Dji nezocaba Ãcõrẽnera ĩjã ɓasida

Josera aɓa jẽdaribema warra Jacoboɗe. Dji djabarãba cawasiɗada Josera dji warra bio quĩrĩã ɓʉda dji zezeba. ¿Sãwã sentisiɗada? Ãdjirãba bio unu ama panasiɗada. Ewari aɓaʉɗe, idjia cãĩmocarasida. Maʉ̃ bʉrʉ idjia nẽbʉrʉsida dji djabarãa. Ãdjirãba quĩchasiɗada jãʉ̃ cãĩmocaraɗara jara quĩrĩã ɓʉda ewari aɓaʉɗe, idji quĩrãpita chĩrãboroɗe coɓeɗida, maʉ̃ bʉrʉ ãdjia mãsa unu amasiɗada.

Ewari aɓaʉɗe, dji djabarã Joseɗeba waga panasiɗada oveja zaqueda puru caita, Siqueʉ̃. Maʉ̃ bʉrʉ Jacoboba diabuesida Joséa acʉɗamãrẽã sãwã panʉ cawaya dji djabarã. Ãdjirãba unusiɗada tʉmʉ zebʉrʉda Josera, jarasiɗada: “¡Beaɗida!”. Maʉ̃ carea ãdjirãba jidasiɗada Josera idjaɓa ɓatabuesiɗada ne neẽ́ne uria waiɓʉaɗe. Baribʉrʉ Juda, aɓa djababa jãʉ̃ba jarasida: “Bearãnadua, maʉ̃ cãyãbara nẽdobueɗida nezoca quĩrãca”. Jãʉ̃ra ara maʉ̃da osiɗada. Nẽdobuesiɗada parata carea. Maʉ̃ carea ¿Josera sãma wãsida? Wãsida Egipto puruɗaa.

Mãwãnacarea, dji djabarãba edaɗapeɗa Jose camisada. Begueaɗapeɗa animarã oaba, ede wãsiɗada dji zezamaa. Maʉ̃ bʉrʉ dji zezeba quĩchasida dji warrara beusida, animarã cadjiruaba beasida. Maʉ̃ carea Jacobora bio sopua ɓesida.

Josera jũẽsiɗe Egipto puruɗe, dji boro carebabari trʉ̃ jarabada Potipaba nẽdo edasida Josera idji nezocada ɓamãrẽã. Baribʉrʉ Jeowara ɓasida Joseme. Potipaba cawasida Josera bio zarea trajabari. Mãwãnacarea Jose jũẽsiɗe Potipaba jũma eroɓʉra diasida Josera wagai carea.

Potipa quimaba unusida Josera, idjira bio mera ɓʉda idjaɓa bio zarea trajabari. Maʉ̃ carea jarasida ɓarima zocãrã idjime cãĩmãrẽã. ¿Cãrẽda osida Joseba? Ĩ́jãca basía. Maʉ̃ bʉrʉ jarasida: “Jãʉ̃ra cadjiruada. Mʉ̃ boroba mʉ̃́ra ĩjã ɓʉ bẽrã, maʉ̃ bẽrã idjia jũma eroɓʉɗebemada mʉ̃́a diasida idjaɓa bʉra dji quimada. Mʉ̃da bʉme cãĩbʉrʉ, jãʉ̃ra bio cadjirua ɓʉda Ãcõrẽmaarã”.

Wãyã Potipa quimaba osida õgo Joseme cãĩ carea idjime. Maʉ̃ bʉrʉ jʉwaba jidasida idji cacuaɗe jʉ̃badara, baribʉrʉ idjira pira wãsida. Potipa jũẽsiɗe idji deda, idjia jarasida Joseba jidasida idjira. ¡Jãʉ̃ra sewada! Potipa bio quĩrũsida, maʉ̃ bʉrʉ idjía diabuesida carceɗe. Baribʉrʉ Jeowa quĩrãdoaẽ́ basida Josera.