Cornelioba eɗasia Ãcõrẽ jaure

Cesareaɗe basida, aɓa biara ɓʉ dji boro ejercitoɗebema, Romanonebema trʉ̃ jarabada Cornelio. Idjira Judiorãẽ́ ɓaɗamĩna bio quĩrĩãsiɗada ẽberã so bia ɓaɗa bẽrã. Idjia ne quĩrãtanoa obadjiɗa, ẽberãra ne neẽ́ queɗea carea. Cornelioba ĩjã basida Jeowaɗera maʉ̃ bʉrʉ ewariza dji idibadjida. Ewari aɓaʉɗe aɓa angelba jarasida: “Ãcõrẽba ũrĩ ɓʉda bʉa dji idi ɓʉra. Diabuedua bʉ umaquĩrãrãda dji puru Jopeda, Pedro ɓʉmaa zei carea nama”. Cornelioba diabuesida ara maʉ̃da ũbea umaquĩrãda Jopeda, jãʉ̃ puru ɓasida 50 kilometro.

Jopeɗe ɓʉmisa Pedroba cãĩmocarasida. Unusida animarãda Judiorãba coɗaca ɓasida. Mãwãna cãrẽ ũrĩsida beɗea jĩguaba, jarasida: “Codua”. Pedroba quĩrĩãẽ́ ɓasida, Jara ɓasida: “Ni aɓa coca ɓasida jãʉ̃ animarãra”. Beɗea jĩguaba panusida: “Mãwãẽ́da jãʉ̃ animarãra cadjirua ɓʉẽ́da, ara naʉ̃da Ãcõrẽba jarasida jãʉ̃ animarãra biara ɓʉda”. Dji beɗea jĩguaba jarasida: “Acʉɗe wãdua umaquĩrãda ũbea bʉ puertaɗe panʉda”. Pedroba acʉɗe wãsida puertaɗe, idisida jãʉgʉ umaquĩrã: “¿Cãrẽã mãrãra ze panʉ?”. Ãdjirãba panusiɗada: “Ɗiabuesida Cornelioba dji boro ejercito Romanebema, quĩrĩã ɓʉda zeida daime, dai dera Cesareaɗe ɓʉda”. Pedroba edecasida jãʉ̃gʉ umaquĩrãrã jãʉ̃ dimisi. Nurẽma diapeɗe wãsiɗada ãdjirãme Cesareada. Ʉ̃cʉrʉ djabarã Jopeɗebema siɗa idjaɓa wãsiɗada.

Cornelioba unusiɗe Pedrora, ara maʉ̃da chĩrãboroɗe coɓesida. Baribʉrʉ Pedroba jarasida: “Piradrʉdua mʉ̃ra aɓari quĩrãca ɓʉda umaquĩrã bʉ quĩrãca. Ãcõrẽba mʉ̃a jarasida wãida bʉ deda, bʉra Judioẽ́mĩnã mʉ̃ra zesida bʉ deda. Ara naʉ̃da mʉ djuburia jaradua ¿Cãrẽ cãrẽã mʉ̃ra trʉ̃sida?”.

Corneliba nẽbʉrʉsida Pedroa: “Ewari quĩmãrẽ ɓabʉrʉɗe idiɗi basida Ãcõrẽa, maʉ̃be aɓa angelba jarasida: “Trʉ̃ida bʉra mʉ̃ djuburia jaradiaida beɗea Jeowaɗebemada””. Pedroba panusida: “Ãcõrẽba quĩrã awara oẽ́da idjia quĩrĩã ɓʉda jũmarãda”. Pedroba jaradiasia zocarã Jesuɗebemada. Maʉ̃ bʉrʉ Corneliora jãma edasida Ãcõrẽ jaure Jeowaɗeda idjaɓa borocuesiɗada dji cuariara siɗa.