Luca
Jesu beaɗi carea crĩcha jʉrʉ panana
Mateo 26:1-5, 14-16; Marco 14:1-2, 10-11; Juaʉ̃ 11:45-53
22 Paʉ̃ ẽsãbari neẽ́ cobada ewarira caita ɓasia. Maʉ̃ ewarira judiorã Egiptoɗeba ẽdrʉpeɗaɗa quĩrãnebabada ewari abadaa. 2 Maʉ̃ne sacerdote bororãba, judiorã ley jaradiabadarã biɗa Jesu beaɗi carea crĩcha jʉrʉ panasiɗaa. Baribʉrʉ puruda waya panʉ bẽrã ebuɗa o quĩrĩãẽ́ panasiɗaa.
3 Mãwã ɓʉɗe diauruba Juda Iscariote crĩchara poyasia. Maʉ̃ Judara Jesuba doce edaɗaɗebema basía. 4 Judara sacerdote bororãmaa, Ãcõrẽ de droma zarrarã dji bororãmaa biɗa wãsia. Ãdjirãa jarasia sãwãbʉrʉ Jesura jidabida. 5 Maʉ̃ ũrĩsiɗaɗe ãdjirãra bio ɓʉsriɗaɗapeɗa idjía paratada diaɗiaɗa asiɗaa. 6 Bia ɓʉaɗa apeɗa Judara wãsia. Maʉ̃be idjia jʉrʉbadjia ẽberãrã neẽ́ne Jesura jidabi carea.
Jesuba doce edaɗarã ume ne coɗa
Mateo 26:17-29; Marco 14:12-25; Juaʉ̃ 13:21-30; 1 Corinto 11:23-26
7 Paʉ̃ ẽsãbari neẽ́ ɓʉ cobada ewarira jũẽsia. Maʉ̃ ewariɗe judiorã Egiptoɗeba ẽdrʉpeɗaɗa quĩrãnebaɗi carea oveja zaqueda beaɗapeɗa cobadaa.* 8 Maʉ̃ carea Jesuba Pedroda, Juaʉ̃ siɗa diabuesia maʉ̃ cobadara ãdji itea oɗe wãnamãrẽã. Nãwã jarasia:
–Dadji judiorã Egiptoɗeba ẽdrʉpeɗaɗa quĩrãnebaɗi carea cobadara jũma oɗe wãnadua.–
9 Maʉ̃ne ãdjia iwiɗisiɗaa:
–¿Bʉa sãma quĩrĩã ɓʉ daiba maʉ̃gʉra oɗe wãnida?–
10 Jesuba panusia:
–Puruɗe eɗa wãbʉdaɗe bãrãba ununia umaquĩrãba zocoda eronĩda. Idji caiɗu wãnadua idji wãbʉrʉ deɗaa. 11 Maʉ̃ de djibaría nãwã jaraɗadua: “Dadjirãa Jaradiabariba naʉ̃da iwiɗibisia: mʉ̃a, mʉ̃ ume nĩbabadarã biɗa Egiptoɗeba ẽdrʉpeɗaɗa quĩrãnebaɗi carea cobadara ¿sãma coɗi?” 12 Maʉ̃ne idjia ʉ̃taarebema dejã waiɓʉada jũma biya o nũmʉda acʉbiya. Mama oɗadua.–
13 Wãbʉdaɗe Jesuba ãdjía jaraɗa quĩrãca unusiɗaa. Ara maʉ̃da Egiptoɗeba ẽdrʉpeɗaɗa quĩrãnebaɗi carea cobadara osiɗaa. 14 Ne coɗi bẽrã Jesura, idjia diabueɗarã siɗa mesa icawa chũpanesiɗaa. 15 Maʉ̃ne ãdjía jarasia:
–Mʉ̃ bio bia mĩgai naẽna mʉ̃a wãrãda naʉ̃ cobadara bãrã ume ãbaa co quĩrĩã ɓasia. 16 Mʉ̃a bãrãa wãrãda jaraya: naʉ̃ coɗaba waa coẽ́a aɓa Ãcõrẽba jũma idji ẽberãrã pe eroɓebʉrʉɗaa. Naʉ̃ cobadaba jara ɓʉ jũma mãwãnacarea wayacusa coya.–
17 Maʉ̃be tazada idji jʉwaɗe edapeɗa Ãcõrẽa bia jarapeɗa nãwã jarasia:
–Naʉ̃ra doɗadua. 18 Mʉ̃a jaraya: uva ɓara waa doẽ́a aɓa Ãcõrẽba jũma idji ẽberãrã pe eroɓebʉrʉɗaa.–
19 Maʉ̃be paʉ̃da idji jʉwaɗe edapeɗa Ãcõrẽa bia ɓʉaɗa asia. Cõrãcuapeɗa ãdjía diabʉrʉɗe nãwã jarasia:
–Naʉ̃ra mʉ̃ cacuaa, bãrã carea diabʉrʉa. Coɗadua. Mʉ̃ quĩrãnebaɗi carea ara naʉ̃ quĩrãca o pananadua.–
20 Ara maʉ̃ quĩrãca ne copeɗaɗacarea tazara idji jʉwaɗe edapeɗa jarasia:
–Naʉ̃ tazaɗe ɓʉra mʉ̃ oa bãrã carea erozoabʉrʉ́a. Mʉ̃ oaɗeba Ãcõrẽba bãrã ume beɗea djiwiɗida ɓʉbʉrʉa.* 21 Baribʉrʉ mʉ̃ jidabira nama mʉ̃ ume ne co ɓʉa.* 22 Wãrãda mʉ̃, Naʉ̃ Djara Edaɗara bia mĩgaida ɓʉa Ãcõrẽba jaraɗa quĩrãca, ¡baribʉrʉ mʉ̃ jidabi ẽberãra bio mĩã djuburi ɓʉa!–
