Mateo

Jesu beaɗi carea crĩcha jʉrʉ panana

Marco 14:1-2; Luca 22:1-2; Juaʉ̃ 11:45-53

26 Jũma maʉ̃ jaradiaɗacarea Jesuba idji ume nĩbabadarãa jarasia:

2 –Bãrãba cawa panʉa ewari umé babʉrʉɗe Egiptoɗeba ẽdrʉpeɗaɗa quĩrãnebabada ewarida oɗida.* Maʉ̃ne aɓaʉba mʉ̃, Naʉ̃ Djara Edaɗara jidabiya cruɗe cachi beaɗamãrẽã.–

3 Maʉ̃misa sacerdote bororãda, judiorã ley jaradiabadarãda, judiorã dji dromarã siɗa Caipá de dromane ãbaa dji jʉresiɗaa. Maʉ̃ Caipára sacerdote dji dromaara ɓasia. 4 Maʉ̃ne beɗea ausiɗaa Jesura chupea jidaɗapeɗa beabiɗi carea. 5 Baribʉrʉ jarasiɗaa:

–Ewari dromane jidaɗaẽ́a ẽberãrã quĩrũbucarãnamãrẽã.–

Wẽrãba nardo quera Jesu boro ʉ̃rʉ̃ weaɗa

Marco 14:3-9; Juaʉ̃ 12:1-8

6 Maʉ̃ ewariɗe Jesura Betania puruɗe Simoʉ̃ aiɗa bara ɓaɗa deɗe ɓasia. 7 Maʉ̃ne wẽrãda idjimaa zesia. Maʉ̃ wẽrãba boteya alabastro mõgara oɗada enesia.* Boteyara quera bio nẽbʉa ɓʉba bira ɓasia. Jesu ne co chũmʉne wẽrãba maʉ̃ querara idji boro ʉ̃rʉ̃ weabuesia. 8 Jesu ume nĩbabadarãba maʉ̃ unubʉdaɗe quĩrũsiɗaa. Nãwã jarasiɗaa:

–¿Cãrẽ cãrẽã jãwã weatasi? 9 Nẽdobueɗabara paratada waiɓʉa edacasia. Maʉ̃ba ne neẽ́ queɗeara carebacasia.–

10 Baribʉrʉ Jesuba maʉ̃da ũrĩna bẽrã jarasia:

–¿Cãrẽ cãrẽã idjira quẽã panʉ? Idjia mʉ̃ jãwã oɗara bia ɓasia. 11 Ne neẽ́ queɗeara ewariza bãrã tãẽna panania, baribʉrʉ mʉ̃ra bãrã ume ewariza ɓaẽ́a. 12 Dãrãẽ́ne mʉ̃ra beupeɗa tʉɓariɗia. Naʉ̃ wẽrãba mʉ̃ra maʉ̃ carea queraba pãsia. 13 Wãrã arada mʉ̃a jaraya: jũma naʉ̃ ẽjũãne beɗea bia mʉ̃nebema jaradiabʉdama naʉ̃ wẽrãba oɗara nẽbʉrʉɗia idji siɗa quĩrãnebaɗamãrẽã.–

Judaba Jesu jidabi carea crĩchaɗa

Marco 14:10-11; Luca 22:3-6

14 Juda Iscariote abadada Jesuba doce edaɗaɗebema basía. Maʉ̃ Judara sacerdote bororãmaa wãsia. 15 Idjia nãwã iwiɗisia:

–Mʉ̃a bãrãa Jesuda jida diaibʉrʉ, ¿bãrãba mʉ̃́a cãrẽda diaɗi?–

Maʉ̃ne ãdjirãba parata torroda treinta diasiɗaa.* 16 Mamaʉba ʉ̃taa Judaba jʉrʉbadjia sãwã Jesura jidabida.

