Exodo

Idji wua de oɗamãrẽã Ãcõrẽba diabiɗa

25 Maʉ̃ne Ãcõrẽba Moisea jarasia:

2 –Israelerãa jaradua jũma mʉ̃ itea ne dia quĩrĩã ɓeaba bʉmaa enenida panʉda ara ãdji soɗeba dia quĩrĩã panʉ quĩrãca. 3 Ãdjirãba diaɗida panʉra naʉ̃gʉa: oroda, paratada, bronceda, 4 oveja cara nayãna pãwãrã oɗada, pursupursua oɗada, purea oɗa siɗa. Maʉ̃ awara diaɗida panʉa wua dji biara ɓʉ lino oɗada, wua chiwatu cara oɗada, 5 oveja e purea oɗada, animarã e biada,* acacia bacuruda, 6 olivo dragada ĩbĩrã coaɗi carea. Idjaɓa querada diaɗida panʉa olivo dragaɗaa pueraɗi carea. Maʉ̃ba ne jũma Ãcõrẽ iteabemada soaɗida panʉa. Maʉ̃ awara diaɗida panʉa quera baɗi careabemada, 7 ónice mõgarada, dewara mõgara bia queɗea siɗa sacerdote dji droma djioɗe caraɗi carea.* 8 Jũma maʉ̃gʉra peɗapeɗa bãrãba mʉ̃ itea wua deda oɗida panʉa mʉ̃ bãrã tãẽna ɓai carea. 9 Maʉ̃ wua dera, dji eɗa ɓea siɗa jũma mʉ̃a obi ɓʉ quĩrãca daucha oɗida panʉa.

Ãcõrẽ baurude

10 Baurude acacia bacuruɗeda oɗadua. Maʉ̃ baurude drasoara bicaca umé ʉ̃rʉ̃ ẽsadra ɓaida ɓʉa. Dji jouɓʉara bicaca aɓa ʉ̃rʉ̃ ẽsadra ɓaida ɓʉa. Dji ʉ̃tʉara bicaca aɓa ʉ̃rʉ̃ ẽsadra ɓaida ɓʉa. 11 Dji jãra, dajadaare biɗa oro idji awa quiruba bʉraɗadua. Iquiɗaza jũma pʉrrʉga oroba tuca ɓʉɗadua. 12 Idjaɓa pĩrũ oroɗeda quĩmãrẽ omoa oɗadua. Maʉ̃ pĩrũra baurude jĩrũza cara ɓʉɗadua. Mãwã orroza pĩrũra umé panania. 13 Idjaɓa acacia bacuruda umé biya eraɗapeɗa oroba bʉraɗadua. 14 Maʉ̃ bacurura pĩrũne eɗa berajuɗadua baurude jira edeɗi carea. 15 Bacurura pĩrũne eɗa berajusiɗara waa ẽũtarãnadua. 16 Maʉ̃ baurudeɗe mʉ̃a ĩjã obi ɓʉ beɗea mõgaraɗe ɓʉ́ diaira waga ɓʉɗadua.

17 Maʉ̃be oro idji awa quiruda peweɗea baɗaa ariɗe oɗadua baurude ʉ̃rʉ̃ coɓʉɗi carea. Dji drasoara bicaca umé ʉ̃rʉ̃ ẽsadra ɓaida ɓʉa. Dji jouɓʉara bicaca aɓa ʉ̃rʉ̃ ẽsadra ɓaida ɓʉa. 18 25:18-19 Idjaɓa oroda edaɗapeɗa mʉ̃ nezoca bajãnebema i bara ɓʉ za quĩrãca umé toa chĩ oɗadua. Maʉ̃ra bio cara ɓʉɗadua dji baurude ʉ̃rʉ̃ coɓʉɗi carea opeɗaɗa ʉ̃rʉ̃. Quĩrãza iquiɗa aɓa ɓʉɗaɗua. Mãwã jũma maʉ̃gʉra aɓa ɓʉ oɗa quĩrãca ɓeya. 20 Mʉ̃ nezoca bajãnebema i bara ɓʉ za quĩrãca panʉra quĩrã djica eɗaa ɓarru ɓʉɗadua. Ãdji iba dji baurude ʉ̃rʉ̃ coɓʉɗi carea opeɗaɗara jũãtrʉ eropanania. 21 Mãwã oɗapeɗa dji baurude ʉ̃rʉ̃ coɓʉɗadua. Maʉ̃ baurudeɗe mʉ̃a ĩjã obi ɓʉ beɗea mõgaraɗe ɓʉ́ diaira waga ɓʉɗadua. 22 Mama mʉ̃ra zeya bʉ ume beɗeai carea. Mʉ̃ baurude ʉ̃rʉ̃ bajãnebema nezoca i bara panʉ ẽsi mʉ̃a israelerãa obi ɓʉra cawabiya.

