Tịm Kpeme Se Afo Ekpepde Owo
“Tịm kpeme idem fo, ye se afo ekpepde owo. Yịre ke edinam utom emi; koro ke edinam ntem afo ayanyan̄a idem fo ye mmọ ẹmi ẹkopde uyo fo.”—1 TIMOTHY 4:16.
1, 2. Ntak emi ẹyomde mme ifịk ifịk andikpep usọp usọp mfịn?
“ẸKA ẹkenam kpukpru mme idụt ẹdi mbet Mi, . . . ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Ke ikerede iban̄a ewụhọ Jesus Christ emi, kpukpru Christian ẹkpenyene ndidomo ndikabade ndi mme andikpep. Ẹyom mme ifịk ifịk andikpep man ẹn̄wam mbon esịt akpanikọ ẹnyene ifiọk Abasi mbemiso ini okụrede. (Rome 13:11) Apostle Paul akakpak ete: “Kwọrọ ikọ Abasi; sịn ifịk nam emi, ke edide ekem ini ye ke mînyụn̄ idịghe ekem ini.” (2 Timothy 4:2) Emi oyom ẹnọ ukpep ke esịt esop ye ke an̄wa. Ke akpanikọ, utom ukwọrọikọ ke idemesie esịne se ikande ikpîkpu editọt etop Abasi. Oyom ukpep oro enyenede uforo edieke anade mbon oro ẹnyenede udọn̄ ẹkabade ẹdi mme mbet.
2 Nnyịn idu uwem ke “ndiọkeyo.” (2 Timothy 3:1) Ẹnyịk mme owo ndinịm ukpepn̄kpọ akwaifiọk ye mme nsunsu ukpepn̄kpọ ererimbot. ‘Enyịn esịt ekịm’ ediwak owo, ‘esịt mmọ onyụn̄ odoro ufiọn.’ (Ephesus 4:18, 19) Ndusụk owo ẹkop ọkpọsọn̄ ubiak unan eke ntụk. Ih, mme owo ẹnen̄ede ‘ẹsuana, nte erọn̄ eke mînyeneke andikpeme.’ (Matthew 9:36) Edi, ebede ke ndida usọ unọ ukpep, nnyịn imekeme ndin̄wam mbon esịt akpanikọ ndinam mme ukpụhọde oro oyomde.
Mme Andikpep ke Esịt Esop
3. (a) Nso isịne ke ewụhọ Jesus ndinọ ukpep? (b) Mmanie ẹnyene akpan mbiomo edinọ ukpep ke esịt esop?
3 Ebede ke ndutịm ukpepn̄kpọ Bible, ediwak miliọn owo ke ẹbọ ọkpọkpọ ukpep. Nte ededi, ke mmọ ẹma ẹkena baptism, mbufa owo ẹyom n̄kaiso un̄wam man “ẹmụm n̄kam ẹnyụn̄ ẹsọn̄ọ ẹwụhọ.” (Ephesus 3:17) Nte nnyịn inamde utom oro Jesus ọkọdọn̄de oro ẹwetde ke Matthew 28:19, 20 inyụn̄ idade mbufa owo iwụt esop Jehovah, mmọ ẹbọ ufọn ẹto ukpep oro ẹnọde ke esịt esop. Nte ekemde ye Ephesus 4:11-13, ẹmek irenowo man ẹnam utom “nte mme andikpeme ye mme anditeme; man oto do ẹnam ikọt Abasi ẹfọn ẹma, ẹnyụn̄ ẹnam utom Abasi okụt unen, ẹnyụn̄ ẹnam Idem Christ ọkọri.” Ndusụk ini, usọ unọ ukpep mmọ esịne ‘ediwụt mme owo ndudue mmọ, nsua nnọ mmọ, n̄kpe ye mmọ, nsan̄a ye ofụri ime.’ (2 Timothy 4:2) Utom mme andikpep ekedi ata akpan n̄kpọ tutu, ke ndiwet n̄wed nnọ ẹsọk mbon Corinth, Paul asiak mme anditeme ke ndondo oro ama akasiak mme apostle ye mme asiak uduak Abasi.—1 Corinth 12:28.
