Genesi
Abrahaʉ̃ba Ãcõrẽ wãrãda ĩjãna
22 Mãwãnacarea Ãcõrẽba nãwã osia Abrahaʉ̃ba wãrãda ĩjã ɓʉ cawaya. Idjia Abrahaʉ̃ra trʉ̃ jarasia:
–¡Abrahaʉ̃!–
Abrahaʉ̃ba panusia:
–¡Mʉ̃ra nama ɓʉa!–
2 Maʉ̃ne Ãcõrẽba jarasia:
–Bʉ warra Isa aɓabe quiruda bio quĩrĩã eroɓʉda edapeɗa wãdua Moria druaɗaa. Mama mʉ̃a bʉ́a eyada jaradiaya. Maʉ̃ eyaɗe bʉa Isara mʉ̃́a babue diadua.–
3 Ara maʉ̃da Abrahaʉ̃ra diapeɗeɗa piraɓaripeɗa idjia edeida ɓʉra burro ʉ̃rʉ̃ jʉ̃cuasia. Tʉbʉda ɓʉasia idji warrara Ãcõrẽa babue diai carea. Maʉ̃be idji warra Isara, nezocarã siɗa umé edesia Ãcõrẽba jaraɗa eyaɗaa.
4 Ewari ũbea babʉrʉɗe Abrahaʉ̃ba dji eyara tʉmʉba unusia. 5 Maʉ̃ne idji nezocarãa jarasia:
–Nama panenadua. Burro siɗa eropanenadua. Mʉ̃ra mʉ̃ warra ume awuá nocoɗaa wãnia Ãcõrẽa bia beɗeaɗi carea. Mãwãnacarea bãrãmaa waya zeɗia.–
6 Maʉ̃be Abrahaʉ̃ba dji tʉbʉra edapeɗa idji warra Isa equiaɗe coɓʉsia. Necoda, tʉbʉdau siɗa edasia. Maʉ̃be umena ãbaa wãsiɗaa Ãcõrẽa ne babue diaɗi carea. 7 Wãbʉdaɗe Isaba Abrahaʉ̃a jarasia:
–¡Zeza!–
Abrahaʉ̃ba panusia:
–¿Cãrẽ, warra?–
Isaba iwiɗisia:
–Nama dadjia tʉbʉda, tʉbʉdau siɗa eropanʉa baribʉrʉ ¿sãma ɓʉ oveja zaque Ãcõrẽa babue diaɗira?–
8 Abrahaʉ̃ba panusia:
–Warra, Ãcõrẽbʉrʉ oveja zaquera diaya babue diaɗi carea.–
Maʉ̃be nocoɗaa wãsiɗaa. 9 Ãcõrẽba jaraɗa eyaɗe jũẽnapeɗa Abrahaʉ̃ba mõgarada pã buesia Ãcõrẽa babue diabadada oi carea. Maʉ̃ ʉ̃rʉ̃ tʉbʉra cajẽrãpeɗa idji warra Isara cabʉrá jʉ̃peɗa tʉbʉ ʉ̃rʉ̃ coɓʉsia. 10 Maʉ̃be Abrahaʉ̃ba necora jʉwaɗe edasia idji warra beai carea. 11 Baribʉrʉ Ãcõrẽ nezocaba bajãneba trʉ̃ jarasia:
–¡Abrahaʉ̃, Abrahaʉ̃!–
Abrahaʉ̃ba panusia:
–Mʉ̃ra nama ɓʉa.–
12 Maʉ̃ne bajãnebema nezocaba jarasia:
–Bʉ warrara bearãdua. Idjira ni maãrĩ biẽ́ orãdua. Bʉa iɗibʉrʉ mʉ̃́a cawabisia bʉa Ãcõrẽra wãrãda waya ɓʉda, bʉ warra aɓabe quiruda Ãcõrẽa wãgaẽ́ diai baɗa bẽrã.–
13 Abrahaʉ̃ba jẽda acʉbʉrʉɗe oveja umaquĩrãda unusia. Maʉ̃ oveja cachura bacuru zaque jʉwateɗe jũẽ nũmasia. Ara maʉ̃da Abrahaʉ̃ra wãpeɗa maʉ̃ ovejara jidasia. Maʉ̃drʉ Ãcõrẽa babue diasia idji warra cacuabari. 14 Maʉ̃ carea Abrahaʉ̃ba dji eyara trʉ̃ ɓʉsia “Ãcõrẽba diabaria.” Maʉ̃ bẽrã hebreorãba waɗibiɗa jarabadaa: “Ãcõrẽba idji eyaɗe diabaria.”
15 Maʉ̃ne Ãcõrẽ nezocaba wayacusa bajãneba Abrahaʉ̃ra trʉ̃ jarasia. 16 22:16-17 Nãwã jarasia:
–Ãcõrẽba nãwã jara ɓʉa: “Bʉ warra aɓabe quiruda wãgaẽ́ diai baɗa bẽrã, ara mʉ̃dji trʉ̃neba mʉ̃a wãrãneba jarabʉrʉa bʉra careba ɓaida. Mʉ̃a bʉɗeba zocãrã yõbiya chĩdau zocãrã panʉ quĩrãca, pusa icawa ĩbʉ pichi zocãrã baraa quĩrãca. Maʉ̃ awara bʉɗeba yõbʉdaba ãdji dji quĩrũ puru ɓeara jãrĩnia. 18 Bʉa mʉ̃ beɗeara ĩjã oɗa bẽrã mʉ̃a bʉɗeba yõbʉrʉɗeba naʉ̃ ẽjũãne ɓea purura jũma carebaya.”–
19 Mãwãnacarea Abrahaʉ̃ra jẽda wãsia idji nezocarã amenamaa. Mamaʉba ãbaa wãsiɗaa Beersebáɗaa. Mama Abrahaʉ̃ra ɓesia.
Abrahaʉ̃ djaba Naco warrarã
20 Mãwãnacarea Abrahaʉ̃ba ũrĩsia idji djaba Nacoba dji quima Milca ume warrarãda unusiɗada. 21 Dji nabema warrara Uz abadjiɗaa. Maʉ̃are dji djaba Buzuda ɓasia. Buzuare Quemuelda ɓasia. Quemuelera Araʉ̃ zeza basía. 22 Idjaɓa Milcaba tosia Queseda, Hazoda, Pildáda, Jidlada, Betuel siɗa. 23 Betuelera Rebeca zeza basía. Milcaba maʉ̃ ocho warrarãra Abrahaʉ̃ djaba Nacoa to diasia. 24 Nacoba dewara wẽrãda Reuma abadada eroɓasia. Reumaba tosia Tebada, Gahaʉ̃da, Tahada, Maacá siɗa.