Genesi

Jacoboba Jose warrarã bia jara ɓʉɗa

48 Mãwãnacarea Jose ẽberãrãba idjía jarasiɗaa idji zezara cacua biẽ́ ɓʉda. Maʉ̃ carea Joseba idji warrarã Manase, Epraiʉ̃ siɗa idji zeza acʉɗe edesia. 2 Maʉ̃ne Jacoboa jarasiɗaa Josera zesida. Maʉ̃ carea Jacobo Israel abadara ʉɓʉaẽ́ ɓʉmĩna idji cʉɗaɗe ʉ̃ta chũmesia. 3 Maʉ̃ne Josea jarasia:

–Canaaʉ̃ druaɗe mʉ̃ Luz puruɗe ɓasiɗe ne jũma poya ɓʉ Ãcõrẽra mʉ̃ma odjapeɗa mʉ̃ra nãwã bia jara ɓʉsia: 4 “Mʉ̃a bʉɗeba ẽberãrã zocãrã yõbiya. Idjaɓa bʉɗeba puruda zocãrã yõbiya. Maʉ̃ awara mʉ̃a bʉ ẽberãrãa naʉ̃ Canaaʉ̃ druara diaya ewariza ãdjiɗe bamãrẽã.”*

5 Mʉ̃ bʉmaa zei naẽna bʉ warrarã Epraiʉ̃ra, Manase siɗa naʉ̃ Egiptoɗe tosiɗaa. Ãdjira Rubeʉ̃ quĩrãca idjaɓa Simeoʉ̃ quĩrãca mʉ̃ warrarã araaɗa aya. 6 Baribʉrʉ bʉa dewara warrarãda unuibʉrʉ, ãdjirãra mʉ̃ warrarã araaɗa aẽ́a. Maʉ̃ bẽrã Canaaʉ̃ druaɗe mʉ̃ warrarã araba ẽjũã edabʉda quĩrãca ãdjirãba edaɗaẽ́a. Ãtebʉrʉ Epraiʉ̃ba, Manase biɗa edabʉda ẽjũãnebemada ãdjia edaɗida panʉa. 7 Mʉ̃ Padan-Araʉ̃ druaɗeba zebʉrʉɗe bʉ papa Raquelera Canaaʉ̃ druaɗe jaiɗasia Eprata Beleʉ̃ abada caita. Mama mʉ̃a idjira tʉɓarisia. Mʉ̃ra idji carea bio sopua ɓasia. Maʉ̃ carea mʉ̃a bʉ warra umébemarã mʉ̃reana abʉrʉa.–

8 Jacobo Israel abadaba Jose warrarãra unupeɗa iwiɗisia:

–Za panʉra ¿cai?–

9 Joseba idji zezaa panusia:

–Mʉ̃ warrarãa, Ãcõrẽba mʉ̃́a naʉ̃ Egiptoɗe diaɗaa.–

Israelba jarasia:

–Mʉ̃ djuburia mʉ̃ caita zebidua ãdjira bia jara ɓʉi carea.–

10 Israelera drõãda quiru bẽrã dau towa ɓasia. Maʉ̃ne Joseba idji warrarãra idji zeza caitaara edasia. Israelba ãdjira bʉrʉ edapeɗa isõsia. 11 Israelba Josea jarasia:

–Mʉ̃a crĩcha ɓasia bʉ quĩrãra waa unuẽ́da, baribʉrʉ ¡Ãcõrẽba mʉ̃́a bʉra bʉ warrarã siɗa unubisia!–

12 Maʉ̃be Joseba idji warrarã idji zeza ɓacaraɗe chũpanʉda ãyã ɓʉsia. Ãyã ɓʉpeɗa idji zeza quĩrãpita chĩrãboroɗe ɓarru coɓesia.

