Genesi

Joseba ara idjida cawabiɗa

45 45:1-2 Maʉ̃ beɗea ũrĩbʉrʉɗe Josera so borequea nũmesia. Waa poya droaẽ́ bẽrã jũma idji nezocarã arima ɓeaa jĩgua jarasia:

–¡Jũma dajadaa wãnadua!–

Ara maʉ̃da wãsiɗaa. Aɓabe idji djabarãda idji ume panesiɗaa. Mãwã panʉne Josera bio jĩãsia. Maʉ̃ jĩãbira idji nezocarã dajada panʉba ũrĩsiɗaa. Maʉ̃ awara idji jĩãnanebemada Egiptoɗebema boro deɗe panabadarãba ũrĩsiɗaa. Jĩãnacarea Joseba idji djabarãa cawabisia idjida mãwã ɓʉda. 2 – 3 Nãwã jarasia:

–Mʉ̃ra Josea. ¿Mʉ̃ zezara waɗi ɓʉca?–

Maʉ̃ne idji djabarãba poya panunaẽ́ basía bio dauperasiɗa bẽrã. 4 Maʉ̃ carea Joseba ãdjía jarasia:

–Mʉ̃ caita zeɗadua.–

Ara maʉ̃da Jose caita wãsiɗaa. Maʉ̃ne Joseba ãdjía jarasia:

–Mʉ̃ra bãrã djaba Josea, bãrãba nẽdobuepeɗaɗaa Egiptoɗaa edeɗamãrẽã.* 5 Baribʉrʉ sopuarãnadua. Bãrãba mʉ̃ra nẽdobuepeɗaɗamĩna jũmawãyã crĩcharãnadua. Ãcõrẽbʉrʉ mʉ̃ra nama bãrã na diabuesia ẽberãrã beuɗiɗebemada ẽdrʉ edamãrẽã. 6 Poa umé babʉrʉa jarraba zeɗada. Idjaɓa waɗi poa juesuma mãwã ɓaya. Maʉ̃ne poya ne uɗaẽ́a ni ewaɗaẽ́a. 7 Ãcõrẽba mʉ̃ra bãrã na diabuesia bãrã ẽberãrã naʉ̃ ẽjũãne jũma beurãnamãrẽã. Mʉ̃ra nama ɓʉsia bãrãra beuɗiɗebemada ẽdrʉ edamãrẽã. 8 Bãrãba mʉ̃ra namaa diabueɗaẽ́ basía, ãtebʉrʉ Ãcõrẽbʉrʉ mʉ̃ra diabuesia. Idjiabʉrʉ mʉ̃ra ɓʉsia Egiptoɗebema boroa crĩcha diabarida ɓamãrẽã, idji deɗebema boroda ɓamãrẽã, idjaɓa Egipto druaɗe dji dromada ɓamãrẽã. 9 Jãʉ̃be bãrãra isabe wãnadua mʉ̃ zezamaa. Idjía nãwã jaraɗadua:

“Bʉ warra Joseba nãwã jara ɓʉa: Ãcõrẽba mʉ̃ra Egiptoɗebema boroare ɓʉsia. Mʉ̃maa isabe zedua. Dãrãrãdua. 10 Zepeɗa Goseʉ̃ ẽjũãne ɓeya. Mãwã bʉra, bʉ warrarã siɗa, bʉ wiuzaquerã siɗa mʉ̃ caita duanania. Bʉ animarã ɓeara, jũma bʉa eroɓʉ siɗa enedua. 11 Mʉ̃a bʉra mama ne cobi ɓaya, waɗi poa juesuma jarrabara ɓai bẽrã. Mãwã bʉra, bʉ ẽberãrãra, bʉ animarã siɗa jarrababa beuɗaẽ́a.”

