Joná

Ãcõrẽba Ninive quĩrã djuburiaɗa

4 Ãcõrẽba mãwã quĩrã djuburiaɗara Jonába aɓeɗa biẽ́ unusia. Maʉ̃ bẽrã bio quĩrũsia. 2 Idjia Ãcõrẽa nãwã jarasia:

–Mʉ̃ Boro Ãcõrẽ, waɗibiɗa mʉ̃ druaɗe ɓasiɗe ¿mʉ̃a jaraẽ́ basica ara maʉ̃ quĩrãca mãwãida? Maʉ̃ carea mʉ̃ra Tarsi druaɗaa mĩrũ wã quĩrĩãsia. Mʉ̃a bio cawa ɓʉa bʉ biaɗeba ẽberãrãra carebabarida. Bʉra quĩrã djuburiaiɗa ɓʉa. Isabe quĩrũcaa. Bʉ quĩrĩãra bio waiɓʉa ɓʉ bẽrã ẽberãrãba cadjiruada idu ɓʉsiɗara bʉa ãdjirãa cawa oi jaraɗara quĩrãdoabaria. 3 Maʉ̃ carea mʉ̃ Boro Ãcõrẽ, mʉ̃a bʉ́a quĩrã djuburia iwiɗiya aɓeɗa mʉ̃ra beamãrẽã. Zocai ɓei cãyãbara biara ɓʉa mʉ̃ra beuida.–

4 Baribʉrʉ Ãcõrẽba jarasia:

–¿Bʉmaarã bia ɓʉca bʉ jãwã quĩrũ ɓʉra?–

5 Maʉ̃be Jonára puru dajadaa wãpeɗa ʉ̃mãdau odjabariare de zaqueda osia. Maʉ̃ de zaque edre chũmepeɗa jʉ̃ã ɓesia Ninive purura sãwãi cawaya. 6 Mãwã ɓʉɗe Ãcõrẽba Joná caita jʉ̃cara quedua jouɓʉa ɓʉda tunubipeɗa waribisia.* Maʉ̃ jʉ̃carara Joná chũmʉ ʉ̃rʉ̃ bʉrá wãna bẽrã Jonára cũrãsaɗe necai ɓesia. Idjira capipia ɓesia maʉ̃ jʉ̃cara carea.

7 Baribʉrʉ nurẽma diapeɗa Ãcõrẽba caragada diabuesia maʉ̃ jʉ̃cara comãrẽã. Maʉ̃ba jʉ̃carara beusia. 8 Besea odjaɗacarea Ãcõrẽba ʉ̃mãdau odjabariareba nãũrã jʉ̃wʉ̃rʉ̃ãda puábisia. Maʉ̃ne beseaba Jonára bá nũmesia. Mãwã ɓʉɗe Jonára cacua norraɓari nũmesia. Maʉ̃ carea idjira wetara beu quĩrĩãsia. Nãwã jarasia:

–Zocai ɓei cãyãbara biara ɓʉa mʉ̃ra beuida.–

9 Baribʉrʉ Ãcõrẽba idjía iwiɗisia:

–¿Naʉ̃ jʉ̃cara beuɗa carea bia ɓʉca bʉ jãwã quĩrũ ɓʉra?–

Jonába panusia:

–Mãẽ. Wãrãda mʉ̃maarã bia ɓʉa jãwã quĩrũ ɓaira. Mʉ̃ra quĩrũbiɗeba aɓeɗa beu quĩrĩã ɓʉa.–

10 Maʉ̃ carea Ãcõrẽba idjía jarasia:

–Jʉ̃cara bʉ caita tununara bʉa uẽ́ basía idjaɓa waribiẽ́ basía. Diamasi tunupeɗa nurẽma diamasi beusia. Baribʉrʉ maʉ̃ jʉ̃cara beuɗa carea bʉra sopua ɓʉa. 11 Bʉda maʉ̃ jʉ̃cara carea sopua ɓʉbʉrʉ, ¿Ninive puru droma cawa oida ɓaɗa carea auɗuara sopua ɓapeɗa mʉ̃a quĩrã djuburiaiẽ́ ɓasica? Wãrãda jãʉ̃ puruɗe cadjirua o panʉ adua ɓeada 120 mil auɗu panʉa.* Maʉ̃ awara animarã siɗa baraa.–