Luca

Jesuba idji ume nĩbabadarã diabueɗa

Mateo 10:5-15; Marco 6:7-13

9 Jesuba idji ume nĩbabadarã doce panʉra ãbaa trʉ̃peɗa ʉɓʉada diasia jaida ãyã jʉretaɗamãrẽã idjaɓa cacua biẽ́ ɓea siɗa biabiɗamãrẽã. 2 Maʉ̃be ãdjía jarasia:

–Ãcõrẽra dji Boro bai carea zebʉrʉda jaraɗe wãnadua idjaɓa cacua biẽ́ ɓeada biabiɗadua.–

3 Wãni naẽna Jesuba ãdjirãa jarasia:

–Bãrã wãbʉdaɗe ni cãrẽ siɗa ederãnadua. Bardonada, buchacada, coɗida, parata siɗa ederãnadua. Cacuaɗe jʉ̃ panʉ awa edeɗadua.

4 Djãrã puruɗe jũẽnapeɗa aɓaʉba bãrãda bia edasira maʉ̃ deɗebemada ãyã wãrãnadua aɓa puruɗeba ẽdrʉbʉdaɗaa. 5 Baribʉrʉ puruba bãrãda bia edaẽ́bʉrʉ mamaʉba ẽdrʉɗadua. Ẽdrʉbʉdaɗe egoro pora bãrã jĩrũne ɓʉra jãrãpetaɗadua. Maʉ̃ba cawabiya ãdjia Ãcõrẽ igara panʉ carea idjia cawa oida.–

6 Ara maʉ̃da wãnapeɗa puru ɓeaza jarasiɗaa Ãcõrẽra ãdji Boro bai carea zebʉrʉda. Maʉ̃ beɗea bia jaradia panʉne cacua biẽ́ ɓeada biabicuabadjiɗaa.

Herodeba Jesuɗebema ũrĩna

Mateo 14:1-12; Marco 6:14-29

7 Herodeda Galilea druaɗebema boro basía. Maʉ̃ Herodeba jũma Jesuba o ɓʉda ũrĩsia.* Idjia cawa crĩchaẽ́ ɓasia ʉ̃cʉrʉba nãwã jara panʉ bẽrã:

–Borocuebari Juaʉ̃da ʉ̃rẽbasia.–

8 Maʉ̃ne dewararãba jara panasiɗaa:

–Elíada waya dadjirã tãẽna zesia.–

Dewararãba jara panasiɗaa:

–Ãcõrẽneba beɗeabari naẽna ɓaɗada ʉ̃rẽbasia.–

9 Maʉ̃ carea Herodeba jarasia:

–Mʉ̃a Borocuebari Juaʉ̃ra oɓʉá tʉ beabisia. Mãẽteara za jara panʉra ¿caida mãwã ɓʉ?–

Maʉ̃ carea Jesura unu quĩrĩã ɓasia.

Jesuba mil juesuma auɗu ne cobigaɗa

Mateo 14:13-21; Marco 6:30-44; Juaʉ̃ 6:1-14

10 Jesuba diabueɗarã jẽda zesiɗaɗe ãdjia opeɗaɗada jũma nẽbʉrʉsiɗaa. Mãwãnacarea Jesuba ãdjirãra Betsaidá puru caita ẽberã neẽ́maa edesia. 11 Baribʉrʉ ẽberãrãba idjira mama ɓʉda cawaɗapeɗa araa wãbʉrʉsiɗaa. Maʉ̃ne Jesuba ãdjirãra bia edapeɗa jaradia ɓesia Ãcõrẽra ãdji Boro bai carea zebʉrʉda. Maʉ̃ beɗea bia jaradia ɓʉɗe dji cacua biẽ́ queɗeara biabicuasia.

12 Queubʉrʉɗe Jesuba doce edaɗarãra idjimaa wãnapeɗa jarasiɗaa:

–Ẽberãrãa jaradua puru ɓeamaa idjaɓa de ɓeamaa wãnamãrẽã. Mamabʉrʉ poya cãĩnia idjaɓa coɗida nẽdoɗia. Namara ne neẽ́a.–

13 Jesuba jarasia:

–Bãrãbʉrʉ ne cobiɗadua.–

Baribʉrʉ ãdjirãba panusiɗaa:

–Dairãba ne nẽdoɗe wãnaẽ́bʉrʉ, naʉ̃ ẽberãrã cãbana panʉra poya ne cobiɗaẽ́a. Paʉ̃da juesumabe idjaɓa ɓedada umébe eropanʉa.–