12 Bãrãba, mʉ̃ djaba Benjamiʉ̃ biɗa bãdji dauba unu panʉa wãrãda mʉ̃da bãrã ume mãwã beɗea ɓʉda. 13 Mʉ̃ zezaa jaraɗadua mʉ̃ra naʉ̃ Egipto druaɗe dji dromada. Bãrãba unupeɗaɗa siɗa jũma mʉ̃ zezaa jaraɗadua. Isabe wãnapeɗa mʉ̃ zezara namaa enenadua.–

14 Maʉ̃be idji djaba Benjamiʉ̃ ume ojũẽnapeɗa jĩãsiɗaa. 15 Mãwãnacarea Joseba waabema djabarãra uridarraɗe isõcuapeɗa jĩãsia. Maʉ̃bebʉrʉ idji djabarãra idji ume beɗeasiɗaa.

16 Egiptoɗebema boro deɗe panabadaba ũrĩsiɗaa Jose djabarãra zesiɗada. Dji boroba, dji droma ɓea biɗa maʉ̃nebemada bia crĩchasiɗaa. 17 Maʉ̃ carea dji boroba Josea jarasia:

–Bʉ djabarãa jaradua: “Bãrã animarã ʉ̃rʉ̃ ne ataubiɗapeɗa Canaaʉ̃ druaɗaa wãnadua. 18 Maʉ̃be bãrã zezara, bãrã ẽberãrã siɗa mʉ̃maa enenadua. Mʉ̃a bãrãa Egipto druaɗe ẽjũã biara ɓʉda diaya. Bãrãba naʉ̃ druaɗebema dji biara ɓʉda coɗia.” 19 Idjaɓa bʉ djabarãa jaradua nama Egiptoɗeba carretada edecuaɗamãrẽã ãdji warrarã, ãdji wẽrãrã, bãrã zeza siɗa enenamãrẽã. 20 Maʉ̃ awara jaradua ãdjia eroɓeara ɓecuaɗamãrẽã, Egiptoɗebema ne biara ɓʉda jũma ãdjiɗe ɓai bẽrã.–

21 Israel warrarãba mãwã osiɗaa. Egiptoɗebema boroba jaraɗa quĩrãca Joseba ãdjía carretara diacuasia. Ãdjia oɗe coɗi siɗa diasia. 22 Ãdjiza cacuaɗe jʉ̃bada djiwiɗida aɓa aɓa diacuasia. Baribʉrʉ Benjamiʉ̃a cacuaɗe jʉ̃badada juesuma diasia. Parata torro siɗa tresciento diasia. 23 Idji zeza itea Egiptoɗebema ne bia queɗeada die burroɗe diabuesia. Maʉ̃ awara die burro wẽrãne trigoda, paʉ̃da, idji zebʉrʉɗe coi siɗa diabuesia. 24 Maʉ̃be idji djabarãra wãbigasia. Ãdji wãbʉdaɗe Joseba ãdjía jarasia:

–Oɗe ijararãnadua.–*

Jacoboba Jose zocai ɓʉda cawaɗa

25 Maʉ̃be Egiptoɗeba wãnapeɗa Canaaʉ̃ druaɗe ãdji zeza Jacoboma jũẽsiɗaa. 26 Jũẽnapeɗa ãdjia Jacoboa jarasiɗaa Josera waɗi zocai ɓʉda idjaɓa idjira Egiptoɗebema boroare ɓʉda. Baribʉrʉ Jacoboba cawa crĩchaẽ́ basía. Maʉ̃gʉra ĩjãẽ́ basía. 27 Maʉ̃ne ãdjirãba Joseba jaraɗara jũma nẽbʉrʉsiɗaa. Maʉ̃ awara Jacoboba unusia Joseba carreta diabuecuaɗada idji edeɗamãrẽã. Maʉ̃ unubʉrʉɗe Jacobora sobiasia. 28 Jacobo Israel abadaba jarasia:

–Ara naʉ̃ba bia ɓʉa. Mʉ̃ warra Josera wãrãda waɗi zocai ɓʉa. Mʉ̃ beui naẽna idji acʉɗe wãya.–