BEƊEA 10
¿Cãrẽã biara ɓʉda ãbaa jʉre ɓaida Beɗea ɓeara Jeowaɗebemarame?
Ewari aɓaʉɗe ¿aɓaʉba bʉ́a edecasida Beɗea ɓeara Jeowaɗebemarame ãbaa jʉreɗi carea? Bʉa waɗi wãẽ́ ɓʉbʉrʉ ãdjirãme pera poya sentida. Eɗauɗe bʉa ididua, ¿Beɗea ɓeara Jeowaɗebemara ãbaa jʉre panʉne cãrẽda oɗida? ¿Cãrẽ cãrẽã bio biara ɓʉda ãdjirã carea? ¿Mʉ̃a ãdjirãme wãibaraida? Naʉ̃ beɗeaɗe cawaɗida bʉa poya ara caita ɓaida Ãcõrẽme idjaɓa poya carebaɗida bʉ́a bia ɓai carea.
1. ¿Cãrẽ cãrẽã bio biara ɓʉda ãbaa jʉreɗida?
Biblia ɓʉbariba jarasida cãrẽã bio biara ɓʉda ãbaa jʉreɗira, idjia jarasida: “Ãbaa jʉrebada waiɓʉaɗe, mʉ̃a bia beɗeaida Jeowa” (Salmo 26:12). Iɗi Beɗea ɓeara Jeowaɗebemara siɗa ãbaa jʉre panʉda maʉ̃ bʉrʉ ɓʉsriɗa panʉda. Ẽjũã enteroɗe ãbaa jʉre panʉda bia beɗeaɗi carea Ãcõrẽa, trʉ̃ãni carea idjaɓa ʉ̃taa dji idiɗi carea. Poagaza ãbaa jʉreɗida zocãrãrãme.
2. ¿Cãrẽ cawaida ãbaa jʉre wãbʉrʉɗe?
Ãbaa jʉre panʉne beɗea panʉda Bibliaɗeba, “ebuɗa cawa jara panʉda Ãcõrẽ beɗeaba jara ɓʉra” (Leadua Nehemia 8:8). Bʉa jãma wãibʉrʉ mãsa poya cawaida Jeowaɗebemada idjaɓa idjira sãwãbʉrʉ ɓʉda. Bʉa cawa ɓʉɗe idjia jũmasãwã quĩrĩã ɓʉda bʉra, mĩga cawa quĩrĩã ɓʉda idjira idjaɓa cawaida idjia poya carebaida bʉra ɓʉsriɗa ɓai carea (Isaías 48:17, 18).
3. ¿Wãbʉrʉɗe ãbaa jʉreɗe jãʉ̃gʉba sãwã poya carebaida bʉra?
Jeowaba jara ɓʉda “jʉrʉɗida panʉa sãwã dji carebaɗida biara dji quĩrĩãni carea idjaɓa ne biada oɗi carea. Ãbaa dji jʉrebadara idu ɓʉɗiẽ́ panʉa” (Hebreo 10:24, 25). Ãbaa jʉre wãbʉrʉɗe unuida ẽberãrãra bio quĩrĩã panʉda ãdjirãya idjaɓa ara caita quĩrĩã panʉda Ãcõrẽme. Poya ũrĩda ãdjirãba jara panʉra Ãcõrẽ Beɗeaɗebemada (Leadua Romano 1:11, 12). Idjaɓa beɗeaɗida ẽberãme beɗea droma eropanʉmĩna poya ara oɗida. Maʉ̃ carea Jeowaba quĩrĩã ɓʉda ãbaa dji jʉrebadara idu ɓʉɗaiẽ́ panʉa.
BIO CAWAƊIDA NAɄ̃ BEƊEAƊE
Acʉɗida sãwã o panʉ Beɗea ɓeara Jeowaɗebemarãba ãbaa jʉre panʉne idjaɓa cãrẽã biara ɓʉda esfuerzo oɗida ãbaa jʉreɗi carea.
4. Beɗea ɓeara Jeowaɗebemara ãbaa jʉre panʉne
Siglo nabema critianorãba ãbaa jʉrebadjiɗada bia beɗeaɗi carea Jeowaɗeda (Romano 16:3-5). Leaɗapeɗa Colosa 3:16, beɗeaɗadua:
¿Critianorã drõãenabema cãrẽda osiɗada bia beɗeaɗi carea Jeowaɗera?
Naʉ̃ ewariɗera Beɗea ɓeara Jeowaɗebemarãba reunión oɗida ãbaa jʉrebadamae. Cawaɗi carea cãrẽda oɗida ãbaa jʉre panʉne, Acʉdua dji VIDEODA. Mãwãnacarea, acʉɗapeɗa jãʉ̃ dibujoda ãbaa jʉre panʉne beɗeaɗadua.
Colosa 3:16ɗe jara ɓʉ quĩrãca, ¿cãrẽne aɓarida ɓʉda o panʉra ãbaa jʉre panʉne?
