Hecho

Bajãnebema nezocaba Cornelioa beɗeaɗa

10 Cesarea puruɗe Cornelioda ɓasia. Idjira Italia druaɗebema sordaorã boro basía. 2 Maʉ̃ Corneliora idji ẽberãrã siɗa jũma jipa ɓeasia. Ãcõrẽra waya panasiɗaa. Cornelioba judiorã carebai carea paratada waiɓʉa diabadjia idjaɓa Ãcõrẽa iwiɗi ɓabadjia. 3 Ewari aɓa quewara ʉ̃mãdau ʉ̃tʉeɗa Cornelioba cãĩmocara quĩrãca bajãnebema nezocada idjimaa zebʉrʉda ebuɗa unusia. Maʉ̃ba jarasia:

–¡Cornelio!–

4 Cornelioba bajãnebema nezocara bio acʉpeɗa ne wayaaba iwiɗisia:

–¿Cãrẽ, mʉ̃ boro?–

Maʉ̃ne bajãnebema nezocaba jarasia:

–Bʉa Ãcõrẽa iwiɗi ɓʉra, ne neẽ́ queɗea careba ɓʉ siɗa idjia bia unu ɓʉa idjía ne babue diabʉrʉ quĩrãca. 5 Maʉ̃ bẽrã Jope puruɗaa ẽberãrãda diabuedua Simoʉ̃ Pedro abada jʉrʉɗe wãnamãrẽã. 6 Idjira pusa icawa dewarabema Simoʉ̃ dji animarã e biya obari deɗe ɓʉa.–*

7 Bajãnebema nezocara idji ume beɗea ɓapeɗa wãsia. Wãnacarea Cornelioba idji nezocada umé idjaɓa sordaoda aɓa trʉ̃sia. Maʉ̃ sordaoba Corneliora carebabadjia idjaɓa Ãcõrẽra waya ɓasia. 8 Cornelioba ununara ãdjía jũma nẽbʉrʉpeɗa Jopeɗaa diabuesia.

Pedroba cãĩmocara quĩrãca ununa

9 Nurẽma ãdji oɗe nĩnane umatipa baboɗoɗe Jope puru caita jũẽbʉda basía. Maʉ̃misa Pedrora ʉ̃taarebema dejãne Ãcõrẽa iwiɗiɗe wãsia. 10 10:10-11 Jarra nũmʉ bẽrã ne co quĩrĩã ɓasia. Ne dju panʉmisa Pedroba cãĩmocara quĩrãca unusia bajãra ewabʉrʉda. Bajãneba boroɓa waiɓʉa quĩrãca ɓʉda eɗaa zebʉrʉda unusia. Maʉ̃ boroɓara iquiɗaza jʉ̃caraba jʉ̃ ɓasia. 12 Boroɓaɗe eɗa quĩrãtanoa animarã jĩrũ quĩmãrẽ ɓeada, ãdji jãne wãbadada, ĩbana siɗa ɓeasia. (Ʉ̃cʉrʉ animarãra judiorãba coɗacara panasiɗaa.) 13 Mãwã ɓʉɗe Pedroba beɗeada ũrĩsia. Maʉ̃ beɗeaba jarasia:

–Pedro, piradrʉdua. Beapeɗa codua.–

14 Baribʉrʉ Pedroba jarasia:

–Mʉ̃a coẽ́a, mʉ̃ Boro. Daiba coɗacara panʉda wa bʉ quĩrãpita mititia ɓʉda mʉ̃a cocaa.–*

15 Dji beɗeaba wayacusa jarasia:

–Bãrãba coɗamãrẽã Ãcõrẽba bia ɓʉɗara mititia ɓʉaɗa arãdua.–*

16 Mãwã beɗeabʉrʉda Pedroba ɓarima ũbea ũrĩsia. Maʉ̃be boroɓara wayacusa bajãnaa wãsia. 17 Maʉ̃ ununa carea Pedroba aɓeɗa cawa crĩchaẽ́ ɓesia. Waɗibiɗa maʉ̃gʉba cãrẽ jara ɓʉda crĩcha ɓʉmisa Cornelioba diabueɗarãba Simoʉ̃ dera iwiɗi wãnapeɗa dji eɗa wãbadama jũẽsiɗaa. 18 Ãdjirãba jĩgua iwiɗisiɗaa Simoʉ̃ Pedro abadara maʉ̃ deɗe ɓʉ cawaya.

