Paulo Timoteome

Timoteora cũdra ɓasida dji congregacioʉ̃ Listraɗe. Dji zezera Griegoraʉ̃ ɓasida, dji nanara Judioɗebemara ɓasida. Dji nana trʉ̃ jarabadjiɗaa Eunice, dji papadjora trʉ̃ jarabadjiɗaa Loida. Jãʉ̃ wẽrãrãba jaraɗia panabadjia Jeowaɗeda Timoteo caibe basiɗe eɗa.

Pauloba ɓarima umé acʉɗe wãsida Listra purura, jãma jaradiaɗe wã ɓasida, maʉ̃ne idjia cawasida Timoteoba bio quĩrĩã ɓʉda djabara, maʉ̃ bʉrʉ aɓeɗa careba quĩrĩã basi. Maʉ̃ carea Pauloba edecasida Timoteora wãida idjime. Dãrã ɓaɗa carea Pauloba bio jaradiasida Timoteoa aɓeɗa, idjia biya jaradiamãrẽã beɗea bia Ãcõrẽnebemada.

Ãcõrẽ jaureba jipa edebadjiɗaa Paulora, Timoteo siɗa ãdji wãbʉdaza. Aɓaʉ dimisiɗe Pauloba cãĩmocarasida. Maʉ̃ne unusida umaquĩrã, jarasida: “Wãida Macedonia puru carebai carea”. Maʉ̃ bʉrʉ Paulo,Timoteo, Sila, Luca wãsiɗada jaradiaɗi carea jãma, idjaɓa oɗi carea congregacioʉ̃ra.

Dji puru Tesalonicaɗe zocãrã umaquĩrãra, wẽrãrã siɗa critiano panesiɗaa. Baribʉrʉ ʉ̃cʉrʉ Judiorãba bio unu amasida Paulora idjaɓa ãdjime panʉ siɗa. Zocãrã jʉresiɗada ẽberãra cadjiruarãda, ara maʉ̃da erreɓari edesiɗada djabarãra dji bororãmaa. Dji Judiorã bio jĩgua ɓiabadjiɗada: “Naʉ̃gʉ umaquĩrãra dji quĩrũrãda dji boro Romanebemame”. Paulo, Timoteome bio cadjirua mãwãsiɗada, maʉ̃ bʉrʉ mĩrũ wãsiɗada jãʉ̃gʉ dimisi Berea puruɗaa.

Dji ẽberãrã Bereaɗebemaba ũrĩ quĩrĩãsiɗada beɗea biada Ãcõrẽnebemada. Zocãrã Griego idjaɓa Judiora biɗa ĩjãsiɗada. Baribʉrʉ ʉ̃cʉrʉ Judiorã zesesiɗada Tesalonicaɗeba beɗea droma oɗi carea. Maʉ̃ carea Paulora wãsida Atenana. Timoteo Sila panesiɗada Bereaɗe, droaɗi carea djabarãme. Dãrã ɓaɗa carea Pauloba diabuesida Timoteora carebamãrẽã djabarãba droaɗamãrẽã jãʉ̃ ne cadjirua mãwã panʉne. Wãya Pauloba diabuesida Timoteora Tesalonicaɗaa acʉɗe wãmãrẽã idjaɓa sobiabiɗi carea dewaraʉ congregacioʉ̃nebemada siɗa.

Pauloba jarasida Timoteoa: “Ãcõrẽ Beɗea ĩjãna panʉra, ãdjira ẽpẽnaida”. Timoteora bio djuburiasida idjaɓa carceɗe ɓʉsiɗada ĩjã ɓaɗa bẽrã. Baribʉrʉ idjia bio ɓʉrsiɗa ɓasida ¿Cãrẽã? Jãwãbʉrʉ idjia acʉbisida bio quĩrĩã basida Jeowara.

Pauloba jarasida Pilipoɗebemaraa: “Mʉ̃a diabuesia Timoteora idjia jaradiamãrẽã sãwãbʉrʉ jipa oɗida idjaɓa sãwã jaradiaɗida”. Pauloba bio cawa ɓasida Timoteora ãdjia aɓari quĩrãca bio ĩjã panana bẽrã Ãcõrẽneda. Ãdjirã bio zocãrã poa dji bia panasiɗada.