Video acʉɗacare idjaɓa poto ununacare, ¿cãrẽda bio quĩrĩã ɓasida dadjirã ãbaa jʉre panʉne?
Leaɗapeɗa 2 Corinto 9:7, beɗeaɗadua:
¿Cãrẽ cãrẽã parata idiɗacada ãbaa jʉre panʉne Beɗea ɓeara Jeowaɗebemarame?
Acʉdua ɓʉ jaradiabarime cãrẽda oɗida naʉ̃ domia ãbaa jʉre panʉne.
¿Cãrẽ mãsa quĩrĩã ɓʉda bʉa ununara?
¿Cawa ɓasida?
Bʉa poya jʉrʉida jw.org, cawai carea sãʉ̃be idjaɓa sãma ãbaa jʉre panʉda ẽjũã enteroɗe.
Dadjirã ãbaa jʉre panʉne jaradiabada Bibliaɗebema, cawabi ɓʉda sãwã jaradiaɗida dewarara idjaɓa unubada videora. Naãrã trʉ̃napeɗa ʉ̃taa dji idibada, jẽdaare aɓari quĩrãca obada.
Eɗauɗe dji quĩrĩãda jʉwa wãida ʉ̃taa beɗeai carea.
Jũmarãda bia zesiɗaa: Umaquĩrã wẽrã siɗa idjaɓa drõãrã caibearã siɗa.
Beɗea ɓeara Jeowaɗebemarãba ãbaa jʉre panʉne parata idiɗacada, jũma baribemada.
5. Esfuerzo oibara ãbaa jʉreɗe wãi carea
Quĩchadua Jesu cuariaɗe Nazare puru panabadjiɗaa. Baribʉrʉ Ãcõrẽ de dromara Jerusaleʉ̃naa wãi carea ewari ũbea jĩrũneba wãbadjiɗaa o chirua ɓʉɗe. Leaɗapeɗa Luca 2:39-42, beɗeaɗadua:
Bʉmaarã, ¿Jerusaleʉ̃naa wãi carea bio zarea ɓasida?
¿Bʉra cãrẽda oida ɓʉ ãbaa jʉreɗe wãi carea?
Bʉmaarã, ¿bio biara ɓʉda esfuerzo oida? ¿Carea?
Ãcõrẽ Beɗeaba jara ɓʉda bio biara ɓʉda ãbaa jʉreɗe wãida bia beɗeai carea Ãcõrẽnera. Leaɗapeɗa Hebreo 10:24, 25, beɗeaɗadua:
¿Cãrẽ cãrẽã bio biara ɓʉda ãbaa dji jʉrebadara idu ɓʉɗiẽ́ panʉ?
ẼBERÃRÃBA JARA PANɄRA: “Bia beɗeai carea Ãcõrẽa ãbaa jʉreɗacada ni aɓaʉme. Dadjirãza iduɓa poya cawaɗida Ãcõrẽnera dadji deɗe”.
¿Cãrẽ textoba poya acʉbi ɓʉda unubi carea Ãcõrẽba quĩrĩã ɓʉra dadjirãba oɗamãrẽã?
JŨMA BEƊEAƊA
Ãbaa jʉreɗe wãibʉrʉ mãsa poya cawaɗida Jeowaɗera, dji bia poya pananida idjime idjaɓa bia poya beɗeaɗida idjira dewarame.
Cawaɗara
¿Cãrẽ cãrẽã Jeowaba jara ɓʉda ãbaa jʉreɗe wãida bio biara ɓʉda?
¿Cãrẽ cawaida ãbaa jʉreɗe wãbʉrʉɗe?
Bʉa cãrẽ mãsa quĩcha ɓʉda, ¿sãwã poya carebaida ãbaa jʉreɗe wãbʉdaɗe?
CAWADUA MÃSA
¿Bʉa quĩchabʉrʉɗe ãbaa jʉreɗe wãida pera nũmʉca? Umaquĩrã aɓa pera senti ɓasimĩna, mãwãnacarea bio quĩrĩãsida ãbaa jʉreɗe wãida.
Cawadua aɓaʉ cũdraba bio quĩrĩã ɓabadjida ãbaa jʉreɗe wãi carea, idjaɓa acʉdua idjia oɗara ara ʉ̃rʉ̃ wã ɓai carea ãbaa jʉreɗe.
Leadua dewaraʉba jarabadara sãwã sentisiɗada ãbaa jʉreɗe wãsiɗaɗe.
“¿Cãrẽã biara ɓʉda reunioʉ̃naa wãida ãbaa jʉrebadamae?” (Acʉdua internene)
Cawadua aɓa umaquĩrã ne drʉabariɗe wã carera Beɗea ɓeara Jeowaɗebemarame awara ɓebarida.
“Mʉ̃a wãbʉrʉza edebadjida põwara” (Cartaba Jara ɓʉda, 2014, julio 1)