Mateo
Jesuba pariseorã biẽ́ jaraɗa
Marco 12:38-40; Luca 11:37-54; 20:45-47
23 Mãwãnacarea Jesuba idji ume nĩbabadarãa, dewara ẽberãrãa biɗa nãwã jarasia:
2 –Judiorã ley jaradiabadaba, pariseorã biɗa Moiseba jaradia ɓaɗara jaradiabadaa. 3 Maʉ̃ bẽrã ãdjirãba jarabadara jũma ĩjã oɗadua. Baribʉrʉ ãdjirãba ara ãdjia jaradia panʉ quĩrãca oɗacaa. Maʉ̃ bẽrã ãdjirãba o panʉ quĩrãca orãnadua. 4 Ãdjirãba ẽberãrãa beɗea zareada ĩjã obibadaa ne zʉgʉa ataubi panʉ quĩrãca. Baribʉrʉ ariɗe ĩjã oɗamãrẽã ni maãrĩ biɗa carebaɗacaa.
5 Ãdjirãba ne jũmada obadaa dewararãba bia ununamãrẽã. Ãcõrẽ beɗea cartaɗe ɓʉɗara buchaca zaqueɗe eɗa ɓʉɗapeɗa ãdji dratuɗe, jʉwapotoɗe biɗa jʉ̃badaa. Baribʉrʉ dji buchacara jouɓʉa obadaa dewararãba bia ununamãrẽã. Idjaɓa maʉ̃ carea ãdjia jʉ̃bada iɗe jizojizoa drasoa ɓeada cajuɗapeɗa jʉ̃badaa.* 6 Ãbaa ne cobʉdaɗe ãdjira dji dromarã chũmebadaɗe chũme quĩrĩãbadaa. Judiorã dji jʉrebada deɗe biɗa ara maʉ̃ quĩrãca obadaa. 7 Idjaɓa puruɗe nĩnane quĩrĩãbadaa ẽberãrãba ãdjía wayaaɗeba “Mẽrã, Jaradiabari” aɗida.
8 Baribʉrʉ bãrãra jũmaena djabarã bẽrã idjaɓa Jaradiabarida aɓa eropanʉ bẽrã quĩrĩãniẽ́ panʉa ẽberãrãba bãrãa “Jaradiabari” aɗida.* 9 Maʉ̃ awara naʉ̃ duɗabema ni aɓaʉa “dai zeza” arãnadua, Zezada aɓa bajãne eropanʉ bẽrã. 10 Idjaɓa quĩrĩãrãnadua ẽberãrãba bãrãa “dai boro” aɗida, bãrã Borora aɓabʉrʉ ɓʉ bẽrã. Idjira Ãcõrẽba ẽdrʉ edabari diai jaraɗaa. 11 Bãrãnebemada dji dromaara ɓʉra waabemarã nezocada ɓaida ɓʉa. 12 Bariduada dji dromaara ɓa quĩrĩã ɓʉbʉrʉ Ãcõrẽba eɗaara ɓʉya. Aɓaʉba ara idjida eɗaara ɓʉibʉrʉ Ãcõrẽba dji dromaara ɓʉya.
13 ¡Bãrã pariseorã, judiorã ley jaradiabadarã, dji biaca ɓearã, mĩã djuburi panʉa Ãcõrẽba cawa oi bẽrã! Bãrãba ẽberãrãa Ãcõrẽba pe eroɓʉɗebemada idu cawabiɗacaa. Quĩrĩãnaẽ́ panʉa idjia bãrãra pe eroɓaida idjaɓa dewararãba mãwã quĩrĩã panʉ siɗa bãrãba iduaribiɗacaa.
14 ¡Bãrã pariseorã, judiorã ley jaradiabadarã, dji biaca ɓearã, mĩã djuburi panʉa Ãcõrẽba cawa oi bẽrã! Pẽdra wẽrãrãba eroɓeara jũma jãrĩbadamĩna dji biarãda crĩchabiɗi carea jũmarã quĩrãpita dãrã Ãcõrẽa iwiɗibadaa. Maʉ̃ carea Ãcõrẽba bãrãra biara cawa oya.*
15 ¡Bãrã pariseorã, judiorã ley jaradiabadarã, dji biaca ɓearã, mĩã djuburi panʉa Ãcõrẽba cawa oi bẽrã! Naʉ̃ ẽjũãne, pusaɗe biɗa pʉrrʉabadaa bãrãba jaradia nĩnada aɓaʉa ĩjãbiɗi carea. Baribʉrʉ maʉ̃ ĩjãbʉrʉra bãrã cãyãbara biẽ́ara ɓepeɗa wetara tʉbʉ uruaɗe ɓaida ɓʉa.
