Jesura juru edasida Saulora

Saulora toɗa basida Tarso puruɗe. Idjira pariseoɗebema bẽrã idjaɓa bio cawa basida jãmabema leyra. Idjia unu ama ɓasida critianorãra. Ãdji deɗebemada ãĩ erreɓari eɗe basida ẽberã umaquĩrãda idjaɓa wẽrãra siɗa mãwã edebari basida carceɗe ɓʉi carea. Maʉ̃ne Sauloba unusida ẽberãrãba Estebaʉ̃ra jãma poɗapeɗa mõgaraba beasiɗada.

Saulora ɓʉsriɗa ɓaẽ́ ɓasida critianorã Jerusaleʉ̃nebemame, maʉ̃ bʉrʉ idjia idisida sacerdote bororãra dia bueɗamãrẽã drʉa Damascoɗa, critianorã mãwã aɓarica oi carea. Mãwã Sauloba dji puru caida jũẽboɗoɗe, besea dorrodorroa quĩrãca ɓʉba, quĩrãna jʉ̃rã tẽũsia, maʉ̃ bʉrʉ idjira ẽjũãne ẽdrʉ bari ɓesia. Mãwãna carea idjia ũrĩsia: “¿Saulo cãrẽ cãrẽã bʉa mʉ̃ra ẽpẽ ɓʉ?”. Sauloba idisia: “¿Caida bʉra?”. Maʉ̃ beɗeaba panusia: ““Mʉ̃ra Jesua”. Wãnadua Damascoɗaa, jãma jaraɗia carea”. Sauloba poya unuẽ́ ɓasida, maʉ̃ bʉrʉ idjira jʉwaɗe jidaɗapeɗa edesiɗada maʉ̃ puruɗaa.

Damasco puruɗe aɓa critianoda trʉ̃ jarabadjia Ananía, Jesuba cãĩmocaraɗeba jarasia: “Wãdua Juda deda, dji o trʉ̃ jarabada recta, jãma ununida Saulora”. Ananiaba panusia: “Mʉ̃ boro, mʉ̃a ũrĩ ɓʉa zocãrã jãʉ ẽberãba ẽpẽbadarãra preso ɓʉbaria”. Baribʉrʉ Jesuba jarasia: “Wãdua idji ɓʉmaa, Sauloba mʉ̃a edasia Jaradiamãrẽã beɗea djiwiɗiɗebemada Ãcõrẽneda jũma ẽberãra puruɗebema”.

Ara maʉ̃da Ananíara wãsida Saulo ɓʉmaa, idjia jarasia Saulo: “Djaba Jesuba mʉ̃ra bʉmaa diabuesia bʉa mãwã wãya unumãrẽã”. Ara maʉ̃da Sauloba wãya naãrãbema quĩrãca unubisia. Mãwã cawapeɗa Jesuɗebemada ẽberãra jaradia ɓesia. Mãwã idjia borocuepeɗa idji djabarãme jaradia nĩba basida sinagogaɗe. Quĩchadua quĩrãcuita acʉsiɗada judiorãba. Ara maʉ̃da unusiɗada Sauloba jaradiabadjia ẽberãra caitabema Jesuɗeda. Dji judiorãba idibadjiɗada: “¿Nãʉgʉ ẽberã Jesu ẽpẽɓarica?”.

Mãwã Sauloba poa ũbea jaradia basida ẽberãra Damascoɗebema. Maʉ̃ bʉrʉ judiorãba bio quĩrãmasiɗada idjaɓa ɓea quĩrĩã panasiɗada. Mãwã panʉne djabarãba idjira carebasiɗada ãyã wãmãrẽã naʉ̃ puruɗebemada. Maʉ̃ bʉrʉ djabara cawasiɗada idjira jʉrʉ panʉda beaɗi carea, ara maʉ̃da jamarane ɓʉɗapeɗa mẽrãsiɗada ẽdrʉmãrẽã.

Jẽdaare Saulora Jerusaleʉ̃naa wã quĩrĩãsida, djabara acʉɗe. Baribʉrʉ ãdjirãba waya panasiɗada Saulora. Maʉ̃ne aɓa ẽberã sobiada, trʉ̃ jarabadjiɗada Bernabe, edesida Saulora nĩbabadaramaa idjia cawabisida Saulora ya naãrãbema quĩrãca ɓʉẽ́da ãtebʉrʉ awara ɓesida idji soɗe. Sauloba ãbaa jʉre ɓesida Jerusaleʉ̃ne, mãwã jaradiasida idji soɗeba quĩrĩã ɓʉ bẽrã Ãcõrẽnebemada mãwã dãrã bʉrʉɗe ẽberãrãba trʉ̃ jarasiɗada idjira Paulo.