BEƊEA 59
Bʉa poya droaida dewararãba ẽpẽ panʉne
Dãrãẽ́ne jũmarãa critianorãra ẽpẽnenida. ¿Jãʉ̃ba ne wayaida?
1. ¿Cãrẽ cãrẽãbʉrʉ cawa panʉda dadjirãra ẽpẽnenida?
Ãcõrẽ Beɗeaba ebuɗa jara ɓʉda “jũma Jesucrito ĩjã ɓea Ãcõrẽ quĩrãpita bia nĩnada ẽberãrãba biẽ́ oɗi carea ẽpẽnia” (2 Timoteo 3:12). Jesura ẽpẽsiɗada, idjira naʉ̃ ẽjũãne Diauruɗebemaẽ́ ɓaɗa bẽrã. Idjaɓa dadjirãra Jesu quĩrãca naʉ̃ ẽjũãnebemaẽ́ bẽrã, maʉ̃gʉ bẽrã bororã naʉ̃ ẽjũãnebemada idjaɓa religioʉ̃ sewaida ɓeaba dadjirãra ẽpẽ panʉda (Juaʉ̃ 15:18, 19).
2. ¿Ẽpẽ naẽna cãrẽda poya oɗida?
Iɗiɗera bio ĩjãnida Ãcõrẽ Beɗeara. ¿Jãʉ̃da sãwã oɗida? Ewariza ʉ̃taa idiɗida idjaɓa leaɗida idji beɗeara. Ãbaa jʉreɗida dadji djabarãya congregacioʉ̃ne domiaza. Naʉ̃ba jũma diaida ʉɓʉa ɓai carea ẽpẽbʉdaɗe dadjirãa idjaɓa dadji cuariarãba ẽpẽ ɓʉɗamĩna. Dji apóstol Paulo idjira ara catrua ẽpẽsiɗada, maʉ̃gʉbʉrʉ ɓʉsida: “Mʉ̃ Boroba [Jeowa] mʉ̃ra careba ɓʉa. Maʉ̃ bẽrã mʉ̃ra ne wayaẽ́ ɓʉa” (Hebreo 13:6).
Sozarra ɓeaɗi carea bio biara ɓʉda Ãcõrẽ Beɗea jaradiaɗida. Dji jaradia ɓʉba careba ɓʉda ẽberãa wayaẽ́ carea idjaɓa biara ĩjã panʉda Jeowaa (Proverbios 29:25). Ara naʉ̃da bʉa ʉɓʉa eroɓʉbʉrʉ bʉa poya mãsa jaradiaida Ãcõrẽ Beɗeara dji bororãba naʉ̃ ẽjũãnebema obiẽ́ quĩrĩã panʉne (1 Tesalonica 2:2).
3. Dewaraʉba ẽpẽbʉdaɗe droa panʉbʉrʉ ¿bia ɓʉda?
Ni aɓaʉba quĩrĩãcada dewaraʉba ẽpẽira. Baribʉrʉ droa panʉbʉrʉ dewaraʉba ẽpẽbʉdaɗe bio ĩjãnida Ãcõrẽ Beɗeara. Idjaɓa caita Ãcõrẽme pananida unu pananaera Jeowaba careba ɓʉda, maʉ̃gʉbʉrʉ ĩjã panʉda dadji ʉɓʉaẽ́ ɓʉɗe (Leadua Santiago 1:2-4). Jeowa sopua ɓʉda djuburia panʉne, baribʉrʉ idjira so ɓʉsriɗa ɓʉda dadji esfuerzo o panʉne droaɗi carea. Ãcõrẽ Beɗeaba jara ɓʉ: “Bia o panʉ carea mĩga panʉne droaɗi bʉrʉ, Ãcõrẽba bia unuya” (1 Pedro 2:20). Jũmarã dji droa panʉbʉrʉ idjaɓa jipa panʉbʉrʉ, Jeowaba ne bia diaida naʉ̃ ẽjũãne dãrã panani carea idjaɓa dji quĩrũrã neẽ́ ɓaya (Mateo 24:13).
BIO CAWAƊIDA NAɄ̃ BEƊEAƊE
Acʉɗida ʉ̃cʉrʉ beɗeada acʉbi ɓʉda sãwãbʉrʉ jipa pananida Jeowame ẽpẽ panʉmĩna. Idjaɓa acʉɗida sãwãbʉrʉ Jeowaba ne bia dia ɓʉda droa ɓʉɗe.
4. Bʉa poya droaida ẽpẽ panʉne bʉ cuariarãba
Jesuba jarasida wãrãda ʉ̃cʉrʉra dji cuariarãra ẽpẽnida Ãcõrẽ Beɗea ĩjã panʉ carea. Leaɗapeɗa Mateo 10:34-36, beɗeaɗadua:
Aɓaʉba ĩjãibʉrʉ Ãcõrẽ Beɗeara, ¿dji cuariarãra sãwã quĩchaɗida?