4. Didie ke ukeme unọ ukpep an̄wam nnyịn ndinam item Paul oro ẹwetde ke Mme Hebrew 10:24, 25?
4 Edi akpanikọ, idịghe kpukpru Christian ẹnam utom nte mbiowo, m̀mê mme esenyịn. Kpa ye oro, ẹsịn udọn̄ ẹnọ kpukpru owo ndidemede kiet eken nnọ “ima ye nti utom.” (Mme Hebrew 10:24, 25) Ndinam ntre ke mme mbono esop abuana mme ibọrọ ofụri esịt oro ẹketịmde idem edifọn edifọn oro ẹkemede ndibọp nnyụn̄ nsịn udọn̄ nnọ mbon en̄wen. Mme asuanetop Obio Ubọn̄ oro ẹnyenede mbufiọk ẹkeme n̄ko ‘ndidemede nnọ nti utom’ ebe ke ndibuana ifiọk ye mme ifiọkutom mmọ ye mbufa owo ke ini ẹnamde utom ye mmọ ke an̄wautom. Ke mme utọ ini oro ye ke mme idaha oro owo mîketịmke-tịm idem, ẹkeme ndinọ eti ukpep. Ke uwụtn̄kpọ, ẹteme iban oro ẹkọride ẹsịm ọyọhọ idaha ẹte ‘ẹdi mme ọnọ nti item.’—Titus 2:3.
Ẹkpek Man Ẹnịm ke Akpanikọ
5, 6. (a) Didie ke ata Ido Ukpono Christ okpụhọde ye nsunsu utuakibuot? (b) Didie ke mbiowo ẹsin̄wam mbufa owo ndinam mme ubiere oro ẹwụtde eti ibuot?
5 Ata Ido Ukpono Christ ke ntem edi ata isio ye mme nsunsu ido ukpono, ediwak ke otu ẹmi ẹyomde ndikara ekikere mme andibuana ke mmọ. Ke ini Jesus okodude ke isọn̄, mme adaiso ido ukpono ẹma ẹyom ndikara ke ekperede ndidi kpukpru ikpehe ke uwem mme owo ebe ke mme ufịk ufịk item owo. (Luke 11:46) Mme ọkwọrọ ederi Christendom ẹsiwak ndinam kpasụk ntre.
6 Nte ededi, utuakibuot akpanikọ edi “edisana utom” oro nnyịn idade “ukeme ukere n̄kpọ” nnyịn inam. (Rome 12:1, NW) ‘Ẹkpekpek’ mme asan̄autom Jehovah ‘man ẹnịm ke akpanikọ.’ (2 Timothy 3:14, NW) Ndusụk ini, ekeme ndiyom mbon oro ẹdade usụn̄ ẹsion̄o ndusụk ndausụn̄ ye mme usụn̄ unam n̄kpọ ẹdi man esop asan̄a nte ọfọnde. Nte ededi, utu ke ndiyom ndinam mme ubiere nnọ mme ekemmọ Christian, mbiowo ẹkpep mmọ “ndidiọn̄ọ se ifọnde ye se idiọkde.” (Mme Hebrew 5:14) Mbiowo ẹnam emi akpan akpan ebe ke ndibọk esop “ke ikọ mbuọtidem ye eti ukpep-n̄kpọ.”—1 Timothy 4:6.
Nditịm N̄kpeme Se Afo Ekpepde Owo
7, 8. (a) Didie ke mme owo oro ẹnyenede ukeuke ukeme ẹkeme ndinam utom nte mme andikpep? (b) Nso iwụt nte ke oyom ọkpọkpọ ukeme man owo akabade edi andikpep oro enyenede uforo?
7 Nte ededi, ẹyak nnyịn ifiak ika ibịne utom kpukpru nnyịn ndinọ ukpep. Ndi oyom mme akpan usọ, ifiọkn̄wed, m̀mê mme ukeme ekededi man ibuana ke utom emi? Inen̄ekede idi ntre. Ke ediwak idaha, mme usụhọde owo oro ẹnyenede esisịt ukeme ẹnam utom unọ ukpep eke ofụri ererimbot emi. (1 Corinth 1:26-29) Paul anam an̄wan̄a ete: “Nnyịn ikama ọsọn̄-urua n̄kpọ [utom ukwọrọikọ] emi ke aban̄ mbat [mme anana-mfọnmma idem], man akwa ubom odudu esie okpoto Abasi, itoho nnyịn.” (2 Corinth 4:7) Akwa unen oro utom edikwọrọ Obio Ubọn̄ ke ofụri ererimbot enyenede edi n̄kpọ ntiense ndisọn̄ọ odudu spirit Jehovah!
