Genesi

Jacoboba Esaú wayaɗa

32 Mamaʉba Jacobora nocoɗaa wãsia. Wãbʉrʉɗe Ãcõrẽ nezocarã bajãnebemada idjimaa zesiɗaa. 2 Maʉ̃gʉrã unubʉrʉɗe Jacoboba jarasia: “Ãcõrẽ sordaorãda nama duanʉa.” Maʉ̃ carea mama trʉ̃ ɓʉsia Mahanaiʉ̃.*

3 Mamaʉba Jacoboba idji nezocarãda Seír druaɗaa diabuesia idji djaba Esaúmaa. Seír druara idjaɓa Edoʉ̃ abadaa. 4 Idji nezocarã diabuei naẽna Jacoboba jarasia:

–Mʉ̃ djaba Esaúa nãwã jaraɗe wãnadua: “Dai boro, bʉ nezoca Jacoboba nãwã jarabisia: mʉ̃ wãna ewariɗeba ʉ̃taa mʉ̃ra dadji djabadrõã Labaʉ̃ma ɓasia. 5 Mʉ̃a pacada, burroda, ovejada, nezoca umaquĩrãrãda, nezoca wẽrãrã siɗa eroɓʉa. Mʉ̃a naʉ̃ beɗeara diabuebʉrʉa mʉ̃ quĩrã djuburia bʉra mʉ̃ ume bia ɓamãrẽã.”–

Mãwã jarapeɗa idji nezocarãra diabuesia. 6 Dji nezocarã Jacobomaa jẽda zeɗapeɗa nãwã jarasiɗaa:

–Dairãra bʉ djaba Esaúmaa wãnapeɗa bʉ beɗeara jarasiɗaa. Ara nawena idjira bʉmaa zebʉrʉa. Maʉ̃ awara idji ume ẽberãrãda cuatrociento zebʉdaa.–

7 Maʉ̃ ũrĩbʉrʉɗe Jacobora bio ne wayasia. Maʉ̃ba cawa crĩchaẽ́ basía. Maʉ̃ bẽrã idji ẽberãrãda ẽsadra awara ɓʉsia. Idji ovejada, pacada, cameyo siɗa ara maʉ̃ quĩrãca osia. 8 Nãwã crĩcha ɓasia: “Esaúda zepeɗa aɓabemada uraibʉrʉ, waabemada ẽdrʉɗia.” 9 Maʉ̃be Jacoboba Ãcõrẽa iwiɗisia:

–Mʉ̃ zezadrõã Abrahaʉ̃ Ãcõrẽ, mʉ̃ zeza Isa Ãcõrẽ, mʉ̃ Boro, bʉa mʉ̃́a jarasia: “Wãdua bʉ djibarirã druaɗaa. Mʉ̃a bʉra ne jũmane carebaya.” 10 Mʉ̃ra ẽberã biaẽ́ bẽrã bʉa mʉ̃ra quĩrã djuburiaiẽ́ ɓʉa. Baribʉrʉ bʉa mʉ̃ra wãrãda careba ɓʉa. Labaʉ̃maa wãi carea naʉ̃ Jordaʉ̃ do chãsiɗe mʉ̃ jʉwaɗe aɓabe bacuruda eroɓasia. Baribʉrʉ iɗira mʉ̃a ẽberãrãra zocãrã pe eroɓʉ bẽrã daira puru umé panʉ quĩrãca panʉa. 11 32:11-12 Mʉ̃a waya ɓʉa mʉ̃ djaba Esaúra zepeɗa mʉ̃da, mʉ̃ wẽrãrãda, mʉ̃ warrarã siɗa quenaida. Bʉa jarasia mʉ̃ra ne jũmane careba ɓaida idjaɓa mʉ̃ warrarãra zocãrã yõni bẽrã pusa ĩbʉ quĩrãca poya juachaɗaca baida. Wãrãda mãwã ɓaibʉrʉ, mʉ̃ quĩrã djuburia mʉ̃ra ẽdrʉ edadua mʉ̃ djaba Esaú jʉwaɗebemada.–

13 Maʉ̃ diamasi Jacobora mama cãĩsia. Nurẽma idjia animarã eroɓʉɗebemada jʉrʉ pesia idji djaba Esaúa diai carea: 14 chiwatu wẽrãda dosciento, dji umaquĩrãda veinte, oveja wẽrãda dosciento, dji umaquĩrãda veinte, 15 cameyo wẽrã warra bara ɓeada treinta, paca wẽrãda cuarenta, dji umaquĩrãda die, burro wẽrãda veinte, idjaɓa dji umaquĩrãda die. 16 Mãwã opeɗa maʉ̃ animarãra idji nezocarãa diasia. Maʉ̃ne ãdjía jarasia:

