Exodo

Animarã babue diabada

27 Idjaɓa animarã babue diabada acacia bacuruɗeda oɗadua. Dji drasoara bicaca juesuma ɓaida ɓʉa. Dji jouɓʉa siɗa bicaca juesuma ɓaida ɓʉa quĩrã quĩmãrẽena aɓarica ɓamãrẽã. Dji ʉ̃tʉara bicaca ũbea ɓaida ɓʉa. 2 Aɓari bacuruɗe iquiɗaza cachu quĩrãca oɗapeɗa maʉ̃ animarã babue diabadara bronceba jũma bʉraɗadua. 3 Idjaɓa tʉbʉ pora ãyã cuabadada, tʉbʉ pora tãĩbadada, oa piabadada, warebada mĩãsuda, tʉbʉdau edebada siɗa jũma bronceɗeda oɗadua. 4 27:4-5 Idjaɓa jʉrrʉjʉrrʉa bronceɗeda oɗadua. Maʉ̃ jʉrrʉjʉrrʉara animarã babue diabadaɗe dji iɗeba eɗaa ẽsidra cara ɓʉɗadua.* Maʉ̃be pĩrũ omoa bronceɗeda quĩmãrẽ oɗapeɗa jʉrrʉjʉrrʉa ɓʉmaa animarã babue diabada iquiɗaza cara ɓʉɗadua. 5 – 6 27:6-7 Maʉ̃be acacia bacuruda umé eraɗapeɗa bronceba bʉraɗadua. Maʉ̃ bacurura animarã babue diabada orroza pĩrũ ɓeaɗe berajuɗadua jira edeɗi carea. 7 – 8 Animarã babue diabadara wãyã uria ɓaya bacuru ʉrraɗaɗeda oɗi bẽrã. Ara mʉ̃a naʉ̃ eyaɗe unubiɗa quĩrãca jũma daucha oɗadua.

Ãcõrẽ wua de auɗu jũrã ɓʉɗa

9 27:9-11 Mʉ̃ wua dera auɗu jũrã ɓʉɗadua dji biara ɓʉ lino wuaba. Maʉ̃ auɗu jũrã ɓʉ orroza veinte bronce oɗa uria ɓeada ɓʉɗapeɗa bacuru tẽnara maʉ̃gʉɗe eɗa wẽãju nũmʉnadua. Maʉ̃ bacuru quẽbʉra parataba bʉraɗadua idjaɓa wua jũẽbari parata oɗa siɗa cara ɓʉɗadua. Lino wuara maʉ̃ne eatʉ jũẽcuaɗadua. Mʉ̃ wua de auɗu jũrã ɓʉ drasoara cien bicaca ɓaya.

12 Jẽdaare biɗa bronce oɗa uria ɓeada die ɓʉɗapeɗa maʉ̃ne bacuru tẽnara eɗa wẽãju nũmʉnadua. Lino wuara maʉ̃gʉɗe eatʉ jũẽcuaɗadua. Mʉ̃ wua de auɗu jũrã ɓʉ jẽdaarebemara cincuenta bicaca ɓaya idjaɓa ʉ̃mãdau ɓaebariare ɓaida ɓʉa. 13 Dji nocoarebemara ʉ̃mãdau odjabariare ɓaida ɓʉa. Maʉ̃ siɗa cincuenta bicaca ɓaya. 14 27:14-15 Maʉ̃ne dji eɗa wãbadara ẽsidra ɓaya. Dji eɗa wãbada jʉwa acʉare bronce oɗa uria ɓeada ũbea ɓʉɗapeɗa bacuru tẽnara maʉ̃ne eɗa wẽãju nũmʉnadua. Jʉwa araare biɗa aɓari quĩrãca oɗadua. Maʉ̃ne lino wuara eatʉ jũẽcuaɗadua. Dji eɗa wãbada orro aɓaare wuara quince bicaca ɓaya idjaɓa dewarabema orroare biɗa quince bicaca ɓaya. 16 Mʉ̃ wua de auɗu jũrã ɓʉɗe eɗa wãbadara veinte bicaca ɓaya. Bronce oɗa uria ɓeada quĩmãrẽ dji eɗa wãbadama ɓʉɗapeɗa bacuru tẽnara wẽãju nũmʉnadua. Maʉ̃be dji biara ɓʉ lino wuada edaɗapeɗa maʉ̃ wuaɗe eɗa oveja cara nayãna pãwãrã oɗada, pursupursua oɗada, purea oɗa siɗa caɗadua. Maʉ̃ wuaba dji eɗa wãbadara jũãtrʉ ɓʉɗadua.

17 27:17-18 Jũma mʉ̃ wua de auɗu jũrã ɓʉ bacuru tẽnara bronce oɗa uria ɓeaɗe eɗa wẽãju nũmeania. Bacuru quẽbʉza parata oɗa wua jũẽbarida eroɓeaɗia idjaɓa parataba bʉrá ɓeaɗia. Maʉ̃ bacuruɗe eatʉ jũẽ ɓʉ lino wua jouɓʉara bicaca juesuma ɓaya. Mʉ̃ wua de auɗu jũrã ɓʉ ẽjũã drasoara cien bicaca ɓaya. Dji jeɗeara cincuenta bicaca ɓaya. 19 Jũma mʉ̃ wua de dajadaarebema siɗa bronce oɗa baya. Dji egoroɗe cachiɗi careabema siɗa bronce oɗa baya.

Olivo draga ĩbĩrã coaɗi careabema

20 Israelerãa jaradua olivo draga idji awa quiruda enenamãrẽã. Maʉ̃ dragara ĩbĩrãne weaɗia urua ɓamãrẽã. 21 Aaroʉ̃ba idji warrarã biɗa mʉ̃ wua deɗe ɓʉ ĩbĩrãra quewaraza coaɗida panʉa mʉ̃ quĩrãpita urua ɓamãrẽã quewara eɗaʉba aɓa ʉ̃nadrʉbʉrʉɗaa.* Maʉ̃ ĩbĩrãra mʉ̃ baurude quĩrãpe ɓaya dji wua eatʉ jira ɓʉ nocoare. Mʉ̃a ĩbĩrã coabi ɓʉ leyra bãrã israelerãba, bãrã warrarãneba yõbʉdarã biɗa ewariza ĩjã o pananida panʉa.