23 Maʉ̃ carea idji ume nĩbabadarãba ara ãdjiduɓa iwiɗi duanesiɗaa caibʉrʉ Jesura mãwã oida.
¿Caida dji dromaara ɓʉ?
Mateo 20:25-28; Marco 10:42-45
24 Mãwã panʉne ara ãdjiduɓa iwiɗi duanesia caida dji dromaara ɓʉ cawaya. 25 22:25-26 Maʉ̃ carea Jesuba ãdjía jarasia:
–Ni aɓaʉba idjira dji dromaara ɓʉda crĩchaiẽ́ ɓʉa. Naʉ̃ ẽjũãnebema bororãba ãdji ẽberãrãra jũmawãyã zocabadaa idjaɓa ãdji purura carebabariaɗa abadaa. Baribʉrʉ bãrãra mãwã ɓeaɗiẽ́ panʉa. Dji drõãara ɓʉra dji cũdraara ɓʉ quĩrãca ɓaida ɓʉa. Dji borora nezoca quĩrãca ɓaida ɓʉa. 27 Ẽberãmaarã ¿caida dji dromaara ɓʉ: dji mesaɗe ne coi carea chũmebarida wa dji ne cobibarida? ¿Dji mesaɗe chũmebarida dji dromaara ɓʉẽ́ca? Baribʉrʉ mʉ̃ra dji dromada ɓʉmĩna nama bãrã tãẽna nezoca quĩrãca ɓʉa.
28 Mʉ̃ bia mĩga ɓasiɗe bãrãba mʉ̃ ume jũma droasiɗaa. 29 Maʉ̃ bẽrã mʉ̃ Zezaba mʉ̃ ɓʉɗa quĩrãca mʉ̃a bãrãra dji bororãda ɓʉcuaya. 30 Mʉ̃ puruɗe bãrãra mʉ̃ ume ne coɗia. Bãrãra Israelɗeba yõpeɗaɗa doce puruɗebema bororãda ɓeaɗi bẽrã bugue biya queɗeaɗe chũpanania.–
Pedroba Jesu igaraẽ́ana aɗa
Mateo 26:31-35; Marco 14:27-31; Juaʉ̃ 13:36-38
31 Maʉ̃ awara Jesuba jarasia:
–Simoʉ̃, Simoʉ̃, diauruba Ãcõrẽa iwiɗisia bãrã mĩã sẽ ɓʉɗeba mʉ̃ ĩjã panʉra igarabi carea. 32 Baribʉrʉ mʉ̃a Ãcõrẽa iwiɗisia bʉa ĩjã ɓʉra igararãmãrẽã. Mãwãmĩna igaraya. Baribʉrʉ bʉa jẽda crĩchapeɗa bʉ djabarãra carebadua biara ĩjãnamãrẽã.–
33 Maʉ̃ carea Pedroba Jesua nãwã panusia:
–Mʉ̃ Boro, mʉ̃ra bʉ ume aɓabe preso wãida crĩcha ɓʉẽ́a; ãtebʉrʉ bʉ ume beuida crĩcha ɓʉa.–
34 Jesuba idjía jarasia:
–Mʉ̃a jaraya, Pedro, ara naʉ̃ diamasi eterre berui naẽna bʉa ɓarima ũbea mʉ̃ra unucaaɗa aya.–
Ewari zarea jũẽbʉrʉa
35 Maʉ̃be Jesuba ãdjía jarasia:
–Mʉ̃a bãrã parata neẽ́, buchaca neẽ́ idjaɓa jĩrũne jʉ̃bada neẽ́ diabuesiɗe ¿ne cʉre ɓaesiɗaca?–*
Ãdjirãba panusiɗaa:
–Ni cãrẽ siɗa cʉre ɓaeẽ́ basía.–
36 Maʉ̃ carea idjia jarasia:
–Baribʉrʉ mʉ̃a jaraya: iɗira parata eroɓʉbʉrʉ ededua. Buchaca bara ɓʉbʉrʉ maʉ̃ siɗa ededua. Djõbada neco neẽ́ ɓʉba idjia cacuaɗe jʉ̃barira nẽdobuepeɗa aɓa nẽdodua. 37 Mʉ̃a jaraya: Ãcõrẽneba beɗeabariba mʉ̃nebema ɓʉɗara wãrãda mãwãida ɓʉa. Nãwã ɓʉsia: ara idjida ẽberã cadjirua quĩrãca idu beabisia.* Mʉ̃nebema ɓʉpeɗaɗara wãrãda jũma mãwãya.–
