Joná

Jonába Ãcõrẽa iwiɗiɗa

2 Maʉ̃ne Jonába ɓeda ɓiteɗaʉba Ãcõrẽa nãwã iwiɗisia:

2 Mʉ̃ biẽ́ ɓesiɗe mʉ̃a beɗea djuburiasia, mʉ̃ Boro Ãcõrẽ, maʉ̃ne bʉa mʉ̃ beɗeara panusia.

Mʉ̃ beuboɗoba mʉ̃a beɗea djuburiasia, maʉ̃ne bʉa mʉ̃ beɗeara ũrĩsia.

3 Bʉa mʉ̃ra pusa nãbuaɗe ɓatabuebisia. Maʉ̃ne pusaba mʉ̃ra aɓeɗa jũma ãnã edasia. Bʉa pusa bogozoa ɓʉ diabueɗara mʉ̃ ʉ̃rʉ̃ wãsia.

4 Maʉ̃ bẽrã crĩchasia bʉa mʉ̃ra igarapeɗa bʉ quĩrãpitabemada ãyã ɓʉsida. Mʉ̃a crĩchasia bʉ de droma biya quiruda waa unuẽ́da.*

5 Pusaba mʉ̃ra jũma ãnã eroɓasia. Aɓeɗa mʉ̃ra pusajãne ɓasia. Maʉ̃ne pusajãnebema chiruara mʉ̃ boroɗe bʉracuasia.

6 Aɓeɗa mʉ̃ra eɗu pusajãne ta wãsia. Mamaʉba mʉ̃ra waa ẽdrʉẽ́da crĩchasia.

Baribʉrʉ mʉ̃ Boro Ãcõrẽ, bʉa maʉ̃ beuiɗebemada mʉ̃ra ẽdrʉ edasia.

7 Beuboɗo basiɗe mʉ̃a bʉra quĩrãnebasia. Maʉ̃ne bʉ de droma bia quiruɗeba bʉa ũrĩsia mʉ̃a beɗea djuburia ɓʉda.

8 Jʉwaba oɗa ãcõrẽ ʉɓʉaẽ́ ɓea ẽpẽbadarãba bʉa careba ɓʉra igarabadaa.

9 Baribʉrʉ mʉ̃a bio bia ɓʉaɗa abʉrʉɗe animarãda bʉ́a babue dia ɓaya.

Maʉ̃ awara bʉ ume beɗea ɓʉɗara mʉ̃a jũma daucha o ɓaya. Mʉ̃ Boro Ãcõrẽ, aɓabe bʉabʉrʉ mʉ̃ra poya ẽdrʉ ɓʉya.

10 Maʉ̃ne Ãcõrẽba ɓedaa Jonára pusa icawa webisia.