2 Samuel

Davi israelerã boroda ɓeɗa

5 Saul jaiɗaɗacarea Israelɗeba doce puru yõpeɗaɗada Hebroʉ̃ puruɗaa Davimaa wãnapeɗa nãwã jarasiɗaa:

–Dadjirãra aɓari ẽberãrãa. 2 Saulora dadjirã boro baɗamĩna djõne wãbʉdaza bʉabʉrʉ dadji israelerãra edepeɗa bia enebadjia. Maʉ̃ awara Ãcõrẽba jarasia bʉdrʉ idji puru Israel boroda ɓeida. Bʉabʉrʉ oveja waga ɓʉ quĩrãca idji ẽberãrãra pe eroɓayaɗa asia.–

3 Maʉ̃ne Hebroʉ̃ne Ãcõrẽ quĩrãpita Israelɗebema dji dromarãda Davi ume beɗea ɓʉɗapeɗa nedragada idji boroɗe weasiɗaa israelerã boroda ɓʉɗi carea. 4 Davi israelerã boroda ɓʉsiɗaɗe treinta poa ɓasia. Maʉ̃be cuarenta poa ãdjirã boroda ɓesia. 5 Naãrã Hebroʉ̃ne idjira siete poa auɗu ẽsidra Judaɗeba yõpeɗaɗarã boro basía.* Mãwãnacarea 33 poa Jerusaleʉ̃ne jũma israelerã boroda ɓasia.

Daviba Jerusaleʉ̃ puru poyaɗa

6 Israelerã boro Davira idji sordaorã ume Jerusaleʉ̃naa djõne wãsiɗaa. Maʉ̃ ewariɗe jebuseorãda jãma panabadjiɗaa. Ãdjirãba crĩchasiɗaa Davira poya ãdji puruɗe eɗa zeẽ́da. Maʉ̃ carea idjía jarasiɗaa:

–Bʉra nama eɗa poya zeẽ́a. Dauɓerrea ɓeaba, jĩrũ biẽ́ ɓea biɗa naʉ̃ puruda poya wagaɗia bãrã eɗa zerãnamãrẽã.–

7 Baribʉrʉ Daviba Jerusaleʉ̃ra poyapeɗa maʉ̃ puruɗe sordaorã panabada Sioʉ̃ abada siɗa poyasia. Iɗira Sioʉ̃ra Davi puru abadaa.

8 Israelerãba jebuseorã poyaɗi naẽna Daviba jarasia:

–Jebuseorãda poya quĩrĩã ɓʉbʉrʉ, Sioʉ̃ puruɗe eɗa baido weamãrẽã opeɗaɗa uriaɗeba wãida ɓʉa.* Mãwãbʉrʉ jãʉ̃ dauɓerrea ɓeamanada, jĩrũ biẽ́ ɓeamana siɗa beaɗia. Ãdjirãra mʉ̃a quĩrãma ɓʉa.–

Daviba mãwã jaraɗa bẽrã iɗira aɓaʉba djãrãda quĩrãma ɓʉbʉrʉ nãwã jarabaria: “Dauɓerrea ɓeada, jĩrũ biẽ́ ɓea siɗa dadji boro de dromane eɗa wãnacara panʉa.”*

9 Maʉ̃be Davira Sioʉ̃ne ɓesia. Sioʉ̃ra trʉ̃ ɓʉsiɗaa Davi puru. Dji puru mõgaraba auɗu jũrã ca ɓʉra Daviba waiɓʉara osia idjaɓa Milo abadaɗeba eɗa dji jogoa ɓeara egoroba daucha pãrĩ wãsia.* 10 Ãcõrẽ ne jũma poya ɓʉda idji ume ɓʉ bẽrã Davira ewariza dji dromaara ɓesia.

11 Maʉ̃ ewariɗe Tiro druaɗebema boro Hiraʉ̃ abadaba ʉ̃cʉrʉ Davimaa diabuesia idji ume dji bia bai carea. Maʉ̃ awara bacuru de obadarãda, mõgara de obadarãda, dji biara ɓʉ bacuru siɗa diabuesia. Ãdjirãba Davi itea de dromada osiɗaa. 12 Maʉ̃neba Daviba cawasia Ãcõrẽba idjira wãrãda israelerã boroda ɓʉsida. Maʉ̃ awara cawasia Ãcõrẽba idji puru Israelda quĩrĩã ɓʉ bẽrã idjira careba ɓʉda israelerã bia pe eroɓamãrẽã.

Davi warrarã Jerusaleʉ̃ne topeɗaɗa

13 Hebroʉ̃neba wãnacarea Jerusaleʉ̃ne Daviba quimada zocãrã edasia. Dewara wẽrãrã siɗa zocãrã eroɓasia. Ãdjirãba warrarãda, caurã siɗa Davia to diasiɗaa. 14 Daviba naʉ̃ warrarãda Jerusaleʉ̃ne unusia: Samúa, Sobab, Nataʉ̃, Salomoʉ̃, 15 Ibhar, Elisua, Nepeg, Japia, 16 Elisamá, Eliadá, idjaɓa Elipelet.