¿Cãrẽda oibara ɓʉ cuariara capipia panani carea? (Dji 2)

Warrarã Jeowaba bari diaɗa. Idjia quĩrĩã ɓʉda dji warrarã bio wagaɗida. Maʉ̃ carea ʉ̃rãga biada dia ɓʉda jaradiaɗamãrẽã. Idjaɓa ʉ̃rãga biada dia ɓʉda dji warrarãa ãdjirãba carebaɗamãrẽã dji cuariara bia panani carea.

1. ¿Cãrẽ ʉ̃rãga biada Jeowaba dia ɓʉda djibarirãa?

Jeowaba quĩrĩã ɓʉda djibarirãba bio quĩrĩãnida ãdji warrarãa idjaɓa quĩrĩã ɓʉda ãdjirãra ãbaa pananida dji warrarãme ewariza. Dji zezerãba bio wagaɗida panʉa ãdji warrarãa idjaɓa bio jaradiaɗida panʉa Ãcõrẽ Beɗeaɗe (Proverbios 1:8). Maʉ̃ bʉrʉ dadji Ãcõrẽba dji zezerãa jara ɓʉ: “jaradia panʉneba idjaɓa jipa obi panʉneba dadjirã Boroba quĩrĩã ɓʉ quĩrãca daupẽnadua” (Leadua Epeso 6:4). Jeowaba bia unuida dji zezerãba daupẽbada ãdji warrarãa idjia quĩrĩã ɓʉ quĩrãca. Jeowaba quĩrĩã ɓʉda dji zezerãbʉrʉ daupẽnida dji warrarãa; dewararãbara daupẽnaẽ́da.

2. ¿Cãrẽ ʉ̃rãga biada Jeowaba dia ɓʉda dji warrarãa?

Jeowaba ãdji warrarãa jara ɓʉda “djibarirã beɗeara ne jũmane ĩjãnadua” (Leadua Colosa 3:20). Dji warrarãba waya panʉbʉrʉ idjaɓa ĩjã panʉbʉrʉ dji zeze beɗeara, bio capipiabibarida ãdji zezerãa idjaɓa Jeowa siɗa (Proverbios 23:22-25). Jesura warra bia ɓasida; idjiara jipa ɓasimĩna, djibarirãba jarabʉdara idjia jũma ĩjã obadjia. Idjaɓa wayabadjia djibarirãa ãdjirãra jipaẽ́ panasiɗamĩna (Luca 2:51, 52).

3. ¿Cãrẽda poya oɗida jũma dji cuariarã ara caita panani carea Ãcõrẽme?

Bʉa warrada eroɓʉbʉrʉ, bʉa quĩrĩã ɓʉda ãdjirãra biɗa bio quĩrĩãnida Jeowara bʉa quĩrĩã ɓʉ quĩrãca. ¿Cãrẽba poya carebaida? Oɗibara panʉ Bibliaba jara ɓʉ quĩrãca: “Bio jaradiaɗibara [Ãcõrẽ Beɗeara] bʉ warrarãa. Beɗeaɗibara jãʉ̃gʉɗebema chũmebʉdaɗe bʉ deɗe, pʉrrʉaɗe wãbʉdaɗe” (Deuteronomio 6:7). Bio jaradiai carea ɓarima zocãrã aɓarida jaraɗida panʉa. Bʉa cawa ɓʉa ewariza bʉa aɓarida jaraida ɓʉa bʉ warrarãa ãdjirãra ĩjãnamãrẽã. Maʉ̃ bʉrʉ naʉ̃gʉ textoba jara quĩrĩã ɓʉda bʉ ewariza jaraida ɓʉa Jeowaɗebemada bʉ warrarãa ãdjirãba cãĩne wãbʉdaɗe, idjaɓa bʉ piradrʉbʉdaɗe. Domiaza, dji cuariarãba ãbaa cawaɗibara Ãcõrẽ Beɗeaba jara ɓʉra. Baribʉrʉ bʉra warrarã neẽ́ ɓʉmĩna, idjaɓa estudiaibara ɓʉa Ãcõrẽ Beɗea domiaza, jãʉ̃gʉba bio poya carebaida bʉra.