19 Pedroba ununara waɗi crĩcha ɓʉɗe Ãcõrẽ Jaureba idjía jarasia: “Ẽberãrã ũbea panʉba bʉra jʉrʉ panʉa. 20 Piradrʉpeɗa duɗaa wãdua. Ãdji ume wãida biẽ́ crĩcharãdua. Mʉ̃a ãdjira zebisia.”

21 Ara maʉ̃da Pedrora eɗaa wãsia Cornelioba diabueɗarãmaa. Idjia jarasia:

–Bãrãba mʉ̃drʉ jʉrʉ panʉa. ¿Cãrẽma ze panʉ?–

22 Ãdjirãba panusiɗaa:

–Daira sordaorã boro Cornelioba diabuesia. Idjira ẽberã jipa ɓʉa idjaɓa Ãcõrẽra waya ɓʉa. Jũma judiorãba idjiɗebemada bia crĩcha panʉa. Ãcõrẽ nezoca bajãnebemaba idjía bʉra idji deɗaa trʉ̃bisia bʉ beɗea ũrĩ carea.–

23 Maʉ̃be Pedroba deɗe eɗa wãbisia. Maʉ̃ diamasi Pedro ume panesiɗaa. Nurẽma Pedrora piraɓaripeɗa ãdjirã ume wãsia. Idjaɓa ʉ̃cʉrʉ djabarã Jopeɗebemada ãdjirã ume wãsiɗaa.

Pedro Cornelio ume beɗeaɗa

24 Maʉ̃ nurẽma Cesareaɗe jũẽsiɗaa. Cornelioba idji ẽberãrãda, idji dji biarã siɗa ãbaa trʉ̃na bẽrã idji deɗe jʉ̃ã panasiɗaa. 25 Pedro dji de caita jũẽsiɗe Cornelioba araa audiaɓariɗe wãsia. Pedro quĩrãpita egode ɓarru coɓepeɗa bia beɗeasia. 26 Baribʉrʉ piradrʉmãrẽã Pedroba nãwã jarasia:

–¡Piradrʉdua! Mʉ̃ra ẽberãda jãwã ɓʉa.–

27 Pedrora Cornelio ume beɗea ɓʉda eɗa wãsia. Mama ẽberãrã zocãrã duanʉda unusia. 28 Maʉ̃be Pedroba jarasia:

–Bãrãba cawa panʉa dai judiorãra judiorãẽ́ ume nĩbacara panʉda idjaɓa judiorãẽ́ deɗe eɗa wãcara panʉda. Baribʉrʉ Ãcõrẽba mʉ̃́a cawabisia ni aɓaʉda jaraiẽ́ ɓʉda Ãcõrẽ quĩrãpita biẽ́ ɓʉda wa idji quĩrãpita mititia ɓʉda. 29 Maʉ̃ bẽrã mʉ̃ nama zemãrẽã jaraɗe wãsiɗaɗe ara maʉ̃da ne jaraẽ́ zesia. Jãʉ̃be mʉ̃a cawa quĩrĩã ɓʉa cãrẽ cãrẽã mʉ̃ra trʉ̃siɗada.–

30 Maʉ̃ne Cornelioba jarasia:

–Ewari quĩmãrẽ ɓʉa ara naʉ̃ horaca mʉ̃a ne coɗaca ewarida o ɓasia. Quewara ʉ̃mãdau ʉ̃tʉeɗa Ãcõrẽa iwiɗi ɓʉɗe ẽberãda mʉ̃ quĩrãpita nũmʉda unusia. Idjia cacuaɗe jʉ̃ ɓʉra dorrodorroa ɓasia. 31 Maʉ̃ ẽberãba mʉ̃́a jarasia: “Cornelio, bʉa iwiɗi ɓaɗara Ãcõrẽba bia ũrĩsia. Idjia quĩrãdoaẽ́ ɓʉa bʉa ne neẽ́ queɗeara carebabarida. 32 Maʉ̃be ẽberãrãda Jopeɗaa diabuedua Simoʉ̃ Pedro abadada jʉrʉɗe wãnamãrẽã. Idjira pusa icawa dewarabema Simoʉ̃ dji animarã e biya obari deɗe ɓʉa. Maʉ̃ Simoʉ̃ Pedrora jũẽsira idjia bʉ́a beɗeaya.”*