Jesuba doce edaɗarã ume ne coɗa

Marco 14:12-25; Luca 22:7-23; Juaʉ̃ 13:21-30; 1 Corinto 11:23-26

17 Paʉ̃ ẽsãbari neẽ́ ɓʉ cobada ewarida jũẽsia. Domia aɓa mãwã cobadjiɗaa. Dji nabema ewariɗe Jesu ume nĩbabadarãba idjimaa wãnapeɗa iwiɗisiɗaa:

–¿Bʉa sãma quĩrĩã ɓʉ daiba Egiptoɗeba ẽdrʉpeɗaɗa quĩrãnebaɗi carea cobadara bʉ itea oɗida?–

18 Jesuba panusia:

–Jerusaleʉ̃ne dadjia unubada ẽberãmaa wãnadua. Idjía nãwã jaraɗadua: “Dadjirãa Jaradiabariba jara ɓʉa idji ewarira caita ɓʉda. Idjia, idji ume nĩbabadarã biɗa Egiptoɗeba ẽdrʉpeɗaɗa quĩrãnebaɗi carea cobadara bʉ deɗe coɗia.”–

19 Ara maʉ̃da Jesuba jaraɗa quĩrãca idji ume nĩbabadarãba Egiptoɗeba ẽdrʉpeɗaɗa quĩrãnebaɗi carea cobadara osiɗaa.

20 Queuɗacarea Jesura, idji ume nĩbabadarã doce panʉ ume mesa icawa chũmesia. 21 Ne co panʉne idjia jarasia:

–Wãrã arada mʉ̃a jaraya: aɓa bãrãnebemaba mʉ̃ra jidabiya.–

22 Maʉ̃ carea ãdjira bio sopua panesiɗaa. Ara maʉ̃da aɓa aɓa idjía iwiɗisiɗaa:

–Mʉ̃ Boro, ¿mʉ̃a mãwã oica?–

23 Idjia panusia:

–Mʉ̃ ume aɓari epeɗecoɗe ne co ɓʉba mʉ̃ra jidabiya.* 24 Wãrãda mʉ̃, Naʉ̃ Djara Edaɗara beuida ɓʉa Ãcõrẽ Beɗeaɗe ɓʉ́ ɓʉ quĩrãca.* ¡Baribʉrʉ mʉ̃ jidabi ẽberãra bio mĩã djuburi ɓʉa! Idjira topeɗaɗaẽ́bara biara ɓacasia.–

25 Maʉ̃ne Juda, Jesu jidabiya ɓʉba iwiɗisia:

–Jaradiabari, ¿mʉ̃a mãwã oica?–

Jesuba panusia:

–Mãẽ, bʉa mãwã jara ɓʉa.–

26 Waɗi ne co duanʉne Jesuba paʉ̃da jʉwaɗe edapeɗa Ãcõrẽa bia jarasia. Maʉ̃be cõrãcuapeɗa idji ume nĩbabadarãa diabʉrʉɗe jarasia:

–Edaɗadua. Coɗadua. Naʉ̃gʉra mʉ̃ cacuaa.–

27 Mãwãnacarea uva ɓa tazaɗe ɓʉda edapeɗa Ãcõrẽa bia ɓʉaɗa asia. Maʉ̃be ãdjirãa diabʉrʉɗe jarasia:

–Jũmarãba doɗadua. 28 Naʉ̃gʉra mʉ̃ oaa. Mʉ̃ oa erozoabʉrʉba Ãcõrẽba beɗea djiwiɗida ɓʉbʉrʉa zocãrã ẽberãrãba cadjirua opeɗaɗada quĩrãdoai carea.* 29 Mʉ̃a jaraya: mʉ̃a uva ɓara waa doẽ́a aɓa mʉ̃ Zezaba jũma idji ẽberãrã pe eroɓebʉrʉɗaa. Maʉ̃bebʉrʉ mʉ̃a bãrã ume uva ɓada wayacusa doya.–*

Pedroba Jesu igaraẽ́ana aɗa

Marco 14:26-31; Luca 22:31-34; Juaʉ̃ 13:36-38

30 Maʉ̃be Ãcõrẽ Beɗeaɗebemada trʉ̃ãnapeɗa Olivo eyaɗaa wãsiɗaa.* 31 Maʉ̃ne Jesuba ãdjía jarasia:

–Naʉ̃ diamasi jũma bãrãba mʉ̃ra igaraɗia. Ãcõrẽ Beɗeaɗe nãwã ɓʉ́ ɓʉa: “Mʉ̃a oveja wagabarira beabʉrʉɗe dji ovejara jãrãzoaɗia.”* 32 Baribʉrʉ mʉ̃ra ʉ̃rẽbapeɗa bãrã na wãya Galilea druaɗaa.–

