BEƊEA 12
¿Cãrẽba carebaida mãsa estudiai carea Bibliaɗebemada?
Bibliaɗebema cawaira dewara ẽjũãnaa wãbʉrʉ quĩrãca ɓʉa. Baribʉrʉ eɗauɗe zarea ɓʉda. ¿Bʉa poya idida mãsa estudiaida Bibliara? ¿Cãrẽ cãrẽã biara ɓʉda esfuerzo oida estudiai carea Bibliada? Idjaɓa ¿cãrẽba poya carebaida beɗea droma zebʉrʉɗe?
1. ¿Cãrẽ cãrẽã bio biara ɓʉda estudiaida Bibliara?
“Ãcõrẽ beɗeara zocai ɓʉa idjaɓa ʉɓʉa ɓʉa” (Hebreo 4:12). Bibliara dji carta bio biara ɓʉda jara ɓʉ bẽrã Ãcõrẽba quĩcha ɓʉra idjaɓa idjia senti ɓʉra bʉ carea. Idjia poya carebaida mĩga cawai carea, bio ne cawai carea idjaɓa ne biada jʉ̃ãi carea. Idjaɓa maʉ̃ cãyãbara bʉa Ãcõrẽme dji bia ɓaida. Cawabʉdaza Bibliaba bio ʉɓʉabi ɓaida.
2. ¿Cãrẽ cãrẽã wãrãda cawa panʉda Bibliara biara ɓʉda?
Ãcõrẽ Beɗeaba jara ɓʉra nẽbʉa ɓʉ quĩrãca ɓʉda. Dji wãrãda Ãcõrẽ Beɗeaɗebemada “nẽdo edadua idjaɓa nẽdobuerãdua” (Proverbios 23:23). Dadjirãmaarã bio biara ɓʉda jũma cawaɗara Ãcõrẽ Beɗeaɗebema esfuerzo oɗida mĩga cawaɗi carea (Leadua Proverbios 2:4, 5).
3. ¿Cãrẽda oida Jeowaba bʉ carea mĩga estudiai carea?
Jeowaba jũma oɗa bẽrã idjaɓa bʉra dji bia bẽrã, idjia bio cawa ɓʉda bʉra, maʉ̃ bẽrã idjia carebaida mĩga estudiai carea. Ãcõrẽba “careba ɓʉa idjia quĩrĩã ɓʉra o pananamãrẽã idjaɓa mãwã o quĩrĩã ɓeaɗamãrẽã” (Leadua Pilipo 2:13). Maʉ̃ bʉrʉ bʉa quĩrĩã ɓʉbʉrʉ idjia carebamãrẽã, Ãcõrẽba poya carebaida. Idjaɓa bʉ cuariara, bʉ dji biarã siɗa quĩrĩãnacada Bibliara estudiaɗira, idjia ʉɓʉada diaida droai carea. Ewariza ididua Jeowaa carebamãrẽã mĩga cawai carea (1 Tesalonica 5:17).
BIO CAWAƊIDA NAɄ̃ BEƊEAƊE
Acʉdua cãrẽda poya oida dewararãba quĩrĩãnacamĩna bʉa estudiaɗira Bibliara idjaɓa ʉ̃nãũi neẽ́ ɓʉbʉrʉ. Mãwãnacarea acʉɗida Jeowaba sãwã poya carebaida.
4. Bio cawadua estudiaira Bibliaɗebemada bio biara ɓʉda bʉ carea
Eɗauɗe ne quĩrãtanoa mãwãbarida, maʉ̃ bʉrʉ bio zarea ɓʉda estudiaira Bibliara. ¿Cãrẽda poya oibarai? Leaɗapeɗa Pilipo 1:10, beɗeaɗadua:
Bʉ quĩchamaarã, ¿cãrẽda bio biara ɓʉ dewara cãyãbara?
Ãcõrẽ Beɗeara biara ɓʉbʉrʉ dewara cãyãbara, ¿bʉa cãrẽda poya oida?
Bʉa ɓʉibʉrʉ ĩbʉda boteyaɗe, mãwãnacare ɓʉida mõgarada, poya araẽ́da mãsa
Baribʉrʉ bʉa naãrã ɓʉibʉrʉ mõgarada boteyaɗe, mãwãnacare bʉa ĩbʉda ɓʉibʉrʉ, mãwãra poya araida. Ara maʉ̃ quĩrãca bʉa bio cawa ɓʉbʉrʉ “cãrẽda biara ɓʉda” jãʉ̃gʉra poya oida idjaɓa ne jũma bʉa quĩrĩã ɓʉra oya
Ãcõrẽ Beɗeara cawa panʉbʉrʉ capipia pananida, mãwã oɗibʉrʉ bio cawaɗida Ãcõrẽra biya beɗeaɗi carea idjime. Leaɗapeɗa Mateo 5:3, beɗeaɗadua:
Dadjirãmaarã Ãcõrẽ Beɗeara biara ɓʉbʉrʉ, ¿jãʉ̃gʉba sãwã poya carebaida?