14 Mama panʉra umaquĩrã awa mil juesuma panasiɗaca ɓʉa. Maʉ̃ bẽrã Jesuba idji ume nĩbabadarãa nãwã jarasia:

–Ãdjirãa jaraɗadua cincuenta awara awara egode chũpanenamãrẽã.–

15 Idji ume nĩbabadarãba idjia jaraɗa quĩrãca osiɗaa. Ẽberãrãra jũma chũpanesiɗaa. 16 Jesuba paʉ̃ juesuma panʉra, ɓeda umé panʉ siɗa idji jʉwaɗe edapeɗa bajãnaa acʉpeɗa Ãcõrẽa bia jarasia. Maʉ̃be cõrãcuapeɗa idji ume nĩbabadarãa jarasia jeɗecaɗamãrẽã. 17 Jũmarãda ne coɗapeɗa jãwũãsiɗaa. Dji aɗubaɗada jʉrʉ pesiɗaɗe doce jamara birasiɗaa.

Pedroba Jesuɗebema jaraɗa

Mateo 16:13-28; Marco 8:27 –9:1

18 Ewari aɓa Jesura ẽberãrãnebemada ãyã wãpeɗa Ãcõrẽa iwiɗi ɓasia. Idji ume nĩbabadarãda arima panasiɗaa. Ãcõrẽa iwiɗiɗacarea Jesuba ãdjía nãwã iwiɗisia:

–¿Ẽberãrãba mʉ̃ra caiaɗa a panʉ?–

19 Ãdjirãba panusiɗaa:

–Ʉ̃cʉrʉba jara panʉa bʉra Borocuebari Juaʉ̃da. Dewararãba jara panʉa bʉra Elíada. Dewararãba jara panʉa bʉra naẽnabema Ãcõrẽneba beɗeabari baɗada ʉ̃rẽbapeɗa jãwã ɓʉda.–

20 Maʉ̃ne idjia waya iwiɗisia:

–Bãrãba mʉ̃ra ¿caida crĩcha panʉ?–

Pedroba panusia:

–Bʉra Ãcõrẽba ẽdrʉ edabari diai jaraɗaa.–

21 Jesuba bio jara ɓʉsia maʉ̃gʉra ni aɓaʉa jararãnamãrẽã.

22 Maʉ̃ awara jarasia:

–Mʉ̃, Naʉ̃ Djara Edaɗara bio bia mĩgaida ɓʉa. Puruɗebema bororãba, sacerdote bororãba, dadji judiorã ley jaradiabadarã biɗa mʉ̃ra igaraɗapeɗa beabiɗia. Baribʉrʉ mʉ̃ra ewari ũbeaɗe ʉ̃rẽbaya.–

23 Jesuba jũmarãa jarasia:

–Aɓaʉba mʉ̃da ẽpẽ quĩrĩã ɓʉbʉrʉ, idjia o quĩrĩã ɓʉra igarapeɗa ewariza bia mĩgai carea ɓaida ɓʉa.* Maʉ̃be mʉ̃ra ẽpẽida ɓʉa. 24 Aɓaʉba naʉ̃ ẽjũãne bia ɓaida jʉrʉ ɓaibʉrʉ, jĩrũare bia ɓaẽ́a. Baribʉrʉ aɓaʉda mʉ̃ carea beuibʉrʉ Ãcõrẽ ume ewariza zocai ɓaya. 25 Bio crĩchaɗadua: ẽberãda naʉ̃ ẽjũãne ne jũma eroɓʉɗe beupeɗa tʉbʉ uruaɗaa wãibʉrʉ, ¿idjia eroɓaɗaba carebaica? 26 Aɓaʉba mʉ̃ra, mʉ̃ beɗea siɗa adua ɓʉaɗa aibʉrʉ, mʉ̃, Naʉ̃ Djara Edaɗa ʉɓʉa bara zebʉrʉɗe maʉ̃ ẽberãra adua ɓʉaɗa aya. Maʉ̃ ewariɗe mʉ̃ Zeza Ãcõrẽ ʉɓʉa bara idjaɓa idji bajãnebema nezocarã ʉɓʉa bara zeya. 27 Mʉ̃a wãrãda jaraya: ʉ̃cʉrʉ nama panʉ beuɗi naẽna Ãcõrẽba mʉ̃ra jũmarã Boro ɓʉɗada ebuɗa ununia.–*

