Exodo

Moise Aaroʉ̃ siɗa Egiptoɗebema boro ume beɗeapeɗaɗa

5 Mãwãnacarea Moisera, Aaroʉ̃ siɗa Egiptoɗebema boromaa wãnapeɗa jarasiɗaa:

–Israelerã Ãcõrẽba nãwã jara ɓʉa: “Mʉ̃ purura ẽjũã põãsa ewaraga ɓʉɗe idu wãbidua mʉ̃́a animarãda babue diaɗamãrẽã.”–

2 Maʉ̃ne Egiptoɗebema boroba panusia:

–¿Cai maʉ̃ Ãcõrẽ mãwã idjia israelerã idu wãbiduaɗa aɗara mʉ̃a ĩjãi carea? Mʉ̃a idjira adua ɓʉa. Maʉ̃ bẽrã mʉ̃a bãrã israelerãra idu wãbiẽ́a.–

3 Moiseba Aaroʉ̃ biɗa jarasiɗaa:

–Dai hebreorã Ãcõrẽda daima odjapeɗa jarasia idji itea animarãda babue diaɗe wãnamãrẽã. Maʉ̃ bẽrã dairãra ẽjũã põãsa ewaraga ɓʉɗe ewari ũbea idu wãbidua mãwã oɗi carea. Mãwã oɗaẽ́bʉrʉ, Ãcõrẽba dairãra cacua biẽ́ ɓʉpeɗa quinibiya wa necoba quenabiya.

4 5:4-5 Baribʉrʉ Egiptoɗebema boroba jarasia:

–¡Moise, Aaroʉ̃! Israelerãra zocãrã panʉa. ¿Cãrẽ cãrẽã bãrãba ãdjirã trajura obi ama panʉ? Bãrã israelerãra jũma trajaɗe wãbʉrʉɗadua.– 5 –

6 Ara maʉ̃ ewariɗe Egiptoɗebema boroba dji traju obibada bororãa, dji traja panʉ bororã israelerãa biɗa jarasia:

7 –Iɗiba ʉ̃taa israelerãa chiruada waa diarãnadua. Ãdjirãbʉrʉ chiruara jʉrʉ peɗe wãnapeɗa de obada mõgarara oɗida panʉa. 8 Baribʉrʉ waɗibiɗa ãdjia o panana quĩrãca obiɗadua. Ni aɓa biɗa eɗaara oɗiẽ́ panʉa. Ãdjirãra coaiɗa taɓea bẽrã nãwã jara panʉa: “Dairãra idu wãbidua dai Ãcõrẽa animarãda babue diacuaɗi carea.” 9 Israelerãra wetara trajabiɗadua bari ɓearãnamãrẽã. Mãwã ãdjirãba Moise sewara ĩjãnaẽ́a.–

10 Ara maʉ̃da dji traju obibada bororãra, dji traja panʉ bororã israelerã siɗa Egiptoɗebema boromaʉba ẽdrʉɗapeɗa israelerãa nãwã jaraɗe wãsiɗaa:

–Egiptoɗebema boroba nãwã jara ɓʉa: “Mʉ̃a waa chiruara diabiẽ́a de obada mõgara oɗamãrẽã. 11 Bãdjiabʉrʉ chiruara jʉrʉ peɗe wãnida panʉa bãdjia jʉrʉbʉdamaa. Baribʉrʉ naãrã o panana quĩrãca oɗida panʉa. Ni aɓa biɗa eɗaara oɗiẽ́ panʉa.”–

12 Maʉ̃ bẽrã israelerãba jũma Egipto druaɗe chiruara jʉrʉ peɗe wãsiɗaa. 13 Mãwã dji traju obibada bororãba israelerãra wetara trajabisiɗaa. Nãwã jarasiɗaa:

–Ewariza daucha oɗadua naẽna chirua diabadjiɗaɗe o panana quĩrãca.–

14 Idjaɓa dji traju obibada bororãba dji traja panʉ bororã israelerãda ubadjiɗaa ãdjia ɓʉpeɗaɗamĩna. Dji traju obibada bororãba ãdjirãa iwiɗibadjiɗaa:

–¿Sãwãẽrã nuena, iɗi biɗa bãrãba de obada mõgarara daucha oɗaẽ́ panʉ? Naẽna bãrãba ewariza daucha obadjiɗaa.–

15 Maʉ̃ bẽrã dji traja panʉ bororã israelerãra Egiptoɗebema boromaa wãnapeɗa nãwã jarasiɗaa:

–Dairã bʉ nezocarãra bʉa jãwã oiẽ́ ɓʉa. 16 Iɗira chiruada diaɗaẽ́ panʉa, baribʉrʉ waɗibiɗa dji traju obibada bororãba de obada mõgarara aɓarica daucha obi panʉa. Mãwã poya oɗaẽ́ panʉ carea ãdjirãba dairãra ubadaa. Baribʉrʉ dairãra beɗeaɗe panʉẽ́a, ãtebʉrʉ bʉa ɓʉcuaɗa traju obibada bororãda beɗeaɗe panʉa.–

17 Maʉ̃ne Egiptoɗebema boroba panusia:

–Bãrãra coaiɗa taɓeaa. Maʉ̃ bẽrã nãwã jara panʉa: “Dairãra wãnia Ãcõrẽa animarãda babue diacuaɗi carea.” 18 Wãnadua bãdji trajuɗaa. Daiba chiruara bãrãa waa diaɗaẽ́a. Baribʉrʉ bãrãba de obada mõgarara naãrã o panana quĩrãca oɗida panʉa.–

19 Maʉ̃ ũrĩsiɗaɗe dji traja panʉ bororãba cawasiɗaa nẽbʉraɗe panʉda. 20 Ãdjirã Egiptoɗebema boromaʉba ẽdrʉbʉdaɗe unusiɗaa Moiseba Aaroʉ̃ biɗa dajadaare ãdji jʉ̃ã panʉda. 21 Dji traja panʉ bororãba ãdjía jarasiɗaa:

–Ãcõrẽba bãrãra cawa oya. Bãrãdrʉ beɗeaɗe panʉa dairãra Egiptoɗebema boro quĩrãpita, dji dromarã quĩrãpita biɗa biẽ́ panebʉda carea. Iɗibʉrʉ bãrãba dairãra quenabiɗia.–

Moiseba Ãcõrẽa iwiɗiɗa

22 Maʉ̃be Moiseba Ãcõrẽa iwiɗisia:

–¡Mʉ̃ Boro! ¿Cãrẽ cãrẽã bʉ purura biẽ́ o ɓʉ? ¿Cãrẽ cãrẽã mʉ̃ra diabuesi? 23 Mʉ̃a Egiptoɗebema boro ume bʉ trʉ̃neba beɗeaɗamĩna, maʉ̃ ewariɗeba idjia Israel purura wetara biẽ́ o ɓʉa. Maʉ̃ awara bʉa ẽdrʉ ɓʉyaɗa aɗara waɗibiɗa oẽ́ ɓʉa.–