Genesi

50 Maʉ̃ne Joseba idji zezara bʉrʉ edapeɗa jĩã ɓʉba isõsia. 2 Mãwãnacarea Joseba dji nẽãrã obadarãa idji zeza Israel cacuara pʉrʉbisia ɓerawarãmãrẽã. Ara maʉ̃da pʉrʉ panesiɗaa. 3 Cuarenta ewari mãwã pʉrʉ panasiɗaa, jũma daucha oi carea dãrãbari bẽrã. Jũma ãbaa egiptorãra setenta ewari Jacobo carea sopua ewarida wagasiɗaa. 4 Sopua ewari jõnacarea Joseba Egiptoɗebema boro deɗe panabadaa jarasia:

–Mʉ̃ djuburia, dadjirã boroa nãwã jaraɗadua: 5 “Mʉ̃ zezaba mʉ̃́a wãrãneba jarabisia idjira Canaaʉ̃ druaɗe tʉɓariɗe edemãrẽã. Idjia jarasia: ‘Mʉ̃ra beuya. Canaaʉ̃ druaɗe mʉ̃a joubada uriada eroɓʉa. Mama mʉ̃ra tʉɓaridua.’ Maʉ̃ carea mʉ̃a beɗea djuburiaya idu mʉ̃ zeza tʉɓariɗe wãbimãrẽã. Tʉɓaripeɗa waya zeya.”–

6 Ãdjia Egiptoɗebema boroa mãwã jarapeɗaɗacarea dji boroba Josea jarasia:

–Bʉ zeza tʉɓariɗe wãdua idjia bʉ́a wãrãneba jarabiɗa quĩrãca.–

7 Ara maʉ̃da Josera idji zeza tʉɓariɗe wãsia. Idji ume wãbʉrʉsiɗaa jũma Egiptoɗebema boroare ɓeada, dji boro ẽberãrãnebema dji dromarãda, jũma Egipto druaɗebema dji dromarã siɗa. 8 Jose ẽberãrãda, idji djabarãda, idji zeza ẽberãrã siɗa jũma wãbʉrʉsiɗaa. Ãdji warrarãda, ãdji ovejada, ãdji paca siɗa Goseʉ̃ne amesiɗaa. 9 Carretaɗeba djõbadarãda idjaɓa cawayoɗeba djõbadarã siɗa Jose ume wãsiɗaa. Ẽberãrãra bio cãbana wãsiɗaa.

10 Wãbʉdaɗe trigo tẽũbada Atad abadama jũẽsiɗaa. Maʉ̃gʉra Jordaʉ̃ doɗeba ʉ̃mãdau odjabariare ɓʉa. Mama Josera waabemarã siɗa idji zeza Jacobo carea wayacusa aujĩãsiɗaa. Siete ewari bio ororoa aujĩãsiɗaa. 11 Mamabema cananeorãba ãdji bio ororoa aujĩã duanʉra ũrĩsiɗaa. Maʉ̃ bẽrã jarasiɗaa:

–Egiptorãda sopuaba bio jĩãbi ororoa duanʉa.–

Maʉ̃ carea Atad ẽjũãra trʉ̃ ɓʉsiɗaa Abel-mizraiʉ̃.*

12 Jacobo warrarãba ãdji zezaba jaraɗa quĩrãca osiɗaa. 13 Idji cacuara edesiɗaa Canaaʉ̃ druaɗaa. Maʉ̃be Macpela joubada uriaɗe tʉɓarisiɗaa. Dji ẽjũãra Mamreɗeba ʉ̃mãdau odjabariare ɓʉa. Abrahaʉ̃ba maʉ̃ ẽjũãra, dji uria siɗa hitita Eproʉ̃ne baɗada nẽdosia idji ẽberãrã jaiɗabʉdada tʉɓari carea. 14 Jacobo tʉɓaripeɗaɗacarea Josera, idji djabarã, waabemarã siɗa waya Egipto druaɗaa wãsiɗaa.

