Luca

Ãcõrẽa iwiɗiɗiɗebema

Mateo 6:9-15; 7:7-11

11 Ewari aɓa Jesuba Ãcõrẽa iwiɗi ɓasia. Mãwãnacarea idji ume nĩbabari aɓaʉba nãwã iwiɗisia:

–Dai Boro, daiba Ãcõrẽa ariɗe iwiɗiɗi carea jaradiadua Juaʉ̃ba idji ume nĩbabadarãa jaradiaɗa quĩrãca.–

2 Jesuba jarasia:

–Bãrãba Ãcõrẽa iwiɗibʉdaɗe nãwã beɗeaɗadua:

Dai Zeza bajãne ɓʉ, jũmarãba bʉra wayaɗida panʉa.*

Daiba quĩrĩã panʉa bʉra jũmarã Boro bai carea isabe zeida. [Idjaɓa quĩrĩã panʉa naʉ̃ ẽjũãnebemarãba bʉa quĩrĩã ɓʉra oɗida bajãnebemarãba obada quĩrãca.]*

3 Coɗira ewariza daia diadua.

4 Daiba cadjirua opeɗaɗara quĩrãdoadua djãrãba dai biẽ́ opeɗaɗara quĩrãdoabada quĩrãca.

Daira idu cadjiruaɗe ɓaebirãdua, ãtebʉrʉ cadjiruaɗebemada ẽdrʉ ɓʉdua.*

5 Idjaɓa Jesuba nãwã jarasia:

–Ãĩbẽrã bãrãnebemaba ariquẽtra dji biamaa wãpeɗa nãwã jaraisicada: “Ache, mʉ̃́a paʉ̃da ũbea diadua. 6 Naʉ̃ diamasi aɓaʉda cawaẽ́ne mʉ̃ deɗe jũẽsia baribʉrʉ ne cobi carea mʉ̃a neẽ́ ɓʉa.” 7 Maʉ̃ne dji eɗa ɓʉba nãwã panuisicada: “Ache, mĩã sẽrãdua. Mʉ̃ deɗe eɗa wãbadara jũãtrʉ eroɓʉa. Daira jũma cʉɗaɗe duanʉa, mʉ̃ warrarãra cãĩ duanʉa. Maʉ̃ bẽrã mʉ̃a ni cãrẽ siɗa poya diaẽ́a.” 8 Mʉ̃a jaraya: idjia paʉ̃ra diaẽ́a bʉ ume dji bia bẽrã, ãtebʉrʉ diaya bʉa mĩã sẽ ɓʉ bẽrã.

9 Mʉ̃a jaraya: ara maʉ̃ quĩrãca Ãcõrẽa iwiɗi pananadua; maʉ̃ne idjia bãrãa diaya. Idjia diamãrẽã jʉrʉ pananadua; maʉ̃ne ununia. Deɗe eɗa wãbadamaʉba trʉ̃nadua; maʉ̃ne dji eɗa wãbadara ewaya diai carea. 10 Dji iwiɗi ɓʉba edaya. Dji jʉrʉ ɓʉba unuya. Dji trʉ̃ ɓʉ itea deɗe eɗa wãbadara ewaya ne diai carea.

11 Warraba paʉ̃ iwiɗibʉrʉɗe ¿dji zezaba mõgarada diaica?* Warraba ɓeda iwiɗibʉrʉɗe ¿dji zezaba damada diaica? 12 Warraba ne ʉ̃mʉ̃da iwiɗibʉrʉɗe ¿dji zezaba drusõrẽda diaica? 13 Bãrã dji cadjiruarãba bãrã warrarãa ne biada dia cawa panʉbʉrʉ, ¿bãrã Zeza bajãne ɓʉba idji Jaureda dji iwiɗi panʉ́a diaẽ́ca?–

Jesu biẽ́ jarapeɗaɗa

Mateo 12:22-30; Marco 3:20-27

14 Ewari aɓa Jesuba jaida ãyã jʉretasia. Maʉ̃ jaiba ẽberãda quĩrãme cara eroɓasia. Jai ẽdrʉɗacarea dji ẽberãra beɗeasia. Maʉ̃ unusiɗaɗe ẽberãrãba cawa crĩchaɗaẽ́ panesiɗaa. 15 Baribʉrʉ ʉ̃cʉrʉba jarasiɗaa:

–Jãʉ̃ Jesuba jaira ãyã jʉretabaria, jairã boro Beelzebúba maʉ̃ ʉɓʉada diaɗa bẽrã.–

16 Maʉ̃ne Jesu Ãcõrẽneba ze ɓʉ cawaya dewararãba idjía iwiɗisiɗaa ne ununacada omãrẽã. 17 Baribʉrʉ Jesuba ãdji crĩchara cawa ɓaɗa bẽrã nãwã jarasia:

–Aɓari druaɗebemarãda ara ãdjiduɓa djõ pananibʉrʉ, ãduɓa dji quininia. Ara maʉ̃ quĩrãca aɓari deɗe ɓeada djõ pananibʉrʉ dãrã pananaẽ́a. 18 Bãrãba jara panʉa mʉ̃a jaira Beelzebú ʉɓʉaɗeba ãyã jʉretabarida. Maʉ̃ carea mʉ̃a bãrãa iwiɗiya: Satanada ara idji jairã ume djõ ɓaibʉrʉ ¿sãwã idjia poya ɓʉra dãrã eroɓai?

19 Bãrãmaarã mʉ̃a Beelzebúɗeba jairãda ãyã jʉreta ɓʉa. Mãwãra bãrã ẽpẽ ɓeaba ¿caiɗeba jaira ãyã jʉretabada? Ãdjirãba cawabiɗia bãrãba ãĩ crĩcha panʉda. 20 Baribʉrʉ Ãcõrẽ ʉɓʉaɗeba mʉ̃a jairãda ãyã jʉreta ɓʉbʉrʉ, Ãcõrẽba bãrãa unubi ɓʉa idjira jũẽsida bãrã Boro bai carea.

21 Ẽberã mẽsrã ɓʉba djõbada necoba bio waga eroɓʉbʉrʉ, idjia eroɓʉra ni aɓaʉba poya drʉaɗaẽ́a. 22 Baribʉrʉ idji cãyãbara ẽberã ʉɓʉara ɓʉda zepeɗa idjira poyaibʉrʉ, idji djõbada necora jãrĩya. Maʉ̃be jũma idjia eroɓaɗara jãrĩpeɗa dji biarã ume jeɗecaya.

23 Mʉ̃are ɓʉẽ́ra mʉ̃ ume dji quĩrũa. Mʉ̃ ume ẽberãrã careba jʉrʉ peẽ́ ɓʉba dji jʉrʉ peɗara ẽjĩzoabibaria.

Jai jẽda zeɗa

Mateo 12:43-45

24 Ẽberã cacuaɗebemada ẽdrʉɗacarea jaira ẽjũã põãsa ewaraga ɓʉɗe ʉ̃nãũi carea jʉrʉ ɓabaria. Unuẽ́ bẽrã idjiduɓa nãwã jarabaria: “Mʉ̃dji ɓaɗamaa jẽda wãya.” 25 Jũẽbʉrʉɗe maʉ̃ ẽberã sora de bia ima ɓʉ quĩrãca unubaria. Ne jũma bia nũmeada unubaria. 26 Maʉ̃be siete jai idji cãyãbara cadjiruara ɓeada maʉ̃ ẽberãmaa enepeɗa dji ẽberã soɗe eɗa panebadaa. Maʉ̃ bẽrã dji ẽberãra idji naãrã ɓaɗa cãyãbara wetara biẽ́ ɓebaria.–

¿Cairãda wãrãda bia ɓea?

27 Jesuba mãwã jara ɓʉɗe wẽrã ẽberãrã tãẽna ɓʉba jĩgua jarasia:

–¡Bʉ toɗa idjaɓa ju dawaɗa wẽrãra bio bia ɓʉa!–

28 Baribʉrʉ Jesuba jarasia:

–Maʉ̃ cãyãbara Ãcõrẽ beɗea ũrĩnapeɗa ĩjã obadarãda biara ɓeaa.–

Jesuba Jonánebema jaraɗa

Mateo 12:38-42; Marco 8:12

29 Ẽberãrã zocãrã idjimaa zebʉda unusiɗe Jesuba jarasia:

–Iɗibema ẽberãrãra dji cadjiruarãa. Bãrãba mʉ̃ra bajãneba ze ɓʉda cawaɗi carea quĩrĩã panʉa mʉ̃a ne ununacada oida. Baribʉrʉ mʉ̃a ne ununacada oẽ́a. Bãrãba aɓabe Joná mãwãna quĩrãca ununia. 30 Joná mãwãnaba Niniveɗebema ẽberãrãa cawabisia idjira Ãcõrẽneba ze ɓʉda.* Mʉ̃, Naʉ̃ Djara Edaɗara ara maʉ̃ quĩrãca mãwãya iɗibemarãba cawaɗamãrẽã Ãcõrẽneba ze ɓʉda.

