“Mme Ọfiọkn̄kpọ Owo Ita”—Mmanie ke Mmọ Ẹkedi?
Mme ndise emana Jesus ẹsiwak ndiwụt iren ita oro ẹsịnede nduọ nduọ ọfọn̄ ẹnyụn̄ ẹwatde ke camel ẹdi ẹdisịm ufọk ufene emi nsek Jesus anade ke usịnudia ufene. Ẹsiwak ndikot isenowo oro ẹsịnede ndiye ọfọn̄ mi mme ọfiọkn̄kpọ owo ita. Nso ke Bible etịn̄ aban̄a mmọ?
Nte Bible ọdọhọde, inua-okot mme ọfiọkn̄kpọ owo emi ẹketo “ke edem usiaha-utịn,” do ke mmọ ẹkenyụn̄ ẹkop ẹban̄a emana Jesus. (Matthew 2:1, 2, 9) Anaedi ama ada mme owo emi anyan ini ndinam isan̄ n̄kesịm Judea. Ke ini mmọ ke akpatre ẹkedide ẹdikụt Jesus, enye ikedịghe aba obufa nsekeyen emi amanade ke ufọk ufene. Utu ke oro, mme owo oro ẹkekụt Mary ye “ekpri eyen” oro ẹdụn̄de ke ufọk.—Matthew 2:11, NW.
Bible okot mme owo emi “mme asiak ntantaọfiọn̄,” (NW) inyụn̄ itin̄ke m̀mê owo ifan̄ ke mmọ ẹkedi. The Oxford Companion to the Bible anam an̄wan̄a ete: “Ẹkụt ebuana oro odude ke ufọt mfọni ye edisiak ntantaọfiọn̄ ke ọkpọsọn̄ udọn̄ emi isenowo oro ẹkenyenede nditiene ntantaọfiọn̄ oro akadade mmọ usụn̄ ekesịm Bethlehem.” Nte an̄wan̄ade, Bible obiom kpukpru orụk mfọni ye edinam Babylon eke edidomo ndibọ ntọt nto ntantafiọn̄, ikpe.—Deuteronomy 18:10-12; Isaiah 47:13.
Ntọt oro mme owo emi ẹkebọde ikadaha ufọn ndomokiet idi. Enye ama edemede ufụp ye iyatesịt ke esịt idiọk Edidem Herod. Nte utịp, emi ama osụn̄ọ ke Joseph, Mary, ye Jesus ndifehe n̄ka Egypt ye ke ndiwot kpukpru nditọiren ke Bethlehem “ọtọn̄ọde ke nditọ isua iba tutu esịm nsek nditọ.” Herod ama enen̄ede ọfiọk ini emana Jesus oto se enye okokopde oto mme asiak ntantaọfiọn̄ oro. (Matthew 2:16) Ke ikerede iban̄a kpukpru mme afanikọn̄ oro ẹketode mmọ ndika n̄kese, owụt ifiọk ndibiere nte ke ntantaọfiọn̄ oro mmọ ẹkekụtde ye etop aban̄ade “Enye emi akamanade nte Edidem mme Jew” okoto asua Abasi, Satan kpa Devil, oro okoyomde ndiwot Jesus.—Matthew 2:1, 2.