BIO CAWAƊIDA NAɄ̃ BEƊEAƊE

4. Quĩrĩã daupẽnadua warrarãra

Warrada daupẽnira bio zarea ɓʉa. ¿Ãcõrẽ Beɗeaba sãwã poya carebaida? Leaɗapeɗa Santiago 1:19, 20, beɗeaɗadua:

• ¿Djibarirãba sãwã poya acʉbi panʉda bio quĩrĩã panʉda ãdji warrarãa beɗea panʉne ãdjirãme?

• Zeze quĩrũ ɓʉɗera, ¿cãrẽã poya quĩrãmaẽ́da dji warrarãra?a

5. Bio wagadua bʉ warrarã

Bio wagai carea bʉ warrara, bio biara ɓʉda bʉra ãdjirãme beɗeaɗida umaquĩrãba wẽrã obadara. Eɗauɗe bio perabarida, maʉ̃ cãyãbara biara ɓʉda beɗeaida. Acʉɗapeɗa dji VIDEODA, beɗeaɗadua.

VIDEO: Wagaɗadua bãrã warrarã “Ne cadjiruaɗe” (2:58)

• ¿Cãrẽ cãrẽã ʉ̃cʉrʉ djibarirãba pera sentibadada beɗeaɗi carea ãdji warrarãme umaquĩrãba wẽrã obadara?

• ¿Cãrẽba carebabarida ʉ̃cʉrʉ zezerãba beɗeaɗi carea jãʉ̃gʉɗebemada ãdji warrarãme?

Ãcõrẽ Beɗeaba jaraɗa quĩrãca, naʉ̃ ẽjũãra Diauruɗebema bẽrã wetara cadjiruara o wãsida. Leaɗapeɗa 2 Timoteo 3:1, 13, beɗeaɗadua:

• Dji caibea 13ɗe jara ɓʉ quĩrãca zocãrã ẽberãrãba ne cadjirua obadada. Ne jara ɓʉ quĩrãca, ʉ̃cʉrʉba caibearãra bio cadjirua obadada. Maʉ̃ bʉrʉ, ¿cãrẽ cãrẽã bio biara ɓʉda djibarirãba beɗeaɗida ãdji warrarãme umaquĩrãba wẽrã obadara? idjaɓa ¿cãrẽda poya oɗida wagai carea ãdji warrarãa?

¿Cawa ɓasida?

Beɗea ɓeara Jeowaɗebemarãba ne zocãrãneba jaradiabada djibarirãra bia beɗeai carea ãdji warrarãme umaquĩrãba wẽrã obadara idjaɓa wagai carea caibearãa. Maʉ̃ne jaraɗida:

• Wagaɗadua dji warrarãa (video)

• Cawaɗadua dji waiɓʉarabema jaradiabariɗeda, beɗea 10 idjaɓa 32

• “Sãwã beɗeaida bʉ warrame umaquĩrãba wẽrã obadara” (¡Despertad! 2016, núm. 5)

6. Bio wayadua zezerãra

VIDEO: ¿Sãwã beɗeaida mʉ̃ djibarirãme? (2:19)

• ¿Cãrẽ cãrẽã bio biara ɓʉda cũdraba bia beɗeaida djibarirãra?

• ¿Cũdraba sãwã acʉbi ɓʉda bio waya ɓʉda djibarirãra?

Leaɗapeɗa Proverbios 1:8, beɗeaɗadua:

• ¿Cũdraba cãrẽda oibara djibarirãba jarabʉdaɗe cãrẽda oida ɓʉ?

7. Dji idiɗadua idjaɓa bia beɗeaɗadua Jeowaa bʉ cuariarãme

Beɗea ɓeara Jeowaɗebemarãba domiaza dji cuariame ãbaa jʉrebada dji idiɗi carea idjaɓa bia beɗeaɗi carea Jeowaa. ¿Cãrẽda o panʉda ãbaa jʉre panʉne dji cuariame? Acʉɗapeɗa dji VIDEODA, beɗeaɗadua.

