Ẹyak Nnyịn Isọn̄ọ Imụm Ọsọn̄urua Mbuọtidem Nnyịn Ikama!
“[Ọnọ] ẹsọk mmọemi ẹkebọde utọ ọsọn̄urua mbuọtidem eke ebietde eke nnyịn.”—2 PETER 1:1.
1. Nso ke Jesus eketịn̄ ndidụri mme apostle esie utọn̄, edi Peter akanam inua aban̄a nso?
KE MBUBỊTEYO oro mbemiso n̄kpa Jesus, enye ama ọdọhọ ke kpukpru mme apostle esie ẹyekpọn̄ imọ. Kiet ke otu mmọ, Peter, ama anam inua ete: “Kpukpru owo ẹkpeduọn̄ọ kaban̄a Fi, ami ndiduọhọ tutu amama.” (Matthew 26:33, sịghisịghi ubọkn̄wed edi eke nnyịn.) Edi Jesus ama ọfiọk ete ke ididịghe ntre. Ntak edi oro enye akasiande Peter kpa ke ebe oro ete: “N̄kekpe ubọk nnọ fi, nte mbuọtidem okûbọhọ fi: ndien afo n̄ko, ke ini editọn̄ọde ntak akabade, sọn̄ọ nditọete fo idem.”—Luke 22:32.
2. Kpa ye oro Peter ekeberide edem ke idemesie akaha, mme ewe edinam esie ẹkewụt ke mbuọtidem esie ama emem?
2 Peter, emi ekeberide edem ke mbuọtidem esie akaha, ama akan̄ Jesus kpa ke okoneyo oro. Enye ama akan̄ utịm ikata ete ke imọ ikam idiọn̄ọke Christ! (Matthew 26:69-75) Ke enye ‘ama ọkọtọn̄ọ ntak akabade,’ anaedi enye ama etetịm eti mme ikọ Eteufọk esie oro, “sọn̄ọ nditọete fo idem.” Item oro ama otụk nsụhọ ini uwem Peter ntotụn̄ọ ntotụn̄ọ, nte leta iba oro enye ekewetde, emi ẹtịmde ẹnịm ke Bible, owụtde.
Ntak Emi Peter Ekewetde Mme Leta Esie
3. Ntak emi Peter ekewetde akpa leta esie?
3 N̄kpọ nte isua 30 ke Jesus ama akakpa, Peter ama ewet akpa leta esie, ọnọde ẹsọk nditọete esie ke Pontus, Galatia, Cappadocia, Asia, ye Bithynia, mme ikpehe oro ẹnamde edere edere ye n̄kan̄ edem usoputịn Turkey idahaemi. (1 Peter 1:1) Mme Jew, emi ekemede ndidi ndusụk mmọ ẹma ẹkabade ẹdi mme Christian ke Pentecost 33 E.N., nte eyịghe mîdụhe ẹma ẹdu ke otu mbon oro Peter ekewetde n̄wed ọnọ ẹsọk. (Utom 2:1, 7-9) Ediwak ẹkedi mme Gentile ẹmi ẹkesobode ikan̄ ikan̄ ukọbọ ke ubọk mme andibiọn̄ọ. (1 Peter 1:6, 7; 2:12, 19, 20; 3:13-17; 4:12-14) Ntre Peter ekewet n̄wed ọnọ ẹsọk nditọete ẹmi ndisịn udọn̄ nnọ mmọ. Uduak esie ekedi ndin̄wam mmọ ẹbọ “se mbuọtidem [mmọ] osụn̄ọde . . . kpa edinyan̄a ukpọn̄ [mmọ].” Ntem, ke item unyọn̄ esie, enye ama akpak ete: “Ẹsọn̄ọ ẹda ke mbuọtidem ẹn̄wana ye [Devil].”—1 Peter 1:9; 5:8-10.
