Moiseba Jeowaa bia beɗeasida

Waɗi ɓabadjida Egiptoɗe Jacobo warrarã. Jãʉ̃gʉra ẽberãrã dji cuariara Jacoboɗebemarãba zeɗara trʉ̃ jarasiɗaa israelerã. Jacobo Joseme quinisiɗada. Mãwãnacarea dewaraʉ Paraoʉ̃ boro ɓasida. Naʉ̃ Paraoʉ̃ra waya ɓasida israelerãra zocãrã panana bẽrã egiptoɗebema cãyãbara. Maʉ̃ bʉrʉ ɓʉsida dji nezocarã quĩrãca. Maʉ̃ bʉrʉ õgo obisida ladrilloda idjaɓa mẽã zarea trajabisida. Egiptoɗebemarãba bio biẽ́ obadjiɗada. Ewariza mãsa israelerãra zocãrã panasiɗada. Paraoʉ̃ba quĩrĩãca ɓaɗa bẽrã, jũma wãwã umaquĩrãrã israelɗebema beabicuasida.¿Israelerãba sãwã sentisiɗada jãʉ̃ ununacarea?

Aɓa wẽrã israelɗebemaba trʉ̃ jarabada Jocabé, tosida umaquĩrã warra. Wagai carea, dji warrara ɓʉsiɗada jamara caɗaɗeba. Jãʉ̃ jamara cãdorronaba soasiɗada idjaɓa chogoro tãẽna ɓʉsida do trʉ̃ jarabada Nilo. Miriaʉ̃ba dji djabawẽrã ɓasida idjaɓa wãwã caita ɓesida acʉi carea cãrẽda mãwãi ɓasida.

Paraoʉ̃ caura doeɗa cuiɗe wãsida, maʉ̃ne unusida jamarada. Jãʉ̃ jamara ewa acʉbʉrʉɗe unusida wãwãda jĩã quiruda. Idjia mĩã djuburia unusida. Miriaʉ̃ba idisida: “¿Quĩrĩã ɓʉda jʉrʉɗe wãida aɓa wẽrãba juɓa domãrẽã jãʉ̃ wãwãra?”. Idjia jarasida: “Bia bʉa”. Miriaʉ̃ba dji nana ene basida. Paraoʉ̃ cauba jarasida Jocabéa: “Ededua naʉ̃ wãwãra daupẽmãrẽã, maʉ̃ carea mʉ̃a parata diaida”.

Dji wãwã wariɗacarea Jocabéba Paraoʉ̃ caumaa edesida. Idjia trʉ̃ ɓʉsida Moise, daupẽsida dji warra quĩrãca. Moiseba warisida Paraoʉ̃ warra quĩrãca, maʉ̃ bʉrʉ idjia eroɓaida idjia quĩrĩã ɓʉra. Baribʉrʉ idjia quĩrãdoaẽ́ basida Jeowara. Moiseba cawa ɓasida idjira israelera, egiptoɗebemaẽ́ basída. Maʉ̃ bʉrʉ idjia Jeowaa bia beɗeasida.

40 poa eroɓasiɗe Moise, maʉ̃ bʉrʉ idjia carebasida idji puruɗebemara. Ewari aɓaʉɗe unusida egiptoɗebemaba puo ɓʉda dji nezoca israelɗebema. Unupeɗa Moiseba puo ɓʉda egiptoɗebemara, bio zarea quĩrũpeɗa beasida idjaɓa beapeɗa ĩbʉɗe joutasida. Paraoʉ̃ba cawasida. Maʉ̃ bʉrʉ bea quĩrĩãsida Moisera baribʉrʉ idjira mĩrũ wãsida Madiaʉ̃ puruɗaa. Jãma Jeowaba bio wagasida idjira.