5. Droadua beɗea droma eroɓʉmĩna
Ʉ̃cʉrʉba quĩrĩãnacada bʉa Ãcõrẽ Beɗea estudiaira. Unudua Francesco mãwãnara. Acʉɗapeɗa dji VIDEODA, beɗeaɗadua.
¿Sãwã sentisiɗada dji cuariarã, dji biarã siɗa Francescoɗe ũrĩnapeɗa idjia estudiaɗara?
¿Cãrẽã biara ɓasida idjia droasida?
Leaɗapeɗa 2 Timoteo 2:24, 25, beɗeaɗadua:
¿Bʉ cuariarã, bʉ dji biarã siɗa cãrẽda quĩcha panʉda bʉa cawaɗara?
Jãʉ̃ texto jaraɗa quĩrãca, ¿cãrẽda poya oida dewararãba quĩrĩãnaẽ́bʉrʉ bʉa estudiaida? ¿Cãrẽã?
6. Ĩjãdua Jeowaba carebaida
Mãsa dji bia ɓaibʉrʉ Ãcõrẽme, idjira capipia ɓaida. Baribʉrʉ eɗauɗe zarea ɓʉda awara oi carea idjia quĩrĩã ɓʉ quĩrãca. Ewari aɓaʉɗe mãwã senti ɓʉbʉrʉ idu ɓʉẽ́da Ãcõrẽra, idjia poya carebaida. Acʉɗapeɗa dji VIDEODA, beɗeaɗadua.
Jãʉ̃ video ununa quĩrãca, ¿Jim cãrẽda oibara ɓasida awara oi carea Jeowaba jara ɓʉ quĩrãca?
¿Cãrẽda mãsa bʉa quĩrĩãsi idjia oɗaɗeba?
Leaɗapeɗa Hebreo 11:6, beɗeaɗadua:
¿Jeowaba cãrẽda oida “jũma idji jʉrʉbʉdara” carea idjaɓa idji ũrĩbʉdara carea?
Bʉmaarã, ¿Jeowaba sãwã senti ɓʉda bʉa esfuerzo obʉrʉɗe estudiai carea Ãcõrẽ Beɗeara?
AƁAɄBA POYA IDIDA: “¿Cãrẽ cãrẽã bʉa Bibliara estudia ɓʉ?”
¿Bʉa cãrẽda panuida?
JŨMA BEƊEAƊA
Eɗauɗe zarea ɓʉmĩna Ãcõrẽ Beɗeada estudiaida, jãʉ̃gʉba poya carebaida dãrã panani carea. Bʉa ĩjã ɓʉbʉrʉ Jeowaa, idjia ne bia diaida.
Cawaɗara
Bʉmaarã, ¿Cãrẽ cãrẽã biara ɓʉda Ãcõrẽ Beɗeara?
Ãcõrẽ Beɗeara “biara ɓʉda” dewara cãyãbara. Maʉ̃ bʉrʉ, ¿bʉa cãrẽda poya oida?
¿Cãrẽ cãrẽã idida Jeowaa carebamãrẽã Biblia mĩga estudiai carea?
CAWADUA MÃSA
Acʉdua beɗea quĩmãrẽ bio carebaɗa ʉ̃cʉrʉ ẽberãrã ʉ̃nãũi neẽ́ ɓʉmĩna estudiaɗi carea Ãcõrẽ Beɗeada.
“Ne quĩrãtanoa oɗibara panʉmĩna bia oɗadua” (¡Despertad!, 2014, Febrero)
Wẽrãba bio ĩjã quĩrĩã ɓasida Ãcõrẽ Beɗeara, baribʉrʉ dji quimaba adua ɓasida idjia oɗara. Acʉdua Jeowaba sãwã carebasida.
Acʉdua wẽrãda droasida sãwã carebasida idji quimaa.
Ĩjã ɓʉ bẽrã Ãcõrẽ Beɗeara maʉ̃ bʉrʉ ede wãsida leymaa (6:30)
Ʉ̃cʉrʉba jarabadada Beɗea ɓeara Jeowaɗebemarãba quĩrĩãnacada cuariarã ãbaa pananaẽ́da. ¿Jãʉ̃gʉra wãrãda?