4. Ntak emi Peter ekewetde udiana leta esie?
4 Ekem, Peter ama ewet udiana leta ọnọ ẹsọk mme Christian ẹmi. (2 Peter 3:1) Ntak-a? Koro n̄kpọndịk oro akakam okponde akan ama odu. Mme oburobụt owo ẹma ẹdomo ndisịn udọn̄ nnọ ndek ndek edu mmọ ke otu mme andinịm ke akpanikọ nnyụn̄ nda ndusụk owo ntụn usụn̄! (2 Peter 2:1-3) Akan oro, Peter ama odụri owo utọn̄ aban̄a mbon nsahi. Enye ama ewet ke akpa leta esie ete ke “utịt kpukpru n̄kpọ ke ekpere,” ndien idahaemi etie nte ndusụk owo ẹma ẹda utọ ekikere oro ẹnam nsahi. (1 Peter 4:7; 2 Peter 3:3, 4) Ẹyak nnyịn idụn̄ọde udiana leta Peter oro inyụn̄ ise nte enye ọkọsọn̄ọde nditọete idem ndisọn̄ọ nda ke mbuọtidem. Ke akpa ibuotikọ emi, nnyịn idineme 2 Peter ibuot 1.
Uduak Ibuot 1
5. Didie ke Peter etịm mme andikot n̄wed esie idem ọnọ edineme mban̄a mme mfịna?
5 Peter isọpke itịn̄ n̄kpọ nnennen iban̄a ikpọ mfịna. Utu ke oro, enye ọdiọn̄ usụn̄ ọnọ edineme mme mfịna ẹmi ebe ke ndikọri esịtekọm mme andikot n̄wed esie nnọ se mmọ ẹkebọde ke ini mmọ ẹkekabarede ẹdi mme Christian. Enye eti mmọ aban̄a mme utịbe utịbe un̄wọn̄ọ Abasi ye nte mme prọfesi Bible ẹdide se ẹkemede ndiberi edem. Enye anam emi ebe ke nditịn̄ mban̄a edikpụhọde mbiet, kpa n̄kukụt emi enye ke idemesie okokụtde aban̄a Christ ke odudu Obio Ubọn̄.—Matthew 17:1-8; 2 Peter 1:3, 4, 11, 16-21.
6, 7. (a) Nso ukpepn̄kpọ ke nnyịn ikeme ndikpep nto ntọn̄ọikọ ke leta Peter? (b) Edieke nnyịn inọde item, nnyịn ndinyịme nso ekeme ndidi n̄kpọ oro an̄wamde ke ndusụk ini?
6 Nte nnyịn imekeme ndikpep n̄kpọ nto ntọn̄ọikọ Peter? Nte item isimemke ikan ndibọ edieke nnyịn ibemde iso idụn̄ọde mme ikpehe utịbe utịbe idotenyịn Obio Ubọn̄ oro nnyịn inyenede ye mme andibọ item? Ndien nso kaban̄a edida ọkpọkpọ ifiọk n̄kpọntịbe? Eyedi, ke Jesus ama akakpa, Peter ama esiwak nditịn̄ mban̄a nte okokụtde n̄kukụt Christ ke odudu Obio Ubọn̄.—Matthew 17:9.
7 Ti, n̄ko, ete ke etịm etie nte ke etisịm ini emi Peter ekewetde udiana leta esie, ẹma ẹsasuan Gospel Matthew ye leta oro apostle Paul ekewetde ọnọ ẹsọk mbon Galatia ntatara ntatara. Ntre eyedi mbon iduọk ini esie ẹma ẹtịm ẹdiọn̄ọ ẹban̄a mme ndudue oro Peter akanamde nte owo ọkọrọ ye mbụk edinam akpanikọ esie. (Matthew 16:21-23; Galatia 2:11-14) Nte ededi, emi ikakpanke enye nditịn̄ ikọ ye uko. Ke akpanikọ, ekeme ndidi emi ama akam anam leta esie etetịm edemede udọn̄ mbon oro ẹkekerede ẹban̄a mme mmeme idemmọ. Ke ntre, ke ini in̄wamde mbon oro ẹnyenede mfịna, nte ikpọfọnke ndinyịme nte ke nnyịn n̄ko imesinam ndudue?—Rome 3:23; Galatia 6:1.
