Romano

Ãcõrẽ Jaureɗeba nĩbaɗiɗebema

8 8:1-2 Iɗira dadjirãra Jesucrito ume panʉ bẽrã ni maãrĩ biɗa beɗeaɗe panʉẽ́a.* Ãcõrẽ Jaureba dadjirãa zocai ɓai djiwiɗida Jesucritoɗeba diasia. Dadjirãra cadjiruaɗebemada idjaɓa beuɗiɗebemada ẽdrʉ ɓʉsia. 2 – 3 Ãcõrẽba Moisea diaɗa leyba dadjirãra cadjiruaɗebemada poya ẽdrʉ ɓʉẽ́ basía. Naʉ̃ djaraba o quĩrĩã ɓʉɗeba nĩnaba maʉ̃ ley ĩjã oɗi cãyãbara cadjiruada obadaa. Baribʉrʉ Ãcõrẽba idji Warrada diabuesia dadjirã dji cadjiruarã quĩrãca ɓamãrẽã. Maʉ̃ne idji Warrara dadjirã cadjirua carea beusia. Mãwã Ãcõrẽba idji Warraɗeba dadjirãra cadjiruaɗebemada ẽdrʉ ɓʉsia. 4 Idjia mãwã osia dadjirãba poya jipa oɗamãrẽã idji leyba jara ɓʉ quĩrãca. Iɗira dadjirãra poya jipa nĩbaɗia naʉ̃ djaraba o quĩrĩã ɓʉɗeba nĩnaẽ́ bẽrã, ãtebʉrʉ Ãcõrẽ Jaureɗeba nĩna bẽrã.

5 Naʉ̃ djaraba o quĩrĩã ɓʉɗeba nĩnaba aɓabe naʉ̃ djaraba cadjirua o quĩrĩã ɓʉdrʉ crĩchabadaa. Baribʉrʉ Ãcõrẽ Jaureɗeba nĩnaba Ãcõrẽ Jaureba quĩrĩã ɓʉdrʉ crĩchabadaa. 6 Naʉ̃ djaraba o quĩrĩã ɓʉda aɓaʉba crĩcha ɓaibʉrʉ beuya. Baribʉrʉ Ãcõrẽ Jaureba quĩrĩã ɓʉda crĩcha ɓaibʉrʉ necai ɓaya idjaɓa ewariza Ãcõrẽ ume zocai ɓaya. 7 Aɓaʉba naʉ̃ djaraba o quĩrĩã ɓʉda crĩcha ɓaibʉrʉ, Ãcõrẽ ume dji quĩrũa. Ãcõrẽ leyra ĩjã o quĩrĩãẽ́a, ni poya ĩjã oẽ́a. 8 Naʉ̃ djaraba o quĩrĩã ɓʉɗeba nĩnara Ãcõrẽba bia unucaa.

9 Baribʉrʉ Ãcõrẽ Jaureda wãrãda bãrã soɗe ɓʉbʉrʉ, idjiɗeba nĩnaa. Naʉ̃ djaraba o quĩrĩã ɓʉɗeba nĩnaẽ́a. Wãrãda Crito Jaure neẽ́ ɓʉra Critoɗeẽ́a. 10 Baribʉrʉ Critoda bãrã soɗe ɓʉbʉrʉ, bãrã jaurera zocai ɓʉa Ãcõrẽba bãrãra jipa unu ɓʉ bẽrã. Mãwãmĩna bãrãba cadjirua o panana carea naʉ̃ djaraɗe beuɗia. 11 Baribʉrʉ idji Jaureda bãrã soɗe ɓʉ bẽrã, idjiɗeba bãrã cacua beuida ɓʉra ʉ̃rẽbabiya Jesu ʉ̃rẽbabiɗa quĩrãca.

