Paulo jiɗapeɗaɗa Romane wãbisida

Ɓarima ũbea jaradiaɗe wãsida Pauloba, jãma jũẽne wãsida Jerusaleʉ̃ne. Jãma sordaorãba jidasida. Dimisi aɓaʉɗe, carceɗe ɓʉmisa Jesuba jarasida cãĩmocaraɗe: “Wãida bara Romanaa. Jãma jaradiaida jãʉ̃gʉ puruɗe”. Ara maʉ̃da ede wãsiɗada Paulora Jerusaleʉ̃na idjaɓa Cesareada. Jãma poa umé carceɗe ɓasida. Ewari aɓaʉɗe ɓasida tribunalɗe quĩrãpita dji bororãme Pesto, Pauloba idisida: “Quĩrĩã ɓʉda quĩrãmanida Cesarmaa Roma puruɗe”. Pestoba panusida: “Bʉa quĩrĩã ɓʉbʉrʉ Cesarmaa wãida, mʉ̃a diabueya Cesarmaa”. Ara maʉ̃da ɓadobisiɗada Paulora jãba waiɓʉaɗe Romanaa wãbʉrʉɗe. Ume wãsiɗada djabarãda: Luca idjaɓa Aristarco.

Panasiɗada pusaɗe ẽsãrica maʉ̃ne nãũrãda bogozoame bio zarea zesida. Jũmarãba quĩchasiɗada ãdjirãra beuɗida. Pauloba jarasida: “Djabarã wayarãnadua. Aɓa angelba mʉ̃́a jarasida: “Ne wayaɗaẽ́da ni aɓaʉda beuɗaẽ́da. Bia jũẽne wãnida Romane. Jũmarãda jãba waiɓʉaɗe panʉna ẽdrʉɗida”. Maʉ̃ bʉrʉ ¡sozarra pananida!”.

Mãwãnacarea panasiɗada nãũrã dromane 14 ewariɗe. Jũẽne wãsiɗada ẽjũã trʉ̃ jarabada Malta. Jãba waiɓʉara põã nũmane wãsida idjaɓa ãrĩsida. Baribʉrʉ 276 ẽberãrã wãbʉda ɓaɗara jãʉ̃ jãbaɗe, ãdjirãra ẽdrʉsiɗada doya. Ʉ̃cʉrʉ jũẽne wãsiɗada doya, dewara idjaɓa jãba orroɗe jida panenapeɗa jũẽne wãsiɗada. Jãʉ̃gʉ ẽberãra jũẽsiɗada ẽjũã Maltada. Jãmabema ẽberãba bio quĩrĩã edasiɗada ãdjirãa. Maʉ̃ careabʉrʉ jʉ̃wʉ̃rʉ̃ãnamãrẽã tʉbʉda coasiɗada.

Jeɗeco ũbea baɗacarea, sordaorãba edesiɗada Paulora wãyã jãba waiɓʉaɗeba Romanaa. Djabarãrã wãsiɗada bia edaɗi carea. Jãʉ̃da jãwã unusida Pauloba maʉ̃ bʉrʉ bia ɓʉaɗa asida Ãcõrẽa idjaɓa idjira bio biya sentisida, jãʉ̃ deɗe jũẽna bẽrã. Jãʉ̃gʉ dera bio acʉbadjiɗada sordaorãba. Jãma ɓasida poa umé. Ẽberãba acʉɗe wãbadjiɗada. Maʉ̃ne idjia jaraɗiabadjida beɗea bia dji Boroɗebema Ãcõrẽneda, idjaɓa jaradia basida Jesuɗeda. Pauloba ɓʉ́badjida cartaɗe congregacioʉ̃nebema carea, Asiaɗebema, idjaɓa Judeaɗebema carea. Jãʉ̃gʉba unubi ɓʉda Jeowaba jʉrʉ edasida Paulora edemãrẽã beɗea bia Ãcõrẽnebemada ẽjũã entero.