Cartara Djabarã bororãɗebema
Djabarã:
Dairãba bio quĩrĩã panʉda Jeowara idjaɓa Biblia siɗa. Bio cawa panʉda Jeowaba nẽbʉrʉɗara jipa ɓʉda. Jãʉ̃gʉ beɗeaba careba ɓʉda. Jeowa beɗeaba acʉbi ɓʉɗa wãrãda Jeowaba quĩrĩã ɓʉda dadjirãra, idji cuariara quĩrãca (Salmo 119:105; Luca 1:3; 1 Juaʉ̃ 4:19) Dairãba quĩrĩã panʉda carebaɗida dewarauba cawaɗamãrẽã beɗea wãrã arada Ãcõrẽnebema. Maʉ̃ carea bio ɓʉsriɗabibadada acʉbiɗida naʉ̃ librora: Naʉ̃ nẽbʉrʉra cawaɗida Bibliaɗebema. Ũrĩdua naʉ̃ libroɗebema.
Naʉ̃ librora aɓabe quĩchaɗapeɗa osiɗada warrarã carea, baribʉrʉ drõãrãba biɗa poya cawaɗida naʉ̃ libroɗebemada. Quĩrãdoarãnadua Ãcõrẽ beɗeaba bio careba ɓʉda jũmarãda bio ɓʉsriɗa panani carea.
Naʉ̃ libroɗe jara ɓʉɗa Ãcõrẽba bajãda, ẽjũã, ẽberãrã siɗa osida. Naʉ̃ cartaɗe zareaẽ́ ɓʉda leai carea.
Naʉ̃ libroba aɓabe nẽbʉrʉcada drõãenabema cuentora maʉ̃ cãyãbara cawaɗida beɗea biara Jeowaɗebema. Jãʉ̃ nẽbʉrʉɗaɗebemada lea ɓʉɗaɗe quĩchaɗida bʉra jãma ɓʉda.
Naʉ̃gʉ cartaba acʉbi ɓʉda Ãcõrẽ beɗeaɗe jara ɓʉ ʉ̃cʉrʉ ẽberãrãba ĩjãnaẽ́ basida, dewarauba ĩjãsiɗada Jeowaɗera. Ẽberãra biaɗeba cawaɗida jãʉ̃gʉ quĩrãca oɗamãrẽã. (Romano 15:4; 1 Corinto 10:6) Dji libro eroɓʉda 14 beɗearã. Naãrã cawaɗida aɓa ʉ̃cʉrʉba jaraɗada idjaɓa idji beɗeaɗebema cawaɗi carea.
Bʉa warrarã eroɓʉbʉrʉ leaida capítulo aɓa idjime idjaɓa beɗeaida dibujoɗebema. Mãwãnacarea jʉrʉdua Ãcõrẽ Beɗeaɗebemada, jãʉ̃ nẽbʉrʉɗaba careba ɓʉ bʉ warrada cawaɗamãrẽã jãʉ nẽbʉrʉɗeba aɓari quĩrãca oɗamãrẽã idjaɓa poya jaraɗiaida drõãrãa biɗa.
Quĩrĩã panʉda jãʉ̃gʉ cartaba carebaida ẽberãrã so bia, cũdrarãa idjaɓa drõãrã siɗa cawaɗida naʉ̃ beɗea Ãcõrẽnebema. Mãwã cuariara quĩrãca pananida Jeowame.
Bãrã djabarã,
Djabarã bororãɗebema beɗea ɓeara Jeowaɗebemada