Ekọm Nsịnudọn̄
8. Ke nso usụn̄ifiọk ke enyene ndidi Peter akada ikọ oro “mbuọtidem” etịn̄ ikọ?
8 Idahaemi kere ban̄a ekọm oro Peter ọkọnọde. Enye ọsọsọp otụk ibuot nneme mbuọtidem, okotde mme andikot n̄wed esie “mmọemi ẹkebọde utọ ọsọn̄urua mbuọtidem eke ebietde eke nnyịn.” (2 Peter 1:1) Mi eyedi ikọ oro “mbuọtidem” ọwọrọ “ọkpọsọn̄ mbukpek” ndien etịn̄ aban̄a ofụri edinịm ke akpanikọ m̀mê mme ukpepn̄kpọ Christian, ẹmi ndusụk ini ẹsikotde “akpanikọ” ke N̄wed Abasi. (Galatia 5:7; 2 Peter 2:2; 2 John 1) Ẹwak ndida ikọ oro “mbuọtidem” ke usụn̄ifiọk emi utu ke usụn̄ifiọk oro ẹsiwakde ndida emi aban̄ade ediberi edem m̀mê edinyene mbuọtidem ke idem owo m̀mê n̄kpọ.—Utom 6:7; 2 Corinth 13:5; Galatia 6:10; Ephesus 4:5; Jude 3.
9. Ntak anade edi ekọm oro Peter ọkọnọde ama enen̄ede etie ufiop ufiop ọnọ mme Gentile?
9 Anaedi ekọm oro Peter ọkọnọde ekedi ata ufiop ufiop ọnọ mme andikot n̄wed esie ẹkedide mme Gentile. Mme Jew ikasan̄ake n̄kpọ ye mme Gentile, idem ẹsịnde mmọ ke ndek, ndien usua oro ẹkenyenede ẹban̄a mme Gentile ama aka iso ke otu mme Jew oro ẹkekabarede ẹdi mme Christian. (Luke 10:29-37; John 4:9; Utom 10:28) Kpa ye oro, Peter, owo Jew ke emana ye apostle Jesus Christ, ọkọdọhọ ke mme andikot n̄wed esie—mme Jew ye mme Gentile—ẹkebọ ukem mbuọtidem ebietde eke esie.
10. Nso ukpepn̄kpọ ke nnyịn ikeme ndikpep nto ekọm Peter?
10 Kere ban̄a nti ukpepn̄kpọ oro ekọm Peter ekpepde nnyịn mfịn. Abasi iten̄eke owo enyịn; enye inyeneke uma inọ ekpụk m̀mê idụt kiet ikan eken. (Utom 10:34, 35; 11:1, 17; 15:3-9) Nte Jesus ke idemesie ekekpepde, kpukpru mme Christian ẹdi nditọete, ndien baba owo kiet ke otu nnyịn ikpenyeneke ndikere ke imedi n̄kpọ ikan. N̄ko-n̄ko, ekọm Peter ọsọn̄ọ nte ke nnyịn ke akpanikọ idi otu nditọete ofụri ererimbot, ẹmi ẹnyenede utọ mbuọtidem “ebietde eke” Peter ye mme ekemmọ apostle.—Matthew 23:8; 1 Peter 5:9.
