Naʉ̃ ewariɗera carebaɗadua Ãcõrẽ Ɓoroda
Quĩchadua, nãũrã waiɓʉada bʉ puru caita jũẽbʉrʉda. Ẽberã bororã ẽjũãnebemaba jarabadaa: “¡ẼDRɄƊADUA WAGAƊI CAREA!”. ¿Bʉa cãrẽda oibara? ¿Wãrãda bʉra biara ɓʉ mãwãida?
Wãrãda “nãũrã waiɓʉara” zebʉrʉda dadjirãmaa. Jesuba jarasida bio ewari minijĩchiada zebʉrʉ dadjirãmaa, nãũrã waiɓʉara quĩrãca ɓʉa (Mateo 24:21). Dadjirãba poya jʉrʉɗi ẽdrʉɗi carea nãũrã waiɓʉaɗe. ¿Cãrẽda oɗibara panʉ?
Jesu eyaɗe ɓasiɗe jarasia cãrẽda poya oɗida: “Maʉ̃ bẽrã naãrã Ãcõrẽra bãrã Boroda ɓʉɗadua. Quĩrãcuita pananadua idjia obi ɓʉra oɗi carea. Mãwã bãrãba neẽ́ panʉra idjia jũma diaya” (Mateo 6:33). ¿Cãrẽda jara quĩrĩã ɓʉ naʉ̃ba?
“Maʉ̃ bẽrã naãrã Ãcõrẽra bãrã Boroda ɓʉɗadua”. Jãʉ̃gʉdrʉ bio biara ɓʉda dewara ɓea cãyãbara (Mateo 6:25, 32, 33). ¿Cãrẽa poya cawa quĩchaɗida? Ẽberãrãba poya ara oɗaẽ́da panʉda naʉ̃ beɗea droma ẽjũãnebemara. Aɓabe Ãcõrẽbʉrʉ ara oida ɓʉda.
Quĩrãcuita pananadua “idjia obi ɓʉra oɗi carea”. Naʉ̃gʉ jara quĩrĩã ɓʉda oɗida Ãcõrẽba obi ɓʉra idji beɗeaɗe. ¿Cãrẽã? Dadjirãba jara panʉbʉrʉ cãrẽda maʉ̃ biara ɓʉda idjaɓa cãrẽda maʉ̃ biẽ́ ɓʉda, biẽ́ wanida (Proverbios 16:25). Ĩjãnibʉrʉ Ãcõrẽba jara ɓʉra idji leyɗe dadjirãra bia pananida idjaɓa sobiabiɗida Ãcõrẽra (Isaías 48:17, 18).
¿Cãrẽã Jesuba jarasi: “Maʉ̃ bẽrã naãrã Ãcõrẽra bãrã Boroda ɓʉɗadua idjaɓa idjia obi ɓʉra oɗi carea”? Ʉ̃cʉrʉba naãrã jʉrʉɗaẽ́da Ãcõrẽnera, quĩchabadaa parata waiɓʉada jãʉ̃gʉba bio biara ɓʉda ãdjirã carea. Dewararãba sopuabadada necoɗi carea maʉ̃ bʉrʉ jʉrʉɗacada Ãcõrẽ Boroɗera (Mateo 6:19-21, 25-32).
Jesuba jarasida carebaɗida Ãcõrẽ Boroda jãʉ̃da jãwã oɗibʉrʉ bio biara pananida (Mateo 6:33).
Naãrãbema dji ẽpẽbadarã Jesuɗeba jʉrʉsiɗamĩna Ãcõrẽ Boroɗeda idjaɓa idjia obi ɓʉra, ãdjirãba ununaẽ́ ɓasida dji djuburiara jõĩ ɓasida baribʉrʉ unusiɗada bio biara ɓʉ wagaɗira. ¿Sãwã unusiɗada jãʉ̃ wagaɗira?
Jesu ewariɗera dji ĩjãnacarã bio sopua panabadjiɗaa baribʉrʉ bio ĩjãbadarãba bio bia panasiɗada maʉ̃ bʉrʉ bio biara ɓʉda ĩjãnida dji Boro, Jeowaba diasida ãdjia idji ʉɓʉara droaɗamãrẽã (2 Corinto 4:7-9).
¿BɄA NAÃRÃ JɄRɄIDA ÃCÕRẼ BORORA?
Dji ẽpẽbadarã Jesuɗeba jʉrʉsiɗada dji Ãcõrẽ Boroɗeda maʉ̃ bʉrʉ jaradiasiɗada beɗea biara ɓʉda dewarara (Colosa 1:23). ¿Cairãda iɗi ewarida ara maʉ̃ quĩrãca o panʉ?
Beɗea ɓeara Jeowaɗebemaba cawa panʉda naʉ̃ ewarira ya caita ɓabʉrʉda maʉ̃ bʉrʉ jaradia panʉda druaza idjaɓa puruza Jesuba jaraɗa quĩrãca: “Maʉ̃ne beɗea bia Ãcõrẽba pe eroɓʉɗebemada jũma naʉ̃ ẽjũãne jaraɗia puru ɓeaza ũrĩnamãrẽã. Mãwãnacareabʉrʉ naʉ̃ ewarira jõya” (Mateo 24:14).
¿Bʉa naʉ̃gʉ beɗea ũrĩbʉrʉɗe cãrẽda oida bara ɓʉ? Bereaɗebema ũrĩsiɗaɗe Pabloba beɗeaɗara Ãcõrẽ Boroɗebemada, ãdjirãba “Ãcõrẽ Beɗeara bio quĩrãcuita” ũrĩnapeɗa osiɗada Pabloba jaraɗa quĩrãca (Hecho 17:11, 12).
Ara maʉ̃ quĩrãca bʉa poya oida. Bʉa naãrã Ãcõrẽ Boroda ɓʉibʉrʉ, necai panania idjaɓa dãrã panania.