Ãcõrẽ quĩrãpita paʉ̃ ɓʉbada mesa

23 Mesa acacia bacuruɗeda oɗadua. Dji drasoara bicaca umé ɓaida ɓʉa. Dji jouɓʉara bicaca aɓa ɓaida ɓʉa. Idjaɓa dji ʉ̃tʉara bicaca aɓa ʉ̃rʉ̃ ẽsadra ɓaida ɓʉa. 24 Maʉ̃ mesara oro idji awa quiruba jũma bʉraɗadua. Dji icawa orroza pʉrrʉga oroba tuca ɓʉɗadua. 25 Mesa ʉ̃rʉ̃ icawa bacuruda cara ɓʉɗadua jũgurua ɓemãrẽã. Maʉ̃ bacuru ʉ̃tʉara jʉwa jĩwĩnĩ quĩmãrẽ ɓaida ɓʉa. Maʉ̃ siɗa icawa pʉrrʉga oroba tuca ɓʉɗadua. 26 25:26-28 Maʉ̃be pĩrũ oroɗeda quĩmãrẽ omoa oɗadua. Maʉ̃ra mesa jĩrũza cara ɓʉɗadua dji jũgurua oɗa edrecarebe. Maʉ̃gʉɗe eɗa bacuruda berajuɗadua jira edeɗi carea. Maʉ̃ra acacia bacuru oɗa baida ɓʉa. Biya erapeɗa oroba bʉraɗadua. 29 Idjaɓa oro idji awa quiruda edaɗapeɗa epeɗeco ɓeada, epeɗeco jũgurua ɓeada, taza ɓeada, zoco ɓea siɗa mesaɗe ɓʉɗi carea oɗadua. Taza ɓeara, zoco ɓea siɗa mesaɗe ɓʉɗadua uva ɓa mʉ̃́a wea diaɗi carea. 30 Idjaɓa paʉ̃ mʉ̃ quĩrãpita ɓaida ɓʉra maʉ̃ mesaɗe ewariza eropananadua.

Ĩbĩrã ɓʉbada

31 Idjaɓa oro idji awa quiruda edaɗapeɗa ĩbĩrã ɓʉbadada toa chĩ oɗadua. Dji jĩrũda, dji cacuada, dji gʉ̃rʉ̃gʉ̃rʉ̃ã nepõnõ zaca ɓeara, dji ĩbĩrã ɓʉɗi careabema siɗa aɓari oro idji awa quiruɗebemada ɓaida ɓʉa. 32 Maʉ̃ ĩbĩrã ɓʉbada cacuara sei jʉwate eroɓaya. Orro aɓaare ũbea ɓaya. Dewarabema orroare biɗa ũbea ɓaya. 33 Jʉwateza gʉ̃rʉ̃gʉ̃rʉ̃ã nepõnõ zaca ɓeada ũbea oɗida panʉa.* 34 Dji cacuaɗe biɗa gʉ̃rʉ̃gʉ̃rʉ̃ã nepõnõ zaca ɓeada quĩmãrẽ oɗida panʉa. 35 Dji jʉwate cara ɓeaza aɓa oɗida panʉa. 36 Dji gʉ̃rʉ̃gʉ̃rʉ̃ã nepõnõ zaca ɓeara, dji jʉwate ɓeara, dji cacua siɗa aɓari oro idji awa quiruɗebemada toa chĩ oɗadua.

37 Idjaɓa ĩbĩrãda siete oɗadua. Maʉ̃gʉrã ĩbĩrãra dji ĩbĩrã ɓʉbada jʉwate quẽbʉza ɓʉɗadua mʉ̃ dejãra ʉ̃na eroɓamãrẽã.* 38 Idjaɓa oro idji awa quiruda edaɗapeɗa ĩbĩrã quĩrã tʉbadara, ĩbĩrã quĩrã tʉɗa ãyã edebada epeɗeco zaque siɗa oɗadua. 39 Oro idji awa quiru ĩbĩrã ɓʉbadara idjaɓa ne jũma idjiɗebema siɗa zabʉdaɗe dji zʉgʉara 75 libra ɓaida ɓʉa. 40 Jũma daucha oɗadua mʉ̃a naʉ̃ eyaɗe unubiɗa quĩrãca.