8 Kpa ye oro, oyom ọkpọkpọ ukeme ofụri esịt man owo akabade edi “anam-utom eke mînyeneke ntak ndikop bụt, edi [etịmde asiak] ikọ akpanikọ.” (2 Timothy 2:15) Paul eketeme Timothy ete: “Tịm kpeme idem fo, ye se afo ekpepde owo. Yịre ke edinam utom emi; koro ke edinam ntem afo ayanyan̄a idem fo ye mmọ ẹmi ẹkopde uyo fo.” (1 Timothy 4:16) Edi didie ke owo etịm ekpeme se enye ekpepde owo, edide ke esịt esop m̀mê ke an̄wa? Ndi ndinam ntre oyom owo enyene ndusụk usọ m̀mê usụn̄ unọ ukpep?
9. Nso inen̄ede idi akpan n̄kpọ ikan mme ndammana ukeme?
9 Ke akpanikọ, Jesus ama ada mme n̄wọrọnda usụn̄ unọ ukpep ke ọwọrọetop Ukwọrọikọ esie oro ke Obot. Ke enye ama eketịn̄ ikọ ama, “n̄kpaidem omụm ediwak owo oro aban̄a ukpepn̄kpọ Esie.” (Matthew 7:28) Edi akpanikọ, owo nnyịn ndomokiet ikemeke ndinọ ukpep ọfọn nte Jesus ọkọnọde. Nte ededi, iyomke nnyịn idi mme udọn-udọn etịn̄ikọ man idi mme andikpep oro ẹnyenede uforo. Kamse, nte ekemde ye Job 12:7, idem “unam” ye “inuen enyọn̄” ẹkeme ndikpep owo n̄kpọ ke ndopuyo! Ke adianade ye mme ndammana ukeme m̀mê mme usọ ekededi oro nnyịn ikemede ndinyene, se idide akpan n̄kpọ ikan edi “orụk owo” ẹmi nnyịn idide—mme orụk edu oro nnyịn inyenede ye mme orụk ido eke spirit oro nnyịn ikọride ẹmi nditọ ukpepn̄kpọ ẹkemede ndikpebe.—2 Peter 3:11; Luke 6:40.
Nditọ Ukpepn̄kpọ Ikọ Abasi
10. Didie ke Jesus ekenịm uwụtn̄kpọ nte eyen ukpepn̄kpọ Ikọ Abasi?
10 Ana enyene-uforo andikpep akpanikọ N̄wed Abasi edi eyen ukpepn̄kpọ Ikọ Abasi. (Rome 2:21) Jesus Christ ama enịm n̄wọrọnda uwụtn̄kpọ ke afan̄ emi. Ke ini utom ukwọrọikọ esie, Jesus ama etịn̄ otụk mîdịghe etịn̄ mme ekikere oro ẹdide ukem ye mme ubak udịmikọ ke n̄kpọ nte mbahade iba ke N̄wed Abasi Usem Hebrew.a Enye ndimehe ye Ikọ Abasi ama ana in̄wan̄în̄wan̄ ke ini enye ekedide isua 12, ke ini ẹkekụtde enye “nte etiede ke ufọt mme andikpep, akpan̄ utọn̄ okop se mmọ ẹtịn̄de, onyụn̄ obụp mmọ mbụme.” (Luke 2:46) Nte akwa owo, ekedi ido Jesus ndisika synagogue, emi ẹkesikotde Ikọ Abasi.—Luke 4:16.