38 Maʉ̃ carea ãdjirãba jarasiɗaa:
–Dai Boro, nama djõbada necoda umé eropanʉa.–
Jesuba jarasia:
–Ɓesia. Waa beɗearãnadua.–
Jesuba Olivo eyaɗe Ãcõrẽa iwiɗiɗa
Mateo 26:36-46; Marco 14:32-42
39 Maʉ̃be Jesura wayacusa Olivo eyaɗaa wãsia idjia obari quĩrãca. Idji ume nĩbabadarã siɗa wãsiɗaa. 40 Araa jũẽsiɗaɗe Jesuba ãdjía jarasia:
–Ãcõrẽa iwiɗiɗadua mʉ̃ igaraɗa amaaba.–
41 Maʉ̃be Jesura mõgara taɓarida ɓʉ tʉmʉane wãsia. Chĩrãboroɗe coɓepeɗa Ãcõrẽa nãwã iwiɗisia:
Zeza, bʉmaa bia ɓʉbʉrʉ, mʉ̃ra idu bia mĩgabirãdua. Baribʉrʉ mʉ̃a quĩrĩã ɓʉ quĩrãca orãdua, ãtebʉrʉ bʉa quĩrĩã ɓʉ quĩrãca odua.–
[43 Mãwã ɓʉɗe bajãnebema nezocaba ʉɓʉada idjía diaɗe zesia. 44 Jesura bio sopua ɓʉ bẽrã Ãcõrẽa wetara iwiɗi ɓasia. Maʉ̃ne idji jʉara oa quĩrãca egoroɗaa erozoasia.]*
45 Jesuba Ãcõrẽa iwiɗi ɓapeɗa jẽda wãsia. Maʉ̃ne idji ume nĩbabadarãra sopuaba cãĩ panʉda unusia. 46 Maʉ̃ carea ãdjía jarasia:
–¿Cãrẽ cãrẽã bãrãra cãĩ panʉ? Piraɓariɗapeɗa Ãcõrẽa iwiɗiɗadua mʉ̃ igaraɗa amaaba.–
Jesu jidapeɗaɗa
Mateo 26:47-56; Marco 14:43-50; Juaʉ̃ 18:2-11
47 Waɗi Jesu beɗea ɓʉɗe ẽberãrãda zocãrã jũẽcuasiɗaa. Judada ãdji nocoare ɓasia. Idjira Jesuba doce edaɗaɗebema basía. Jesu uridarraɗe isõi carea caita wãsia. 48 Maʉ̃ne Jesuba idjía jarasia:
–Juda, isõbʉrʉɗeba ¿mʉ̃, Naʉ̃ Djara Edaɗara bʉa jida diaica?–
49 Jesu ume nĩnaba cawasiɗaa idjira jidaɗida. Maʉ̃ carea nãwã iwiɗisiɗaa:
–Dai Boro, ¿necoba djõnica?–
50 Ara mãwãbʉrʉɗe aɓaʉba sacerdote dji droma nezoca cʉwʉrʉ jʉwa araarebemada tʉtasia. 51 Maʉ̃ carea Jesuba jarasia:
–¡Djõrãnadua! ¡Idu ɓʉɗadua!–
Ara maʉ̃da dji ẽberã cʉwʉrʉra tãpeɗa anibisia. 52 Maʉ̃be Jesuba sacerdote bororãa, Ãcõrẽ de dromanebema zarrarãa, dji droma ɓea zepeɗaɗarãa biɗa nãwã jarasia:
–Bãrãba ¿cãrẽ cãrẽã neco bara, bacuru bara mʉ̃ra jãwã jidaɗe ze panʉ? ¿Mãwãra mʉ̃ra ẽberã minijĩchiaca? 53 Ewariza mʉ̃ra Ãcõrẽ de droma dajada bãrã tãẽna ɓaɗamĩna jidaɗaca basía. Baribʉrʉ ara nawena Ãcõrẽba diaurua idu poyabi ɓʉa. Mãwã bãrãba o quĩrĩã panʉra o panʉa.–
Pedroba Jesu unucaaɗa aɗa
