Apocalipsi

Bajãnebema nezoca siete panʉba bia mĩgabiɗiɗebema

15 Wayacusa ne jarai waiɓʉada mʉ̃a bajãne unusia. Maʉ̃ ne jarai carea mʉ̃a cawa crĩchaẽ́ ɓesia. Bajãnebema nezocarãda siete panasiɗaa. Ãdjirãza jĩrũarebema bia mĩgabiɗira aɓa eropanasiɗaa. Maʉ̃ bia mĩgabi siete panʉ jũma mãwãnacarea Ãcõrẽ quĩrũbiɗeba cawa oira jõya.

2 Maʉ̃ awara mʉ̃a pusa quĩrãca unusia vidrio quĩrãca ẽsã quiruda idjaɓa urua nũmʉda. Maʉ̃ icawa jũma dji animarã minijĩchia ɓʉ ĩjãpeɗaɗaẽ́ra duanasiɗaa. Ãdjirãba maʉ̃ animarãa, jʉwaba oɗa idji za quĩrãca ɓʉ́a biɗa bia beɗeaɗaẽ́ basía idjaɓa idji trʉ̃nebema numeroda ãdji dratuɗe, jʉwaɗe biɗa idu ɓʉbiɗaẽ́ basía. Ãcõrẽba arpa diaɗada ãdjirãba eropanasiɗaa. 3 Arpa zabʉdaɗe Ãcõrẽ nezoca Moise trʉ̃ãbida, Oveja Zaque trʉ̃ãbi siɗa nãwã trʉ̃ã panasiɗaa:

Dairã Boro Ãcõrẽ jũma poya ɓʉ, bʉa o ɓʉra waiɓʉa ɓʉa.

Bʉa o ɓʉ carea ẽberãrãba cawa crĩchaɗaẽ́ panabadaa.

Jũmarã Boro, bʉa o ɓʉra jipa ɓʉa idjaɓa ariɗe ɓʉa.*

4 Dairã Boro, ¿caiba bʉra wayaẽ́ ɓai?

¿Caiba bʉra dji dromaana aẽ́? Bʉdrʉ dji wãrã Ãcõrẽa.

Druazabemarãda zeɗapeɗa bʉ́a bia beɗeaɗia bʉa jipa o ɓʉra unubiɗa bẽrã.

5 Mãwãnacarea ʉ̃taa acʉbʉrʉɗe mʉ̃a Ãcõrẽ deda bajãne unusia. Dji eɗaara ɓʉ dejãne wua eatʉ jira ɓʉra ewa nũmasia. 6 Maʉ̃ deɗeba bajãnebema nezoca siete panʉra dajadaa zesiɗaa. Bia mĩgabiɗi siete panʉra eropanasiɗaa. Lino wua oɗa totroa dorrodorroa quiruda jʉ̃ panasiɗaa. Ãdji ju caita oro oɗaba trãjʉ̃ ɓeasia. 7 Maʉ̃be animarã zaca zocai ɓea quĩmãrẽ panʉnebema aɓaʉba ãdjirãa epeɗeco jũgurua oro oɗada aɓa aɓa diasia. Maʉ̃ epeɗecora ewariza zocai ɓʉ Ãcõrẽ quĩrũbiba bira ɓeasia.* 8 Maʉ̃be Ãcõrẽ dorrodorroaba, ʉɓʉa biɗa idji deɗe eɗa cowaga nũmesia. Maʉ̃ba ni aɓaʉda maʉ̃ deɗe eɗa poya wãnaẽ́ basía aɓa bajãnebema nezocarã siete panʉba bia mĩgabiɗi siete panʉ jõbʉrʉɗaa.