Jesura ẽdrʉ edabaria

Juaʉ̃ba jãma jaradia ɓabadjia jãʉ̃ beɗea biara: “Aɓa umaquĩrã zeida bio zarea ɓʉda mʉ̃ cãyãbara”. Jesura eroɓasida poa 30, maʉ̃ne wãsida Galileaɗeba do Jordaʉ̃ abadada. Jãma Juaʉ̃ba borocue ɓasida ẽberãrãra. Jesuba quĩrĩã ɓasida Juaʉ̃ba borocueida idjira. Baribʉrʉ Juaʉ̃ba jarasida: “Mʉ̃a bʉra borocueẽ́da ɓʉda. Bʉabʉrʉ mʉ̃ra borocueida ɓʉa”. Jesuba panusia: “Jeowaba quĩrĩã ɓʉda bʉa mʉ̃́ra borocueida”. Ara maʉ̃da do Jordaʉ̃naa wãsiɗaa. Juaʉ̃ba borocuesida Jesura cacua entero.

Mãwãnacarea Jesu ãĩ zesida doeɗaʉba dji idisida Jeowaa. Ara maʉ̃da bajãra ewasida. Dji jaure Ãcõrẽneda eɗa zesida. Idjia unusida puchirã quĩrãca. Maʉ̃ne Jeowaba beɗeasia bajãneba: “Bʉra mʉ̃ warra bio quĩrĩã ɓʉ́a. Mʉ̃ra bio ɓʉsriɗa ɓʉa bʉ carea”.

Jãwã edasia Jesuba dji jaure Jeowaɗeda, ara maʉ̃ quĩrãca Critora maʉ̃ bʉrʉ ɓesida Mesia. Maʉ̃ bʉrʉ poya oida Jeowaba jara ɓʉda naʉ̃ ẽjũãne.

Borocueɗacarea, Jesura wãsida ẽjũã põãsada 40 ewari jãma. jiruãbẽrã zeɗacarea, wãsida acʉɗe Juaʉ̃da. Idjia unusida Jesu caita zebʉrʉda, jarasida: “Naʉ̃drʉ oveja zaque Ãcõrẽne. Jãʉ̃gʉba idu ɓʉbida ne cadjirua naʉ̃ ẽjũãnebemara”. Jãʉ̃da jarasia carebai carea ẽberãrã diai carea cawaɗamãrẽã Jesura Mesiada. ¿Cawasiɗada cãrẽda mãwãsida Jesura ẽjũã põãsaɗe ɓasiɗe? Acʉɗida naʉ̃da.