Joseba idji djabarã sobiabiɗa

15 Ãdji zezara beuɗa bẽrã Jose djabarãba nãwã crĩcha panesiɗaa: “Ãĩbẽrã Joseba dadjirãra quĩrãma ɓʉa. Ʉ̃rãbʉrʉ dadjirãra biẽ́ oya idji biẽ́ opeɗaɗa carea.” 16 50:16-17 Maʉ̃ bẽrã naʉ̃ beɗeada Josemaa diabuesiɗaa: “Dadji zeza jaiɗai naẽna daia jarasia bʉ́a nãwã jaraɗamãrẽã: ‘Bʉ djabarãba wãrãda cadjirua opeɗaɗamĩna mʉ̃ djuburia maʉ̃ra quĩrãdoadua.’ Maʉ̃ bẽrã dai djuburia, bʉ biẽ́ opeɗaɗara quĩrãdoadua. Daira dadji zeza Jacoboba ĩjã ɓaɗa Ãcõrẽ nezocarãa.”

Maʉ̃ ũrĩbʉrʉɗe Josera jĩãsia.

18 Maʉ̃be Jose djabarãra idjimaa wãsiɗaa. Ne wayaaɗeba idji quĩrãpita chĩrãboroɗe copanenapeɗa jarasiɗaa:

–Daira bʉ nezocarãa.–

19 Maʉ̃ne Joseba panusia:

–Wayarãnadua. Mʉ̃ra Ãcõrẽẽ́a bãrã cawa oi carea. 20 Bãrãba mʉ̃ra biẽ́ oɗida crĩchasiɗaa baribʉrʉ maʉ̃ biẽ́ opeɗaɗaɗeba Ãcõrẽba biada osia maʉ̃neba zocãrã ẽberãrãda jarrababa beuɗiɗebemada ẽdrʉ edai carea. Maʉ̃gʉra bãrãba naʉ̃ ewariɗe unu panʉa. 21 Wayarãnadua. Mʉ̃a bãrãra careba ɓaya. Mʉ̃a dia ɓaya bãrãra, bãrã warrarã siɗa ne coɗamãrẽã.–

Mãwã quĩrĩãneba jaraɗa bẽrã Joseba ãdjira sobiabisia.

Jose jaiɗaɗa

22 Josera, idji zeza ẽberãrã siɗa Egiptoɗe panesiɗaa. Josera ciento die poa ɓasia. 23 Beui naẽna idji warra Epraiʉ̃ wiuzaquerãra, ãdji warrarã siɗa unusia. Idjaɓa Manase wiuzaquerã siɗa unusia. Ãdji zezara Maquir basía. Joseba maʉ̃gʉrãra idji ɓacaraɗe edapeɗa idji warrarã araaɗa asia.

24 Ewari aɓa Joseba idji djabarãa jarasia:

–Mʉ̃ra dãrãẽ́ne beuya, baribʉrʉ Ãcõrẽba bãrãra carebaya. Idjia bãrãra, bãrãneba yõbʉdarã siɗa naʉ̃ druaɗeba Canaaʉ̃ druaɗaa edeya. Maʉ̃ druara idjia Abrahaʉ̃a, Isaa, Jacoboa biɗa wãrãneba diai jarasia.–

25 Maʉ̃ne Joseba Israel ẽberãrãa jarasia:

–Wãrãda Ãcõrẽba bãrãra carebaya. Maʉ̃ ewariɗe bãrãba mʉ̃ ɓʉwʉrʉra namaʉba Canaaʉ̃ druaɗaa tʉɓariɗe edeɗadua.–

Maʉ̃gʉra Joseba Israel ẽberãrãa wãrãneba jarabisia.

26 Jose ciento die poa ɓʉda Egipto druaɗe jaiɗasia. Idji cacuara nẽãrãba pʉrʉsiɗaa ɓerawarãmãrẽã. Pʉrʉɗapeɗa cajona biaɗe ɓʉsiɗaa.