Luca

Jesuba setenta ẽberãrã diabueɗa

10 Mãwãnacarea dadji Boro Jesuba idji ẽpẽ ɓeada setenta edasia Ãcõrẽ beɗea jaraɗe wãnamãrẽã.* Idji wãida ɓʉ puruza umé uméa wãbisia. 2 Ãdjirãa nãwã jarasia:

–Zocãrãba mʉ̃ beɗeara ĩjãni carea panʉa. Maʉ̃ ẽberãrãra néu waiɓʉa waraga taɓʉ quĩrãca ɓeaa. Baribʉrʉ dji ewabadarãda zocãrãẽ́be panʉa. Maʉ̃ bẽrã Néu Djibaría iwiɗiɗadua ewabadarãda idji néumaa diabuemãrẽã.

3 ¡Wãnadua! Mʉ̃a bãrãra ẽberã cadjirua tãẽna diabuebʉrʉa. Ãdjirãba bãrãra biẽ́ oɗia usa cadrʉaba oveja zaque orrabari quĩrãca. 4 Wãbʉdaɗe buchacada, parata siɗa ederãnadua. Bãrãba jĩrũne jʉ̃badara dewara ederãnadua. Wãnane ni aɓaʉ ume oɗe beɗearãnadua.

5 Deɗe eɗa wãbʉdaɗe maʉ̃ deɗebemarãa nãwã jaraɗadua: “Ãcõrẽneba necai pananadua.” 6 Maʉ̃ deɗebemarãba bãrãda necai edaɗibʉrʉ, bãrãba beɗeapeɗaɗa quĩrãca ãdjirãra necai panania. Necai edaɗaẽ́bʉrʉ, ãdjirãra necai pananaẽ́a. 7 Bãrãra necai edaɗibʉrʉ, maʉ̃ deɗe panenadua. Deza cãĩrãnadua. Bãrãba o panʉbari ne edaɗida panʉ bẽrã mama panʉmisa ãdjia diabʉdara coɗadua.

8 Puruɗe jũẽbʉdaɗe ẽberãrãba bãrãda bia edaɗibʉrʉ, ãdjia bãrãa diabʉdara coɗadua. 9 Maʉ̃ awara dji cacua biẽ́ ɓeara biabicuaɗadua. Ãdjía nãwã jaraɗadua: “Ãcõrẽra bãrã Boro bai carea zebʉrʉa.”

10 Baribʉrʉ puruɗe jũẽbʉdaɗe ẽberãrãba bãrãda bia edaɗaẽ́bʉrʉ, ãdjía nãwã jaraɗadua: 11 “Naʉ̃ puruɗebema pora dai jĩrũnebemada bãrã quĩrãpita jãrãpetabʉdaa unubiɗi carea Ãcõrẽba cawa oida. Bio cawaɗadua Ãcõrẽra dji Boro bai carea zebʉrʉda.” 12 Maʉ̃ bẽrã mʉ̃a jaraya: Ãcõrẽba cawa oi ewariɗe idjia maʉ̃ purura wetara cawa oya Sodomanebema ẽberãrã cawa oi cãyãbara.*

Jesuba idji ĩjãẽ́ ɓea puru quẽãna

Mateo 11:20-24

13 ¡Coraziʉ̃nebemarãra, Betsaidaɗebemarã siɗa mĩã djuburi ɓeaa Ãcõrẽba cawa oi bẽrã! Mʉ̃a ne ununaca bãrã tãẽna oɗara Tiroɗe, Sidoʉ̃ne biɗa oɗabara, maʉ̃ puruɗebemarãba isabe cadjiruada igaraɗapeɗa Ãcõrẽda ĩjãcasiɗaa. Maʉ̃ carea tʉbʉ poraɗe chũpanecasiɗaa idjaɓa sopuaɗebema jʉ̃badara jʉ̃casiɗaa. 14 Maʉ̃ bẽrã Ãcõrẽba cawa oi ewariɗe Tiroɗebemarã idjaɓa Sidoʉ̃nebemarã cãyãbara bãrãra wetara cawa oya.