13 Joseba idji warrarãra wayacusa idji zeza quĩrãpita caita ɓʉsia. Epraiʉ̃ra idji jʉwa araare ɓʉsia idji zeza jʉwa acʉare ɓemãrẽã. Manasera idji jʉwa acʉare ɓʉsia idji zeza jʉwa araare ɓemãrẽã. 14 Baribʉrʉ Israelba idji jʉwara carusia. Epraiʉ̃ra dji tẽãbemamĩna Israelba idji jʉwa arada Epraiʉ̃ boro ʉ̃rʉ̃ ɓʉsia. Manasera dji iwinamĩna Israelba idji jʉwa acʉda Manase boro ʉ̃rʉ̃ ɓʉsia. 15 Maʉ̃ne Israelba Josera nãwã bia jara ɓʉsia:

Mʉ̃ zezadrõã Abrahaʉ̃ba idjaɓa mʉ̃ zeza Isa biɗa Ãcõrẽda ĩjã panasiɗaa. Mʉ̃ tosiɗa ewariɗeba ʉ̃taa ara maʉ̃ Ãcõrẽba mʉ̃ra waga ɓabaria.

16 Idjia jũma mʉ̃ bia mĩga ɓʉɗebemada ẽdrʉ edabaria.* Maʉ̃gʉ Ãcõrẽba naʉ̃ warrarãra carebaya.

Mʉ̃a quĩrĩã ɓʉa ãdjiɗeba naʉ̃ ẽjũãne zocãrã yõnida. Mãwã naʉ̃ warrarãneba mʉ̃ trʉ̃ra, mʉ̃ zezadrõã Abrahaʉ̃ trʉ̃ra, mʉ̃ zeza Isa trʉ̃ siɗa jũmarãba quĩrãneba panania.

17 48:17-18 Joseba unusia idji zeza jʉwa arara dji tẽãbema Epraiʉ̃ boro ʉ̃rʉ̃ ɓʉda. Maʉ̃ra Joseba biẽ́ unusia. Maʉ̃ carea idji zezaa jarasia:

–Zeza, jãwãẽ́a. Za ɓʉdrʉ mʉ̃ warra iwinaa. Idji boro ʉ̃rʉ̃bʉrʉ bʉ jʉwa arara ɓʉdua.–

Mãwã jarabʉrʉɗe idji zeza jʉwara Epraiʉ̃ boroɗe ɓʉda jidapeɗa Manase boro ʉ̃rʉ̃ ɓʉ quĩrĩã ɓasia. 19 Baribʉrʉ idji zezaba mãwã o quĩrĩãẽ́ basía. Ãtebʉrʉ jarasia:

–Warra, mʉ̃a cawa ɓʉa mʉ̃ jʉwara cai ʉ̃rʉ̃ ɓʉsida. Bʉ warra iwinaneba ẽberãrãda zocãrã yõnia. Idjira dji dromada ɓaya. Baribʉrʉ dji djaba tẽãbemara idji cãyãbara dji dromaara ɓaya. Dji tẽãbema warrarãneba puruda zocãrã yõnia.–

20 Maʉ̃ ewariɗe Israelba Jose warra tẽãbema Epraiʉ̃ra dji nabema Manase cãyãbara dji dromaara ɓʉsia. Maʉ̃ne ãdjira nãwã bia jara ɓʉsia:

–Nocoarebema ewariɗe israelerãba bãrã trʉ̃neba nãwã dewaraa bia jaraɗia: “Ãcõrẽba Epraiʉ̃, Manase siɗa bia oɗa quĩrãca bʉ siɗa bia oya.”–

21 Mãwãpeɗa Israelba Josea jarasia:

–Dãrãẽ́ne mʉ̃ra beuya. Baribʉrʉ Ãcõrẽra bãrã ume ɓaya. Idjia bãrãra bãdji drõãenabemarã druaɗaa jẽda edeya. 22 Mʉ̃a bʉ́a ẽjũãra auɗuara diabʉrʉa bʉ djabarã cãyãbara. Mʉ̃a bʉ́a Siqueʉ̃ eyada diabʉrʉa.* Maʉ̃ ẽjũãra mʉ̃a jãrĩsia necoba cha biɗa amorreorã ume djõ ɓʉɗeba.–