Exodo

Ne drʉaɗa jẽda diaiɗebema ley

22 Bariduaba pacada wa ovejada drʉapeɗa beaibʉrʉ wa nẽdobueibʉrʉ, naʉ̃ quĩrãca oida ɓʉa. Pacada drʉasira paca juesuma jẽda diaida ɓʉa. Ovejada drʉasira oveja quĩmãrẽ jẽda diaida ɓʉa.

2 Bariduada diamasi ne drʉa ɓʉɗe de djibariba beaibʉrʉ, mĩã beaɗa carea beɗeaɗe ɓaẽ́a. 3 Baribʉrʉ ãsa de djibariba maʉ̃ ne drʉa ɓʉda beaibʉrʉ, mĩã beaɗa carea beɗeaɗe ɓaya.

Bariduada ne drʉapeɗa jidaɗibʉrʉ, idjia drʉaɗabari jẽda diaida ɓʉa. Jẽda diai carea neẽ́ ɓʉbʉrʉ, idjira nezoca bamãrẽã nẽdobueɗida panʉa idjia drʉaɗabari jẽda diaɗi carea.

4 Bariduaba pacada, burroda, wa ovejada drʉaibʉrʉ, idji jidabʉdaɗe maʉ̃ animarãda waɗi zocai eroɓʉbʉrʉ, jẽda diaida ɓʉa. Maʉ̃ awara aɓa auɗu diaida ɓʉa.

5 Bariduaba idji ẽjũãne wa uva u eroɓʉma idji animarãda ne coɗamãrẽã ẽrãbueibʉrʉ, baribʉrʉ maʉ̃ animarãra djãrã ẽjũãne ne coɗe wãnibʉrʉ, djibarira beɗeaɗe ɓʉa. Maʉ̃ bẽrã dji ẽjũã djibaría idji néuɗebema dji biara ɓʉda diaida ɓʉa.

6 Bariduaba idji ẽjũã babuebʉrʉɗe djãrã néu ewaɗada wa ewaẽ́ ɓʉ siɗa bá wãibʉrʉ, dji báɗaba jũma dji bá wãnabari diaida ɓʉa.

7 Aɓaʉba paratada wa ne bariduada djãrã deɗe waga eroɓʉɗe dewaraʉba drʉaibʉrʉ, dji ne drʉaɗara jidaɗapeɗa idjia drʉaɗada jẽda diaida ɓʉa. Maʉ̃ awara aɓa auɗu diaida ɓʉa. 8 Baribʉrʉ dji ne drʉaɗada jidaɗaẽ́bʉrʉ, dji ne waga eroɓaɗara bãrã bororãmaa edeɗida panʉa. Maʉ̃be ãdjia quĩrãcuita iwiɗiɗida panʉa idjia maʉ̃ ne waga eroɓaɗara drʉasi cawaya.

9 Paca carea, burro carea, oveja carea, cacuaɗe jʉ̃bada carea, ne baridua adua ɓaɗa carea biɗa ijaraɗibʉrʉ, ãdjira bãrã bororãmaa wãnida panʉa.* Maʉ̃ne dji bororãba quĩrãcuita iwiɗiɗapeɗa cawa jaraɗia caida beɗeaɗe ɓʉda. Maʉ̃be dji beɗeaɗe ɓʉba djibaría ãdji ijara panʉ careabemada umé diaida ɓʉa.

10 22:10-11 Bariduaba burroda, pacada, ovejada, wa baridua animarã siɗa dewaraa wagabi ɓʉɗe maʉ̃ animarãda beuibʉrʉ, wa cawaẽ́ne iduɓa puaibʉrʉ, wa ni aɓaʉba ununaẽ́ne drʉaɗibʉrʉ, dji animarã waga eroɓaɗaba Ãcõrẽ quĩrãpita wãrãneba jaraida ɓʉa maʉ̃ animarã drʉaẽ́ ɓʉda. Maʉ̃ jaraɗara djibariba ĩjãida ɓʉa. Mãwãra dji animarã waga eroɓaɗaba djibaría maʉ̃ animarãbari diaiẽ́ ɓʉa. 12 Baribʉrʉ idjia idu drʉabibʉrʉ, maʉ̃ animarãbari djibaría diaida ɓʉa. 13 Idjia waga eroɓʉ animarãda mẽãbema animarãba beaibʉrʉ, dji beuɗara edeida ɓʉa acʉbi carea mẽãbema animarãba wãrãda beasida. Mãwãra maʉ̃ animarãbari djibaría diaiẽ́ ɓʉa.