Cawai carea ʉ̃cʉrʉ ẽberãrãra aɓarica mãwãsida, acʉɗadua dji VIDEODA. Mãwãnacarea beɗeaɗadua.
¿Cãrẽda bʉa oida ɓʉ cuariarãba wa bʉ dji biarãba jaraida bʉra Ãcõrẽ Beɗea idu ɓʉmãrẽã?
Leaɗadua Salmo 27:10 idjaɓa Marco 10:29, 30. Leaɗapeɗa texto aɓa aɓa, beɗeaɗadua:
¿Jãʉ̃ beɗeaba sãwã poya careba ɓʉda bʉ cuariarãba wa bʉ dji biarãba ẽpẽbʉdaɗe?
5. Dewaraʉba ẽpẽ panʉmĩna idu ɓʉẽ́da Jeowara
Ʉɓʉa ɓaida Jeowame dewaraʉba iduaribicada ĩjãi carea Jeowaa. Acʉɗapeɗa dji VIDEODA, beɗeaɗadua.
Jãʉ̃gʉ videoba jaraɗa, ¿bʉra sãwã careba ɓʉda ʉɓʉa ɓai carea?
Leaɗadua Hecho 5:27-29 idjaɓa Hebreo 10:24, 25. Leaɗapeɗa texto aɓa aɓa, beɗeaɗadua.
¿Cãrẽ cãrẽãbʉrʉ bio biara ɓʉda Jeowaa igaraẽ́da dji bororã naʉ̃ ẽjũãnebemaba iduaribida wã panʉmĩna Ãcõrẽ Beɗea jaradiaɗi carea idjaɓa ãbaa jʉreɗi carea?
6. Jeowaba careba ɓʉda droai carea
Beɗea ɓeara Jeowaɗebema ne jũma droaɗebema; dji caibea, dji drõãrãba poya o panʉda Jeowame jipa ara caita panani carea ẽpẽ panasiɗaɗe. Cawai carea sãwã osiɗada, acʉɗapeɗa dji VIDEODA, beɗeaɗadua.
¿Cãrẽba carebasida jãʉ̃ Beɗea ɓeara Jeowaɗebema droaɗi carea ẽpẽ panasiɗaɗe?
Leaɗadua Romano 8:35; 37-39 idjaɓa Pilipo 4:13. Leaɗapeɗa texto aɓa aɓa, beɗeaɗadua.
Naʉ̃ textoba jaraɗa quĩrãca, ¿sãwã bʉa poya droaida dewara ne cadjirua ɓea?
Leaɗapeɗa Mateo 5:10-12, beɗeaɗadua:
¿Cãrẽ cãrẽãbʉrʉ bʉra so ɓʉsriɗa ɓaida jãʉ̃ ẽpẽ panʉne?
Zocãrã ĩjã ɓea Jeowaɗebemaba droa panʉda ẽpẽ panʉne. ¡Bʉa biɗa poya oida!
ẼBERÃRÃBA JARA PANɄRA: “Mʉ̃a poya droaẽ́da ẽpẽnira”.
¿Cãrẽ textoba poya carebaida ẽpẽ panʉ ẽberã mãwã quĩcha ɓʉɗe droai carea?
JŨMA BEƊEAƊA
Jeowaba bia unumʉda esfuerzo o panʉne idji beɗea ĩjãni carea ẽpẽ panʉne. ¡Idjia careba ɓʉba poya droaɗida!
Cawaɗara
¿Cãrẽã cawa panʉ critianorãra ẽpẽnida?
¿Cãrẽda poya oida ara naʉ̃da ẽpẽni zebʉrʉɗe?
¿Cãrẽã bʉa wãrãda ĩjã ɓʉda ẽpẽnibʉdaɗe poya ĩjãnida Jeowa beɗeara?
CAWADUA MÃSA
Acʉdua sãwã carebasida Jeowaba aɓa djaba cũdraba idji presoɗe ɓasiɗe dewara araare wãẽ́ ɓasi.
Cawadua cãrẽba carebasida umaquĩrãa idji quimame Ãcõrẽme ɓai carea zocãrã poa ẽpẽ panasiɗaɗe.
Cawadua sãwã droaɗida ẽpẽbʉdaɗe ʉɓʉa.
“Arã naʉ̃da oɗida ẽpẽbʉdaɗe” (Cartaba Jara ɓʉda, 2019, Julio)
¿Cãrẽda cawaɗibara dji cuariarãba ẽpẽbʉdaɗe? ¿Sãwã poya necai pananida idjaɓa jipa Jeowame pananida?