Luca
Jesu toɗa ewari
2 Maʉ̃ ewariɗe Romanebema boro Cesar Augustoba idji jʉwaeɗa ɓeara jũma juachabisia.* Maʉ̃ bẽrã jarasia puru ãĩ ɓeara ãdji puruɗaa wãnamãrẽã. 2 Maʉ̃ ẽberãrã juachabiɗara idjia naãrã obiɗa basía. Maʉ̃ ewariɗe Cirenioda Siria druaɗe dji boro basía. 3 Maʉ̃ne jũmarãda juachaɗamãrẽã ãdji puruza wãsiɗaa.
4 Maʉ̃ ewariɗe Josera Galilea druaɗe Nazare puruɗe ɓabadjia. Idjira Daviɗeba zeɗa bẽrã Judea druaɗe Beleʉ̃ puruɗaa wãsia. Beleʉ̃ra Davi topeɗaɗa puru basía. 5 Ãdji juachaɗamãrẽã idji quima bai Maria ume wãsia. Maʉ̃ ewariɗe Mariara ɓiogoa ɓasia. 6 Beleʉ̃ne panʉne Maria warra toi ewarira jũẽsia. 7 Cãĩbada de bari ɓʉra neẽ́ bẽrã idji warra iwina toɗara wuaba bʉrapeɗa animarã ne cobadaɗe coquirusia.
Bajãnebema nezoca oveja wagabadarãma odjaɗa
8 Maʉ̃ diamasi oveja wagabadarãba ãdji ovejara Beleʉ̃ caita waga panasiɗaa. 9 Cawaẽ́ne bajãnebema nezocada ãdjima odjasia. Maʉ̃ne Ãcõrẽ quĩrãwãrẽã dorrodorroaba ãdjima bio ʉ̃naga nũmesia. Maʉ̃ carea oveja wagabadara bio dauperasiɗaa. 10 Baribʉrʉ bajãnebema nezocaba ãdjía jarasia:
–Ne wayarãnadua. Mʉ̃a beɗea biada bãrãa jaraɗe ze ɓʉa. Maʉ̃ beɗea carea jũmarãda ɓʉsriɗaɗia. 11 Iɗi Davi topeɗaɗa puru Beleʉ̃ne bãrã ẽdrʉ edabarida tosiɗaa. Idjira Critoa, dadjirã Boroa.* 12 Naʉ̃gʉɗeba bãrãba cawaɗia mʉ̃a jarabʉrʉra wãrãda: bãrãba maʉ̃ warra zaquera wuaba bʉrá ɓʉda animarã ne cobadaɗe ununia.–
13 Ara mãwã jarabʉrʉɗe bajãnebema nezocarãda zocãrã odjasiɗaa. Jũma ãdjirãba Ãcõrẽa nãwã bia beɗeasiɗaa:
14 ¡Ãcõrẽ ʉ̃tʉ bajãne ɓʉra bio bia quirua! ¡Ẽberãrã Ãcõrẽba bia unu ɓʉra naʉ̃ ẽjũãne necai ɓeaɗia!*
15 Maʉ̃be bajãnebema nezocarãra bajãnaa wãsiɗaa. Ara maʉ̃da oveja wagabadarãba jarasiɗaa:
–Mãẽteara dadjirã Boroba cawabiɗara Beleʉ̃naa acʉɗe wãnia.–
16 Ara maʉ̃da wãbʉrʉsiɗaa. Jũẽsiɗaɗe Mariada, Joseda, dji warra zaque siɗa unusiɗaa. Warra zaquera animarã ne cobadaɗe ɓasia. 17 Maʉ̃ unupeɗaɗacarea bajãnebema nezocaba warraɗebema jaraɗara ãdjia jũmarãa nẽbʉrʉsiɗaa. 18 Oveja wagabadaba jara panʉ ũrĩsiɗaɗe jũmarãba cawa crĩchaɗaẽ́ panesiɗaa. 19 Baribʉrʉ dji papa Mariaba maʉ̃gʉɗebemada idji soɗe jũma quĩrãcuita crĩcha ɓabadjia. 20 Oveja wagabadarã jẽda wãbʉdaɗe ãdjia unupeɗaɗa carea idjaɓa ũrĩpeɗaɗa carea Ãcõrẽa bia beɗeasiɗaa. Bajãnebema nezocaba jaraɗa quĩrãca wãrãda jũma mãwãsia.