Ifiọk ye Mme Un̄wọn̄ọ Abasi
11. Ke etienede ekọm esie, mme akpan n̄kpọ ewe ke Peter odori nsọn̄uyo?
11 Ke etienede ekọm esie, Peter ewet ete: “[Mfọnido oro owo mîdotke, NW] ye emem akpakam . . . ẹtiene mbufo uwak uwak.” Didie ke mfọnido oro owo mîdotke ye emem ẹtiene nnyịn uwak uwak? Peter ọbọrọ ete: “Oto ke [nnennen ifiọk, NW] Abasi ye eke Jesus Ọbọn̄ nnyịn.” Ekem enye ọdọhọ ete: “Odudu Abasi ama [ọnọ] nnyịn kpukpru n̄kpọ eke ẹsan̄ade ye uwem uten̄e Abasi.” Edi didie ke nnyịn ibọ mme akpan n̄kpọ ẹmi? “Oto ke [nnennen ifiọk, NW] Enyeemi akadade ubọn̄ ye nti ido Esie okot nnyịn.” Ntem Peter ọsọn̄ọ utịm ikaba ete ke nnennen ifiọk Abasi ye eke Eyen esie edi akpan n̄kpọ.—2 Peter 1:2, 3; John 17:3.
12. (a) Ntak emi Peter ọsọn̄ọde etịn̄ nte nnennen ifiọk edide akpan n̄kpọ? (b) Man ibọ mme un̄wọn̄ọ Abasi, nso ke anaedi nnyịn ima inanam?
12 “Abian̄a abian̄a mme anditeme” emi Peter okodụride owo utọn̄ aban̄a ke ibuot 2 ẹda “ikọ abian̄a” ndida mbian̄a mme Christian. Ke usụn̄ emi mmọ ẹdomo nditap mmọ mfiak nsịn ke oburobụt ido oro ẹma ẹkenyan̄a mmọ ẹsio. Utịp odude ọnọ owo ekededi emi ẹma ẹkenyan̄a ebe ke “[nnennen ifiọk, NW] Ọbọn̄ ye Andinyan̄a nnyịn Jesus Christ” ndien ekem afiak ayak idem ọnọ utọ abian̄a oro edi nsobo. (2 Peter 2:1-3, 20) Nte an̄wan̄ade ke odoride enyịn ndineme mfịna emi ke ukperedem, Peter ọsọn̄ọ etịn̄ ke ntọn̄ọ ntọn̄ọ leta esie aban̄a udeme oro nnennen ifiọk enyenede ke ndisọn̄ọ mmụm edisana idaha ye Abasi n̄kama. Peter etịn̄ ete ke Abasi ama “ọnọ nnyịn mme un̄wọn̄ọ eke ẹsọn̄de urua ẹnyụn̄ ẹkponde etieti; man mbufo ẹda mmọ ẹkabade ẹbuana ke uduot Abasi.” Edi, man ibọ mme un̄wọn̄ọ ẹmi, ẹmi ẹdide akpan ikpehe mbuọtidem nnyịn, Peter ọdọhọ, ana nnyịn ibem iso “[ibọhọ] mbiara emi idiọkitọn̄ esịnde ke ererimbot.”—2 Peter 1:4.