11. Nti ukpepn̄kpọ ewe ke andikpep ọkpọkọri?
11 Nte afo edi ifịk ifịk andikot Ikọ Abasi? Ndinam ndụn̄ọde ke enye edi usụn̄ emi “afo [editịmde] ọfiọk uten̄e Jehovah, onyụn̄ esịme ifiọk Abasi.” (Mme N̄ke 2:4, 5) Ntre fori nti edu ukpepn̄kpọ. Domo ndikot itie kiet ke Ikọ Abasi kpukpru usen. (Psalm 1:2) Nam edi ido fo ndikot nsiondi Enyọn̄-Ukpeme ye Awake! kiet kiet ke ndondo oro ọbọde. Tịm nọ n̄kpan̄utọn̄ ke mme mbono esop. Kpep nditịn̄ enyịn nnam ndụn̄ọde. Ebede ke ndikpep ‘nditịm ntiene nde kpukpru n̄kpọ,’ afo emekeme ndifep nditịn̄ mme n̄kpọ mbe ubọk ye mme ndudue ke ini afo ekpepde owo n̄kpọ.—Luke 1:3.
Ima ye Ukpono Ẹnyenede ẹnọ Mbon Oro Ẹbọde Ukpep
12. Nso ikedi edu Jesus kaban̄a mme mbet esie?
12 Akpan edu en̄wen edi nnennen edu oro enyenede aban̄a mbon oro afo ọnọde ukpep. Mme Pharisee ẹkese mbon oro ẹkekpan̄de utọn̄ ẹnọ Jesus ke usụhọde. Mmọ ẹkedọhọ ẹte: “Ama edi otu owo eke mîfiọkke ibet, mmọ ẹdi mbukpo owo.” (John 7:49) Edi Jesus ama enyene ntotụn̄ọ ukpono ye ima ọnọ mme mbet esie. Enye ọkọdọhọ ete: “N̄kotke aba mbufo mme asan̄autom, koro asan̄autom mîfiọkke se ete-ufọk esie anamde; edi n̄kot mbufo mme ufan, koro mma mmen kpukpru se n̄kokopde ke inua Ete Mi nyarade nnọ mbufo.” (John 15:15) Emi ama owụt nte mme mbet Jesus ẹkpenamde utom unọ ukpep mmọ.
13. Eketie Paul didie ke idem aban̄a mbon oro enye ọkọnọde ukpep?
13 Ke uwụtn̄kpọ, Paul ikenyeneke mbịtmbịt itie ebuana ebietde eke unam mbubehe ye nditọ ukpepn̄kpọ esie. Enye akasian mbon Corinth ete: “Mbufo ẹkpenyenyene mme andikpep thousand duop ke Christ, mbufo inyeneke ediwak ete; koro edi ami n̄kada gospel mbon mbufo ke Christ Jesus.” (1 Corinth 4:15) Ndusụk ini, mmọn̄eyet ama esikam asiaha Paul ke ini enye eketemede mbon oro enye ọnọde ukpep! (Utom 20:31) Enye ama owụt n̄wọrọnda ime ye mfọnido n̄ko. Ke ntre enye ama ekeme ndisian mbon Thessalonica ete: “Nnyịn iketie sụn̄-sụn̄ ke otu mbufo, nte emi eka ọbọkde nditọ esie mmọ.”—1 Thessalonica 2:7.
14. Ntak emi edinyene ọkpọkpọ udọn̄ ke idem nditọ ukpepn̄kpọ Bible nnyịn edide akpan n̄kpọ ntre? Nam an̄wan̄a.
14 Nte afo emekpebe Jesus ye Paul? Ata ima oro inyenede inọ nditọ ukpepn̄kpọ ekeme ndikan mme ndammana unana ukeme ekededi oro nnyịn ikemede ndinyene. Ndi nditọ ukpepn̄kpọ Bible nnyịn ẹkụt ke nnyịn imenyene ọkpọkpọ udọn̄ ofụri esịt ke idem mmọ? Ndi nnyịn imada ini itịm idiọn̄ọ mmọ? Ke ini Christian an̄wan kiet ekenyenede mfịna ndin̄wam eyen ukpepn̄kpọ anam n̄kọri eke spirit, enye ke mfọnido ama obụp ete: “Ndi enyene se ifịnade fi?” N̄wan oro ama ọtọn̄ọ ndin̄wan̄a esịt esie, obụkde ekese mfịna ye editịmede esịt. Ima ima nneme oro ama akabade edi ini ukpụhọde ọnọ n̄wan oro. Ke mme utọ idaha oro mme ekikere N̄wed Abasi ye mme ikọ ndọn̄esịt ye nsịnudọn̄ ẹdi se idotde. (Rome 15:4) Nte ededi, emi edi ikọ item: Eyen ukpepn̄kpọ Bible ekeme ndinam n̄kọri usọp usọp edi ekeme ndisụk nnyene ndusụk usụn̄ unam n̄kpọ ndikan oro mîdịghe eke Christian. Ntre ikpowụtke eti ibuot ndikpere owo oro idem nte mîdotke ke n̄kan̄ edinam n̄kaowo. Ẹkpenyene ndinam n̄kpọ ntre ke mme idaha oro ẹdotde ye mme Christian.—1 Corinth 15:33.