12 Djabarã, dadjirãra wãrãda Ãcõrẽ Jaureɗeba nĩbaɗida panʉa. Naʉ̃ djaraba o quĩrĩã ɓʉɗeba nĩbaɗiẽ́ panʉa. 13 Bãrãda naʉ̃ djaraba o quĩrĩã ɓʉɗeba nĩbaɗibʉrʉ beuɗia. Baribʉrʉ naʉ̃ djaraba cadjirua o quĩrĩã ɓʉda Ãcõrẽ Jaureɗeba igaraɗibʉrʉ, ewariza Ãcõrẽ ume zocai panania. 14 Jũma Ãcõrẽ Jaureɗeba nĩnara Ãcõrẽ warrarãa. 15 Bãrãba Ãcõrẽ Jaure edasiɗaɗe nezocada ɓʉẽ́ basía. Ãtebʉrʉ ɓʉsia Ãcõrẽ warrarãda ɓeaɗamãrẽã. Idjiɗeba ne wayaɗacaa ãtebʉrʉ Ãcõrẽa “mʉ̃ Zeza” abadaa. 16 Dadjirã soɗe Ãcõrẽ Jaureba cawabi ɓʉa wãrãda Ãcõrẽ warrarãda. 17 Idji warrarã bẽrã Crito ume ãbaa idjia eroɓʉɗebemada edaɗia. Dadjirãda wãrãda Crito bia mĩgaɗa quĩrãca bia mĩga pananibʉrʉ, Ãcõrẽba Crito ume ãbaa bio bia ɓʉya.

Bajãne bia pananinebema

18 Dadjirã naʉ̃ ewariɗe bia mĩga panʉnebemada mʉ̃a mãcua crĩchacaa, nocoarebema ewariɗe Ãcõrẽba dadjirãra bia ɓʉi bẽrã. 19 Ne jũma Ãcõrẽba ocuaɗaba quĩrĩã ɓʉa idji warrarã bia panebʉdada isabe unubida. 20 8:20-21 Naẽna ne jũma Ãcõrẽba bia ocuaɗara biẽ́ ɓesia. Baribʉrʉ iduɓa mãwã biẽ́ ɓeẽ́ basía, ãtebʉrʉ Ãcõrẽba biẽ́ ɓʉsia. Mãwãmĩna ne jũma biẽ́ ɓeɗaba jʉ̃ã ɓʉa Ãcõrẽba idji warrarã bia ɓʉi quĩrãca bia ɓʉmãrẽã. Maʉ̃be waa ɓerawaẽ́a.

22 Dadjirãba cawa panʉa wẽrãba warra tobʉrʉɗe pua carea isabe to quĩrĩãbarida. Ara maʉ̃ quĩrãca ne jũma Ãcõrẽba ocuaɗara puaɗeba ɓeaca ɓʉa. Maʉ̃ carea isabe bia ɓe quĩrĩã ɓʉa. Ãcõrẽba ocuaɗa biẽ́ ɓeɗa ewariɗeba aɓa iɗiɗaa mãwã ɓʉa. 23 Maʉ̃ awara Ãcõrẽba dadjirã cacuara bia ɓʉmãrẽã jʉ̃ã panʉmisa dadjirã siɗa puaɗeba panʉa. Idji warrarã edabʉrʉɗe mãwã oya. Idji Jaureda dadjirãa naãrã diasia wãrãda idji warrarãda cawaɗamãrẽã. 24 Ãcõrẽba dadjirãra ẽdrʉ edaɗa bẽrã maʉ̃gʉra jʉ̃ã panʉa. Dadjia jʉ̃ã panʉra waɗibiɗa neẽ́ panʉa. Eropanʉbara ¿cãrẽ cãrẽã jʉ̃ã panacasiɗa? ¿Caiba idjia eroɓʉ edai carea jʉ̃ã ɓai? 25 Baribʉrʉ dadjirãba jʉ̃ã panʉra waɗibiɗa neẽ́ panʉ bẽrã jũma droa panʉneba cawa panʉa wãrãda edaɗida.

26 Maʉ̃ awara ara dadjiduɓa ʉɓʉaẽ́ panʉ bẽrã Ãcõrẽ Jaureba dadjirãra careba ɓʉa. Wãrãda adua panʉa sãwã Ãcõrẽa ariɗe iwiɗiɗida. Baribʉrʉ Ãcõrẽ Jaureba dadjia poya jaraɗaca beɗeaɗeba dadjirã carea Ãcõrẽa iwiɗibaria. 27 Maʉ̃ne Ãcõrẽ dadji so acʉbariba idji Jaureba iwiɗi ɓʉra cawa ɓʉa, idjia quĩrĩã ɓʉ quĩrãca idjiɗerã carea iwiɗibari bẽrã.