13. Mme Christian oro ẹyetde aran ye “mme erọn̄ en̄wen” ẹbiere ndisọn̄ọ mmụm nso n̄kama?
13 Didie ke afo ese mme un̄wọn̄ọ Abasi? Ke usụn̄ nte nsụhọ Christian oro ẹyetde aran ẹsede? Ke 1991, Frederick Franz, etieibuot Watch Tower Bible and Tract Society ini oro, emi ama akanam utom uyọhọ ini ke se ibede isua 75, ama etịn̄ ibio ibio se idide ekikere mbon oro ẹnyenede idotenyịn edikara ye Christ ete: “Nnyịn imọsọn̄ọ ida tutu esịm emi, ndien nnyịn iyọsọn̄ọ ida tutu Abasi enen̄ede anam ‘mme ọsọn̄urua ye ata utịbe utịbe un̄wọn̄ọ’ esie ẹsu.” Brọda Franz ama enyene mbuọtidem ke un̄wọn̄ọ Abasi aban̄ade ediset ke n̄kpa n̄ka heaven, ndien enye ama ọsọn̄ọ omụm mbuọtidem oro akama tutu ke n̄kpa esie ke isua 99 ke emana. (1 Corinth 15:42-44; Philippi 3:13, 14; 2 Timothy 2:10-12) Ukem ntre, ediwak miliọn owo ke ẹsọn̄ọ ẹmụm mbuọtidem oro ẹkama, ẹwụkde enyịn mmọ ke un̄wọn̄ọ Abasi eke paradise isọn̄ emi mme owo ẹdidude uwem ke nsinsi ke inemesịt. Nte afo edi kiet ke otu mmọemi?—Luke 23:43; 2 Peter 3:13; Ediyarade 21:3, 4.
Nam N̄kpọ Ban̄a Mme Un̄wọn̄ọ Abasi
14. Ntak emi Peter asiakde eti ido nte akpa edu oro ẹnyenede ndidian ke mbuọtidem?
14 Nte nnyịn imowụt esịtekọm inọ Abasi iban̄a se enye ọn̄wọn̄ọde? Ke edide ntre, Peter ọdọhọ ete ke ana nnyịn inam enye iwụt. “Ke ntak emi ndien” (koro Abasi ọnọde nnyịn mme ata ọsọn̄urua un̄wọn̄ọ), nnyịn ikpenyene ndisịn ata ukeme ndinam n̄kpọ. Nnyịn ikemeke ndikop uyụhọ ke ikpîkpu edidu ke mbuọtidem m̀mê ikpîkpu edimehe ye akpanikọ Bible. Oro ikemke! Eyedi ke eyo Peter ndusụk owo ke mme esop ẹma ẹtịn̄ ekese ẹban̄a mbuọtidem edi ẹsịn idem ke oburobụt ido. Ama oyom mmọ ẹnyene eti ido uwem, ntre Peter akpak ete: “Ẹdian eti ido ke mbuọtidem mbufo.”—2 Peter 1:5; James 2:14-17.
15. (a) Ntak ẹsiakde ifiọk ẹdian eti ido nte edu emi ẹnyenede ndidian ke mbuọtidem? (b) Mme ewe edu eken ẹdin̄wam nnyịn isọn̄ọ imụm mbuọtidem nnyịn ikama?
15 Ke ama akasiak eti ido, Peter asiak edu itiokiet en̄wen oro anade idian, m̀mê ikọrọ, ke mbuọtidem nnyịn. Nnyịn imoyom mmọemi kiet kiet edieke anade ‘isọn̄ọ ida ke mbuọtidem.’ (1 Corinth 16:13) Sia mbon nsọn̄ibuot ‘ẹkeyụrọrede N̄wed Abasi’ ẹnyụn̄ ẹsuande “abian̄a abian̄a ukpepn̄kpọ” (NW), n̄kpọ efen oro Peter asiakde nte edide akpan n̄kpọ edi ifiọk, ọdọhọde ete: “Ẹdian ifiọk ke eti ido.” Ekem enye aka iso ete: “Ẹdian edifara ke idem ke ifiọk, ye ime ke edifara ke idem, ye uten̄e Abasi ke ime, ye iman ke uten̄e Abasi, ye ima ke iman.”—2 Peter 1:5-7; 2:12, 13; 3:16.
