Hecho

Pedroba ẽberã jĩrũ biẽ́ ɓʉ biabiɗa

3 Ewari aɓa ʉ̃mãdau ʉ̃tʉeɗa judiorãba Ãcõrẽa iwiɗibada horaɗe Pedrora Juaʉ̃ siɗa Ãcõrẽ de dromanaa wãsiɗaa. 2 Maʉ̃ne Ãcõrẽ de dromane eɗa wãbada Quĩrãwãrẽã Ɓʉ abadaɗe ẽberã jĩrũ biẽ́ topeɗaɗada ɓasia. Ẽberãrãba idjira ewariza mamaa edebadjiɗaa dji eɗaa wãbʉdarãa parata iwiɗimãrẽã. 3 Idjia Pedro, Juaʉ̃ siɗa eɗa wãbʉdada unusiɗe paratada iwiɗisia. 4 Pedroba, Juaʉ̃ biɗa idjimaa acʉsiɗaa. Maʉ̃ne Pedroba jarasia:

–Daimaa acʉdua.–

5 Idjía ne diaɗida crĩchaɗa bẽrã ãdjimaa acʉsia. 6 Baribʉrʉ Pedroba jarasia:

–Mʉ̃a paratada, oro siɗa neẽ́ ɓʉa, baribʉrʉ mʉ̃a eroɓʉda bʉ́a diaya: ¡Jesucrito Nazareɗebema trʉ̃neba piradrʉpeɗa nĩbaɗe wãdua!–

7 Maʉ̃ne Pedroba dji ẽberã jʉwa araare jidapeɗa piradrʉ edasia. Piradrʉbʉrʉɗe dji ẽberã jĩrũra, idji cõrãcõrã siɗa biasia. 8 Ara maʉ̃da ʉ̃tʉ jʉ̃drʉpeɗa taibaɗe wãsia. Jʉ̃drʉ jʉ̃drʉ nĩne Ãcõrẽa bia beɗea ɓʉda ãdji ume Ãcõrẽ de dromane eɗa wãsia. 9 Jũmarãba idjira Ãcõrẽa bia beɗea nĩda unusiɗaa. 10 Maʉ̃ unusiɗaɗe cawa crĩchaɗaẽ́ basía. Ãdjirãba cawasiɗaa idjira ewariza Ãcõrẽ de dromane eɗa wãbada Quĩrãwãrẽã Ɓʉ abadama parata iwiɗi chũmabadjida.

Pedroba Ãcõrẽ de droma dajadaare jĩgua jaradiaɗa

11 Ẽberã jĩrũ biẽ́ ɓaɗaba Pedrora, Juaʉ̃ siɗa quenaɓarica basía. Ãdjira Ãcõrẽ de droma mõgaraba auɗu jũrã ca ɓʉ eɗaare panasiɗaa. Ãdji pananamaa Salomoʉ̃ abadaa. Jũmarãba cawa crĩchaɗaẽ́ bẽrã ãdjimaa pira wãsiɗaa. 12 Pedroba maʉ̃ unusiɗe jarasia:

–Achirã Israelɗebema, ¿cãrẽ cãrẽã cawa crĩchaɗaẽ́ panʉ? ¿Cãrẽ cãrẽã daida acʉ panʉ? ¿Crĩcha panʉca dai ʉɓʉaɗeba wa daira Ãcõrẽ quĩrãpita jipa panʉ bẽrã naʉ̃ ẽberãra biabisiɗada? ¡Mãwãẽ́a! 13 Ãcõrẽ dadjirã drõãenabema Abrahaʉ̃ ume, Isa ume, idjaɓa Jacobo ume ɓaɗaba idji nezoca Jesura dji Dromada ɓʉsia.* Bãrãba idjira Pilatoa jida diasiɗaa beamãrẽã. Pilatoba idjira ẽdrʉ ɓʉ quĩrĩã ɓaɗamĩna bãrãba igarasiɗaa. 14 Bãrãba Ãcõrẽ Nezoca Jipa Ɓʉra igaraɗapeɗa mĩã sẽ iwiɗi panasiɗaa Pilatoba mĩã beaɗada ẽdrʉ ɓʉmãrẽã.* 15 Mãwã bãrãba dadji Zocai Ɓai Diabarida beasiɗaa. Baribʉrʉ Ãcõrẽba idjira beu ɓaɗada ʉ̃rẽbabisia. Maʉ̃ ʉ̃rẽbaɗara daiba unusiɗaa. 16 Ara maʉ̃ Jesu ʉɓʉaba naʉ̃ ẽberã bãrãba unubadara biasia. Daiba ĩjã panʉa Jesuba cacua biẽ́ ɓeara biabibarida. Mãwã ĩjã panʉneba naʉ̃ ẽberãra wãrãda biasia. Maʉ̃ra bãrãba ebuɗa unu panʉa.

17 Mʉ̃ djabarã judiorã, mʉ̃a cawa ɓʉa bãrãba, bãrã bororã biɗa Jesura beasiɗada idjira Ãcõrẽba diai jaraɗa ẽdrʉ edabarida cawaɗaẽ́ basi bẽrã. 18 Baribʉrʉ maʉ̃gʉɗeba Ãcõrẽba naẽna jaraɗara jũma mãwãbisia. Idjiɗeba beɗeabadarãneba jarasia idjia ẽdrʉ edabari diai jaraɗara bia mĩgapeɗa beuida.* 19 Jãʉ̃be bãrãba cadjiruada igaraɗapeɗa Ãcõrẽmaa zeɗadua. Mãwã osiɗara bãrãba cadjirua opeɗaɗara Ãcõrẽba quĩrãdoapeɗa sobiabiya. 20 Idjia Jesura diabueya naẽnaena bãrã Boroda ɓʉɗa bẽrã. 21 Nawena Jesucritora bajãne ɓʉa aɓa Ãcõrẽba ne jũmada wayacusa bia obʉrʉɗaa. Ãcõrẽba drõãenabema ewariɗe idjiɗeba beɗeabadarãneba wãrãda mãwã oyaɗa asia.

22 Moiseba dadji drõãenabemarãa nãwã jarasia: “Dadji Boro Ãcõrẽba mʉ̃ diabueɗa quĩrãca idjiɗeba beɗeabarida aɓa bãrãmaa diabueya. Maʉ̃ ẽberãra ara bãrã puruɗebema baya. Idjia jarabʉrʉra jũma ĩjãnadua. 23 Idjia jara ɓʉda aɓaʉba ĩjãẽ́bʉrʉ, Ãcõrẽba maʉ̃ ẽberãra idji puruɗebemada ãyã ɓʉya.”* 24 Maʉ̃ awara Samuel ewariɗeba ʉ̃taa jũma Ãcõrẽneba beɗeabadarãba naʉ̃ ewariɗebemada beɗeasiɗaa. 25 Ãcõrẽba ãdjirãneba beɗeaɗara iɗi wãrãda unu panʉa.

Maʉ̃ awara Ãcõrẽba bãrã drõãenabemarã ume beɗeada ɓʉsia. Idjia Abrahaʉ̃a nãwã jarasia: “Mʉ̃a bʉɗeba yõbʉrʉɗeba naʉ̃ ẽjũãne ɓea purura jũma carebaya.”* Maʉ̃ beɗea ɓʉɗara bãrãba iɗi wãrãda unu panʉa. 26 Ãcõrẽba idji nezoca Jesura edapeɗa naãrã bãrãmaa diabuesia carebamãrẽã.* Bãdjiza careba ɓʉa bãrãba cadjirua obadara igaraɗamãrẽã.–