Afo Emekeme Ndinyene “Esịt Lion”

BIBLE ndusụk ini esida lion etịn̄ ikọ nte idiọn̄ọ uko ye mbuọtidem. Ẹsitịn̄ ẹban̄a irenowo ẹnyenede odudu m̀mê uko nte ẹnyenede “esịt lion,” ẹnyụn̄ ẹtịn̄ ẹban̄a nti owo nte ‘ẹdahade uko nte lion.’ (2 Samuel 17:10; Mme N̄ke 28:1) Akpan akpan ke ini osobode n̄kpọ-ata, lion esiwụt ete ke imodot etop oro imọ inyenede nte “ọkpọsọn̄ ke otu mme unam.”—Mme N̄ke 30:30.

Jehovah Abasi emen iwụk oro enye enyenede ndinyan̄a ikọt esie odomo ye uko lion. Isaiah 31:4, 5 ọdọhọ ete: “Kpa nte lion ye abak lion ẹkụnide ẹban̄a unam mmọ, ẹmi mmọ ẹkotde otu mme ekpeme-ufene ẹte ẹdiwot enye, edi uyom mmọ inamke enye ndịk, iwok mmọ inyụn̄ inamke esịt akpa enye; kpasụk ntre ke Jehovah mme udịm edisụhọde an̄wana ekọn̄ ke akamba obot Zion . . . Ofụk onyụn̄ anyan̄a; ebe, onyụn̄ anam ọbọhọ.” Jehovah ke ntem ọnọ mme asan̄autom esie nsọn̄ọ aban̄a ọkpọsọn̄ ukpeme esie, akpan akpan ke ini ẹsobode afanikọn̄.

Bible emen n̄kponn̄kan asua ubonowo, Satan kpa Devil, odomo ye lion emi okụnide, emi esitade mme unam. Man ifep ndidi udia esie, ẹsian nnyịn ke N̄wed Abasi ẹte: “Ẹfara ke idem ẹnyụn̄ ẹkpeme.” (1 Peter 5:8) Usụn̄ kiet ndinam emi edi ndifep ndiyet idap ke n̄kan̄ eke spirit oro ekemede ndikama n̄kpa. Kaban̄a emi Jesus ọkọdọhọ ete: “Ẹkpeme idem mbufo, mbak uyụhọ udia ye mmịn ye ekikere uwem emi edinam esịt mbufo odobi.” (Luke 21:34-36) Ih, ndidu ke edidemede ke n̄kan̄ eke spirit ke “ukperedem ini” ẹmi ekeme ndinọ nnyịn “esịt lion,” kiet oro ‘enyenede iwụk, ọbuọtde idem ye Jehovah.’—2 Timothy 3:1; Psalm 112:7, 8.