Genesi

Caiʉ̃ba idji djaba Abel beaɗa

4 Maʉ̃be Adaʉ̃ra dji quima Eva ume cãĩsia. Evara ɓiogoa ɓepeɗa warra tosia. Maʉ̃ne Evaba jarasia: “Mʉ̃a umaquĩrã warrada eroɓesia Ãcõrẽba carebaɗa bẽrã.” Mãwã dji warrara trʉ̃ ɓʉsia Caiʉ̃.*

2 Mãwãnacarea dji djaba Abelda tosia. Maʉ̃ Abelera oveja daupẽbari basía. Maʉ̃ne Caiʉ̃ra ne ubari basía.

3 Mãwã panʉne ewari aɓa Caiʉ̃ba idji néuɗebemada Ãcõrẽa diasia. 4 Maʉ̃ne Abelba oveja zaquerã dji naãrã topeɗaɗada beapeɗa dji dragada Ãcõrẽa diasia. Ãcõrẽba Abelera idjia diaɗa siɗa bia unusia.* 5 Baribʉrʉ Caiʉ̃da idjia diaɗa siɗa bia unuẽ́ basía. Maʉ̃ carea Caiʉ̃ra bio quĩrũsia. Aɓeɗa quĩrã cadjirua nũmesia. 6 Maʉ̃ carea Ãcõrẽba Caiʉ̃a jarasia:

–¿Cãrẽ cãrẽã quĩrũ nũmʉ? ¿Cãrẽ cãrẽã quĩrã cadjirua nũmʉ? 7 Bʉa biada oibʉrʉ ¿bʉra ɓʉsriɗa ɓaẽ́ca?* Baribʉrʉ bʉa biada oẽ́bʉrʉ cadjirua jʉwaeɗa ɓaya. Baribʉrʉ bʉa cadjiruara poyaida ɓʉa.–

8 Ewari aɓa Caiʉ̃ba idji djabaa jarasia: “Ãyã pʉrrʉaɗe wãna.”* Ara maʉ̃da wãsiɗaa. Néuɗe ãbaa nĩnane Caiʉ̃ba Abelera adua ɓʉɗe beatasia. 9 Maʉ̃ bẽrã Ãcõrẽba Caiʉ̃a iwiɗisia:

–¿Sãma ɓʉ bʉ djaba Abelera?–

Maʉ̃ne Caiʉ̃ba panusia:

–Cawaẽ́a. Mãwãra ¿mʉ̃ra idji acʉbarica?–

10 Ãcõrẽba jarasia:

–¿Cãrẽ cãrẽã bʉ djabara jãwã beasi? Idji oa egoroɗe erozoaɗaba jĩgua jara ɓʉa mʉ̃a jipa cawa omãrẽã. 11 Bʉ djabada beaɗa bẽrã mʉ̃a bʉra biẽ́ ɓʉya. Mʉ̃a bʉra idji oa erozoaɗamaʉba ãyã jʉretaya. 12 Bʉa ẽjũã obʉrʉmĩna bʉ néura bia zauca baya. Bʉra naʉ̃ ẽjũãne ara jãwã pʉrrʉa nĩbaya. Ʉ̃nãũi siɗa neẽ́ ɓaya.–

13 Caiʉ̃ba Ãcõrẽa jarasia:

–Mʉ̃ mãwã ɓaira jũmawãyã zarea ɓʉa. Maʉ̃ra mʉ̃a droaẽ́a. 14 Iɗi bʉa mʉ̃ra naʉ̃ druaɗebemada ãyã jʉretabʉrʉa. Bʉ quĩrãpita mʉ̃ra wãcara ɓaya. Iɗiba ʉ̃taa mʉ̃ra naʉ̃ ẽjũãne pʉrrʉa nĩbaya drua ãĩbema quĩrãca. Bariduaba mʉ̃ra ununibʉrʉ, beaɗia.–

15 Ãcõrẽba jarasia:

–Bariduaba bʉda beaibʉrʉ, mʉ̃a idjira bʉ cãyãbara auɗuara cawa oya.–

Maʉ̃ bẽrã Ãcõrẽba Caiʉ̃ cacuaɗe sẽyãda ɓʉsia, bariduaba maʉ̃ sẽyãda unusiɗara Caiʉ̃ra bearãnamãrẽã. 16 Ara maʉ̃da Caiʉ̃ra Ãcõrẽ quĩrãpitabemada ãyã wãpeɗa Nod druaɗe ɓaɗe wãsia. Maʉ̃ Nod druara Edeʉ̃neba ʉ̃mãdau odjabariare ɓʉa.

Caiʉ̃neba yõpeɗaɗa

17 Caiʉ̃ra idji quima ume cãĩsia. Dji wẽrãra ɓiogoa ɓepeɗa Enocoda tosia. Maʉ̃ Enoco tosiɗe Caiʉ̃ba puruda o ɓasia. Dji puru trʉ̃ra dji warra trʉ̃ quĩrãca Enoco trʉ̃ ɓʉsia.

18 Enocora Irá zeza basía. Irára Mehujael zeza basía. Mehujaelera Metusael zeza basía. Metusaelera Lame zeza basía. 19 Maʉ̃ Lameba wẽrãda umé eroɓasia. Aɓara Adá abadjiɗaa, dewarabemara Zila abadjiɗaa. 20 Adába Jabalda tosia. Jabalɗeba yõsiɗaa wua deɗe ɓeabadada, animarã daupẽbadarã siɗa. 21 Dji djaba trʉ̃ra Jubal basía. Jubalɗeba yõsiɗaa arpa zá cawa ɓeada idjaɓa chiru zá cawa ɓea siɗa. 22 Zilaba Tubal-Caiʉ̃da tosia. Idjia bronceɗebemada idjaɓa jiorroɗebema siɗa ne o cawa ɓasia. Tubal-Caiʉ̃ djabawẽrãra Naamá abadjiɗaa.

23 Ewari aɓa Lameba idji quimarã Adáa, Zilaa biɗa jarasia:

Adá, Zila, mʉ̃ beɗeada ũrĩnadua. Mʉ̃a ẽberã cũdra ɓʉda beasia idjia mʉ̃ djara tuɗa carea, mʉ̃ puoɗa carea.

24 Bariduaba Caiʉ̃da beaibʉrʉ, Ãcõrẽba maʉ̃gʉra bio cawa oya. Baribʉrʉ bariduaba mʉ̃da dji cũdra carea beaibʉrʉ Ãcõrẽba maʉ̃ ẽberãra auɗuara cawa oya.*

Adaʉ̃ba, Eva biɗa dewara warra unupeɗaɗa

25 Maʉ̃ ewariɗe Adaʉ̃ra wayacusa dji quima ume cãĩsia. Maʉ̃be dji quimaba umaquĩrã warrada tosia. Maʉ̃ne jarasia: “Caiʉ̃ba Abel beaɗacarea Ãcõrẽba mʉ̃́a dewara warrada Abel cacuabari diasia.” Mãwã dji warrara trʉ̃ ɓʉsia Se.*

26 Maʉ̃be Seba warrada unusia. Dji trʉ̃ra ɓʉsia Enó. Maʉ̃ ewariɗeba ʉ̃taa ẽberãrãba Ãcõrẽa ewari iwiɗibʉdaɗe idji trʉ̃ra “Jehová” a panesiɗaa.