Ãcõrẽba ne jũmaneba carebabaria

28 Ãcõrẽba crĩcha ɓaɗa quĩrãca idji quĩrĩã ɓeada trʉ̃sia. Dadjirãba cawa panʉa maʉ̃gʉrã itea Ãcõrẽba ne jũmaneba biada obarida. 29 Idjia naẽnaeɗa cawa ɓasia cairãda idjiɗerã baida. Ãdjirãra ɓʉsia idji Warra Jesu quĩrãca ɓeaɗamãrẽã. Mãwã idji Warra Jesura djabarã zocãrã panʉnebemada dji nabemaa. 30 Ãcõrẽba idji Warra Jesu quĩrãca ɓeaɗamãrẽã naẽnaeɗa ɓʉɗara idjimaa trʉ̃cuasia. Idjia trʉ̃cuaɗara jipa unusia. Idjia jipa ununarãa idji biya quiruɗebemada diaya.

31 ¿Maʉ̃gʉɗebemada sãwã crĩcha panʉ? Ãcõrẽra dadjirãare ɓʉ bẽrã ¿caiba dadjirãra poyai? 32 Wãrãda Ãcõrẽba idji Warra arada wãgaẽ́ basía ãtebʉrʉ jũma dadjirã carea idu beabisia. Maʉ̃ bẽrã ¿idjia dadjirãa ne jũma biada Crito ume ãbaa diaẽ́ca? 33 ¿Caiba Ãcõrẽa idjia edaɗarãda poya biẽ́ jarai? Ãcõrẽba dadjirãra jipa unubaria. 34 ¿Caiba dadjirãra beɗeaɗe panʉana aɗi? Ni aɓaʉba mãwã jaraɗaẽ́a Jesucritora dadjirã carea beuɗa bẽrã. Idjira beu ɓaɗada ʉ̃rẽbasia. Iɗira Ãcõrẽ jʉwa araare ɓʉa. Mama dadjirã carea Ãcõrẽa beɗea djuburia ɓʉa. 35 ¿Caiba dadjirãra Crito quĩrĩãnebemada poya ãyã ɓʉi? Ewari zarea zebʉrʉɗe, bia mĩga panʉne, ẽberãrãba dadjirã biẽ́ oɗi carea ẽpẽ panʉne, jarraba zebʉrʉɗe, cacuaɗe jʉ̃ni carea neẽ́ panʉne, minijĩchiaɗe panʉne, ẽberãrãba bea quĩrĩã panʉne ni aɓaʉba dadjirãra Crito quĩrĩãnebemada poya ãyã ɓʉẽ́a. 36 Ãcõrẽ Beɗeaɗe nãwã ɓʉ́ ɓʉa:

Ewariza bʉ carea daira bea quĩrĩã panʉa. Oveja beabʉda quĩrãca beaɗida crĩcha panʉa.*

37 Baribʉrʉ Critoba dadjirãra quĩrĩã ɓʉa. Idjiɗeba jũma maʉ̃gʉra dadjirãba poyabadaa. 38 8:38-39 Maʉ̃ carea mʉ̃a cawa ɓʉa dadjirãda beuɗibʉrʉ wa zocai pananibʉrʉ, Ãcõrẽ quĩrĩãnebemada jĩga pananaẽ́da. Naʉ̃ ewariɗe, nubema ewariɗe biɗa jĩga pananaẽ́a. Idjaɓa bajãnebema nezocarãba, jairãba, dji droma ɓeaba, naʉ̃ deɗaaɗe ʉ̃tʉara ɓeaba, naʉ̃ deɗaaɗe jeweɗaara ɓeaba, ni cãrẽ Ãcõrẽba oɗaɗebema biɗa dadjirãra idji quĩrĩãnebemada poya ãyã ɓʉɗaẽ́a.* Ara maʉ̃ quĩrĩãra dadjirã Boro Jesucritoɗeba unubisia.