Jesu quĩrã awara nũmena

Mateo 17:1-8; Marco 9:2-8

28 Mãwã jaraɗacarea ocho ewari ɓʉɗe Jesura eyaɗe ʉ̃taa Ãcõrẽa iwiɗiɗe wãsia. Pedroda, Juaʉ̃da, Santiago siɗa edesia. 29 Mama Jesuba Ãcõrẽa iwiɗi ɓʉɗe idji quĩrãdarrara dorrodorroa nũmesia. Idjia cacuaɗe jʉ̃ ɓʉ siɗa totroaba dorrodorroa nũmesia. 30 Cawaẽ́ne ẽberãda umé odjaɗapeɗa Jesu ume beɗeasiɗaa. Aɓa Moise basía. Dewarabemara Elía basía. 31 Ãdji siɗa Ãcõrẽ quĩrãwãrẽãneba dorrodorroa panasiɗaa. Ãdjia beɗea panasiɗaa Jesu Jerusaleʉ̃ne beaɗiɗebemada.*

32 Mãwã ɓʉɗe Pedrora dewararã siɗa bio daupea panasiɗamĩna cãĩnaẽ́ basía. Maʉ̃ne Jesura dorrodorroa ɓʉda idjaɓa ẽberã umé idji caita panʉ siɗa unusiɗaa. 33 Maʉ̃ ẽberãrã Jesu ume pananada wãbʉdaɗe Pedroba Jesua jarasia:

–Jaradiabari, bio bia ɓʉa daira nama panʉda. De zaqueda ũbea oɗia: aɓa bʉ itea, aɓa Moise itea idjaɓa aɓa Elía itea.–

Pedrora mãwã beɗeasia ni cãrẽ siɗa cawaẽ́ bẽrã. 34 Mãwã ɓʉɗe jʉ̃rãrãda eɗaa zepeɗa ãdjirãra ãnẽɓari edasia. Maʉ̃ carea ãdjira bio ne wayasiɗaa. 35 Ara mãwãbʉrʉɗe beɗeada jʉ̃rãrãne ũrĩsiɗaa. Maʉ̃ba nãwã jarasia:

–Naʉ̃drʉ mʉ̃ Warraa. Mʉ̃a idjira edasia. Idjia jara ɓʉra ũrĩnadua.–*

36 Maʉ̃ beɗea chupeaɗacarea Jesura iduɓa nũmʉda unusiɗaa. Ãdjia unupeɗaɗara dãrãsiɗaa ni aɓaʉa nẽbʉrʉɗaẽ́ panʉda.

Jesuba warra jai bara ɓʉ biabiɗa

Mateo 17:14-21; Marco 9:14-29

37 Nurẽma eyaɗeba eɗaa zesiɗaɗe ẽberãrã zocãrãba Jesura acʉɗe zesiɗaa. 38 Maʉ̃ne aɓaʉba nãwã jĩgua jarasia:

–Jaradiabari, mʉ̃ djuburia mʉ̃ warrada acʉdua. Mʉ̃ra waa warra neẽ́ ɓʉa. 39 Idjira jai bara ɓʉa. Maʉ̃ba cawaẽ́ne idjira ɓiabibaria, wawabibaria, idjaɓa yeɗaa cõpepea nũmebibaria. Idjia mʉ̃ warrara idu ɓʉcaa. 40 Mʉ̃a bʉ ume nĩbabadarãa jarasia jaira ãyã jʉretaɗamãrẽã, mãwãmĩna poyaɗaẽ́ basía.–

41 Maʉ̃ carea Jesuba panusia:

–¡Bãrãba Ãcõrẽra ĩjãnacaa! ¡Bãrãra dji cadjiruarãa! Bãrãba ĩjãnamãrẽã ¿aɓa sãʉ̃be mʉ̃a droai? Bʉ warrara namaa enedua.–

42 Warrara Jesumaa wãbʉrʉɗe jaiba egode ɓaebipeɗa biara wawabisia. Baribʉrʉ Jesuba jaira ãyã jʉretasia. Warrara biabipeɗa dji zezaa diasia. 43 Ãcõrẽ ʉɓʉaɗeba mãwãna unusiɗaɗe jũmarãba cawa crĩchaɗaẽ́ basía.

Jesuba waya idji beuiɗebema jaraɗa

Mateo 17:22-23; Marco 9:30-32

Idjia o ɓʉ carea ẽberãrãba waɗibiɗa bio crĩcha duanʉne Jesuba idji ume nĩbabadarãa jarasia:

Mʉ̃a bãrãa jarabʉrʉra bio quĩrãcuita ũrĩnadua. Mʉ̃, Naʉ̃ Djara Edaɗara aɓaʉba ẽberãrãa jidabiya.–

45 Baribʉrʉ ãdjirãba cawaɗaẽ́ basía cãrẽ cãrẽã Jesura mãwã beɗeabʉrʉda. Ãcõrẽba waɗibiɗa ãdjirãa cawabiẽ́ ɓasia. Maʉ̃ne ãdjia Jesua iwiɗiɗida waya panasiɗaa.

