2 Tesalonica

Pauloba naʉ̃ cartaɗe naãrã ɓʉɗa

1 Mʉ̃ra Pauloa. Naʉ̃ cartara ɓʉbʉrʉa djabarã Tesalonica puruɗebema itea. Bãrãra dadjirã Zeza Ãcõrẽnea, dadjirã Boro Jesucritoɗea. Djaba Silvanoda, Timoteo siɗa mʉ̃ ume panʉa. 2 Daiba quĩrĩã panʉa dadjirã Zeza Ãcõrẽba, dadjirã Boro Jesucrito biɗa ãdji biaɗeba bãrãra careba pananida, necai ɓai siɗa bãrãa dia pananida.

Ãcõrẽba idji beɗea ĩjãnaca cawa oiɗebema

3 Djabarã, daiba ewariza bãrã carea Ãcõrẽa bia ɓʉaɗa abadaa. Daiba mãwã obadara bia ɓʉa. Bãrãba ewariza Critora biara ĩjã panʉa idjaɓa biara dji quĩrĩã panʉa. 4 Maʉ̃ carea daiba Ãcõrẽ ẽberãrã duanʉza bãrãnebemada ɓʉsriɗa nẽbʉrʉbadaa. Jarabadaa ẽberãrãba biẽ́ oɗi carea ẽpẽ panʉmĩna bãrãba Critora waɗi ĩjã panʉda idjaɓa bia mĩga panʉmĩna jũma droa panʉda. 5 Maʉ̃ba cawabi ɓʉa Ãcõrẽba jipa cawa obarida. Idjia bãrãra bia unu ɓʉa pe eroɓai carea. Maʉ̃ carea ara nawena bia mĩga panʉa.

6 Ãcõrẽba jipa cawa obaria. Bãrã bia mĩgabi panʉra idjia bia mĩgabiya. 7 1:7-8 Baribʉrʉ bãrã, dji bia mĩga ɓeara ʉ̃nãũbiya dai ʉ̃nãũbi quĩrãca. Maʉ̃gʉra mãwãya dadjirã Boro Jesura idji nezocarã mẽsrã ɓea ume urua eradrʉ nũmʉne bajãneba zebʉrʉɗe. Maʉ̃ne jũma Ãcõrẽ ĩjãẽ́ ɓeada, beɗea bia dadjirã Boro Jesuɗebema ĩjãnacada cawa oya. 8 – 9 Ãdjirãra tʉbʉ uruaɗe ewariza bia mĩgabiya. Dadjirã Boro quĩrãpitabemada, idji ʉɓʉa dromanebema siɗa tʉmʉ ɓeaɗia. 10 Maʉ̃ ewariɗe idjiɗerãba idjía bia beɗeaɗia. Ãdjirã ume bia oɗa carea jũma idji ĩjã ɓeaba idjira bio bia ununia. Daiba idjiɗebema jaradiapeɗaɗara bãrãba ĩjãpeɗaɗa bẽrã bãrã siɗa maʉ̃ ẽberãrãnebemaa.

11 Maʉ̃ carea daiba ewariza dadjirã Ãcõrẽa iwiɗibadaa bãrãda bia unumãrẽã. Idjia bãrãra maʉ̃ carea trʉ̃sia. Daiba iwiɗi panʉa Ãcõrẽba idji ʉɓʉaɗeba bãrãra ne jũmane carebamãrẽã. Mãwã idji ĩjã panʉneba bia o quĩrĩã panʉra bãrãba jũma oɗia. 12 Mãwãra bãrãneba jũmarãba dadjirã Boro Jesucritora bia jaraɗia idjaɓa idjiɗeba bãrãda bia jaraɗia. Dadjirã Ãcõrẽba, dadjirã Boro Jesucrito biɗa ãdji biaɗeba careba panʉ bẽrã mãwã bia jaraɗia.