Carce ɓea wagabariba Ãcõrẽ beɗea wãrãda ũrĩsia

Pilipoɗe aɓa awẽrãda ɓasia. Maʉ̃ra traja ɓabadjida ẽberãra ne bia jarai carea. Baribʉrʉ mãwã jarabari ɓasi animarãda idji cacuaɗe eroɓʉ bẽrã. Mãwã idjia waiɓʉa errarada edabari basida idji djibarira carea. Mãwã Paulo Silame jũẽsiɗaɗe Pilipoɗe, idjia mãwã ẽpẽni ɓasida ãdji caiɗe. Baribʉrʉ animarã idji cacuaɗe ɓʉba mãwã juerza ɓiabari basida: “Naʉ̃gʉ ẽberãrãra nezoca Ãcõrẽnebemada”. Mãwã mĩã sẽ beɗea nĩmi bẽrã Pauloba jarasida maʉ̃gʉ animarã idji cacuaɗe ɓʉa: “¡Mʉ̃a bʉa jaraya Jesu trʉ̃neba bʉra ẽdrʉida idji cacuaɗe ɓʉra!”. Maʉ̃ba animarãra wẽrã cacuaɗe ɓaɗara ẽdrʉsida.

Baribʉrʉ djibarira jãʉ̃ cacuaɗebemarãba cawasiɗaɗe maʉ̃ bʉrʉ waa parata edaɗaẽ́ bẽrã, ãdjirãra quĩrũ ɓʉcuasiɗada. Ara maʉ̃da Paulora, Sila siɗa edesiɗada ãdji bororãmaa. Ãdjia jarasiɗada: “¡Naʉ̃gʉ ẽberãrãba ĩjãnaẽ́ panʉda dji leyra! ¡Maʉ̃ bʉrʉ ẽberãrã pira puosiɗada maʉ̃ puruɗebemara!”. Maʉ̃ba dji bororãba jarasiɗada bia puoɗapeɗa Paulora, Sila siɗa wayacusa carceɗe ɓʉɗida. Maʉ̃ carceɗebema dji boroba ãdjira eɗuara ɓʉsida maʉ̃ pãĩsosoa ɓʉ arare. Maʉ̃ awara ãdjira cepoɗe ɓʉsiɗada.

Paulora, Silame trʉ̃ã panesiɗada Ãcõrẽa bia trʉ̃ãni carea. Mãwã dewararãra ãdjime preso panʉrãba ũrĩnamãrẽã. Cawaɗaẽ́ɗe pãĩmane panʉne zesida de uremiada juerza uresida maʉ̃ carceɗe. Maʉ̃ba jũma ewacuasida dji tapa nũmeanara idjaɓa jũma dji carena jʉ̃ ɓeaɗara ẽrãcuasida, cepoɗe ɓeaɗa siɗa preso ɓeaɗara. Dji boro carcedeɓemara eɗa pira wãsida acʉɗe dji preso ɓeadamaa. Maʉ̃ne unusiɗa dji tapa ɓeaɗara jũma ewa nũmeada. Idjia quĩchasida jũma presoɗe ɓeaɗara wãsiɗada. Maʉ̃ba idjia neco eroɓʉba iduɓa beai basida.

Pauloba mãwã unubʉrʉɗe ɓiasida: “¿Bʉduɓa cãrẽã ne cadjiruada oida? Dairã nama panʉa”. Maʉ̃ba dji carce borora pirasida Paulomaa, Sila panʉmaa. Ãdji caida chĩrãboroɗe coɓepeɗa ãdjia idisida: “¿Cãrẽda mʉ̃a oida mʉ̃ bia ẽdrʉi carea?”. Ãdjirãba panusiɗada: “Bʉa idjaɓa bʉ deɗe ɓea biɗa ĩjãnida panʉda Jesuɗera”. Maʉ̃ bʉrʉ Pauloba Silame jaradiasiɗada Jeowa beɗeara. Maʉ̃ carea dji carce borora idjaɓa jũma idji deɗe ɓeara borocuesiɗada.