33 Maʉ̃ne Pedroba Jesua jarasia:

–Jũmarãba bʉra igaraɗimĩna mʉ̃abʉrʉ igaraẽ́ ɓaya.–

34 Jesuba Pedroa jarasia:

–Wãrã arada mʉ̃a jaraya: ara naʉ̃ diamasi eterre berui naẽna bʉa ɓarima ũbea mʉ̃ra unucaaɗa aya.–

35 Baribʉrʉ Pedroba jarasia:

–Mʉ̃ beabʉda siɗa bʉra igaraẽ́a.–

Waabemarã biɗa aɓarica jarasiɗaa.

Jesu Getsemanine Ãcõrẽa iwiɗiɗa

Marco 14:32-42; Luca 22:39-46

36 Jesura idji ume nĩbabadarã siɗa Getsemani abadama jũẽne wãsiɗaa. Mama Jesuba ãdjirãa jarasia:

–Mʉ̃ awuá Ãcõrẽa iwiɗiɗe wãbʉrʉmisa nama chũpanenadua.–

37 Maʉ̃be Zebedeo warrarã umé panʉda, Pedro siɗa jĩga edesia. Idji sãwãinebemada jũmawãyã crĩcha ɓʉ bẽrã bio sopua ɓesia. 38 Maʉ̃ne ãdjía jarasia:

–Mʉ̃ra sopuaba beubʉrʉ quĩrãca ɓʉa. Nama panenadua. Mʉ̃ daucha zocai pananadua.–

39 Jesura wagabe wãpeɗa idji dratura ẽjũãnaa tẽũ coɓepeɗa Ãcõrẽa iwiɗisia:

–Mʉ̃ Zeza, bʉa quĩrã awara oida ɓʉbʉrʉ mʉ̃ra idu bia mĩgabirãdua. Baribʉrʉ mʉ̃a quĩrĩã ɓʉ cãyãbara bʉa quĩrĩã ɓʉ quĩrãca odua.–

40 Maʉ̃be Jesu idji ume nĩbabadarã ũbea panʉmaa jẽda zebʉrʉɗe unusia ãdjira cãĩ panʉda. Pedroa jarasia:

–¿Bʉra mʉ̃ daucha ni hora aɓa biɗa poya zocai ɓaẽ́ca? 41 Bãrãra dau ʉɓʉa ɓeaɗadua. Ãcõrẽa iwiɗiɗadua mʉ̃ igaraɗa amaaba. Mʉ̃a cawa ɓʉa bãrãba biada o quĩrĩã panʉda. Mãwãmĩna naʉ̃ djaraɗe ʉɓʉaẽ́ panʉa.–

42 Maʉ̃be Jesura wayacusa wãpeɗa Ãcõrẽa iwiɗisia:

–Mʉ̃ Zeza, mʉ̃da bia mĩgaida ɓʉbʉrʉ, bʉa quĩrĩã ɓʉ quĩrãca mĩgaya.–

43 Idji ume nĩbabadarãmaa jẽda zebʉrʉɗe cãĩ panʉda unusia. Ãdji daura daupeaba oga cara nũpanasiɗaa. 44 Ãdjira waya amepeɗa wãsia. Ãcõrẽa ara aɓarida iwiɗisia. 45 Maʉ̃be idji ume nĩbabadarãmaa jẽda zepeɗa jarasia:

–Bãrãra ¿waɗibiɗa cãĩ panʉca? Mʉ̃ ewarira jũẽsia. Mʉ̃, Naʉ̃ Djara Edaɗara ẽberã cadjiruarã jʉwaɗe ɓebʉrʉa. 46 Piradrʉɗadua. Wãnia. Acʉɗadua, jari urua mʉ̃ jidabira.–

Jesu jidapeɗaɗa

Marco 14:43-50; Luca 22:47-53; Juaʉ̃ 18:2-11

47 Jesu waɗi beɗea ɓʉɗe Judada zesia. Maʉ̃ Judara Jesuba doce edaɗaɗebema basía. Zocãrã ẽberãrãda neco bara, bacuru bara idji ume zesiɗaa. Ãdjirãra sacerdote bororãba, judiorã dji dromarã biɗa diabuepeɗaɗarã basía. 48 Dji jidabiya ɓʉba ãdjía jaraɗoasia sãwã oida Jesuda cawaɗamãrẽã. Nãwã jarasia:

–Mʉ̃a uridarraɗe isõbʉrʉda Jesua. Idjida jidaɗadua.–

49 Maʉ̃ne Judara Jesu caita wãpeɗa jarasia:

–¡Mẽrã, Jaradiabari!–

Mãwã jarapeɗa Jesura uridarraɗe isõsia. 50 Jesuba idjía jarasia:

–Ache, bʉa oɗe ze ɓʉra odua.–*

Ara maʉ̃da dewararãda caita zeɗapeɗa Jesura jidasiɗaa. 51 Maʉ̃ne Jesu ume nĩbabari aɓaʉba idji djõbada necoda ẽũta edapeɗa sacerdote dji droma nezoca cʉwʉrʉda tʉtasia. 52 Maʉ̃be dji cʉwʉrʉ tʉtaɗaa Jesuba jarasia:

–Bʉdji necora wagadua. Necoba djõbadara necoba beuɗia. 53 Mʉ̃ Zezaa iwiɗibʉrʉ ara maʉ̃da idjia bajãnebema nezocarãda cãbana diabueya. ¿Bʉa maʉ̃ra adua ɓʉca? 54 Baribʉrʉ mãwã obʉrʉbara idji Beɗeaɗe mʉ̃nebema ɓʉ́ ɓʉra ¿sãwãcasi?–

55 Maʉ̃be Jesuba dewararãa iwiɗisia:

–Bãrãba ¿cãrẽ cãrẽã neco bara, bacuru bara mʉ̃ra jãwã jidaɗe ze panʉ? ¿Mãwãra mʉ̃ra ẽberã minijĩchiaca? Mʉ̃a ewariza Ãcõrẽ de droma dajada bãrãa jaradia chũmabadjia. ¿Cãrẽ cãrẽã mʉ̃ra mama jũmarã daiɗe jidaɗaẽ́ basi? 56 Baribʉrʉ jũma naʉ̃gʉra o panʉa Ãcõrẽneba beɗeabadarãba ɓʉpeɗaɗa mãwãmãrẽã.–

Mãwã ɓʉɗe Jesu ume nĩbabadarãba idjira ɓeesiɗaa. Jũmarãda mĩrũ wãbʉrʉsiɗaa.

Jesu dji dromarã quĩrãpita ɓaɗa

Marco 14:53-65; Luca 22:54-55, 63-71; Juaʉ̃ 18:12-24

57 Maʉ̃be Jesu jidapeɗaɗarãba idjira sacerdote dji droma Caipámaa edesiɗaa. Maʉ̃ Caipá deɗe judiorã ley jaradiabadarãda, judiorã dji dromarã ume ãbaa dji jʉre duanasia. 58 Maʉ̃ne Pedroba Jesu tʉmʉba ẽpẽ nĩda sacerdote dji droma dema jũẽsia. Dji de auɗu jũrã ca ɓʉɗe eɗa wãpeɗa Ãcõrẽ de dromanebema zarrarã ume ãbaa chũmesia Jesu sãwã oɗi cawai carea.

59 Maʉ̃ne sacerdote bororãba, jũma judiorã dji dromarã biɗa ẽberãrãda jʉrʉsiɗaa sewaɗeba Jesura biẽ́ jaraɗamãrẽã. Idjira nẽbʉraɗe ɓʉɗapeɗa beabiɗida crĩchasiɗaa. 60 Zocãrãba Jesura sewaɗeba biẽ́ jaraɗe zesiɗamĩna idjiɗebema biẽ́ jaraɗida neẽ́ basía. Mãwã duanʉne ẽberãda umé zesiɗaa. 61 Maʉ̃gʉrãba jarasiɗaa:

–Naʉ̃ ẽberãba jarasia: “Mʉ̃a Ãcõrẽ de dromara ãrĩda ɓʉa, baribʉrʉ ewari ũbeaɗe wayacusa o coɓʉida ɓʉa.”–*

62 Maʉ̃ne sacerdote dji dromaara ɓʉba ʉ̃ta nũmepeɗa Jesua iwiɗisia:

–Naʉ̃gʉrãba bʉra biẽ́ jara panʉa. Ãdjia jara panʉra ¿wãrãca? ¿Bʉa ni cãrẽ siɗa panuẽ́ca?–