16 ¡Bãrãra mĩã djuburi panʉa Ãcõrẽba cawa oi bẽrã! Dauɓerrea ɓea quĩrãca panʉa. ¿Sãwã purura jipa pe edeɗi? Nãwã ãĩ jaradiabadaa: bariduaba Ãcõrẽ de droma trʉ̃neba wãrãda ne oida jaraibʉrʉ, mãwã oẽ́ siɗa cadjiruaẽ́ana abadaa. Baribʉrʉ Ãcõrẽ deɗe ɓʉ oro trʉ̃neba ne oida jaraibʉrʉ, wãrãda oida ɓʉaɗa abadaa. 17 ¡Bãrãra crĩcha neẽ́ ɓeaa! ¡Dauɓerrea ɓea quĩrãca panʉa! ¿Sãʉ̃da biara ɓʉ? ¿Ãcõrẽ de dromada dji oro cãyãbara biara ɓʉẽ́ca? Maʉ̃ orora Ãcõrẽ itea bia ɓʉa aɓabe Ãcõrẽ deɗe ɓʉ bẽrã.
18 Bãrãba naʉ̃ siɗa jarabadaa: “Bariduaba animarã babue diabada trʉ̃neba wãrãda ne oida jaraibʉrʉ, mãwã oẽ́ siɗa cadjiruaẽ́a. Baribʉrʉ dji animarã trʉ̃neba ne oida jaraibʉrʉ, wãrãda oida ɓʉa.” 19 ¡Bãrãra crĩcha neẽ́ ɓeaa! ¡Dauɓerrea ɓea quĩrãca panʉa!* ¿Sãʉ̃da biara ɓʉ? ¿Ne babue diabadada dji animarã cãyãbara biara ɓʉẽ́ca? Maʉ̃ animarãra Ãcõrẽ itea bia ɓʉa aɓabe ne babue diabada ʉ̃rʉ̃ ɓʉ bẽrã.
20 Ũrĩnadua: aɓaʉba ne babue diabada trʉ̃neba wãrãda ne oida jaraibʉrʉ, aɓabe maʉ̃ trʉ̃neba mãwã oida jaraẽ́ ɓʉa. Ãtebʉrʉ maʉ̃ ʉ̃rʉ̃ ɓʉ animarã trʉ̃neba mãwã oida jara ɓʉa. 21 Maʉ̃ awara aɓaʉba Ãcõrẽ de droma trʉ̃neba wãrãda ne oida jaraibʉrʉ, aɓabe maʉ̃ trʉ̃neba mãwã oida jaraẽ́ ɓʉa. Ãtebʉrʉ Ãcõrẽ maʉ̃ deɗe ɓʉ trʉ̃neba mãwã oida jara ɓʉa. 22 Maʉ̃ awara aɓaʉba bajã trʉ̃neba wãrãda ne oida jaraibʉrʉ, Ãcõrẽ bugue trʉ̃neba mãwã oida jara ɓʉa idjaɓa Ãcõrẽ mama chũmʉ trʉ̃neba wãrãda ne oida jara ɓʉa.
23 23:23-24 ¡Bãrã pariseorã, judiorã ley jaradiabadarã, dji biaca ɓearã, mĩã djuburi panʉa Ãcõrẽba cawa oi bẽrã! Burrumia sãbada quĩrãca Ãcõrẽ leyɗe maãrĩara ɓʉda quĩrãcuita obadaa. Menta queduada, aní tada, comino siɗa die ewabʉdaza aɓa Ãcõrẽa diabadaa. Baribʉrʉ cameyo mĩbuebʉda quĩrãca Ãcõrẽ leyɗe dji dromaara ɓʉda oɗacaa. Djãrã ume jipa oɗacaa, quĩrã djuburiaɗacaa, idjaɓa Ãcõrẽra ĩjãnacaa. Bãrãba idjía ne diabʉda awara ¿cãrẽ cãrẽã maʉ̃ siɗa oɗaẽ́ panʉ? ¡Dauɓerrea ɓea quĩrãca panʉa! ¿Sãwã purura jipa pe edeɗi?