15 ¿Capernauʉ̃nebemarãra bajãnaa wãnica? ¡Wãnaẽ́a! ¡Ãcõrẽba bãrãra beuɗarã panabadamaa ɓatabueya!–*

16 Maʉ̃be idji ume nĩbabadarãa jarasia:

–Bãrã beɗea ĩjã ɓʉba mʉ̃ beɗeada ĩjã ɓʉa. Bãrã igara ɓʉba mʉ̃da igara ɓʉa. Idjaɓa mʉ̃ igara ɓʉba mʉ̃ Diabueɗada igara ɓʉa.–

Jesuba setenta diabueɗa jẽda zepeɗaɗa

17 Jesuba setenta diabueɗara jẽda bio ɓʉsriɗa zesiɗaa.* Maʉ̃be ãdjia Jesua nãwã jarasiɗaa:

–¡Dai Boro, bʉ trʉ̃neba jairã ãyã jʉretabʉdaɗe ãdjirãba ĩjãbadaa!–

18 Maʉ̃ carea Jesuba ãdjía jarasia:

–Mãẽ, mʉ̃a unu ɓasia diaurura bajãneba baa purepurea quĩrãca ɓaebʉrʉda. 19 Mʉ̃a bãrãa ʉɓʉada diasia diauru poyaɗamãrẽã idjaɓa dama ʉ̃rʉ̃, drusõrẽ ʉ̃rʉ̃ biɗa poya tʉgaɗamãrẽã. Ni cãrẽ biɗa bãrãra poya biẽ́ oẽ́a. 20 Baribʉrʉ aɓabe ɓʉsriɗaɗiẽ́ panʉa bãrãba jairã ãyã jʉretabʉdaɗe ãdjia ĩjãbada bẽrã, ãtebʉrʉ biara ɓʉsriɗaɗida panʉa Ãcõrẽba bãrã trʉ̃rã bajãne ɓʉ́ eroɓʉ bẽrã.

Jesu ɓʉsriɗaɗa

Mateo 11:25-27; 13:16-17

21 Mãwã beɗea panʉne Jesura Ãcõrẽ Jaureɗeba bio ɓʉsriɗa nũmesia. Maʉ̃ bẽrã Ãcõrẽa nãwã jarasia:

–Zeza, bʉra bajãnebema Boroa idjaɓa naʉ̃ ẽjũãnebema Boroa. Bʉa ne adua ɓeaa mʉ̃a jaradiaɗara cawabiɗa bẽrã mʉ̃a bʉra bia jaraya. Ne cawa ɓeaa bʉa cawabiẽ́ basía. Mãẽ, Zeza, bʉa mãwã o quĩrĩãsia.

22 Mʉ̃ Zezaba mʉ̃́a ara idjiɗebemada jũma cawabisia. Ni aɓaʉba adua panʉa mʉ̃, dji Warrara sãwã ɓʉda; aɓa mʉ̃ Zezabʉrʉ cawa ɓʉa. Ara maʉ̃ quĩrãca ni aɓaʉba adua panʉa mʉ̃ Zezara sãwã ɓʉda; aɓabe mʉ̃, dji Warrabʉrʉ cawa ɓʉa. Mʉ̃a aɓaʉa mʉ̃ Zezada cawabisira, maʉ̃ ẽberã biɗa cawaya.–

23 Maʉ̃be idji ume nĩbabadarãra awara edepeɗa nãwã jarasia:

–Bãrãra bio bia panʉa mʉ̃a o ɓʉda unu panʉ bẽrã. Dewaraba unusira maʉ̃ ẽberã siɗa bio bia ɓaya. 24 Wãrãda zocãrã Ãcõrẽneba beɗeabadarãba, ẽberãrã bororã biɗa bãrãba unu panʉda unu quĩrĩã panasiɗaa, baribʉrʉ ununaẽ́ basía. Idjaɓa bãrãba ũrĩ panʉra ũrĩ quĩrĩã pananamĩna ũrĩnaẽ́ basía.–

Samariaɗebema ẽberã bia

25 Ewari aɓa Jesu wãrãda ne cawa ɓʉ cawaya judiorã ley jaradiabarida piradrʉpeɗa nãwã iwiɗisia:

–Jaradiabari, ¿mʉ̃a cãrẽda oida ɓʉ Ãcõrẽ ume ewariza zocai ɓai carea?–

26 Jesuba panusia:

–Ãcõrẽ leyɗe ¿cãrẽda ɓʉ́ ɓʉ? ¿Bʉmaarã cãrẽda jara ɓʉ?–

27 Judiorã ley jaradiabariba panusia:

–Jũma bʉ soɗeba, jũma bʉ jaureɗeba, jũma bʉ ʉɓʉaɗeba idjaɓa jũma bʉ crĩchaɗeba bʉ Boro Ãcõrẽra quĩrĩãdua.* Idjaɓa djãrãra quĩrĩãdua ara bʉdji quĩrĩã ɓʉ quĩrãca.–*