16. Nso iditịbe edieke ẹdiande mme edu oro Peter asiakde ke mbuọtidem, edi nso iditịbe ke owo mîdianke?
16 Nso iditịbe edieke idiande n̄kpọ itiaba ẹmi ke mbuọtidem nnyịn? “Edieke mme n̄kpọ ẹmi ẹdude ke esịt mbufo ọyọhọ ọyọhọ,” Peter ọbọrọ ete, “mmọ ẹyenam mbufo ẹkûtie ifu, ẹkûnyụn̄ ẹnana mfri [kaban̄a nnennen ifiọk, NW] Ọbọn̄ nnyịn Jesus Christ.” (2 Peter 1:8) Ke n̄kan̄ eken, Peter ọdọhọ ete: “Owo eke mînyeneke mme n̄kpọ ẹmi edi nnan, itịmke ikụt usụn̄, onyụn̄ efre ete, ẹma ẹyet imọ n̄kani mme idiọkn̄kpọ ẹfep, ẹnyụn̄ ẹnam imọ isana.” (2 Peter 1:9) Tịm fiọk ete ke Peter okpụhọde ọkpọn̄ enye ndida “mbufo” ye “nnyịn” akabade ada “owo” ye “imọ.” Okposụkedi, ke mfụhọ, ndusụk owo ẹdide nnan, mbon efre, ẹnyụn̄ ẹdehede, Peter ke mfọnido idọhọke ite ke andikot n̄wed esie edi kiet ke otu mmọemi.—2 Peter 2:2.
Ọsọn̄ọ Nditọete Esie Idem
17. Enyene ndidi nso ikonụk Peter ndisịn ima ima eben̄e oro nte yak ẹnam “mme n̄kpọ ẹmi”?
17 Iso-ọfọn ke ọfiọkde ete ke mbufa owo akpan akpan ẹkeme ndidi se ẹbian̄ade mmemmem mmemmem, Peter ke ima esịn udọn̄ ọnọ mmọ ete: “Nditọete, ẹdọdiọn̄ ẹsịn ifịk ẹnam ikot eke ẹkekotde mbufo ye edimek eke ẹmekde mbufo ọsọn̄ọ ada: koro edieke mbufo ẹnamde mme n̄kpọ ẹmi, mbufo idikọmọke iduọ.” (2 Peter 1:10; 2:18) Mme Christian oro ẹyetde aran ẹmi ẹdiande n̄kpọ itiaba ẹmi ke mbuọtidem mmọ ẹyebọ akwa utịp, nte Peter ọdọhọde: “Ntem ke ẹdinọ mbufo ọyọhọ odudu ndibe ndụk ke nsinsi Obio Ubọn̄ Ọbọn̄ ye Andinyan̄a nnyịn Jesus Christ.” (2 Peter 1:11) “Mme erọn̄ en̄wen” ẹyebọ nsinsi udeme ke ikpehe n̄kan̄ isọn̄ eke Obio Ubọn̄ Abasi.—John 10:16; Matthew 25:33, 34.
18. Ntak emi Peter amade “nditi” nditọete esie n̄kpọ “kpukpru ini”?
18 Peter ke esịt akpanikọ oyom nditọete esie ẹbọ utọ akwa utịp oro. “Ke ntak emi,” enye ewet ete, “nduak nditi mbufo n̄kpọ ẹmi kpukpru ini, okposụkedi nte mbufo ẹfiọkde mmọ, ẹnyụn̄ ẹsọn̄ọde ẹda ke akpanikọ.” (2 Peter 1:12) Peter ada ikọ Greek oro ste·riʹzo, oro ẹkabarede mi nte “ẹsọn̄ọde ẹda” edi ẹmi ẹkekabarede nte “sọn̄ọ” ke item oro Jesus ekebemde iso ọnọ Peter ete: “Sọn̄ọ nditọete fo idem.” (Luke 22:32) Edida ikọ oro ekeme ndinọ ekikere nte ke Peter eti okopodudu item oro enye ọkọbọde oto Ọbọn̄ esie. Peter kemi ọdọhọ ete: “Mbat nte enen mi ndidemede mbufo ke editi mbufo n̄kpọ emi, adan̄a ini nte ndodu ke ataya emi [idem eke owo]; sia mfiọkde nte ẹyewara ndifụt ataya mi nnịm n̄kan̄ kiet.”—2 Peter 1:13, 14.
