Luca

Zaqueoba Jesu ununa

19 Jesura Jerico puruɗe jũẽpeɗa wãyã wãbʉrʉ basía. 2 Mama ẽberã Zaqueo abadada ɓasia. Maʉ̃ Zaqueora Romanebema boro itea parata jʉrʉ pebadarã boro basía. Bio ne bara ɓasia. 3 Idjia Jesura unu quĩrĩã ɓasia. Baribʉrʉ ẽberã maãrĩ quiru bẽrã ẽberãrã powua nũmʉba poya unuẽ́ ɓasia. 4 Maʉ̃ bẽrã Jesu wãbʉrʉ na pira wãpeɗa sicomoro bacuruɗe ʉ̃tʉ wãsia. 5 Mãwã ɓʉɗe Jesura arima jũẽsia. Maʉ̃be ʉ̃taa acʉpeɗa jarasia:

–Zaqueo, isabe eɗaa zedua. Iɗi mʉ̃ra bʉ deɗe cãĩne wãya.–

6 Ara maʉ̃da Zaqueora ɓʉsriɗa eɗaa zepeɗa Jesura idji deɗaa edesia. 7 Maʉ̃ ununapeɗa jũmarãba Jesuɗebemada nãwã biẽ́ beɗea duanesiɗaa:

–Jãʉ̃ Jesura ẽberã cadjirua obari deɗe cãĩne wãsia.–

8 Idji deɗe Zaqueora Jesu quĩrãpita nũmepeɗa jarasia:

–Mʉ̃ Boro, ne neẽ́ queɗearãa mʉ̃a eroɓʉɗebemada ẽsadra diaya. Maʉ̃ awara sewaɗeba djãrãneda auɗu edaɗabari mʉ̃a ɓarima quĩmãrẽ jẽda diaya.–

9 Jesuba idjía jarasia:

–Iɗi Ãcõrẽba bʉra, bʉ ẽberãrã siɗa ẽdrʉ edasia, Abrahaʉ̃ba ĩjãna quĩrãca bʉa ĩjã ɓʉ bẽrã.* 10 Wãrãda mʉ̃, Naʉ̃ Djara Edaɗaba dji adua ɓeada ẽdrʉ edai carea jʉrʉɗe zesia.–

Parataɗeba ne jara ɓʉ

Mateo 25:14-30

11 Jesura Jerusaleʉ̃ caita ɓʉ bẽrã dji arima duanʉba crĩcha panasiɗaa ara maʉ̃ ewariɗe Ãcõrẽra ãdjirã Boro bai carea zeida. Jesuba jara ɓʉra ũrĩ panʉ bẽrã ne jara ɓʉɗeba nãwã jarasia:

Ẽberã dji dromada tʉmʉ dewara druaɗaa wãsia jũmarã boroba idjira ara idji druaɗebema boroda ɓʉmãrẽã. Idjia crĩchasia mãwãnacarea jẽda zeida. 13 Wãi naẽna idji nezocarãda die trʉ̃peɗa paratada waiɓʉa ãdjiza diasia.* Maʉ̃ne jarasia: “Mʉ̃ neẽ́misa naʉ̃ paratara waribiɗadua.” 14 Baribʉrʉ idji druaɗebemarãba idjira bio quĩrãma panʉ bẽrã, ẽberãrãda diabuesiɗaa jũmarã boroa nãwã jaraɗamãrẽã: “Daiba quĩrĩãẽ́ panʉa idjira dai boro baida.”