33 Ara maʉ̃da mʉ̃a bʉra jʉrʉbisia. Bio bia ɓʉa bʉra namaa zeɗa bẽrã. Nawena jũma dairãra nama Ãcõrẽ quĩrãpita duanʉa dadjirã Boroba bʉ́a jarabi ɓʉda ũrĩni carea.–*

34 Maʉ̃ne Pedroba jarasia:

–Ʉ̃rãbʉrʉ mʉ̃a cawabʉrʉa wãrãda Ãcõrẽba ni aɓaʉda quĩrã awara ocada.* 35 Ãtebʉrʉ puruzabema idji wayaaba jipa o ɓeada bia unubaria. 36 Ãcõrẽba beɗea bia Jesucritoɗeba idji ume ibiaɗiɗebemada israelerãa diabuesia. Maʉ̃ Jesucritora jũmarã Boroa. 37 Bãrãba cawa panʉa jũma judiorã druaɗe Jesuɗebemada nẽbʉrʉbadada. Naãrã Galileaɗe Juaʉ̃ba jaradia ɓasia ẽberãrã borocueɗamãrẽã. 38 Maʉ̃ ewariɗe Ãcõrẽba idji Jaureda, idji ʉɓʉa siɗa Jesu Nazareɗebemaa diasia.* Ãcõrẽra idji ume ɓʉ bẽrã Jesuba ne biada o nĩbasia idjaɓa ẽberãrã diauruba biẽ́ eroɓʉra jũma biabibadjia. 39 Judiorã druaɗe, Jerusaleʉ̃ puruɗe biɗa Jesuba oɗara daiba jũma unusiɗaa. Idjia ne biada oɗamĩna judiorãba cruɗe cachi beasiɗaa.

40 Ara maʉ̃ Jesuda Ãcõrẽba ewari ũbeaɗe ʉ̃rẽbabipeɗa ʉ̃cʉrʉa unubisia. 41 Ãcõrẽba jũmarãa unubiẽ́ basía baribʉrʉ dairãa unubisia maʉ̃ carea edaɗa bẽrã. Idji ʉ̃rẽbaɗacarea dairãra idji ume ne cosiɗaa idjaɓa baido dosiɗaa. 42 Jesuba dairãra diabuesia jũma ẽberãrãa nãwã jaraɗamãrẽã: Ãcõrẽba idjira ɓʉsia zocai ɓeara, beupeɗaɗa siɗa jipa cawa omãrẽã. 43 Jũma Ãcõrẽneba beɗeabadarãba maʉ̃nebemada beɗeasiɗaa. Ãdjirãba cawabisiɗaa bariduaba Jesuda ĩjãibʉrʉ, maʉ̃ ẽberãba cadjirua o ɓaɗara Ãcõrẽba idjiɗeba quĩrãdoaida.–

Ãcõrẽ Jaure judiorãẽ́maa zeɗa

44 Pedro waɗibiɗa beɗea ɓʉɗe jũma idji ũrĩ duanʉmaa Ãcõrẽ Jaureda zesia. 45 10:45-46 Maʉ̃ne dewara beɗeaɗe beɗea duanesiɗaa idjaɓa Ãcõrẽa bia beɗea duanesiɗaa. Judiorã Jesu ĩjã ɓea Pedro ume zepeɗaɗaba maʉ̃ ũrĩsiɗaɗe cawa crĩchaɗaẽ́ basía Ãcõrẽba idji Jaureda judiorãẽ́a biɗa diaɗa bẽrã. 47 Maʉ̃ne Pedroba jarasia:

–Naʉ̃gʉ ẽberãrãba Ãcõrẽ Jaurera edasiɗaa dadjirãba edapeɗaɗa quĩrãca. ¿Ãdjirãra borocueɗiẽ́ panʉca?–

48 Maʉ̃be Pedroba ãdjirãra Jesucrito trʉ̃neba borocuebisia. Mãwãnacarea ãdjirãba beɗea djuburiasiɗaa idjira ãdjirã ume dãrã ɓamãrẽã.