19. Mme un̄wam ewe ke nnyịn iyom mfịn?
19 Okposụkedi Peter ke mfọnido ọdọhọde ke mme andikot n̄wed esie ‘ẹsọn̄ọ ẹda ke akpanikọ,’ enye ọfiọk ete ke mbuọtidem mmọ ekeme ndiwụre. (1 Timothy 1:19) Sia enye ọfiọkde ete ke imọ iyọsọp ikpa, enye ọsọn̄ọ nditọete esie idem ebe ke ndisiak mme n̄kpọ oro mmọ ke ukperedem ẹdikemede nditi man anam mmọ ẹsọn̄ idem ke n̄kan̄ eke spirit. (2 Peter 1:15; 3:12, 13) Ukem ntre, nnyịn mfịn imoyom mme n̄kpọ editi kpukpru ini man isọn̄ọ ida ke mbuọtidem. Inamke n̄kpọ m̀mê nso utọ owo ke nnyịn idi mîdịghe m̀mê adan̄a anyanini didie ke nnyịn idu ke akpanikọ, nnyịn ikemeke ndifụmi edikot Bible kpukpru ini, ukpepn̄kpọ idemowo, ye edidụk mme mbonoesop. Ndusụk owo ẹnyene ntak ndinọ ke nditre ndidụk, ẹdọhọde ẹte ke idem emem mmimọ akaha m̀mê nte ke mme mbonoesop ẹdi n̄kani n̄kpọ oro ẹma ẹkekpekpep m̀mê nte ke owo inịmke enye ke usụn̄ edemerede udọn̄, edi Peter ama ọfiọk nte owo nnyịn ekededi ekemede ndiduọk mbuọtidem usọp usọp edieke nnyịn ibuọtde idem ke idem nnyịn ikaha.—Mark 14:66-72; 1 Corinth 10:12; Mme Hebrew 10:25.
Ọkpọsọn̄ Isọn̄ Mbuọtidem Nnyịn
20, 21. Didie ke edikpụhọde mbiet ọkọsọn̄ọ mbuọtidem Peter ye mme andikot leta esie, esịnede nnyịn mfịn?
20 Nte mbuọtidem nnyịn akam ọkọn̄ọ ke mbụk oro ẹdade mbufiọk ẹtịbi? Peter ọbọrọ ye nsọn̄uyo ete: “Koro nnyịn ikeyịreke ikpîkpu mbụk, eke owo ẹdade mbufiọk ẹtịbi, ke adan̄aemi nnyịn inamde mbufo ẹfiọk odudu ye edidi Ọbọn̄ nnyịn Jesus Christ; edi nnyịn ke idem nnyịn iketie ise ubom Esie.” Peter, James, ye John ẹma ẹdu ye Jesus ke ini mmọ ẹkekụtde n̄kukụt owụtde enye ke odudu Obio Ubọn̄. Peter anam an̄wan̄a ete: “Enye ọkọbọ ukpono ye ubọn̄ ke ubọk Abasi Ete, ke adan̄aemi uyo otode ke akakan ubọn̄ oro esịm Enye ntem, ete, Emi edi Eyen Mi, Eyenima Mi, emi esịt enemde Mi ye Enye: nnyịn ke idem nnyịn ikokop uyo oro, nte otode ke enyọn̄ ọwọrọ, ke ini nnyịn idude ye Enye ke edisana obot oro.”—2 Peter 1:16-18.
