1 Corinto
Jʉwaba oɗa ãcõrẽa djico diaɗaɗebema
8 Idjaɓa jʉwaba oɗa ãcõrẽa djico diaɗaɗebemada mʉ̃a jaraya. Dadjirãba cawa panʉa jũmarãda crĩcha cawa panʉda. Mãwãmĩna crĩcha cawaaba dadjira djãrã cãyãbara biara ɓʉda crĩchabibaria. Baribʉrʉ quĩrĩãba djãrãra carebabaria. 2 Aɓaʉba bio cawa ɓʉda crĩcha ɓʉbʉrʉ, waɗibiɗa adua ɓʉa idjia cawaida ɓʉ quĩrãca. 3 Baribʉrʉ aɓaʉba Ãcõrẽda quĩrĩã ɓʉbʉrʉ, Ãcõrẽba idjira cawa ɓʉa.*
4 Maʉ̃ bẽrã jʉwaba oɗa ãcõrẽa djico diaɗa cobadaɗebemada mʉ̃a jaraya. Dadjirãba cawa panʉa jʉwaba oɗa ãcõrẽra wãrãẽ́da. Idjaɓa cawa panʉa wãrã Ãcõrẽra aɓabʉrʉ ɓʉda. 5 Bajãne, naʉ̃ ẽjũãne biɗa ẽberãrãba ãcõrẽ abadara baraa. Wãrãda maʉ̃gʉrãra idjaɓa ẽberãrãba ãdji boro abada siɗa zocãrã baraa. 6 Baribʉrʉ dadjirãmaarã Ãcõrẽra aɓabʉrʉ ɓʉa. Idjira dadjirã Zezaa. Idjiabʉrʉ ne jũmada osia. Dadjirãra idji itea zocai panʉa. Idjaɓa dadjirã Boro Jesucritora aɓabʉrʉ ɓʉa. Idjiɗeba Ãcõrẽba ne jũmada osia. Idjiɗeba dadjirãra zocai panʉa.
7 Baribʉrʉ ʉ̃cʉrʉba maʉ̃gʉra cawaɗaẽ́ panʉa. Ʉ̃cʉrʉ djabarãba waɗibiɗa crĩcha panʉa jʉwaba oɗa ãcõrẽ ãdjia naẽna ẽpẽ pananara zocai ɓeada. Maʉ̃ bẽrã jʉwaba oɗa ãcõrẽa djico diaɗada cosiɗara crĩchabadaa jʉwaba oɗa ãcõrẽra wayacusa ẽpẽbʉdada. Wãrã beɗeada bio adua panʉ bẽrã maʉ̃ djico co panʉneba crĩchabadaa Ãcõrẽ quĩrãpita biẽ́ panebʉdada. 8 Baribʉrʉ djicoba dadjirãra Ãcõrẽ quĩrãpita bia ɓʉcaa. Maʉ̃ bẽrã dadjia co panʉneba, coɗaẽ́ panʉneba biɗa Ãcõrẽ quĩrãpita biara ɓeaɗaẽ́a.
9 Wãrãda dadjia co quĩrĩã panʉra coɗida panʉa. Baribʉrʉ quĩrãcuita ɓeaɗadua bãrãba co panʉneba djaba bio adua ɓʉra cadjiruaɗe ɓaerãmãrẽã. 10 Ne jũma coida ɓʉ cawa ɓʉ djabada jʉwaba oɗa ãcõrẽ deɗe eɗa ne co chũmeibʉrʉ, maʉ̃ne ne jũma coida ɓʉ adua ɓʉba idjira mama chũmʉda unuibʉrʉ, idjia biɗa jʉwaba oɗa ãcõrẽa djico diaɗara coida crĩchaya. Baribʉrʉ jʉwaba oɗa ãcõrẽra ẽpẽbʉrʉda crĩcha ɓʉ bẽrã idjimaa cadjiruada o ɓʉa. 11 Mãwã ne jũma coida ɓʉ cawa ɓʉba dji bio adua ɓʉ djabara cadjiruaɗe ɓaebiya. Baribʉrʉ quĩrãnebaɗadua Critora beusida maʉ̃ adua ɓʉ djaba carea. 12 Bãrãba maʉ̃ adua ɓea djabarã cadjiruaɗe ɓaebibʉdaɗe Crito quĩrãpita cadjiruada o panʉa. 13 Maʉ̃ carea mʉ̃a co ɓʉɗeba mʉ̃ djabada cadjiruaɗe ɓaebibʉrʉ, waa coẽ́a.