VIDEO: Dji cuariame ãbaa jʉrebada dji idiɗi carea: Cãrẽã zarea ɓʉda oida idjaɓa cãrẽã bia ɓʉda oida (8:04)

• ¿Cãrẽba poya carebaida ãbaa jʉrei carea bʉ cuariame domiaza mãsa cawaɗi carea Ãcõrẽnebemada?

• ¿Djibarirãba cãrẽda poya oɗida ãdji warrarãba bia ununi carea jũma unu panʉra ãbaa panʉne dji cuariame? (Acʉdua poto nabema)

• Bʉmaarã, ¿zarea ɓʉda bʉ cuariame ãbaa jʉreɗi carea domiaza mãsa cawaɗamãrẽã Ãcõrẽnebemada?

Jeowaba quĩrĩã ɓasida naẽnaena Israelitarãra ãdji cuariarãme ãbaa jʉreɗida mãsa cawaɗi carea idjiɗebemada. Leaɗapeɗa Deuteronomio 6:6, 7, beɗeaɗadua:

• ¿Bʉa cãrẽda poya oida naʉ̃ beɗea jara ɓʉ quĩrãca oi carea?

Cãrẽda poya oida bʉ cuariame ãbaa jʉre panʉne mãsa cawaɗi carea Ãcõrẽnebemada:

• Ara oɗira jũma cawaɗira Ãcõrẽ Beɗeaɗe ãbaa jʉre panʉne congregacioʉ̃me.

• Leaɗadua aɓa nẽbʉrʉɗada Bibliaɗebemada, leaɗapeɗa beɗeaɗadua cuariarãme.

• Warra caibearã eroɓʉbʉrʉ, descargadua wa imprimidua internene cãrẽda poya oida caibearãme jw.org ɗe.

• Cũdra eroɓʉbʉrʉ, jʉrʉ edaida internene cãrẽda poya oida cũdrarãme jw.org ɗe.

• Djiobarida ẽberã naẽnabema quĩrãca, cawai carea dji nẽbʉrʉɗa naẽnabema.

• Acʉɗadua video aɓa jw.org ɗe, mãwãnacarea beɗeaɗadua bʉ cuariarãme.

JŨMA BEƊEAƊA

Jeowaba quĩrĩã ɓʉda djibarirãba bio quĩrĩãnida ãdji warrarãa, bio jaradiaɗida idjaɓa bio wagaɗida ãdjirãra; warrarãba bio wayaɗida panʉa djibarirãra idjaɓa bio ĩjãnadua ãdjirãba jara panʉra. Jũma cuariara domiaza dji idiɗibara idjaɓa bia beɗeaɗibara Jeowaa.

Cawaɗara

• ¿Djibarirãba cãrẽda poya oɗida bia jaradiaɗi carea idjaɓa bio wagaɗi carea ãdji warrarãa?

• ¿Warrarãba cãrẽda poya oɗida acʉbiɗi carea bio waya panʉda djibarirãda?

• ¿Cãrẽã biara ɓʉda domiaza dji cuariame ãbaa jʉreɗida dji idiɗi carea idjaɓa bia beɗeaɗi carea Jeowaa?

CAWADUA MÃSA

¿Cãrẽ beɗea bia bʉ warra cawaida ɓʉ bia wãi carea waribʉrʉɗe?

“Beɗea sei bio biara ɓʉda bʉ warrara carea” (¡Despertad!, 2019, núm. 2)

Cawadua cãrẽba poya carebaida quĩrãcuita acʉ panʉne drõãrã queɗeara.

“¿Ãcõrẽba quĩrĩã ɓʉda dadjirãra bio wagaɗida panʉa djibarirã drõã queɗeara?” (Acʉdua internene)

Acʉdua umaquĩrã aɓa idjia adua basimĩna cãrẽda oida bia daupẽni carea dji warrarãa, bia osida.

Jeowaba jaradia ɓasida dadjirãa bia jaradiai carea dai warrarãa (5:58)

Cawadua djibarirãba cãrẽda poya oɗida bia panani carea ãdji warrarãme.

“¿Zezerãba cãrẽda poya oɗida ara caita panani carea dji warrarãme?” (Cartaba Jara ɓʉda, 2011, Noviembre 1)