¿Caida dji dromaara ɓai?

Mateo 18:1-5; Marco 9:33-37

46 Mãwã panʉne ara ãdjiduɓa beɗea duanesiɗaa caida dji dromaara ɓai cawaya. 47 Baribʉrʉ Jesuba maʉ̃ra cawaɗa bẽrã warra zaqueda edapeɗa idji caita nũmʉsia. 48 Maʉ̃ne nãwã jarasia:

–Bariduaba mʉ̃ ĩjã ɓʉɗeba warrarãda bia edaibʉrʉ, mʉ̃da bia edabʉrʉa. Idjaɓa mʉ̃ bia edabʉrʉba mʉ̃ Diabueɗada bia edabʉrʉa. Bãrãnebema dji eɗaara quirura Ãcõrẽ quĩrãpita dji dromaara ɓʉa.–

Dadjirã dji quĩrũẽ́ra dadjirãare ɓʉa

Marco 9:38-40

49 Maʉ̃be Juaʉ̃ba nãwã jarasia:

–Jaradiabari, daiba ẽberãda unusiɗaa bʉ trʉ̃neba jaida ãyã jʉreta ɓʉda. Baribʉrʉ dadjirã ume nĩbaca bẽrã daiba idjía jarasiɗaa waa mãwã orãmãrẽã.–

50 Jesuba jarasia:

–Bãrãba mãwã jaraɗiẽ́ panasiɗaa. Dadjirã dji quĩrũẽ́ra dadjirãare ɓʉa.–

Jesuba Juaʉ̃, Santiago siɗa quẽãna

51 Jesu bajãnaa wãi ewari jũẽboɗosiɗe wãrãda Jerusaleʉ̃naa wãida crĩchapeɗa wãsia. 52 Wãbʉrʉɗe ʉ̃cʉrʉda Samaria druaɗaa na diabuesia. Puru zaqueɗe jũẽnapeɗa sãma cãĩnida jʉrʉsiɗaa. 53 Baribʉrʉ maʉ̃ puruɗebemarãba cawasiɗaa Jesura Jerusaleʉ̃naa wãbʉrʉda. Maʉ̃ carea idjira bia edaɗaẽ́ basía. 54 Maʉ̃ bẽrã Juaʉ̃ba, Santiago biɗa Jesua jarasiɗaa:

–Dai Boro, Elíaba oɗa quĩrãca ¿Ãcõrẽa iwiɗiɗica tʉbʉ urua bajãneba diabuebʉrʉba ãdjirãra jũma quenamãrẽã?–*

55 Jesuba ãdji acʉpeɗa quẽãsia. [Nãwã jarasia:

–Bãrãra ¿cãrẽ cãrẽã mãwã beɗea panʉ?* 56 Mʉ̃, Naʉ̃ Djara Edaɗara zeẽ́ ɓʉa ẽberãrã biẽ́ ɓʉi carea ãtebʉrʉ ze ɓʉa ẽdrʉ edai carea.–]*

Maʉ̃be dewara puruɗaa wãsiɗaa.

Jesu ẽpẽni carea zarea ɓʉa

Mateo 8:19-22

57 Oɗe wãbʉdaɗe aɓaʉba Jesua jarasia:

–Jaradiabari, bʉ wãbʉrʉza mʉ̃ra bʉ ume wãya.–

58 Jesuba jarasia:

–Usa pãra de bara ɓʉa, ĩbana siɗa de bara ɓʉa, baribʉrʉ mʉ̃, Naʉ̃ Djara Edaɗara sãma cãĩ siɗa neẽ́ ɓʉa.–

59 Maʉ̃ne Jesuba dewara ẽberãa jarasia:

–Mʉ̃ ume zedua.–

Dji ẽberãba panusia:

–Mʉ̃ Boro, bʉ ume wãi naẽna idu mʉ̃ zezada tʉɓaribidua.–*

60 Jesuba idjía jarasia:

–Beu ɓearãba beuɗarãra tʉɓariɗida panʉa. Baribʉrʉ bʉa ẽberãrãa jaraɗe wãdua Ãcõrẽra ãdji Boro bai carea zebʉrʉda.–

61 Maʉ̃ne dewaraba Jesua jarasia:

–Mʉ̃ siɗa bʉ caiɗu wãya, baribʉrʉ naãrã mʉ̃ ẽberãrãmaa jaraɗe wãida ɓʉa.–

62 Jesuba panusia:

–Aɓaʉda trajaɗe wãpeɗa waya jẽda crĩchaibʉrʉ, idjira bia ɓʉẽ́a Ãcõrẽ puruɗe trajai carea.–