¿Cãrẽda mãwãida religioʉ̃neba?

1. ¿Jũma religioʉ̃ra bia panʉda?

Zocãrã ẽberãrã dewara religioʉ̃nebemara sobiarã panʉda. Ãcõrẽba bio quĩrĩã ɓʉda jãʉ̃ ẽberãrãra idjaɓa sopuabarida ãdjirã carea. Baribʉrʉ zocãrã religioʉ̃ra cadjirua obadada (2 Corinto 4:3, 4; 11:13-15). Ũrĩ panʉne zocãrã beɗeara cawa panʉda religioʉ̃neba ne cadjirua mãwã panʉda. Ejemploda djõbada, zocãrã ẽberãrãra beabadaa, warrarãra cadjirua obadaa idjaɓa ɓʉbadada bombada jãʉ̃gʉba biẽ́ sentibi ɓʉda ẽberã biara. Leadua Mateo 24:3-5, 11, 12.

Dji religioʉ̃ wãrãrada bio wayaɗida Jeowara. Baribʉrʉ dji religioʉ̃ sewaida ɓeara cadjirua obadaa. Maʉ̃ carea Ãcõrẽra sobiaẽ́ ɓʉda. Religioʉ̃ sewaida ɓea jarabadada sewada Ãcõrẽnebemada idjaɓa jarabadada ẽberã beuɗacare waɗi zocai ɓʉda. Baribʉrʉ Ãcõrẽba quĩrĩã ɓʉda ẽberã jũmarã cawaɗida dji wãrãda idjiɗeɗebemada. Leadua Romano 6:23; 1 Timoteo 2:3-5.

2. ¿Cãrẽda mãwãida religioʉ̃neba?

Ni aɓaʉ religioʉ̃ poya cũrũgaẽ́a Ãcõrẽra jara panʉmĩna ãdjirãba idjía bio quĩrĩã ɓʉda. Baribʉrʉ ãdjirãba ẽpẽ panʉda Satanara (Santiago 4:4). Dji religioʉ̃ra sewaida ɓeara Ãcõrẽ Beɗeaba jarabadada “Babilonia puru droma” naẽnaena ɓada bẽrã jãʉ̃ puruda Babilonia dopapa zeɗacare Noé ewariɗera. Jãmaʉba zesida jũma religioʉ̃ra sewada. Dãrãẽ́ne Ãcõrẽba jõbiya jũma religioʉ̃ sewaida ɓeara ãdjirãba cũrũga panʉ bẽrã ẽberãra dji cadjirua obada bẽrã. Leadua Apocalipsi 17:1, 2, 5, 16, 17; 18:8.

Baribʉrʉ Jeowara bia unu ɓʉda jãʉ̃ ẽberã biada religioʉ̃ sewaida ɓeara panʉmĩna. Maʉ̃ carea idjia ãbaa jʉrebi ɓʉda jãʉ̃ ẽberã biara aɓa ɓʉ deɗe. ¿Sãwã ãbaa jʉrebi ɓʉda jãʉ̃ ẽberãrãra? Jaradia ɓʉda dji wãrãda Ãcõrẽ Beɗeaɗebemada. Leadua Juaʉ̃ 6:45.

3. ¿Cãrẽda oɗida panʉ ẽberã sobiarã?

Jeowara bio sopuabarida idji quĩrĩã panʉ carea idjaɓa ne bia o quĩrĩã panʉ carea. Maʉ̃ bʉrʉ idjia jara ɓʉda jãʉ̃ religioʉ̃ sewaida ɓeara ãyã ɓʉɗadua. Jãʉ̃ ẽberãrãba wãrãda ĩjã panʉbʉrʉ Ãcõrẽnera ãdjirãba awara oɗida Ãcõrẽra bia sentibi carea. Leadua Apocalipsi 18:4.

Siglo nabema zocãrã ẽberãrãba sobiarã ũrĩsiɗada beɗea biara Ãcõrẽ Beɗeaɗe Jesu nĩbabadarãba jaradia panasiɗaɗe. Jeowaba bio jaradiasida jãʉ̃ ẽberãrãra sãwã oɗida capipia panani carea idjaɓa ne bia jʉ̃ãni carea. Ara maʉ̃ quĩrãca dadjirãba ũrĩnida panʉ Ãcõrẽ Beɗeaba jara ɓʉra idjaɓa naãrã ɓʉɗida Jeowara dewara ɓea cãyãbara. Leadua 1 Tesalonica 1:8, 9; 2:13.

Jeowaba bia edesida ẽberã jĩrũãbera zeida idjimaa ãbaa ɓeaɗi carea dji religioʉ̃ wãrãme. Jãʉ̃gʉ oɗibʉrʉ dadjirãba dji biarã pananida Ãcõrẽme, dji biarã pananida dadji djabarãme idjaɓa dãrã pananida nama ẽjũãne. ¿Bʉa dãrã quĩrĩã panʉda? Leadua Marco 10:29, 30; 2 Corinto 6:17, 18.

4. ¿Cãrẽda oya Ãcõrẽba dadjirãra necai pananamãrẽã idjaɓa capipia pananamãrẽã naʉ̃ ẽjũãne?

Jeowaba jõbiya religioʉ̃ sewaida ɓeara dadjirãba necai panani carea. Jãʉ̃ religioʉ̃ra waa cũrũgaẽ́da ẽberãrã, maʉ̃ cãyãbara jũmarã ãbaa pananida. Jũmarãba bia beɗeaɗida panani Ãcõrẽa idjiabʉrʉ Ãcõrẽ wãrãda ɓʉ bẽrã. Jãʉ̃ beɗeara bio biara ɓʉda. Leadua Apocalipsi 18:20, 21; 21:3, 4.