31 Salomoʉ̃ ewariɗe Sabá druaɗebema borora wẽrã basía. Idjira drua tʉmʉba zesia Salomoʉ̃ necawaa ũrĩ carea.* Baribʉrʉ naʉ̃ ewariɗe Salomoʉ̃ cãyãbara dji dromaara ɓʉda nama ɓʉmĩna bãrãba ĩjãnaẽ́ panʉa. Maʉ̃ carea Ãcõrẽba cawa oi ewariɗe maʉ̃ wẽrãba piraɓaripeɗa bãrãra biẽ́ jaraya. 32 Ãcõrẽba cawa oi ewariɗe Niniveɗebemarã siɗa piraɓariɗapeɗa iɗibemarãra biẽ́ jaraɗia.* Jonába jaraɗa ũrĩsiɗaɗe ãdjirãba cadjiruada igaraɗapeɗa Ãcõrẽmaa zesiɗaa. Baribʉrʉ bãrãba nama aɓa eropanʉa Joná cãyãbara dji dromaara ɓʉda. Mãwãmĩna ĩjãnacaa.

Daura dadji cacuaɗebema ĩbĩrã

Mateo 5:15; 6:22-23

33 Ni aɓaʉba ĩbĩrãda coaɗapeɗa mẽrã nũmʉnacaa wa epeɗeco droma edre ɓʉɗacaa. Ãtebʉrʉ ʉ̃tʉ dji ĩbĩrã ɓʉbadaɗe nũmʉbadaa dji deɗe eɗa zebʉdarãba ʉ̃naa ununamãrẽã. 34 Bʉ daura ĩbĩrã quĩrãca ɓʉa. Maʉ̃ bẽrã bʉ dauda bia ɓʉbʉrʉ, ʉ̃naane ɓʉa. Baribʉrʉ bʉ dauda biẽ́ ɓʉbʉrʉ, pãĩmane ɓʉa. 35 Maʉ̃ carea bio quĩrãcuita ɓadua. Bʉa ʉ̃naa quĩrãca crĩcha ɓʉra pãĩmanebemasicada. 36 Baribʉrʉ bʉda wãrãda ʉ̃naane ɓʉbʉrʉ, pãĩmane ni maãrĩ biɗa ɓʉẽ́bʉrʉ, wãrã beɗeara ebuɗa cawaya ĩbĩrãba bio ʉ̃na eroɓʉ quĩrãca.–

Jesuba pariseorã biẽ́ jaraɗa

Mateo 23:1-36; Marco 12:38-40; Luca 20:45-47

37 Jesuba mãwã jaraɗacarea pariseo aɓaʉba idjira eɗosia idji ume ne coɗe wãmãrẽã. Ara maʉ̃da Jesura maʉ̃ ẽberã deɗaa wãpeɗa ne coi carea chũmesia. 38 Baribʉrʉ Jesu ne coi naẽna jʉwa sʉgʉẽ́ basía ãdjia obada quĩrãca. Maʉ̃ unusiɗe pariseoba cawa crĩchaẽ́ basía. 39 Maʉ̃ne Jesuba idjía jarasia:

–Bãrã pariseorãba tazara, epeɗeco siɗa ʉ̃rʉ̃bemada quĩrãcuita sʉgʉbadaa, baribʉrʉ bãrã soɗe ne jũmada awuabadaa idjaɓa cadjirua siɗa crĩchabadaa. 40 Bãrãra crĩcha neẽ́ panʉ quĩrãca panabaria. ¿Dji ʉ̃rʉ̃bema oɗaba dadji so siɗa oẽ́ basica? 41 Sobiaɗeba ne neẽ́ queɗearãa bãrãba eropanʉnebemada diaɗadua. Mãwãbʉrʉ wãrãda bãrãra bia sʉgʉ ɓeaɗia.