Jesu Ãcõrẽ de dromanaa edepeɗaɗa
21 Warra toɗacarea ocho ewari ɓʉɗe dji warra cacuara wẽãgosiɗaa. Maʉ̃ne idji trʉ̃ra ɓʉsiɗaa Jesu, dji papa ɓiogoai naẽna bajãnebema nezocaba jaraɗa quĩrãca.
22 Warra toɗa carea dji papaba wagaida ɓʉ ewarira wagasia Ãcõrẽba Moisea diaɗa leyɗe ɓʉ́ ɓʉ quĩrãca.* Maʉ̃ ewari jõnacarea idjia dji zeza ume warra zaquera Jerusaleʉ̃naa edesiɗaa Ãcõrẽ quĩrãpita ɓʉɗi carea. 23 Mãwã osiɗaa Ãcõrẽ leyɗe nãwã ɓʉ́ ɓʉ bẽrã: “Jũma warra iwinara Ãcõrẽa diaɗida panʉa.”* 24 Maʉ̃ awara Ãcõrẽ quĩrãpita bia ɓei carea dji papaba puchirãda babue diabisia Ãcõrẽ leyɗe nãwã ɓʉ́ ɓʉ bẽrã: “Puchirãda wa putujuda umé diaida ɓʉa.”*
25 Maʉ̃ ewariɗe ẽberã Simeoʉ̃ abadada Jerusaleʉ̃ne ɓasia. Maʉ̃ Simeoʉ̃ra jipa ɓasia idjaɓa Ãcõrẽba jara ɓʉra quĩrãcuita ĩjã obadjia. Idjia jʉ̃ã ɓasia Ãcõrẽba Israel puru sobiabi ewarida.* Ãcõrẽ Jaurera idji ume ɓasia. 26 Naẽna Ãcõrẽ Jaureba idjía cawabisia idji jaiɗai naẽna Ãcõrẽba ẽdrʉ edabari diai jaraɗara unuida. 27 Ãcõrẽ leyɗe ɓʉ́ ɓʉ quĩrãca oɗi carea djibarirãba Jesura Ãcõrẽ de dromanaa edesiɗaɗe Ãcõrẽ Jaureba Simeoʉ̃ra araa wãbisia. 28 Simeoʉ̃ba dji warra unusiɗe bara edapeɗa Ãcõrẽa nãwã bia jarasia:
29 Mʉ̃ Boro, jãʉ̃bebʉrʉ bʉ nezocara idu necai beubidua bʉa jaraɗa quĩrãca oɗa bẽrã.
30 Bʉa ẽdrʉ edabari diai jaraɗara mʉ̃́a unubisia.
31 Bʉa idjira ɓʉsia jũma puru ɓeaba ununamãrẽã.*
32 Idjira ʉ̃naa quĩrãca ɓaya judiorãẽ́ba bʉɗebemada cawaɗamãrẽã.
Idji carea bʉ puru Israelera bia jaraɗia.*
33 Simeoʉ̃ba ãdji warraɗebema jara ɓʉ ũrĩsiɗaɗe Jesu djibarirãba cawa crĩchaɗaẽ́ basía. 34 Maʉ̃ne Simeoʉ̃ba ãdjira bia jara ɓʉpeɗa Mariaa nãwã jarasia:
–Ãcõrẽba naʉ̃ warrara diasia israelerã zocãrã bia ɓʉmãrẽã idjaɓa zocãrã biẽ́ ɓʉmãrẽã. Cawabiya idjira Ãcõrẽneba ze ɓʉda, mãwãmĩna idjira biẽ́ jaraɗia. 35 Mãwã zocãrãba ãdji soɗe mẽrã eroɓeara unubiɗia. Idjaɓa bʉra bio sopua ɓaya mĩãsuba subʉda quĩrãca.–
36 Arima Ãcõrẽneba beɗeabari Ana abadada ɓasia. Idjira Aserɗeba yõna Panuel cau basía. Idjira djorada ɓasia. Awẽrã quiruda quima edapeɗa siete poa ɓʉɗe pẽdra basía. 37 Idji pẽdra ɓeɗara 84 poa ɓasia.* Ewariza ãsa, diamasi biɗa Ãcõrẽ de dromanaa wãbadjia Ãcõrẽa bia jarai carea, ne coɗaca ewari oi carea idjaɓa Ãcõrẽa iwiɗi carea. 38 Maʉ̃ djorara Jesu djibarirã caita wãpeɗa Ãcõrẽa bia beɗeasia. Maʉ̃be Ãcõrẽba Jerusaleʉ̃ puru ẽdrʉ edai ewari jʉ̃ã ɓeaa dji warra zaqueɗebemada beɗeasia.*
39 Ãcõrẽ leyɗe ɓʉ́ ɓʉ quĩrãca jũma opeɗaɗacarea Josera, Maria siɗa Galilea druaɗe ãdji puru Nazareɗaa jẽda wãsiɗaa. 40 Dji warrara cacua ʉɓʉa warisia. Idjira bio ne cawasia idjaɓa Ãcõrẽba ne jũmane idjira carebabadjia.
Jesu Ãcõrẽ de dromane ɓaɗa
41 Poaza Jesu djibarirãra Jerusaleʉ̃naa wãbadjiɗaa judiorã Egiptoɗeba ẽdrʉpeɗaɗa quĩrãnebabada ewari oɗi carea.* 42 Jesu doce poa ɓasiɗe ãdjira wãsiɗaa maʉ̃ ewari droma baɗi carea jũma judiorãba obada quĩrãca. Jesu siɗa ãdji ume wãsia. 43 Maʉ̃ ewari droma jõnacarea ãdjira jẽda wãsiɗaa. Baribʉrʉ ãdji warra Jesura Jerusaleʉ̃ne ɓesia. Maʉ̃ra ãdjia adua panasiɗaa. 44 2:44-45 Crĩcha panasiɗaa Jesura ẽberãrã tãẽna nĩda. Mãwã ewari aɓa nĩbasiɗaa. Quewara idji jʉrʉsiɗaɗe ãdji ẽberãrã tãẽna ununaẽ́ basía. Ara maʉ̃da jẽda Jerusaleʉ̃naa Jesu jʉrʉɗe wãsiɗaa.
46 Ewari ũbea babʉrʉɗe idjira unusiɗaa Ãcõrẽ de droma dajadaare judiorã ley jaradiabadarã tãẽna chũmʉda. Ãdjia jaradia panʉra ũrĩ ɓasia idjaɓa ãdjía iwiɗibadjia. 47 Maʉ̃ne ãdjia iwiɗibʉɗaɗe idjia ariɗe panubadjia. Jũma idji ũrĩ panʉba cawa crĩchaɗaẽ́ panasiɗaa necawaaɗeba panu ɓʉ bẽrã. 48 Djibarirãba idji unusiɗaɗe cawa crĩchaɗaẽ́ basía. Dji papaba idjía iwiɗisia:
–Warra, ¿bʉa cãrẽ cãrẽã jãwã osi? ¿Cãrẽ cãrẽã nama ɓesi? Bio sopua panʉba mʉ̃a, bʉ zeza biɗa bʉra jʉrʉ panasiɗaa.–
49 Jesuba panusia:
–Bãrãba ¿cãrẽ cãrẽã mʉ̃ra jʉrʉ panasiɗa? ¿Mʉ̃ Zeza deɗe ɓaida ɓʉda adua panʉca?–
50 Baribʉrʉ Jesuba jaraɗara djibarirãba cawaɗaẽ́ basía. 51 Maʉ̃be Jesura ãdji ume Nazareɗaa wãsia. Ãdjia jarabʉdara idjia jũma ĩjã obadjia. Jũma Jerusaleʉ̃ne mãwãnara dji papaba bio quĩrãcuita crĩcha ɓabadjia. 52 Jesura cacua ʉɓʉa warisia idjaɓa ewariza ne cawaara wãsia. Ãcõrẽba, ẽberãrã biɗa idjira bia unusiɗaa.