Mateo
Borocuebari Juaʉ̃nebema
Marco 1:1-8; Luca 3:1-9, 15-17; Juaʉ̃ 1:19-28
3 Mãwãnacarea Borocuebari Juaʉ̃ba Judeaɗe ẽjũã põãsa ewaraga ɓʉɗe jaradia ɓesia. 2 Nãwã jarabadjia:
–Ãcõrẽra zebʉrʉa jũmarã Boro bai carea.* Maʉ̃ carea bãrãba cadjirua obadara igaraɗapeɗa idjimaa zeɗadua.–
3 Maʉ̃ Juaʉ̃nebemada Ãcõrẽneba beɗeabari Isaíaba jarasia:
Ẽberãda ẽjũã põãsa ewaraga ɓʉɗe jĩgua beɗea ɓʉa:
Ora jariɗadua dadjirã Boro bia edaɗamãrẽã. Ora idji itea jipa jariɗadua.*
4 Juaʉ̃ba jʉ̃barira cameyo cara oɗa basía. Idjia jʉ̃ ɓʉ trãjʉ̃barira animarã e oɗa basía. Idjia aɗichichida cobadjia idjaɓa urrajõda jõbadjia. 5 Maʉ̃ne ẽberãrã Jerusaleʉ̃nebemarãda, jũma Judea druaɗebemarãda, idjaɓa jũma Jordaʉ̃ do caita ɓearã siɗa Juaʉ̃maa wãbadjiɗaa. 6 Ãdjia cadjirua opeɗaɗada idji quĩrãpita ebuɗa jarabadjiɗaa. Maʉ̃be Juaʉ̃ba ãdjirãra Jordaʉ̃ doɗe borocuebadjia. 7 Mãwã ɓʉɗe ʉ̃cʉrʉ judiorã ley jaradiabadada zesiɗaa Juaʉ̃ba borocuemãrẽã. Ʉ̃cʉrʉra pariseorã basía; ʉ̃cʉrʉra saduceorã basía. Baribʉrʉ Juaʉ̃ba ãdjirã unubʉrʉɗe jarasia:
–Dama ẽberãrã, ¿caiba jarasi bãrãra Ãcõrẽ quĩrũbiɗebemada poya mĩrũnida? 8 Bãrãba o panʉneba unubiɗadua wãrãda Ãcõrẽmaa zesiɗada. 9 Crĩcharãnadua Abrahaʉ̃ warrarã bẽrã Ãcõrẽba cawa oẽ́da. Mʉ̃a bãrãa ebuɗa jaraya: Ãcõrẽba quĩrĩãibʉrʉ, za taɓea mõgarara Abrahaʉ̃ warrarã babicuaya. 10 Maʉ̃ awara mʉ̃a jaraya: Ãcõrẽba zagarada eroɓʉa bacuru tutacuai carea. Jũma bacuru bia zauɗacara tutacuapeɗa tʉbʉɗe ɓatacuaya. Ara maʉ̃ quĩrãca Ãcõrẽba cadjirua obadarãda cawa oya.
11 Mʉ̃a bãrãra baidoba borocueya Ãcõrẽmaa zesiɗada cawabi carea. Baribʉrʉ mʉ̃ caiɗu zebʉrʉda mʉ̃ cãyãbara dji dromaara ɓʉa. Maʉ̃ bẽrã idjia jĩrũne jʉ̃ ɓʉ ẽrãi carea mʉ̃ra bia ɓʉẽ́a. Idjiabʉrʉ Ãcõrẽ Jaureda diaya.* Baribʉrʉ ĩjãnaẽ́bʉrʉ cawa oya.* 12 Ezoai careabemara idji jʉwaɗe eroɓʉa porara dji ta umebemada ãyã ɓʉi carea. Maʉ̃be dji tara wagaya baribʉrʉ dji porara tʉbʉ uruaɗe babueya.–
Juaʉ̃ba Jesu borocueɗa
13 Maʉ̃ ewariɗe Jesura Galilea druaɗeba Jordaʉ̃ doɗaa zesia Juaʉ̃ba idjira borocuemãrẽã. 14 Baribʉrʉ Juaʉ̃ba borocue amaaba jarasia:
–Bʉabʉrʉ mʉ̃ra borocueida ɓʉa. ¿Cãrẽ cãrẽã bʉra mʉ̃maa ze ɓʉ?–
15 Maʉ̃ne Jesuba panusia:
–Nawena bʉa obari quĩrãca odua. Biara ɓʉa dadjia jũma jipa oɗida Ãcõrẽba obi ɓʉ quĩrãca.–
Ara maʉ̃da Juaʉ̃ba ĩjãsia. 16 Jesura borocuepeɗa doeɗaʉba drua wãbʉrʉɗe cawaẽ́ne bajãda ewasia. Maʉ̃ne Jesuba Ãcõrẽ Jaurera puchirã quĩrãca idji ʉ̃rʉ̃ zebʉrʉda unusia. 17 Maʉ̃ awara Ãcõrẽ bajãneba eɗa beɗeabʉrʉda ũrĩsiɗaa. Nãwã jarasia:
–Naʉ̃drʉ mʉ̃ Warra quĩrĩã ɓʉ́a. Mʉ̃ra idji carea bio ɓʉsriɗa ɓʉa.–*