15. Didie ke nnyịn ikeme ndiwụt ukpono nnọ nditọ ukpepn̄kpọ Bible nnyịn?
15 Ukpono inyenede inọ nditọ ukpepn̄kpọ nnyịn esịne nnyịn nditre ndidomo ndikara ọkpọkpọ uwem mmọ. (1 Thessalonica 4:11) Ke uwụtn̄kpọ, ekeme ndidi nnyịn ke ikpep n̄kpọ ye n̄wan emi odụn̄de ye erenowo nte ndantie. Ekeme ndidi mmọ ẹma ẹnyene nditọ. Ke ama ekedi edinyene nnennen ifiọk Abasi, n̄wan emi oyom ndinen̄ede mme n̄kpọ man ada ekekem ye mme idaha Jehovah. (Mme Hebrew 13:4) Ndi enye ọkpọdọdọ eren oro m̀mê akpadadian̄ade ọkpọn̄ enye? Eyedi nnyịn imenen̄ede ikere ke ndidọ eren emi enyenede esisịt udọn̄ m̀mê mînyeneke-nyene ke mme n̄kpọ eke spirit ayakpan n̄kọri eke spirit esie ke ini iso. Ke n̄kan̄ eken, nnyịn imekeme ndikere mban̄a mfọnọn̄kpọ nditọ esie inyụn̄ ikere ke eyetịm ọfọn enye ndidọ eren oro. Ke idaha ekededi, edi unana ediwụt ukpono ye unana ima ndinọhọ ke uwem eyen ukpepn̄kpọ nnyụn̄ ndomo ndinyịk ẹnam mme ekikere nnyịn ke mme utọ n̄kpọ oro. Idem n̄kpọ, enye edi owo emi ediyọde mme utịp ubiere oro. Do, nte ikpetịmke ifọn ndinọ utọ eyen ukpepn̄kpọ oro ukpep ndida “ifiọk” esiemmọ mbiere se enye akpanamde ke idemesie?—Mme Hebrew 5:14.
16. Didie ke mbiowo ẹkeme ndiwụt ima ye ukpono nnọ otuerọn̄ Abasi?
16 Edi ata akpan n̄kpọ mbiowo esop ndinam n̄kpọ ye otuerọn̄ ke ima ye ukpono. Ke ewetde n̄wed ọnọ ẹsọk Philemon, Paul ọkọdọhọ ete: “Mmọdo okposụk edi nte nnyenede ọyọhọ uko ke Christ ndidọhọ fi anam se idotde, edi ke ntak ima mmakam n̄kabade n̄kpe ye afo.” (Philemon 8, 9) Ndusụk ini, mme idaha oro ẹkamade edikpu ẹkeme ndidemede ke esop. Ekeme ndiyom ẹnyene iwụk. Paul eketeme Titus ete ‘asua ọnọ [mbon oro ẹnamde idiọkn̄kpọ] ọkpọsọn̄, man mmọ ẹsọn̄ọ idem ke ikọ mbuọtidem.’ (Titus 1:13) Kpa ye oro, ana mme esenyịn ẹkpeme idem mbak ẹditịn̄ n̄kpọ oro mîwụtke mfọnido ye esop. “Owo Ọbọn̄ inyeneke ndidi owo utọk,” ntem ke Paul ekewet, “enye enyene ndinyene sụn̄-sụn̄ ido ye kpukpru owo; enye enyene ndifiọk nditeme owo, nnyụn̄ mme ime ke ini ẹnamde enye idiọk.”—2 Timothy 2:24; Psalm 141:3.