15 Mãwãmĩna dji boroda ɓesia. Jẽda zeɗacarea idji nezocarãra trʉ̃cuasia idjia parata diaɗara waribisiɗa cawaya. 16 Maʉ̃ne aɓa na zepeɗa jarasia: “Mʉ̃ boro, bʉa parata diaɗara mʉ̃a ɓarima die auɗu waribisia.” 17 Maʉ̃ carea dji boroba jarasia: “Bia ɓʉa, nezoca bia. Mʉ̃a maãrĩ diaɗara bʉa ariɗe oɗa bẽrã mʉ̃a bʉ jʉwaeɗa die puruda ɓʉya.” 18 Dewara nezocada zepeɗa jarasia: “Mʉ̃ boro, bʉa parata diaɗara mʉ̃a ɓarima juesuma auɗu waribisia.” 19 Maʉ̃ carea dji boroba jarasia: “Mʉ̃a puruda juesuma bʉ jʉwaeɗa ɓʉya.”

20 Maʉ̃be dewara nezocada zepeɗa jarasia: “Mʉ̃ boro, bʉa parata diaɗara nama ɓʉa. Mʉ̃a wuaɗe bʉrá waga eroɓasia. 21 Mãwã osia bʉra waya ɓʉ bẽrã. Mʉ̃a cawa ɓʉa bʉa quĩrã djuburiacada djãrãneda edai carea. Maʉ̃ awara djãrãba upeɗaɗara ewabaria.”

22 19:22-23 Maʉ̃ carea dji boroba jarasia: “Nezoca cadjirua, ara bʉdjia jara ɓʉɗeba ebuɗa ɓʉa mʉ̃a jaraɗara oẽ́ basida. Bʉa mʉ̃ra mãwã ɓʉda bio cawa ɓasibʉrʉ ¿cãrẽ cãrẽã parata wagabada deɗe mʉ̃ paratara ɓʉɗe wãẽ́ basi? Mãwã oɗabara mʉ̃ paratara dji eabaɗa siɗa edacasia.”

24 Maʉ̃be dji boroba dji arima duanʉ́a jarasia: “Idjia eroɓʉra jãrĩnapeɗa dji die eroɓʉ́a diaɗadua.” 25 Ãdjirãba jarasiɗaa: “Baribʉrʉ, dai boro, idjia die eroɓʉa.” 26 Dji boroba jarasia: “Mʉ̃a jaraya: dji ariɗe obaría mʉ̃a auɗuara diaya, baribʉrʉ dji ariɗe ocaa mʉ̃a maãrĩ diaɗa siɗa jãrĩya.

27 Maʉ̃ awara mʉ̃ ãdji boro baida quĩrĩãẽ́ pananara enenapeɗa mʉ̃ quĩrãpita quenanadua.”–

Jesu Jerusaleʉ̃ne jũẽna

Mateo 21:1-11; Marco 11:1-11; Juaʉ̃ 12:12-19

28 Mãwã jaraɗacarea Jesura nocoɗaa Jerusaleʉ̃naa wãsia. 29 Wãbʉrʉɗe Betpague puru idjaɓa Betania puru caita Olivo eyaɗe jũẽsia. Maʉ̃be idji ume nĩbabadarãda umé puruɗaa diabuesia. 30 Ãdjía nãwã jarasia:

–Puru quĩrãpe ɓʉɗaa wãnadua. Jũẽbʉdaɗe bãrãba burro zaqueda ununia. Maʉ̃ burro zaque ʉ̃rʉ̃ waɗi ni aɓaʉda wãnacaa. Ẽrã edaɗapeda enenadua. 31 Maʉ̃ne aɓaʉba bãrãa cãrẽ cãrẽã jãwã ẽrã panʉda iwiɗibʉrʉ jaraɗadua: “Dadji Boroba quĩrĩã ɓʉa.”–

32 Ara maʉ̃da wãnapeɗa Jesuba ãdjía jaraɗa quĩrãca unusiɗaa. 33 Burro ẽrã panʉne djibariba ãdjía iwiɗisia:

–¿Cãrẽ cãrẽã mʉ̃ burrora jãwã ẽrã panʉ?–

34 Ãdjirãba panusiɗaa:

–Dadjirã Boroba idjimaa edebisia.–

35 Ara maʉ̃da burrora Jesumaa edeɗapeɗa ãdjia cacuaɗe jʉ̃ panʉra burro ʉ̃rʉ̃ ɓʉsiɗaa. Maʉ̃be Jesura ʉ̃rʉ̃ chũmʉnapeɗa edesiɗaa. 36 Jesu wãbʉrʉ nocoare ẽberãrãba cacuaɗe jʉ̃ panʉra tõcua wãsiɗaa idji bia edaɗi carea. 37 Jesu Olivo eyaɗeba eɗaa wãi carea ɓʉɗe jũma idji ume nĩnaba Ãcõrẽa jĩgua bia beɗea duanesiɗaa. Bio ɓʉsriɗa panasiɗaa Jesuba ne ununacada ãdji quĩrãpita o ɓaɗa bẽrã. 38 Ãdjirãba jara duanasiɗaa:

¡Bio bia ɓʉa jũmarã Boro Ãcõrẽ trʉ̃neba zebʉrʉra!*

¡Jãʉ̃bebʉrʉ dadjirãra Ãcõrẽ ume necai duanania! ¡Bajãne Ɓʉra dji Dromaara ɓʉa!

39 Maʉ̃ carea ʉ̃cʉrʉ pariseorã arima duanʉba Jesua jarasiɗaa:

–Jaradiabari, ¡bʉ ume nĩbabadarãra chupeabidua!–

40 Baribʉrʉ Jesuba ãdjía jarasia:

–Mʉ̃a wãrãda bãrãa jaraya ãdjirãda chupeaɗibʉrʉ mõgarada ɓʉgaɗia.–

41 Jesu nocoɗaa wãbʉrʉɗe Jerusaleʉ̃ puruda unusia. Maʉ̃ puru carea jĩãsia. 42 Maʉ̃ne jarasia:

–¡Bʉa cawabʉrʉbara naʉ̃gʉ ewariɗe caiɗeba bʉra necai ɓaida! Baribʉrʉ dau bʉrá ɓʉ quĩrãca ɓʉ bẽrã bʉa maʉ̃gʉra poya cawaẽ́a. 43 Maʉ̃ bẽrã ewari aɓa bʉ dji quĩrũra bʉ ume djõne zeɗia. Bʉra jũrã edaɗapeɗa bʉ icawa mõgarara egoro siɗa boromea bueɗia ni aɓaʉda ẽdrʉrãnamãrẽã. 44 Bʉ egode ɓaebibʉdaɗe jũma bʉ ẽberãrãra quenania.* Ãdjirãba ni aɓaʉ mõgarara dewara mõgara ʉ̃rʉ̃ ɓeɗaẽ́a. Mãwã oɗia Ãcõrẽba ẽdrʉ edamãrẽã diabueɗara bʉa cawaɗaẽ́ bẽrã.–

Jesuba ne nẽdobuebadarã ãyã jʉrecuaɗa

Mateo 21:12-17; Marco 11:15-19; Juaʉ̃ 2:13-22

45 Jesu Ãcõrẽ de droma dajadaare jũẽbʉrʉɗe Ãcõrẽa diaɗi careabema nẽdobuebadarãda unusia. Ne nẽdo ɓea siɗa zocãrã duanasiɗaa. Jesuba jũma ãdjirãra ãyã jʉretacuasia. Nãwã jarasia:

Ãcõrẽ Beɗeaɗe nãwã ɓʉ́ ɓʉa: “Mʉ̃ dera dji iwiɗibada dea.” Baribʉrʉ bãrãba “ne drʉabadarã mĩrũbada uria” quĩrãca eropanʉa.–*

47 Jesuba ewariza Ãcõrẽ de droma dajada jaradia ɓabadjia. Maʉ̃ne sacerdote bororãba, judiorã ley jaradiabadarãba, ẽberãrã dji droma ɓea biɗa idjira bea quĩrĩã panasiɗaa. 48 Baribʉrʉ poya beaɗaẽ́ basía jũmarãba idji beɗeara ewariza ũrĩ panʉ bẽrã.