14 Bariduaba trajabada animarãda iwiɗi edepeɗa djibari neẽ́ne maʉ̃ animarãra iduɓa puaibʉrʉ wa beuibʉrʉ, dji edeɗaba maʉ̃ animarãbari djibaría diaida ɓʉa. 15 Baribʉrʉ maʉ̃ animarã puabʉrʉɗe wa beubʉrʉɗe djibarida aria ɓaibʉrʉ, dji animarã edeɗaba maʉ̃ animarãbari diaiẽ́ ɓʉa. Idjaɓa maʉ̃ animarã edei carea paratada diasibʉrʉ, maʉ̃ animarãda iduɓa puaibʉrʉ wa beuibʉrʉ, dji edeɗaba maʉ̃ animarãbari waa diaiẽ́ ɓʉa.

Jipa oɗi careabema ley

16 Ẽberãba wẽrã umaquĩrã adua ɓʉda cũrũgapeɗa idji ume cãĩbʉrʉ, maʉ̃ wẽrãra dewara ume quima edai carea beɗea ɓʉẽ́ ɓʉbʉrʉ, maʉ̃ ẽberãba quima edai careabema paratara dji wẽrã zezaa diaida ɓʉa idjaɓa dji wẽrãra edaida ɓʉa. 17 Baribʉrʉ dji wẽrã zezaba idji cauda maʉ̃ ẽberãa dia quĩrĩãẽ́bʉrʉ, dji ẽberãba maʉ̃ wẽrãra edaẽ́mĩna quima edai careabema paratara diaida ɓʉa.

18 Jũma jãĩbana wẽrãrãda beaɗida panʉa.

19 Bariduaba animarãda oibʉrʉ, idjira beaɗida panʉa.

20 Bariduaba animarãda mʉ̃́a babue diai cãyãbara dewara ãcõrẽa babue diaibʉrʉ, idjira beaɗida panʉa.

21 Ãĩbema bãrã tãẽna ɓeada biẽ́ orãnadua. Quĩrãnebaɗadua bãrã siɗa Egiptoɗe ãĩbemarã basida.

22 Pẽdra wẽrãra wa jẽrãmãrã siɗa biẽ́ orãnadua. 23 Bãrãba ãdjirã biẽ́ o panʉ carea mʉ̃́a quĩrã djuburiada iwiɗiɗibʉrʉ, ãdjia iwiɗi panʉra mʉ̃a ũrĩpeɗa carebaya. 24 Mʉ̃ quĩrũbiɗeba iduaribiya dji quĩrũba djõne zeɗapeɗa bãrãra necoba beaɗida. Mãwã bãrã quimara pẽdra baɗia idjaɓa bãrã warrarã siɗa jẽrãmãrã baɗia.

25 Mʉ̃ puruɗebema ne neẽ́ quiruba parata iwiɗiɗara diaɗibʉrʉ, idjia jẽda diabʉrʉɗe auɗu iwiɗirãnadua ʉ̃cʉrʉba auɗu jẽda diabibada quĩrãca. 26 22:26-27 Bariduaba parata iwiɗiɗa wãrãda jẽda diaida cawabi carea idjia jĩsua carea jʉ̃barida ɓeibʉrʉ, dji parata diaɗaba maʉ̃ra eroɓeiẽ́ ɓʉa. Queui naẽna dji parata diaɗaba maʉ̃ra diaɗe wãida ɓʉa djibariba boro cãĩ carea waa neẽ́ ɓʉ bẽrã. Diaɗe wãẽ́bʉrʉ, djibariba jĩsua carea mʉ̃́a quĩrã djuburiada iwiɗibʉrʉ, mʉ̃a carebaya mʉ̃ra quĩrã djuburiaiɗa ɓʉ bẽrã.

28 Mʉ̃da, bãrã bororã siɗa biẽ́ jararãnadua.

29 Mʉ̃a ɓʉɗa ewariɗe bãrã néu naãrã ewabʉdaɗebemada, uva ɓaɗebema siɗa ariɗe diaɗadua.

Jũma bãrã umaquĩrã warra dji nabema tobʉrʉda mʉ̃́a diaɗida panʉa.* 30 Paca umaquĩrã dji nabema tobʉrʉda, oveja umaquĩrã dji nabema tobʉrʉ siɗa bãrãba jũma mʉ̃́a bea diaɗida panʉa. Maʉ̃ animarã zaquera dji papa ume siete ewaribe ɓaya. Nurẽma ochobema ewariɗe mʉ̃́a bea diaɗida panʉa.

31 Bãrã israelerãra mʉ̃ itea bia ɓeaɗida panʉa. Maʉ̃ bẽrã baridua animarã mẽãbemaba beaɗada bãrãba coɗacara panʉa. Maʉ̃ djarara usaa diaɗadua coɗamãrẽã.