17. Nso ndudue ke Moses akanam, ndien nso ke mbiowo ẹkeme ndikpep nto enye?
17 Ana mme esenyịn ẹka iso ẹti idemmọ nte ke mmimọ inam n̄kpọ ye “udịm-erọn̄ Abasi.” (1 Peter 5:2, sịghisịghi ubọkn̄wed edi eke nnyịn.) Okposụkedi Moses okosụhọrede idem, enye ama efre ekikere emi ke ibio ini. Nditọ Israel ẹma “[ẹyat] enye esịt, ndien enye ọsọp inua ọdọhọ ikọ.” (Psalm 106:33) Abasi ama enen̄ede ayat esịt aban̄a edinam n̄kpọ ke idiọk usụn̄ emi ye otuerọn̄ Esie, idem okposụkedi mmọ mîkananake nduduọhọ. (Numbers 20:2-12) Ke ini ẹsobode mme utọ n̄kpọ-ata oro mfịn, mbiowo ẹkpenyene ndidomo ndikpep nnyụn̄ nda ikike ye mfọnido nnọ item. Nditọete nnyịn ẹsinam n̄kpọ ke mfọnn̄kan usụn̄ ke ini ẹnamde n̄kpọ ye mmọ ke edikere mban̄a ye nte mme owo ẹmi ẹyomde un̄wam, idịghe nte mme anamidiọk ẹmi owo mîkemeke ndinen̄ede. Oyom mbiowo ẹsọn̄ọ ẹnyene eti ekikere oro Paul ekenyenede ke ini enye ọkọdọhọde ete: “Nnyịn imonyụn̄ inyene ọyọhọ mbuọtidem ke Ọbọn̄ iban̄a mbufo, ite mbufo ke ẹnanam se nnyịn itemede, ẹyenyụn̄ ẹnam.”—2 Thessalonica 3:4.
Ndinam N̄kpọ Mban̄a Mme Udọn̄ Mmọ
18, 19. (a) Didie ke nnyịn ikpanam n̄kpọ iban̄a mme udọn̄ nditọ ukpepn̄kpọ Bible ẹmi ẹnyenede esisịt ukeme? (b) Didie ke nnyịn ikeme ndin̄wam nditọ ukpepn̄kpọ ẹmi ẹnyenede mfịna ndidiọn̄ọ mme akpan n̄kpọ?
18 Andikpep oro okụtde unen eyenyịme ndikpụhọde nda ekekem ye mme ukeme ye mme unana ukeme nditọ ukpepn̄kpọ esie. (Men John 16:12 domo.) Ke n̄ke Jesus aban̄ade talent, eteufọk ọkọnọ “owo kiet kiet” mme ifetutom “nte ukeme esie edide.” (Matthew 25:15) Nnyịn imekeme nditiene ukem uwụtn̄kpọ oro ke ini nnyịn inịmde mme ukpepn̄kpọ Bible. Nte ido edide, ẹkpema ndikụre n̄wed ọkọn̄ọde ke Bible ke esisịt ini. Nte ededi, ana ẹnyịme nte ke idịghe kpukpru owo ẹnyene nti ukeme ukotn̄wed m̀mê ukeme ndisọp ndiọn̄ọ mbufa n̄kpọ. Ke ntre, oyom mbufiọk kaban̄a ini emi ẹkpekpọn̄de akpan n̄kpọ kiet ẹka efen ke ukpepn̄kpọ edieke n̄kpọ mîsọpke in̄wan̄a mme owo ẹmi ẹmade ukpepn̄kpọ. Ndin̄wam nditọ ukpepn̄kpọ ẹfiọk se mmọ ẹkpepde enen̄ede edi akpan n̄kpọ akan ndikụre n̄wed ke ini oro ẹnịmde-nịm.—Matthew 13:51.
