Genesi
Cãĩmocara umé Joseba cawa jaraɗa
40 40:1-2 Jose preso ɓasiɗe Egiptoɗebema boro itea umé traja panasiɗaa. Aɓa uva ɓa jue diabada boro basía. Dewarabemada paʉ̃ obada boro basía. Maʉ̃ umébemaba Egiptoɗebema borora bio quĩrũbisiɗaa. 2 – 3 Maʉ̃ carea dji boroba ãdjira idji wagabadarã boro deɗe preso ɓʉbisia. Josera maʉ̃ preso ɓʉbada deɗe ɓasia. 4 Dji preso ɓʉbada boroba Josera ɓʉsia maʉ̃ umébemara acʉ ɓamãrẽã. Mama ãdjira dãrã preso panesiɗaa.
5 Ewari aɓa Egiptoɗebema boroa uva ɓa jue diabari baɗara, paʉ̃ obari baɗa siɗa aɓari diamasi cãĩmocarasiɗaa. Cãĩmocaraza ne jara awara ɓeasia. 6 Diapeɗeɗa Jose ãdjimaa wãbʉrʉɗe unusia ãdjira sopua panʉda. 7 Maʉ̃ carea Joseba ãdjía iwiɗisia:
–¿Cãrẽ cãrẽã bãrãra sopua panʉ?–
8 Ãdjia panusiɗaa:
–Daiba iɗi cãĩmocarapeɗaɗara caiba cawa jaraida neẽ́ bẽrã jãwã sopua panʉa.–
Maʉ̃ne Joseba jarasia:
–Aɓa Ãcõrẽbʉrʉ cãĩmocarara poya cawa jarabiya. Bãrãba cãĩmocarapeɗaɗara mʉ̃́a nẽbʉrʉɗadua.–
9 Ara maʉ̃da uva ɓa jue diabada boro baɗaba idji cãĩmocarara Josea nẽbʉrʉsia. Nãwã jarasia:
–Mʉ̃a cãĩmocaraɗe unusia uva jʉ̃carada mʉ̃ caita nũmʉda. 10 Maʉ̃ uva jʉ̃carara jʉwate ũbea ɓasia. Maʉ̃ jʉ̃carara tucupeɗa, põnõpeɗa, bio zau nũmesia. 11 Maʉ̃ne nama dai druaɗebema boro tazada mʉ̃ jʉwaɗe eroɓasia. Maʉ̃ tazaɗe mʉ̃a uvada ɓarrajupeɗa dai boroa diasia.–
12 Maʉ̃ jaraɗacarea Joseba nãwã jarasia:
–Bʉ cãĩmocaraba naʉ̃da jara ɓʉa: uva jʉwate ũbea bʉa ununaba jara ɓʉa ewari ũbea. 13 Ewari ũbeaɗe Egiptoɗebema boroba bʉra idji quĩrãpita trʉ̃ya bʉa naãrã o ɓaɗa quĩrãca wayacusa o ɓamãrẽã. Mãwã bʉa waya idjía uva ɓara jue dia ɓaya bʉa naẽna o ɓaɗa quĩrãca. 14 Bʉ bia ɓebʉrʉɗe mʉ̃ djuburia mʉ̃ra quĩrãdoarãdua. Bʉ boroa mʉ̃nebemada jaradua naʉ̃ deɗebemada ẽdrʉ ɓʉmãrẽã. 15 Mʉ̃ra hebreorã druaɗebemada jida enesiɗaa idjaɓa mʉ̃a ni cãrẽ siɗa oẽ́ ɓʉda nama preso eropanʉa.–
16 Paʉ̃ obada boro baɗaba ũrĩ ɓasia Joseba maʉ̃ cãĩmocarara cawa jara ɓʉda. Joseba cawa jaraɗara bia ɓaɗa bẽrã idjia jarasia:
–Mʉ̃ siɗa cãĩmocarasia. Mʉ̃a unusia mʉ̃ boro ʉ̃rʉ̃ jamara paʉ̃ bara ɓeada ũbea eronĩda. 17 Dji ʉ̃rʉ̃bemane paʉ̃ cũãda quĩrãtanoa eroɓasia nama dai druaɗebema boro itea. Baribʉrʉ cawaẽ́ne maʉ̃ paʉ̃ cũãra ĩbanaba co duanesiɗaa.–
18 Mãwã jaraɗacarea Joseba idjía jarasia:
–Bʉ cãĩmocaraba naʉ̃da jara ɓʉa: maʉ̃ jamara ũbea bʉa ununaba jara ɓʉa ewari ũbea. 19 Ewari ũbeaɗe Egiptoɗebema boroba bʉra idji quĩrãpita trʉ̃ya. Baribʉrʉ bʉra oɓʉá tubipeɗa bacuru cũmiane ʉ̃tʉ su jira ɓʉbiya. Maʉ̃be ãgosoba bʉ djarara coɗia.–
20 Ewari ũbea baɗacarea Egiptoɗebema boroba idji toɗa ewari ɓʉsriɗada osia. Dji dromarã itea djicoda waiɓʉa obisia. Maʉ̃ne uva ɓa jue diabada boro baɗara, paʉ̃ obada boro baɗa siɗa idji quĩrãpita enebisia. 21 Maʉ̃be uva ɓa jue diabada boro baɗara ɓʉsia wayacusa idjia naãrã o ɓaɗa quĩrãca o ɓamãrẽã. Mãwã idjia wayacusa uva ɓara Egiptoɗebema boroa jue dia ɓesia Joseba jaraɗa quĩrãca. 22 Baribʉrʉ paʉ̃ obada boro baɗara bacuru cũmiane ʉ̃tʉ su jira ɓʉbisia Joseba jaraɗa quĩrãca. 23 Uva ɓa jue diabada borora bia ɓeɗamĩna Josera aɓeɗa quĩrãdoasia.