21 Ke ini Peter, James, ye John ẹkekụtde n̄kukụt oro, ke akpanikọ Obio Ubọn̄ ama akabade edi ata idem n̄kpọ ọnọ mmọ! “Ndien,” Peter ọdọhọ ete, “ẹma ẹdọdiọn̄ ẹsọn̄ọ ikọ mme prọfet ẹkan ẹnọ nnyịn; ndien mbufo ẹyetịm ẹnam, edieke mbufo ẹdibiọn̄de utọn̄ ke ikọ oro.” Ih, mme andikot leta Peter, esịnede nnyịn mfịn, ẹnyene okopodudu ntak nditịm n̄kpan̄ utọn̄ nnọ mme prọfesi ẹban̄ade Obio Ubọn̄ Abasi. Ke ewe usụn̄ ke oyom nnyịn ibiọn̄ utọn̄? Peter ọbọrọ ete: “Nte owo esese utuenikan̄ ke n̄kịm n̄kịm ebiet, tutu eyo esiere, utịn onyụn̄ asiaha ke esịt mbufo.”—2 Peter 1:19; Daniel 7:13, 14; Isaiah 9:6, 7.
22. (a) Esịt nnyịn enyene ndidu ke edidemede mban̄a nso? (b) Didie ke nnyịn ibiọn̄ utọn̄ ke ikọ mme prọfet?
22 Ke un̄wana ikọ mme prọfet mîdụhe esịt nnyịn eyekịm. Edi ebede ke ndibiọn̄ utọn̄ ke enye, esịt mme Christian ẹmedu ke edidemede tutu esịm usiere usen emi “utịn,” Jesus Christ, asiahade ke odudu Obio Ubọn̄. (Ediyarade 22:16) Didie ke nnyịn mfịn ibiọn̄ utọn̄ ke ikọ mme prọfet? Ebe ke ukpepn̄kpọ Bible, ebe ke nditịm idem nnọ ye editiene mbuana ke mme mbonoesop, onyụn̄ ebe ke ‘ndinam mme n̄kpọ ẹmi, nnyụn̄ nsịn idem ke esịt ofụri ofụri.’ (1 Timothy 4:15) Edieke anade ikọ mme prọfet ẹdi utuenikan̄ oro ayamade ke “n̄kịm n̄kịm ebiet” (esịt nnyịn), ana nnyịn iyak enye otụk nnyịn ntotụn̄ọ ntotụn̄ọ—mme udọn̄, ntụk, uduakesịt, ye mme utịtmbuba nnyịn. Oyom nnyịn idi nditọ ukpepn̄kpọ Bible, koro Peter eberi ibuot 1 ete: “Baba ikọ prọfet kiet ke N̄wed Abasi idịghe se owo ekemede ndisiak ke usụn̄ esiemmọ. Koro akanam baba ikọ prọfet itoho ke uduak owo: edi mme owo ẹtịn̄ ikọ eke otode Abasi, nte Edisana Spirit esịnde mmọ ẹtịn̄.”—2 Peter 1:20, 21.
23. Akpa ibuot ke 2 Peter etịm mme andikot enye idem ọnọ nso?
23 Ke akpa ibuot eke udiana leta esie, Peter ama ọnọ okopodudu n̄kpọ oro onụkde nnyịn ndisọn̄ọ mmụm ọsọn̄urua mbuọtidem nnyịn n̄kama. Nnyịn idahaemi imetịm idem inọ edineme mme akpan n̄kpọ oro ẹtienede. Ibuotikọ efen eyeneme 2 Peter ibuot 2, emi apostle oro esede aban̄a mfịna ndiọi odudu oro ẹkesuanade ẹyọhọ esop.
Nte Afo Emeti?
◻ Ntak emi Peter ọsọn̄ọde etịn̄ nte nnennen ifiọk edide akpan n̄kpọ?
◻ Nso ikeme ndidi ntak oro anamde ẹsiak eti ido nte akpa edu oro ẹnyenede ndidian ke mbuọtidem?
◻ Ntak emi Peter amade nditi nditọete esie n̄kpọ kpukpru ini?
◻ Nso isọn̄ oro enyenede nsọn̄ọ ke Peter ọnọ kaban̄a mbuọtidem nnyịn?
[Ndise ke page 9]
Mme ndudue Peter ikanamke enye ọkpọn̄ mbuọtidem esie