42 ¡Bãrã pariseorã mĩã djuburi ɓeaa Ãcõrẽba cawa oi bẽrã! Bãrãba menta queduada, ruda queduada, idjaɓa néuɗebema siɗa die ewabʉdaza aɓa Ãcõrẽa diabadaa. Mãwãmĩna djãrã ume jipa oɗacaa idjaɓa Ãcõrẽra quĩrĩãnacaa. Bãrãba Ãcõrẽa ne diabʉda awara ¿cãrẽ cãrẽã maʉ̃ siɗa oɗaẽ́ panʉ?

43 ¡Bãrã pariseorã mĩã djuburi ɓeaa Ãcõrẽba cawa oi bẽrã! Bãrãra judiorã dji jʉrebada deɗe ãdjira dji dromarã chũmebadaɗe chũme quĩrĩãbadaa. Maʉ̃ awara puruɗe nĩnane quĩrĩãbadaa ẽberãrãba wayaaɗeba “mẽrã” aɗida.

44 ¡Mĩã djuburi ɓeaa Ãcõrẽba bãrãra cawa oi bẽrã! Bãrãra bẽwãrã joupeɗaɗa ẽjũã quĩrãca ɓeaa.* Dji boromeada neẽ́ bẽrã dji ʉ̃rʉ̃ wã duanʉba adua panʉa bẽwãrãda tʉga panʉda. Ara maʉ̃ quĩrãca bãrãba obadara ẽberãrãba ẽpẽbadaa baribʉrʉ ãdjia adua panʉa maʉ̃neba cadjirua obʉdada.–

45 Maʉ̃ne judiorã ley jaradiabari aɓaʉba Jesua jarasia:

–Jaradiabari, mãwã jarabʉrʉɗe dairã siɗa biẽ́ jara ɓʉa.–

46 Maʉ̃ carea Jesuba idjía jarasia:

–¡Judiorã ley jaradiabadarã, bãrãra mĩã djuburi ɓeaa Ãcõrẽba cawa oi bẽrã! Bãrãba ne poya oɗiẽ́ ɓeada ẽberãrãa obibadaa. Baribʉrʉ mãwã oɗamãrẽã bãrãba ni maãrĩ biɗa carebaɗacaa.

47 11:47-48 ¡Bãrãra mĩã djuburi ɓeaa Ãcõrẽba cawa oi bẽrã! Bãrã drõã naẽnabemarãba Ãcõrẽneba beɗeabadarãda beasiɗaa. Maʉ̃be ãdji tʉɓaripeɗaɗama bãrãba ʉ̃rʉ̃bemada bia quiruda obadaa. Mãwã o panʉneba unubibadaa bãrã drõã naẽnabemarãba opeɗaɗada bia unubadada.

49 Maʉ̃ carea Ãcõrẽba idji necawaaɗeba nãwã jarasia: “Mʉ̃neba beɗeabadarãda idjaɓa mʉ̃a diabueɗarã siɗa bãrã israelerãmaa wãbiya. Maʉ̃ne ʉ̃cʉrʉ beaɗia idjaɓa dewararãda biẽ́ oɗi carea ẽpẽnia.” 50 11:50-51 Ãcõrẽba iɗibema ẽberãrãra cawa oya bãrã drõã naẽnabemarãba jũma idjiɗeba beɗeabadarã beapeɗaɗa carea. Mãẽ, mʉ̃a jaraya: naʉ̃ ẽjũã oɗaɗeba ʉ̃taa beapeɗaɗarã carea Ãcõrẽba bãrãra cawa oya; Abel beapeɗaɗa carea, Zacaria beapeɗaɗa carea idjaɓa jũma dewararã beapeɗaɗa carea biɗa. Zacariara Ãcõrẽ de dajadaare dji animarã babue diabada caita beasiɗaa.*

52 ¡Judiorã ley jaradiabadarã, bãrãra mĩã djuburi ɓeaa Ãcõrẽba cawa oi bẽrã! Bãrãba ẽberãrãa Ãcõrẽra idu wãrãda cawabiɗacaa. Bãrãba adua panʉa Ãcõrẽra wãrãda sãwãbʉrʉ ɓʉda. Maʉ̃ awara dewararãba cawa quĩrĩã panʉ siɗa bãrãba idu cawabiɗacaa.–

53 Jesu ẽdrʉɗacarea pariseorãba, judiorã ley jaradiabada biɗa caicayaɗeba Jesua auɗuara zarea ɓeada iwiɗi panesiɗaa. 54 Ãdjia quĩrĩã panasiɗaa Jesuba ãĩ panuida idji biẽ́ jaraɗi carea.