28 Maʉ̃ne Jesuba jarasia:

–Bʉa ariɗe panusia. Maʉ̃ quĩrãca bʉa osira ewariza Ãcõrẽ ume zocai ɓaya.–

29 Baribʉrʉ judiorã ley jaradiabariba ara idjida jipa ɓʉda unubi quĩrĩãsia. Maʉ̃ carea Jesua iwiɗisia:

–Baribʉrʉ djãrã a ɓʉɗe ¿caida jara ɓʉ?–

30 Jesuba panusia:

–Ewari aɓa ẽberãda Jerusaleʉ̃neba Jericoɗaa wãsia. Wãbʉrʉɗe ne drʉabadarãba idjira jidaɗapeɗa bio puoɗapeɗa beuɗa quĩrãca taɓʉsiɗaa. Idjia eroɓaɗara jũma jãrĩnapeɗa wãsiɗaa.

31 Mãwã ɓʉɗe sacerdoteda aɓari oɗe zesia. Dji ẽberãra taɓʉda ununamĩna wãyã wãsia. 32 Ara maʉ̃ quĩrãca Leviɗeba yõnada maʉ̃ oɗe zesia.* Idjia biɗa ẽberã taɓʉda ununamĩna wãyã wãsia. 33 Maʉ̃are ẽberã Samariaɗebemada maʉ̃ oɗe zesia. Dji ẽberã taɓʉ unusiɗe sopuasia. 34 Araa wãpeɗa dji ẽberã cacua cõãdrʉcuapeɗaɗara olivo dragaba, uva ɓa biɗa soapeɗa wuaba bʉrasia. Maʉ̃be idji burro ʉ̃rʉ̃ ɓʉpeɗa cãĩbada deɗaa edesia. Mama dji ẽberãra biara carebasia.

35 Nurẽma Samariaɗebemaba de djibaría paratada diapeɗa nãwã jarasia: “Idjira bio carebadua.* Za mʉ̃a diaɗa parataba araẽ́bʉrʉ, bʉ parataba carebadua. Mʉ̃ jẽda zebʉrʉɗe bʉ parata ɓʉɗara mʉ̃a jũma jẽda diaya.”–

36 Mãwã nẽbʉrʉpeɗa Jesuba iwiɗisia:

–Ẽberã ũbeabemaba dji ne drʉabadaba puopeɗaɗara unusiɗaa. Bʉmaarã ¿sãʉ̃gʉba idjira quĩrĩãsi?–

37 Maʉ̃ne judiorã ley jaradiabariba panusia:

–Dji quĩrã djuburiaɗaba.–

Jesuba idjía jarasia:

–Ara maʉ̃ quĩrãca djãrãra quĩrĩãdua.–

Jesu Marta deɗaa wãna

38 Nocoɗaa wãbʉdaɗe puru zaqueɗe jũẽsiɗaa. Mama wẽrã Marta abadada ɓabadjia. Maʉ̃ Martaba Jesura idji deɗe bia edasia. 39 Martaba djabawẽrãda eroɓasia Maria abadada. Mariara Jesu jĩrũ caita chũmasia idjia jaradia ɓʉ ũrĩ carea. 40 Mãwã ɓʉɗe Martara jʉwa tãbʉra ɓʉ bẽrã sobiẽ́ ɓesia. Jesu caita wãpeɗa jarasia:

–Jaradiabari ¿bʉmaarã bia ɓʉca mʉ̃ djabawẽrãba mʉ̃ra carebaẽ́ ɓʉda? Idjía jaradua mʉ̃ carebamãrẽã.–

41 Jesuba jarasia:

–Marta, Marta, bʉa ne zocãrã oida ɓʉ carea jũmawãyã crĩcha ɓʉa. 42 Baribʉrʉ ¿Ãcõrẽ beɗea ũrĩda biara ɓʉẽ́ca? Maʉ̃gʉda Mariaba o ɓʉa. Ni aɓaʉba idjía maʉ̃ra ocara ɓʉaɗa aɗaẽ́a.–