19 Ẹkeme nditịn̄ ukem oro mban̄a nditọ ukpepn̄kpọ Bible ẹmi ẹnyenede mfịna ndidiọn̄ọ mme akpan n̄kpọ, utọ nte Abasi-Ita-ke-Kiet m̀mê mme usen nduọkodudu ido ukpono. Ke adan̄aemi ke ofụri ofụri mîyomke ẹsịn mme ndụn̄ọde Bible oro inamde ke mme ukpepn̄kpọ nnyịn, nnyịn imekeme ndinam ntre ke ini ke ini edieke emi edinen̄ede inyene ufọn. Ẹkpenyene ndida eti ubiere nnam n̄kpọ mbak ẹdibiọn̄ọ n̄kọri eyen ukpepn̄kpọ nte mîdotke.
Nyene Ifiopesịt!
20. Didie ke Paul ekenịm uwụtn̄kpọ ke ndiwụt ifiopesịt ye uko ke unọ ukpep esie?
20 Paul ọkọdọhọ ete: “Ẹnyene ifiopesịt ke spirit.” (Rome 12:11) Ih, edide nnyịn inịm ukpepn̄kpọ Bible m̀mê ibuana ke ndinam n̄kpọ ke mbono esop, nnyịn ikpenyene ndinam ntre ye ifịk ye ifiopesịt. Paul ọkọdọhọ mbon Thessalonica ete: “Gospel nnyịn ikedịghe ke ọtọ mbufo nte ikọ ikpọn̄, edi ekedi ke odudu, ye ke Edisana Spirit, ye ke mbụre edikan.” (1 Thessalonica 1:4, 5) Ke ntem Paul ye mme nsan̄a esie ikọnọhọ ‘gospel Abasi ikpọn̄, edi ẹnyụn̄ ẹyak ukpọn̄ mmọ nde ẹnọ.’—1 Thessalonica 2:8.
21. Didie ke nnyịn ikeme ndika iso nnyene edu ifiopesịt ke mme utom unọ ukpep nnyịn?
21 Ata ifiopesịt oto editịm nnịm nte ke oyom nditọ ukpepn̄kpọ Bible nnyịn ẹkop se nnyịn inyenede nditịn̄. Ẹyak nnyịn ikûdede ida utom unọ ukpep ekededi nte eto eto edinam. Ewetn̄wed oro Ezra ama etịm ekpeme se enye ekekpepde owo ke afan̄ emi. Enye “[okowụk] esịt esie ndidụn̄ọde n̄wed ibet Jehovah, nnyụn̄ nnam, nnyụn̄ nteme ewụhọ ye ikpe ke Israel.” (Ezra 7:10) Nnyịn ikpenyene ndinam kpasụk ntre ebe ke nditịm idem edifọn edifọn nnyụn̄ n̄kere nte n̄kpọ oro edide akpan n̄kpọ. Ẹyak nnyịn ibọn̄ akam iben̄e Jehovah ọnọ nnyịn mbuọtidem ye uko. (Luke 17:5) Ifiopesịt nnyịn ekeme ndinam nditọ ukpepn̄kpọ Bible ẹkọri ata ima ẹnọ akpanikọ. Nte ededi, nditịm n̄kpeme se nnyịn ikpepde owo ekeme ndibuana ndida mme akpan usụn̄ unọ ukpep. Ibuotikọ nnyịn en̄wen eyeneme ndusụk ke otu ẹmi.
[Ikọ idakisọn̄]
a Se Insight on the Scriptures, Eboho 2, page 1071, emi Watchtower Bible and Tract Society of New York, Inc., osiode.
Nte Afo Emeti?
◻ Ntak emi ẹyomde mme Christian andikpep ẹmi ẹnyenede usọ mfịn?
◻ Nti ido ukpepn̄kpọ ewe ke nnyịn ikeme ndikọri?
◻ Ntak emi ima ye ukpono inyenede inọ mbon ẹmi nnyịn inọde ukpep ẹdide akpan n̄kpọ ntre?
◻ Didie ke nnyịn ikeme ndinam n̄kpọ mban̄a mme udọn̄ nditọ ukpepn̄kpọ Bible nnyịn?
◻ Ntak emi ifiopesịt ye uko edide akpan n̄kpọ ke ini inọde mbon en̄wen ukpep?
[Ndise ke page 10]
Nti andikpep ke idemmọ ẹdi nditọ ukpepn̄kpọ Ikọ Abasi
[Ndise ke page 13]
Nyene ọkpọkpọ udọn̄ ke idem nditọ ukpepn̄kpọ Bible