63 Baribʉrʉ Jesura chupea ɓesia.* Mãwã ɓʉɗe sacerdote dji dromaara ɓʉba idjía jarasia:

–Ãcõrẽ zocai ɓʉ quĩrãpita daia wãrãda jaradua. ¿Bʉra Ãcõrẽba ẽdrʉ edabari diai jaraɗaca? ¿Bʉra Ãcõrẽ Warraca?–

64 Jesuba panusia:

–Mãẽ, bʉa mãwã jara ɓʉa. Maʉ̃ awara mʉ̃a jaraya: iɗiba ʉ̃taa bãrãba mʉ̃, Naʉ̃ Djara Edaɗara ununia Ãcõrẽ ne jũma poya ɓʉ jʉwa araare chũmʉda idjaɓa jʉ̃rãrãne zebʉrʉda.–*

65 Maʉ̃ne sacerdote dji dromaara ɓʉ quĩrũbʉrʉba idjia jʉ̃ ɓʉra cõãtapeɗa dewararãa jarasia:

–¡Jãwã idjia Ãcõrẽda biẽ́ jara ɓʉa! ¿Cãrẽ cãrẽã dewarada jʉrʉɗi idji biẽ́ jaramãrẽã? Bãrãba ũrĩsiɗaa idjia Ãcõrẽda biẽ́ jarabʉrʉda. 66 Jãʉ̃be bãrãmaarã ¿idjira sãwã oɗi?–

Ãdjirãba panusiɗaa:

–Idjira beɗeaɗe ɓʉa. Maʉ̃ carea beaɗida panʉa.–*

67 Maʉ̃be ʉ̃cʉrʉba Jesu quĩrãne iɗosiɗaa idjaɓa chĩsiɗaa. Dewararãba idjira quĩrãne usiɗaa.* 68 Uɗapeɗa jarasiɗaa:

–¡Bʉda Ãcõrẽba ẽdrʉ edabari diai jaraɗa baibʉrʉ, Ãcõrẽneba beɗeadua! ¡Daia jaradua caibʉrʉ bʉra usida!–

Pedroba Jesu unucaaɗa aɗa

Marco 14:66-72; Luca 22:56-62; Juaʉ̃ 18:15-18, 25-27

69 Pedro maʉ̃ de droma duɗa chũmʉne nezocawẽrãda idjimaa zesia. Maʉ̃ wẽrãba jarasia:

–Bʉra Jesu Galileaɗebema ume nĩbasia.–

70 Baribʉrʉ Pedroba jũmarã quĩrãpita mẽrãsia. Nãwã jarasia:

–Mʉ̃a adua ɓʉa bʉa cãrẽda jara ɓʉda.–

71 Maʉ̃be Pedrora de jũrã ca ɓʉɗe dji ẽdrʉbadamaa wãsia. Maʉ̃ne dewara nezocawẽrãba idjira unupeɗa arima duanʉrãa jarasia:

–Za ɓʉda Jesu Nazareɗebema ume nĩbasia.–

72 Baribʉrʉ Pedroba wayacusa mẽrãsia:

–Mʉ̃a wãrãneba jaraya: jãʉ̃ ẽberãra unucaa.–

73 Dãrãẽ́ne arima duanʉba Pedromaa wãnapeɗa jarasiɗaa:

–Wãrãda bʉra jãʉ̃ Jesu ume nĩbasia. Bʉa poya mẽrãẽ́a, Galileaɗebema quĩrãca beɗeabari bẽrã.–

74 Pedroba jarasia:

–¡Mʉ̃a sewada jaraibʉrʉ Ãcõrẽba cawa oya! Wãrãneba jaraya: mʉ̃a jãʉ̃ ẽberãra unucaa.–

Ara mãwã jarabʉrʉɗe eterrera berusia. 75 Maʉ̃ne Pedroba quĩrãnebasia Jesuba nãwã jaraɗara: “Eterre berui naẽna bʉa ɓarima ũbea mʉ̃ra unucaaɗa aya.”* Maʉ̃be Pedrora dajadaa wãpeɗa bio sopuaba jĩãsia.