–Bãrãra mʉ̃ na wãnadua. Chiwatura, ovejara, cameyora, paca siɗa awara awara pe edeɗadua.–

17 Maʉ̃be dji nocoare wãbʉrʉ nezocaa jarasia:

–Mʉ̃ djaba Esaúba bʉ unubʉrʉɗe bʉ́a nãwã iwiɗisicada: “¿Bʉra cai nezoca, sãmaa wã, naʉ̃ animarã edebʉrʉra caiɗe?” 18 Mãwã iwiɗisira nãwã panudua: “Mʉ̃ boro Esaú, naʉ̃gʉra bʉ nezoca Jacoboba bʉ itea diabuebʉrʉa. Idjira dai caiɗu zebʉrʉa.”–

19 Jacoboba waabema nezoca dji animarã edebʉdarãa jarasia:

–Esaú unubʉdaɗe aɓarida jaraɗadua. 20 Maʉ̃ awara jaraɗadua: “Bʉ nezoca Jacobora dairã caiɗu zebʉrʉa.”–

Jacoboba crĩchasia: “Mʉ̃a jãwã diabuebʉrʉɗeba Esaú quĩrũbira tumabiya. Maʉ̃be dji unubʉdaɗe ãĩbẽrã idjia mʉ̃ra bia edaisicada.” 21 Mãwã Jacoboba Esaúa diaira na diabuesia baribʉrʉ maʉ̃ diamasi waɗi arima cãĩsia.

Jacobo bajãnebema ume djõna

22 Ara maʉ̃ diamasi Jacobora piradrʉpeɗa idji quima umena, idji nezocawẽrã umena, idji once warrarã siɗa Jabó do ĩchitaɗe chãbigasia. 23 Ãdjirã chãbigapeɗa jũma idjia eroɓʉ siɗa chãbisia. 24 Mãwã Jacobora iduɓa ɓesia. Maʉ̃ne ẽberãda idji ume djõsia aɓa ʉ̃mãdau odjabʉrʉɗaa. 25 Djõ panʉne maʉ̃ ẽberãba cawasia Jacobora poyaẽ́da. Maʉ̃ bẽrã Jacobo chĩdeɗe chĩsia. Maʉ̃ba Jacobo chĩdera ãĩ dogosia. 26 Maʉ̃ne dji ẽberãba Jacoboa jarasia:

–Mʉ̃ra quenaɓaridua. Ʉ̃nadrʉbʉrʉa.–

Jacoboba panusia:

–Bʉa mʉ̃da bia jara ɓʉẽ́bʉrʉ, mʉ̃a quenaɓariẽ́a.–

27 Maʉ̃be dji ẽberãba iwiɗisia:

–¿Bʉra casa trʉ̃bada?–

Jacoboba panusia:

–Mʉ̃ra Jacobo abadaa.–

28 Maʉ̃ne dji ẽberãba jarasia:

–Waa bʉra Jacobo aɗaẽ́a. Namaʉba ʉ̃taa bʉ trʉ̃ra Israel aɗia, bʉra Ãcõrẽ ume, ẽberãrã ume biɗa djõna bẽrã.* Maʉ̃ne bʉa poyasia.–

29 Maʉ̃be Jacoboba jarasia:

–Jãʉ̃be mʉ̃ djuburia bʉ trʉ̃ra jaradua.–

Dji ẽberãba panusia:

–¿Cãrẽ cãrẽã mʉ̃ trʉ̃ra iwiɗi ɓʉ? Mʉ̃ trʉ̃ra mʉ̃a bʉ́a jaraẽ́a.–

Mama dji ẽberãba Jacobora bia jara ɓʉsia.* 30 Maʉ̃ne Jacoboba jarasia: “Mʉ̃dji dauba Ãcõrẽ quĩrãdarrada ununamĩna mʉ̃ra waɗi zocai ɓʉa.” Mãwã mama trʉ̃ ɓʉsia Penuel.*

31 Ʉ̃mãdau odjabʉrʉɗe Jacobora maʉ̃ Penuelɗeba wãsia. Baribʉrʉ idji chĩdera ãĩ wãna bẽrã pĩãca ɓʉcaeda wãsia. 32 Bajãnebemaba Jacobora chĩdeɗe chĩna bẽrã iɗibema ewariɗe israelerãba chĩdeɗebema quẽgura coɗacaa.