25 ¡Bãrã pariseorã, judiorã ley jaradiabadarã, dji biaca ɓearã, mĩã djuburi panʉa Ãcõrẽba cawa oi bẽrã! Bãrãba tazara, epeɗeco siɗa ʉ̃rʉ̃bemada quĩrãcuita sʉgʉbadaa, baribʉrʉ eɗa mititia ɓʉa. Ara maʉ̃ quĩrãca bãrã soɗe ne jũmada ara bãdji itea eda quĩrĩãbadaa idjaɓa ne drʉabadaa. 26 ¡Pariseo dauɓerre! Naãrã tazara, epeɗeco siɗa eɗa sʉgʉdua; mãwãbʉrʉ ʉ̃rʉ̃bema siɗa bia sʉgʉ ɓaya.*
27 ¡Bãrã pariseorã, judiorã ley jaradiabadarã, dji biaca ɓearã, mĩã djuburi panʉa Ãcõrẽba cawa oi bẽrã! Bãrãra beuɗarã tʉɓaripeɗaɗa ʉ̃rʉ̃ totroa nũmʉ quĩrãca ɓeaa. Maʉ̃gʉra dajadaare bia quirua, baribʉrʉ eɗaare beuɗarã ɓʉwʉrʉba, ne jũma mititiaba bira ɓʉa. 28 Ara maʉ̃ quĩrãca bãrãra ẽberã daumaarã jipa ɓeaca panʉa, baribʉrʉ wãrãda bãrãba jaradiabadara oɗacaa. Bãrã sora ne jũma cadjiruaba bira ɓeaa.
29 ¡Bãrã pariseorã, judiorã ley jaradiabadarã, dji biaca ɓearã, mĩã djuburi panʉa Ãcõrẽba cawa oi bẽrã! Ãcõrẽneba beɗeabadarã tʉɓaripeɗaɗama bãrãba ʉ̃rʉ̃bemada bia quiruda obadaa. Dewara jipa ɓearã tʉɓaripeɗaɗama biɗa ara maʉ̃ quĩrãca obadaa. 30 Maʉ̃ne bãrãba jarabadaa: “Dadji drõãenabema ewariɗe pananabara, Ãcõrẽneba beɗeabadarãda careba beaɗaẽ́ bacasia.” 31 Mãwã bãrãba jara panʉa Ãcõrẽneba beɗeabadarã quenapeɗaɗarãneba yõsiɗada. Bãrãra ara ãdjirã quĩrãca ɓeaa. 32 ¡Maʉ̃ bẽrã bãrã drõãenabemaba opeɗaɗaẽ́ra jũma oɗadua!
33 ¡Bãrãra dama quĩrãca ɓeaa! Ãcõrẽba bãrãra wãrãda tʉbʉ uruaɗe biẽ́ ɓʉya. 34 Mʉ̃a Ãcõrẽneba beɗeabadarãda, crĩcha cawa ɓeada, Ãcõrẽ ley jaradiabada siɗa bãrãmaa diabueya. Baribʉrʉ bãrãba ʉ̃cʉrʉ beaɗia idjaɓa ʉ̃cʉrʉ cruɗe cachi jira ɓʉɗia. Dewararãda bãrã dji jʉrebada deɗe soaba uɗia idjaɓa biẽ́ oɗi carea puruza ẽpẽnia. 35 Maʉ̃ bẽrã jũma ẽberã jipa ɓea naãrãeɗaʉba beapeɗaɗa carea Ãcõrẽba bãrãra cawa oya: Abel jipa ɓʉ beapeɗaɗa carea, Berequía warra Zacaria beapeɗaɗa carea idjaɓa jũma dewararã beapeɗaɗa carea biɗa. Zacariara Ãcõrẽ de dajadaare dji animarã babue diabada caita beasiɗaa.* 36 Wãrã arada mʉ̃a jaraya: jũma maʉ̃ ẽberãrã beapeɗaɗa carea Ãcõrẽba iɗibema ẽberãrãra cawa oya.–
Jesu Jerusaleʉ̃ carea sopuaɗa
37 ¡Jerusaleʉ̃, Jerusaleʉ̃, bãrãba Ãcõrẽneba beɗeabadarãda beabadaa! ¡Ãcõrẽba diabueɗarã siɗa mõgaraba taɓari beabadaa!* Mʉ̃a ɓarima zocãrã bãrãra ãbaa pe eda quĩrĩã ɓasia eterre wẽrãba idji warrarã i edre edabari quĩrãca. Mãwãmĩna bãrãba quĩrĩãnaẽ́ basía. 38 Maʉ̃ carea Ãcõrẽra waa bãrã ume ɓaẽ́a.* 39 Mʉ̃a bãrãa jaraya: ara iɗiba mʉ̃ra waa ununaẽ́a aɓa mʉ̃ bia edabʉdaɗaa. Maʉ̃ ewariɗe nãwã jaraɗia: “¡Bio bia ɓʉa Ãcõrẽ trʉ̃neba zebʉrʉra!”–*