Jesus itoroke-toro se akama-ukpọhọde emi akanamde, enye inyụn̄ idọhọke owo anam n̄kari ye mbon oro enye adade anam mbubehe. Nso ndien ke ikọ esie ọwọrọ? Enye ọdọhọ mme mbet esie ete: “Ẹda inyene ukwan̄ido ẹkọ mme ufan ẹnịm ẹnọ idem mbufo, man, ke ini emi mîdụhe aba, mmọ ẹkpeda mbufo ẹdụk ke nsinsi ebietidụn̄.” (Luke 16:9) Ana ikpep ndibem iso nda n̄kụt n̄kpọ nnyụn̄ nda ọniọn̄ mben̄e idem nnọ se iditịbede ke ini iso. Ana ikọt Abasi emi ẹdide “nditọ un̄wana” ẹdiọn̄ọ nte mmọ ẹdade inyene mmọ ẹnam n̄kpọ man an̄wam mmọ ẹdụk Obio Ubọn̄ Abasi.

Jehovah Abasi ye Eyen esie ikpọn̄ ẹkeme ndida owo ndụk Obio Ubọn̄ Abasi ke heaven m̀mê Paradise isọn̄. Ọfọn ida se inyenede isịn idem inam n̄kpọ Abasi man idi ufan Jehovah ye Jesus. Edieke inamde ntre, iyenyene nsinsi uwem ke ini emi gold, silver, m̀mê se ededi emi mme owo ẹnyenede mîdinyeneke ufọn, mîdinyụn̄ ikemeke ndinyan̄a mme andinyene mmọ.

Jesus anam mbet esie ẹdiọn̄ọ ke ekese n̄kpọ ayatak mmọ mbemiso ẹyakde mmọ ‘ẹdụk nsinsi ebietidụn̄.’ Owo ikemeke ndidi ata asan̄autom Abasi onyụn̄ odụk ufụn ọnọ inyene emi mîdikemeke ndinyan̄a enye. Ke akpatre, Jesus ọdọhọ mmọ ete: “Baba eyenufọk kiet ikemeke ndidi ofụn nnọ eteufọk iba; koro, enye ayasua kiet onyụn̄ ama eken, mîdịghe enye ayadiana ye kiet onyụn̄ esịn enye eken ke ndek. Mbufo ikemeke ndidi ifịn nnọ Abasi ye Inyene.”—Luke 16:9, 13.