Critianorãra zocãrã druaɗaa wãsiɗaa

Dji nĩbabadarãda bio ĩjãsiɗada dji ley Jesuɗera. Maʉ̃ bʉrʉ ede wãsiɗada beɗea biara ɓʉda Jeowaɗeda naʉ̃ ẽjũã enteroda. Dji poa 47ɗe, djabarã Antioquíaɗebemara diabuesiɗada Paulora idjaɓa Bernabe siɗa Ãcõrẽ Beɗea jaradiaɗi carea. Ãdji umena jaradiabadjiɗada soɗeba ãdji wãbʉdaza Asia Menor puruɗe. Jãma jaradiabadjiɗada Derbe, Listra, Iconio druaɗea.

Paulo, Bernabe ãdjia jaradiabadjiɗada jũmarã: parata bara ɓea, parata neẽ́ queɗea, cũdrarã idjaɓa drõãrã siɗa. Zocãrãrãba ĩjãsiɗada wãrã arada Critoɗera. Pauloba, Bernabe idjaɓa jaradiasiɗada borora Chipreɗebemara trʉ̃ jarabada Sergio Paulo. Baribʉrʉ aɓa ɓʉ jãĩbanaba obicada. Pauloba jarasida jãĩbanaa: “Jeowaba bʉa quĩrĩãcada”. Ara maʉ̃da jãĩbanara ɓesida dauɓerrea. Jãʉ̃gʉ jãwã unupeɗa dji borora Sergio Paulora ara maʉ̃da ĩjãsida.

Pauloba, Bernabe biɗa jaradiabadjiɗada bariduamae: deza, mercadoɗe, oɗe idjaɓa sinagoga. Maʉ̃ne ãdjia biabisiɗada jĩrũ nũca nũca ɓea Listra puruɗe. Ẽberãrãba unusiɗada ãdjia quĩchasiɗada ãdjirãra ãcõrẽrãda. Maʉ̃ bʉrʉ ãdjia dji idi quĩrĩãsiɗada. Pauloba, Bernabeba idu dji idibiɗaẽ́ basida. Jarasiɗada: “Aɓabe bʉrʉ dji idida bara panʉa Jeowa. Dairãra aɓabe umaquĩrãra”. Maʉ̃ne jũẽsiɗada judiorãda. Ãdjirãba jarasiɗada ẽberãrãra quĩrĩãnaẽ́da Paulora. Ara maʉ̃da dji ẽberãrãba mõgaraba taɓarisiɗada idjaɓa ãyã erreɓari ede wãsiɗada puru jãnea quĩchasiɗada idjira beuɗada. Baribʉrʉ, ¡Pauloba waɗi zocai ɓasida! Ara maʉ̃ne jũẽsiɗada djabarãda carebasiɗada. Maʉ̃ bʉrʉ jĩrũãbera edesiɗada puruɗea. Mãwãnacarea Paulora jĩrũãbera wãsida Antioquíaɗea.

Poa 49ɗe Pauloba wãyã acʉɗe wãsida djabarã Asia Menorɗebemada idjaɓa wãsida Europaɗea biɗa. Wãsida Atenanea, Epesoda, Pilipoda, Tesalonicada idjaɓa dewaraʉ druaɗea. Jãʉ̃ wãsiɗaɗe idjime wãsiɗada Silada, Lucada, aɓa cũdrada trʉ̃ jarabada Timoteo. Trajasiɗada ãbaa oɗi carea congregacioʉ̃da idjaɓa carebasiɗada ãdjirãra so zarea panani carea. Paulora wãsida Corintoɗea. Jãma ɓesida poa aɓa ẽsãrica. Carebasida djabarãra so zarea panani carea. Jaradia ɓabadjida idjaɓa ɓʉbi ɓabadjida cartada zocãrã congregacioʉ̃ne carea. Idjaɓa traja ɓabadjida wua deda ocuasida. Dãrã baɗacarea Paulora wãyã jĩrũãberasida Antioquíaɗea.

Dji poa 52 baɗacarea, Paulora wãsida ɓarima ũbea Asia Menorɗea. Wãsida Pilipoɗea. Mãwãnacareabʉrʉ eɗa zesida Corintoɗea. Paulora dãrã basida Epesoɗe. Jãma jaradiabadjida Ãcõrẽ Beɗeaɗebemada, biabicuasida caya queɗeara idjaɓa carebasida djabarã congregacioʉ̃nebemada mãsa so zarea panani carea. Ewariza ecuelaɗe jaradiasida Ãcõrẽ Beɗeaɗebema. Zocãrã ẽberãrãba ĩjãsiɗada. Maʉ̃ bʉrʉ ãdji cacuara awara ɓesida. Jẽdaare baɗacarea druaza wã ɓaɗa bẽrã jãma jaraɗia ɓabadjida beɗeada bia Ãcõrẽneda, Paulora wãsida Jerusaleʉ̃nea.