Mateo 26:57-58, 69-75; Marco 14:53-54, 66-72; Juaʉ̃ 18:12-18, 25-27
54 Jesura jidaɗapeɗa sacerdote dji droma deɗaa edesiɗaa. Pedroba tʉmʉba ẽpẽ nĩbasia. 55 Maʉ̃ne ʉ̃cʉrʉba de duɗa tʉbʉda coaɗapeɗa caita chũpanesiɗaa. Pedro siɗa ãdjirã tãẽna chũmesia. 56 Mãwã ɓʉɗe nezocawẽrã aɓaʉba Pedrora tʉbʉ cã chũmʉda unupeɗa bio acʉ nũmesia. Maʉ̃ne jarasia:
–Za ɓʉra Jesu ume nĩbabadjia.–
57 Baribʉrʉ Pedroba nãwã mẽrãsia:
–Bʉa jara ɓʉ ẽberãra mʉ̃a unucaa.–
58 Dãrãẽ́ne dewaraba Pedrora unupeɗa nãwã jarasia:
–Bʉra ãdjiɗebemada jãwã ɓʉa.–
Maʉ̃ carea Pedroba jarasia:
–Ache, mãwãẽ́a.–
59 Mãwãnacarea dewaraba jarasia:
–Wãrãda za ɓʉra Jesu ume nĩbabadjia. Idjira Galileaɗebemada jãwã ɓʉa.–
60 Baribʉrʉ Pedroba panusia:
–Ache, mʉ̃a adua ɓʉa bʉa cãrẽda jara ɓʉda.–
Pedro waɗibiɗa beɗea ɓʉɗe eterrera berusia. 61 Ara mãwãbʉrʉɗe Jesuba Pedrora jẽdaa pʉrrʉga acʉsia. Maʉ̃ne Pedroba quĩrãnebasia Jesuba idjía jaraɗara: eterre berui naẽna bʉa ɓarima ũbea mʉ̃ra unucaaɗa aya.* 62 Ara maʉ̃da Pedrora ãyã wãpeɗa bio sopuaba jĩãsia.
Jesu biẽ́ opeɗaɗa
63 Maʉ̃ne Jesu jida eropanʉ ẽberãrãba idjira ipiɗa biẽ́ jarabadjiɗaa idjaɓa puobadjiɗaa. 64 Jesura quĩrã bʉraɗapeɗa ubadjiɗaa. Maʉ̃ne nãwã jarabadjiɗaa:
–¡Ãcõrẽneba beɗeadua! ¡Daia jaradua caibʉrʉ bʉra usida!–
65 Maʉ̃ awara ne quĩrãtanoa jara panʉneba Jesura biẽ́ jarabadjiɗaa.
Jesu dji dromarã quĩrãpita ɓaɗa
Mateo 26:59-66; Marco 14:55-64; Juaʉ̃ 18:19-24
66 Ãsa baɗacarea puruɗebema dji dromarãda ãbaa dji jʉresiɗaa. Sacerdote bororãda, judiorã ley jaradiabadarã siɗa duanasiɗaa. Maʉ̃be Jesura ãdjirã quĩrãpita enebisiɗaa. Idjía nãwã jarasiɗaa:
Dairãa jaradua: ¿bʉra Ãcõrẽba ẽdrʉ edabari diai jaraɗaca?–
Jesuba panusia:
–Mʉ̃a bãrãa jarabʉrʉ siɗa ĩjãnaẽ́a. 68 Maʉ̃ awara mʉ̃a bãrãa cãrẽ cãrẽã ĩjãnaẽ́ panʉda iwiɗibʉrʉ panunaẽ́a. Idjaɓa mʉ̃ra ẽdrʉ ɓʉɗaẽ́a.* 69 Baribʉrʉ iɗiba ʉ̃taa mʉ̃, Naʉ̃ Djara Edaɗara Ãcõrẽ ne jũma poya ɓʉ jʉwa araare chũmaya.–*
70 Maʉ̃ carea jũmarãba iwiɗisiɗaa:
–Mãwã baibʉrʉ ¿bʉra Ãcõrẽ Warraca?–*
Jesuba panusia:
–Mãẽ, bãrãba mãwã jara panʉa.–
71 Maʉ̃ne ãdjirãba jarasiɗaa:
–¿Dadjirãba waa cãrẽda jʉrʉɗi? ¿Ara idji iteba jara ɓʉẽ́ca idjira Ãcõrẽ Warrada?–